Anma Efraín kachlax yu istxꞌojal chiswatxꞌe
12
Yalnipaxo Komam:«Haꞌ konhobꞌ Efraín, nabꞌanhe tzet chiswatxꞌe,
lahan hakaꞌto chinoh iskꞌul yu jaqꞌeqꞌ,
sunilbꞌal tzꞌayik chiꞌekꞌ tzujtzun ebꞌnaj yinta jaqꞌeqꞌ chitit bꞌay chiꞌahilo tzꞌayik.
Kaw chiꞌahkanh isleqꞌtiꞌwi, yebꞌ yaqꞌni howal.
Istꞌinhbꞌakano istrato Efraín yebꞌ Asiria,
chanipaxto teꞌ aceite sabꞌehal tet Egipto,» xhi Komam.
2 Yayo Komam Jahawil isyaꞌtajil yibꞌanh konhobꞌ Judá.
Yanipaxayo Komam isyaꞌtajil yibꞌanh Jacob yu tzet isbꞌeybꞌalnhe,
ispajtze Komam tet hatatikꞌa tzet iswatxꞌe.
3 Hayet ispitzkꞌa nichꞌan Jacob, tzabꞌaniko yinh isyutz yoj yuxhtaj;
haxa yet ichamxa yaꞌ xin, yaqꞌlen howal yaꞌ yebꞌ naj ángel,
isqꞌoji yaꞌ yinh naj.
4 Yaqꞌ howal yaꞌ Jacob yebꞌ huneꞌ ángel tuꞌ, isqꞌoji yaꞌ Jacob; yoqꞌ yaꞌ Jacob,
isqꞌanni yaꞌ tet naj ángel ta chꞌoqꞌ iskꞌul naj yinh yaꞌ bꞌey Bet-el.
5 Haꞌ Komam Jahawil, isDiosal ebꞌnaj ángel yet howal ay satkanh,
Yahawil isbꞌi Komam.
6 Yuxin hex Israel meltzanhweko yul isqꞌabꞌ Komam Dios, ochewe Komam,
kat hewatxꞌen istoholal, hanhehojabꞌ yinh Komam xin chikawxi hekꞌul sunilbꞌal ej tiempo.
7 Chalni Komam Jahawil: «Ebꞌnaj txonhom,
mach tzꞌajano ismalbꞌal ebꞌnaj chꞌokniko yu,
kaw chitzala ebꞌnaj yinh eleqꞌ.a
8 Yalni Efraín: “Yinh kaw yeli qꞌalom inxahan,
kaw kinqꞌalombꞌikanokanhan, machi eleqꞌ ilchalo winhan,
machi inmulan wakojan yinh tzet xaꞌinwatxꞌehan,” xhi.
9 Yajaꞌ hanin Yahawilintiꞌan, haninan heDiosal yettaxtikꞌa ay hex bꞌey Egipto.
Chexehokꞌo yalanh qꞌap mantiado hunelxa hakaꞌ yet yekꞌtzen heyichmam qꞌinh bꞌey txꞌotxꞌ desierto.
10 Hanintiꞌan kintzotelan tet ebꞌyaꞌ inchejabꞌan,
kaw txꞌiꞌal tzet waqꞌan yilaꞌ ebꞌyaꞌ,
yalni hunteqꞌan yechel teyet yet kexiskuyni.
11 ¿Yelmi txꞌoj ebꞌnaj ay bꞌey konhobꞌ Galaad? Haꞌ anma tuꞌ machi yelapnoj.
Bꞌey konhobꞌ Gilgal, yalte ebꞌnaj noꞌ wakax yinh xahanbꞌalil,
haꞌ bꞌay yaqꞌ anma isxahanbꞌal tuꞌ lahan hakaꞌ hunbꞌulan chꞌen chꞌen ayayo xol tzꞌunubꞌ,
hak tuꞌ elkanikoj,» xhi Komam.
12 Yaꞌ Jacob, hayet yelkanh yaꞌ, haꞌ bꞌey Aram to yaꞌ; ismunla yaꞌ bꞌey tuꞌ,
yalaxiko yaꞌ tanhem meꞌ yunhe yok huneꞌ ix yixalo yaꞌ.b
13 Yako Komam Jahawil,
huneꞌ ischejabꞌ yu yinilto ebꞌnaj Israel yul konhobꞌ Egipto,
yanipaxiko Komam ischejabꞌ yu yok istanhemalo Israel.
14 Haꞌ anma Efraín kaw yako ebꞌnaj ishowal Komam Dios yinh iskꞌul sikꞌlebꞌil.
Yuxin yayo Komam isyaꞌtajil yibꞌanh yu chikꞌ xamalto yu ebꞌnaj.
Haꞌ xin Komam Dios yahawil ebꞌnaj,
haꞌ pajtzen hunteqꞌan istxꞌojal iswatxꞌe ebꞌnaj.