Kachbꞌanil yinh konhobꞌ Israel yu chiyo isbꞌa tet tioxh
8
Yalnipaxo Komam:«Hach majwawom, ako chꞌen trompeta yinh hatiꞌ,
kat hawoqꞌtzen chꞌen.
Lanhan yul mak chitanhtzenilo inkonhobꞌan hakaꞌ hunu noꞌ tꞌiw, chinhehul lemnahi.
Yuto mach isyije ebꞌnaj trato tꞌinhbꞌabꞌilkano wuhan tet ebꞌnaj,
ismanhkꞌonpaxo chejbꞌanil aqꞌbꞌilkano tet ebꞌnaj wuhan.
2 Chiꞌawi anma Israel wetan, chalni:
“Mamin, johtajanh ta hach tiꞌ hach koDiosalanh,” xhi anma.
3 Haꞌ anma Israel, mach yoche iskꞌulal,
yuxin chitzumbꞌelaxikꞌo yu ebꞌnaj ayko ishowal yinh.
4 Issay ebꞌnaj mak chiꞌok isreyaloj, yajaꞌ matzet yal ebꞌnaj wetan,
issaynipaxiko ebꞌnaj mak chiꞌok yahawiloj,
yajaꞌ mach isqꞌambꞌe ebꞌnaj wetan.
Iswatxꞌe ebꞌnaj istioxh, haꞌ chꞌen plata yebꞌ chꞌen oro okniko yu ebꞌnaj,
haꞌtikꞌa tzet iswatxꞌe tuꞌ initi isyaꞌtajil yibꞌanh.
5 Hex ah Samaria, haꞌ huneꞌ yechel noꞌ tzehla wakax bꞌay cheyiyo hebꞌa,a
haꞌ aqꞌnitij inhowalan teyinh.
¿Bꞌaqꞌinhtaxka chitzujchapno heyu yinh matxa chewatxꞌe istxꞌojal?
6 Haꞌ huneꞌ yechel wakax tuꞌ yet Israel yehi,
watxꞌebꞌil yu naj watxꞌem echele, mach diosoj;
yuxin kaw kokꞌ chiꞌaykaniko huneꞌ yechel wakax yet Samaria tuꞌ.
7 Haꞌ istxꞌojal istzꞌun ebꞌnaj, lahan yebꞌ jaqꞌeqꞌ,
yuxin istxꞌojal chul yibꞌanh ebꞌnaj lahan yebꞌ hakaꞌ kꞌuh chinhirlahi.
Machi sat istzꞌunubꞌ ebꞌnaj chaqꞌa, machi ixim harina chaqꞌ ixim iswiꞌ trigo.
Ta xin chaqꞌ yul ixim, haꞌ ebꞌnaj nan konhobꞌal chiwahnitoj.
8 Chitanhtzelaxilo Israel, lahan chiꞌelkaniko xol ej konhobꞌ hakaꞌ hunu xhalu machi kaw istohol.
9 Ahto ebꞌnaj yalaꞌ tet konhobꞌ Asiria ta chikolwa yinh ebꞌnaj,
hakaꞌ hunu noꞌ xoltelajil burro tonhe kolo yekꞌi.
Anma Efraín istohla mak chikolwa yinh.
10 Waxanhka chisloqꞌ ebꞌnaj mak chikolwa yinh, xolaj nimeta konhobꞌ,
haninan chinkutxbꞌakojan ebꞌnaj yunhe yabꞌen isyaꞌtajil hayebꞌ tzꞌayik yu ebꞌnaj rey yebꞌ yu ebꞌnaj yahawil.
11 Haꞌ ebꞌnaj konhobꞌ Efraín tuꞌ kaw tzetkꞌa ismexhahil yet xahanbꞌal iswatxꞌekanh ebꞌnaj.
Wal xin kaw ahkanokanh ebꞌnaj yaniko ismul.
12 Kaw txꞌiꞌal chejbꞌanile waqꞌan tet, intzꞌibꞌnhenkanojan,
yajaꞌ xin hakaꞌtanhe komon tzotiꞌ ye yul sat ebꞌnaj.
13 Chaqꞌ ebꞌnaj isxahanbꞌal wetan, chaqꞌ ebꞌnaj noꞌ chibꞌe xahanbꞌalil,
chiskꞌuxni ebꞌnaj noꞌ, mach chintzalahan yinh hunteqꞌan xahanbꞌal tuꞌ.
Wal tinanh, hanin Yahawilintiꞌan chinnatijan ismul ebꞌnaj,
chiwanayojan isyaꞌtajil yibꞌanh ebꞌnaj yu ismul tuꞌ,
kat ismeltzopaxo ebꞌnaj chejabꞌo bꞌey Egipto.
14 Haꞌ anma Israel, haninan watxꞌenhe,
yajaꞌ kinisnahulnhetojan, yok iswatxꞌeno yatut istioxh.
Haxa anma Judá, iswatxꞌe iskonhobꞌ hoybꞌil yu kꞌubꞌ,
wal xin haninan chinchejan alaxoko qꞌaꞌ yinh iskonhobꞌ ebꞌnaj,
kat istzꞌato ispalacio ebꞌnaj yu qꞌaꞌ,» xhi Komam.