Chiꞌetalaxto bꞌay chaqꞌ isxahanbꞌal anma Israel
10
Anma Israel, lahan hakaꞌ hunu teꞌ yoj uva, kaw niman sat chaqꞌa.Hayet ahkanh issatni, ahpaxokanh iswatxꞌen bꞌay chaqꞌ isxahanbꞌal tet istioxh.
Hayet kaw kꞌul yu yaqꞌni sat istzꞌunubꞌ ebꞌnaj sat istxꞌotxꞌ,
kaw ekꞌbꞌal kꞌulchꞌan yute iswatxꞌen ebꞌnaj istioxh.
2 Anma Israel, pohbꞌilayo yanma. Haꞌ tinanh xin chistohla ebꞌnaj ismul tuꞌ;
kaw yako ebꞌnaj ismul sata Komam Dios.
Haꞌ Komam Jahawil chimaqꞌnipoho bꞌay chaqꞌ ebꞌnaj isxahanbꞌal,
kat ismaqꞌnipoho Komam istioxh ebꞌnaj.
3 Yalni anma Israel hakaꞌ tiꞌ: «Yu machi jiyo kobꞌa tet Komam Jahawil,
yuxin machi koreyal tinanh,
yajaꞌ waxanhka ay koreyal, ¿tzet wal iswatxꞌen jinh?» xhi.
4 Nabꞌanhe chitzoteli, chistaqꞌwen isyijen tzet chistꞌinhbꞌakanoj,
yajaꞌ mach chij isbꞌa tzet chala; yuxin haꞌ istoholal chiswatxꞌe chute yalni,
lahan hakaꞌ teꞌ telaj kaw how chonhkam yu, chiꞌahilo xol tzꞌunubꞌ.
5 Anma ah Samaria kaw chixiwkanh,
yuto chiꞌilaxto huneꞌ yechel wakax ay bꞌey Bet-avén.
Kaw chꞌok anma bꞌiskꞌulal yinh huneꞌ yechel wakax tuꞌ,
hakpax tuꞌ ebꞌnaj sacerdote, yuto chiꞌilaxilo iskꞌulchꞌanil tioxh, kat iskꞌaykanh.
6 Huneꞌ yechel wakax tuꞌ, chiꞌilaxto bꞌey Asiria,
kat yaqꞌlax hakaꞌ sabꞌehal tet naj isreyal Asiria tuꞌ.
Anma Efraín chitxꞌixwokanh,
haxa Israel chitxꞌixwipaxokanh yu matxa mak chꞌabꞌen tzet chala.
7 Haꞌ konhobꞌ Samaria yebꞌ isreyal chiꞌilaxiloj,
hakaꞌ yelto hujuy yibꞌanh ha haꞌ.
8 Haꞌ yatut istioxh ebꞌnaj ay yinh ej wonhan bꞌey Avén,
chiꞌetalaxtoj, yuto haꞌ bꞌey tuꞌ yako ismul konhobꞌ Israel.
Haxa yibꞌanh bꞌay chiyo isbꞌa ebꞌnaj tet istioxh tuꞌ chichꞌibꞌkanh teꞌ howla telaj yebꞌ teꞌ txꞌix.
Chalni anma Israel tet ej witz: «Mujonhkantojanh,» xhi.
Kat yalnipaxo tet ej wonhan: «Titanh hukna jibꞌanhanh,» xhi.a
9 Yalni Komam: «Hex Israel, hata bꞌey Gabaa kexichiti heyaniko hemul,
machi xin chebꞌej heyaniko hemul.
¿Tom xin mach chiꞌapni howal yinh hunteqꞌan anma kaw txꞌojkano tuꞌ bꞌey Gabaa?
10 Hayet chiwochehan chiwayojan isyaꞌtajil yibꞌanh anma Israel.
Chishunbꞌa isbꞌa ej konhobꞌ, kat yaniko howal yinh,
yet chiwanayojan isyaꞌtajil yibꞌanh yu kaw ahkanokanh yaniko ismul.
11 Hayet yalanhtokanoj haꞌ konhobꞌ Efraín,
lahantikꞌa hakaꞌ hunu noꞌ wakax kuybꞌil, chixanhnilti sat ixim trigo.
Yajaꞌ haninan chiwakojan teꞌ yugo yibꞌanh isnuqꞌ Efraín chisnhikꞌnito teꞌ yugo,
haxa Judá chiꞌiqꞌni chꞌen arado; haxa Jacob chipohnito txꞌo txꞌotxꞌ.
12 Tzꞌunwe istoholal, haxinwal chehatxꞌ iskꞌulchꞌanil iskꞌul Komam Jahawil.
Watxꞌewe txꞌo txꞌotxꞌ bꞌay chetzꞌun hetzꞌunubꞌ.
Istzꞌayikalxa hesayni Komam Jahawil,
masanto chul Komam kat kexiskuyni yinh istoholal.
13 Hex tiꞌ, xahetzꞌun istxꞌojal, yuxin chehatxꞌ ismachiswalilal.
Cheloh sat heleqꞌtiꞌal, yuto haꞌ yinh hecarro yet howal bꞌay heyako heyanma,
yebꞌ yinh ebꞌnaj hesoldado kaw helan.
14 Chiꞌah howal xol hekonhobꞌ, kat yuchkꞌalaxto chꞌen kꞌubꞌ hoyaniko yinh hekonhobꞌ.
Hakaꞌ yu yetanto naj rey Salmán konhobꞌ Bet-arbel yinh huneꞌ tzꞌayik bꞌay ok howal,
yet ismaqꞌlaxkamo ebꞌix miꞌe yebꞌ nixhte yunin.
15 Hak tuꞌ chiꞌutelax konhobꞌ Bet-el yu hunteqꞌan nimeta istxꞌojal xaꞌiswatxꞌe.
Hayet chisajmatxiloj, kat istanhtzelaxkanilo naj isreyal Israel yinh hunelnhe,» xhi Komam.