Chitzꞌay iskꞌul Komam Dios yinh iskonhobꞌ kaw hip
11
Yalnipaxo Komam:«Hayet nichꞌanto konhobꞌ Israel kaw xahan ay wuhan.
Haꞌ bꞌey Egipto wawtetijan konhobꞌ Israel, inkꞌaholan.
2 Hayet inlahnikojan wawtenan ebꞌnaj, ip kaw ishitznilo isbꞌa winhan.
Haꞌ tet hunteqꞌan Baal yaqꞌ ebꞌnaj isxahanbꞌal,
yaqꞌnipaxo ebꞌnaj ispom tet hunteqꞌanxa tioxh.
3 Haninan inkuyan Efraín isbꞌelwi, inxeknihan isqꞌabꞌ,
mach xin txumchalo yu ebꞌnaj ta haninan chintanhehan ebꞌnaj.
4 Hakaꞌto inxektijan ebꞌnaj inkꞌatanhan yu txꞌanh txꞌanh yinh tzalahilal.
Lahan hinan yinh ebꞌnaj hakaꞌ hunu mak chiꞌinilo teꞌ yugo yibꞌanh isnuqꞌ noꞌ wakax,
chiwanayojan tzet chislo ebꞌnaj yinh sat.
5 Matxa chexmeltzo bꞌey Egipto, wal xin haxa ebꞌnaj asirio chꞌok hereyaloj,
yuto mach heje hemeltzoko yul inqꞌabꞌan.
6 Chipotxꞌlaxkamo anma ay yul konhobꞌ yu espada,
kat istanhtzelaxkaniloj yebꞌ sunil yaldeahil,
chextanhtzelaxkaniloj yu tzet ye tuꞌ nabꞌilxa heyu hewatxꞌeni.
7 Haꞌ inkonhobꞌan xaꞌispohilo isbꞌa hunelnhe winhan,
waxanhka chal ebꞌnaj ta kaw niman welapnojan,
yajaꞌ mach hunu mak tiꞌ chꞌochꞌen anoko inmayan.
8 ¿Tzet chu kaxhinhinkꞌulnhenan Efraín?
¿Tom xin chaxhinhinkꞌulnhepaxojan Israel?
¿Tzettaxka chaxhwutehan, tom chaxhwutehan hakaꞌ konhobꞌ Adma,
akaꞌ yu intanhtzenilojan konhobꞌ Zeboim?
Kaw chitit yinh wanmahan kexinxahannhenan,
kat istzꞌaykanh inkꞌulan teyinh.a
9 Matxa chiwayojan inhowalan teyibꞌanh, matxa chintanhtzelojan Efraín,
yuto hanintiꞌan Dios hinan, man anmahojan.
Machi nino istxꞌojal winhan, ayinikojan texol, mach xin chinoktojan yul konhobꞌ.
10 Chiꞌoktzujno ebꞌnaj wintajan hanin Yahawilintiꞌan.
Chꞌel wawan hakaꞌ noꞌ bꞌalam; chinawihan kat yul wuninalan inkꞌatanhan.
Haꞌ wuninal tuꞌan xin chiluylun yu xiwkilal, ispeto bꞌay chiꞌahilo tzꞌayik.
11 Chititlemna ebꞌnaj yinh anhe bꞌey Egipto, hakaꞌ noꞌ chꞌik,
kat istitpaxo ebꞌnaj bꞌey txꞌotxꞌ Asiria hakaꞌ noꞌ kuwis,
haninan xin chiwaqꞌan eho ebꞌnaj yul yatut,» xhi Komam Jahawil.
12 Yalnipaxo Komam: «Anma Efraín hoyaniko isleqꞌtiꞌal winhan,
haxa anma Israel, chiꞌetli winhan.
Wal anma Judá kaw yijem chute isbꞌa wetan, hanin isDiosal,
hanin machi istxꞌojal winhan,» xhi Komam.