Isyaꞌtajil chiꞌalaxayo yibꞌanh Israel yu ismanhkꞌomal
9
Hex konhobꞌ Israel, mach cheyaqꞌ tzalaho hekꞌul,mach chexah tꞌujla yu tzalahilal hakaꞌ chute hunteqꞌanxa konhobꞌ.
Yuto xahehekꞌilo hebꞌa yinh heDiosal,
hakaꞌ chu isbꞌejnikano ix txꞌoj ye iswiꞌ yichamil.
Kaw chextzalahi cheyeni isxahanil ay Baal heyu,
yet chekutxbꞌaniko sat hetrigo, yuto kaw watxꞌi hetrigo tuꞌ yu tioxh tuꞌ heyalni.
2 Yuxin anma Israel, mach istrigo chixanhlaxilti bꞌay chiwatxꞌelaxilo ixim.
Machipaxo bꞌay chiyatzꞌlax yal teꞌ uva.
Yuxin haꞌ teꞌ akꞌ vino tuꞌ mach chikꞌuxanli teꞌ.
3 Haꞌ anma Israel, mach chikankano sat istxꞌotxꞌ Komam Jahawil;
wal xin chimeltzo Efraín bꞌey Egipto yebꞌ bꞌey Asiria.
Haꞌ bꞌey tuꞌ xin chislo tzet txahul islolaxi hakaꞌ yalni chejbꞌanile.a
4 Mach chiyalte ebꞌnaj vino tet Komam Jahawil,
mach chitzalapaxo Komam yinh isxahanbꞌal.
Haꞌ ispan ebꞌnaj, lahan hakaꞌ pan chiwalax yet ay hunu kamom,
yuxin haꞌ mak chiwahni ixim, mach sajo chiꞌelkanikoj hakaꞌ yalni chejbꞌanile.
Haꞌ ispan ebꞌnaj tuꞌ, kꞌuxannhe yaqꞌni noho iskꞌul,
mach xin chu yalaxikto ispan ebꞌnaj tuꞌ yul Yatut Komam Jahawil.
5 Yuxin ¿tzet cheyu yinh istzꞌayikal qꞌinh niman yelapnoj,
haꞌ ton qꞌinh chiꞌekꞌtzelax tet Komam Jahawil?
6 Elkanh ebꞌnaj tet kꞌayilal hul yibꞌanh ebꞌnaj,
haꞌ Egipto chani ebꞌnaj, haxa anma ah Menfis chimujni ebꞌnaj.
Haꞌ bꞌay ay isplata ebꞌnaj, chichꞌibꞌkanh teꞌ telaj ay istxꞌixal,
haxa bꞌay ay ebꞌnaj chichꞌibꞌkanh teꞌ txꞌix.
7 Hul istzꞌayikal yalaxayo isyaꞌtajil. Hul istzꞌayikal, yaqꞌlax ispaj tet Israel.
Kaw xin yohta Israel tuꞌ ta chihuli.
Ebꞌnaj inchejabꞌan watojan texol, heyala ta mach isnabꞌal ebꞌnaj,
yebꞌ xin ta mach tzꞌajano yul iswiꞌ ebꞌnaj.
Heyal hakaꞌ tuꞌ, yuto kaw xapalkꞌon istxꞌojal chewatxꞌe,
yebꞌ xin yu kaw chichiwa hekꞌul.
8 Haꞌ Komam Dios aniko ischejabꞌ istanhemalo konhobꞌ Efraín,
yajaꞌ xin chayo ebꞌnaj txꞌanh hakꞌ sataj.
Ay ebꞌnaj yul Yatut Komam Dios,
yajaꞌ chichiwako iskꞌul ebꞌnaj yinh ischejabꞌ Komam.
9 Kaw hunelnhe etaxkanto ebꞌnaj yinh istxꞌojal, hakaꞌ yu bꞌey konhobꞌ Gabaa,
chisnati Komam Jahawil istxꞌojal ebꞌnaj,
chanayo isyaꞌtajil yibꞌanh ebꞌnaj yu ismul.
10 Yalni Komam Jahawil: «Hayet inchanihan Israel,
kaw kintzalahan, lahan hakaꞌ yilcha teꞌ uva sat txꞌotxꞌ desierto.
Haꞌ ebꞌnaj hemam icham yul insatan lahan ebꞌnaj hakaꞌ teꞌ bꞌabꞌel sat teꞌ higuera,
yajaꞌ xin to ebꞌnaj yinta tioxh Baal-peor,
ishekꞌnilo isbꞌa ebꞌnaj, isto yinh txꞌixwilal,
yahbꞌeta elkaniko ebꞌnaj hakaꞌtikꞌa tioxh bꞌay chiyo isbꞌa.
11 Haꞌ konhobꞌ Efraín chikꞌaykanh iskꞌulchꞌanil hakaꞌ chu yah purna noꞌ chꞌik.
Matxa yuninal chipitzkꞌahi, yebꞌ matxa ebꞌix ix ayxa tzet yehi,
matxa chipitzkꞌati unin yinh ebꞌix.
12 Yajaꞌ xin ta ay iskꞌahol ebꞌnaj chichꞌibꞌi,
haninan chiwilojan iskawil xol ebꞌnaj winaj.
¡Kaw kꞌanchꞌan ebꞌnaj yet chinbꞌejnikanojan ebꞌnaj!
13 Haꞌ konhobꞌ Efraín, lahan yebꞌ Tiro yul insatan,
ayayo sat txꞌo txꞌotxꞌ kaw kꞌul, yajaꞌ haꞌ konhobꞌ Efraín tuꞌ,
lanhan yinito yuninal yinh kamikal,» xhi Komam.
14 Mam Jahawil, aqꞌ ispaj tet hunteqꞌan anma tiꞌ.
Matxahojabꞌ chu yuninwi ebꞌix ix,
matxahojabꞌpaxo yal yim ebꞌix.
15 Yalni Komam Jahawil: «Haꞌ sunil tzet kaw txꞌoj iswatxꞌe ebꞌnaj,
haꞌ bꞌey Gilgal iswatxꞌe ebꞌnaj,
yuxin haꞌ bꞌey tuꞌ ichiti ischiwa inkꞌulan yinh ebꞌnaj.
Yu istxꞌojal tzet iswatxꞌe ebꞌnaj, yuxin wiltijan ebꞌnaj yul watutan.
Matxa xahano chiwilan ebꞌnaj. Haꞌ sunil yahawil ebꞌnaj, mach yijemoj.
16 Haꞌ konhobꞌ Efraín, alaxiko islahwilal, lahan hakaꞌ hunu te teꞌ tajinxa xeꞌ,
matxa sat chaqꞌa. Waxanhka chipitzkꞌati yuninal ebꞌnaj yebꞌ yixal,
haninan chiwaqꞌkamojan yuninal kaw ochebꞌil yu,» xhi Komam.
17 Haꞌ inDiosalan chihinnikanilto ebꞌnaj,
yuto mach yabꞌeto ebꞌnaj tzet yal Komam,
chixin ekꞌ kolo ebꞌnaj xolaj nimeta konhobꞌ.