Hal-laxkanoj ta chiꞌuchkꞌalaxto anma Efraín yinh hunelnhe
13
Hayet tzotel anma Efraín, kaw xiw hunmajanxa anma Israel,yuto kaw ay yelapno tzet yal anma tuꞌ yul sat Israel,
yajaꞌ xin yako ismul anma Efraín tuꞌ yet yinayo isbꞌa tet tioxh Baal,
hak tuꞌ yu yul kamikal yibꞌanh.
2 Huneꞌnhe haꞌ xin yaniko ebꞌnaj ismul,
chiswatxꞌen ebꞌnaj istioxh yinh chꞌen plata,
hakaꞌ chal iskꞌul, yebꞌ hakaꞌ chal isnabꞌal ebꞌnaj chakꞌom plata.
Chalni ebꞌnaj tet anma chꞌaqꞌni isxahanbꞌal,
ta chistzꞌoh huneꞌ yechel wakax iswatxꞌe tuꞌ.
3 Yuxin lahan chiꞌutelax ebꞌnaj hakaꞌ iskꞌaykanh moyan yet sakꞌayalil,
yebꞌ hakaꞌ iskꞌaykanh yal chew chiꞌay yet sakꞌayalil, hak tuꞌ chiꞌutelaxi.
Hakaꞌ yijlaxto isqꞌalemal yoj ixim trigo yu jaqꞌeqꞌ bꞌay chiwatxꞌelaxilo ixim,
yebꞌ hakaꞌ iskꞌaykanh nhubꞌ chiꞌelti yul bꞌay chiꞌalaxiko qꞌaꞌ, hak tuꞌ chu iskꞌaykanh ebꞌnaj.
4 Yalnipaxo Komam: «Hanin Yahawilintiꞌan,
haninan heDiosal yettax ay hex bꞌey Egipto.
Mach cheyaliko hunuxa tzet ye tuꞌ hediosaloj,
wal xin haninnhehan heDiosal,
haninnhehan heKolomal, machi hunuxa maka.
5 Haninan kexintanhehan yet ay hex bꞌey txꞌotxꞌ desierto, sat txꞌotxꞌ tajin txꞌotxꞌ.
6 Yajaꞌ yet ay tzet heloh, yet kaw isnoh hekꞌul,
yok loloꞌal teyinh, kinhebꞌejnikanojan.
7 Yuxin lahan chiwute hinbꞌahan teyinh hakaꞌ noꞌ bꞌalam.
Hakaꞌ chute ismajwa noꞌ leopardo yinh no noqꞌ,
hak tuꞌ chexwutehan.
8 Chinelti lemnahan tesataj hakaꞌ noꞌ oso xaꞌilaxilo nixhte yunin;
chintziltojan istxam hekꞌul, kat kexinbꞌiqꞌnaytojan hakaꞌ chute noꞌ bꞌalam.
Chexinxitkantojan hakaꞌ chute noꞌ xoltelajil noqꞌ.a
9 Hex ah Israel, kexkꞌaykantoj, yajaꞌ xin winhan chiꞌilcha hekolbꞌanil.
10 ¿Bꞌaytuꞌwal ay ebꞌnaj okle hereyal,
yu kexiskolni yul ej hekonhobꞌ, yebꞌ ebꞌnaj ok heyahawoj yet heqꞌanni hakaꞌ tiꞌ:
“Ako hunu mak chiꞌok koreyalojanh,
yebꞌ mak chiꞌok jahawojanh?” kexchi.
11 Kaw lemanti inhowalan yet waqꞌnihan mak ok hereyal,
kaw aypaxti inhowalan yet winilojan mak ok hereyal tuꞌ.
12 Haꞌ ismul anma Efraín tzꞌunbꞌilayoj, kꞌubꞌabꞌiltoj.
13 Chul isyaꞌtajil yinh, hakaꞌ isyaꞌil yet chiwatxꞌi iskꞌul hunu ix ix;
yajaꞌ nichꞌan unin tuꞌ machi isnabꞌal,
mach iswatxꞌeko isbꞌa yet apni istzꞌayikal yet ispitzkꞌahi.
14 Kexinkolilojan yul isqꞌabꞌ kamikal.
Hach kamikal haninan iqꞌnhe hakamikal.
Haninan chachintanhtzelojan hach kambꞌal.
Haꞌ huneꞌ istzꞌay inkꞌulan matxa chisyeko isbꞌa yinh insatan.
15 Waxanhka chiꞌahkanh tzet ay Efraín xolaj yuxhtaj,
yajaꞌ chul jaqꞌeqꞌ chitit bꞌay chiꞌahilo tzꞌayik,
yebꞌ jaqꞌeqꞌ chati Komam Jahawil bꞌey txꞌotxꞌ desierto,
kat istajilo bꞌay chiꞌahilo ha haꞌ yebꞌ chipaxayto isnuqꞌ ha haꞌ,
kat yinito ebꞌnaj ayko ishowal yinh sunil iskꞌuwanbꞌal kaw kꞌulchꞌankanoj.
16 Konhobꞌ Samaria chitanhtzelaxkaniloj, yuto ok manhkꞌomal tet isDiosal.
Chꞌaqꞌlaxkamo yu chꞌen espada, haꞌ nixhte yuninal chimaqꞌobꞌtanhelaxayo sat txꞌotxꞌ.
Haxa yixal ebꞌnaj ayxa chꞌini chipol-laxtoj,» xhi Komam.