Chiqꞌanlax tet anma Israel tato chimeltzoko yul isqꞌabꞌ Komam Jahawil
14
¡Hex Israel, meltzanhweko yul isqꞌabꞌ Komam Jahawil, heDiosal;yuto yu hemul heyakoj yuxin aykꞌaynaj hex!
2 Meltzanhweko yul isqꞌabꞌ Komam Jahawil, cheqꞌanni tet Komam cheyalni hakaꞌ tiꞌ:
«Aqꞌ tanho sunil ej komulanh, chachani iskꞌulal chijaqꞌanh tawet.
Haꞌ yebꞌalqꞌabꞌe chijaqꞌanh tawet, haꞌ ton jalnihanh kꞌul-la tzotiꞌ tawinh yu kotiꞌanh.
3 Ebꞌnaj asirio, mach chu konhiskolnihanh ebꞌnaj, mach chu kokolchapaxojanh yu noꞌ cheh;
matxa xin bꞌaqꞌinh chijalanh tet tioxh watxꞌebꞌil juhanh hakaꞌ tiꞌ:
“Hex tiꞌ kodiosalanh,” matxa chijalanh huneꞌ tuꞌ.
Yuto tawinh chikawxi iskꞌul mak machi ismam yebꞌ ismiꞌ,
yuto kaw kꞌulchꞌankano hakꞌul,» kexchi tet Komam.
4 Yalni Komam: «Chiwanhtehan ebꞌnaj yinh sunil ismanhkꞌomal,
chinxahannhenan ebꞌnaj yu iskꞌulchꞌanil inkꞌulan.
Matxa chiwayojan inhowalan yibꞌanh ebꞌnaj.
5 Hakaꞌ yal chew chiꞌayi, hak tuꞌ chiwukojan yinh Israel,
kat xin isxumakli hakaꞌ teꞌ lirio,
kaw xin nahat chꞌayto xeꞌ hakaꞌ teꞌ cedro bꞌey witz Líbano.
6 Kaw xin nahat chito lehno isqꞌabꞌ,
haxa iskꞌulchꞌanil xin lahan hakaꞌ teꞌ olivo,
kaw xin xuqꞌkano sam, hakaꞌ isxuqꞌal sam teꞌ cedro ay bꞌey Líbano.
7 Chimeltzo anma Israel hunelxa, haninan xin chintanhehan; kaw xin kꞌulchꞌan ischꞌibꞌkanh,
hakaꞌ ischꞌibꞌ ixim trigo, kat isxumakli hakaꞌ isxumakli teꞌ yoj uva.
Kaw xin chibꞌinahi hakaꞌ vino chꞌel bꞌey Líbano.
8 Hex konhobꞌ Efraín matxa tzet chalilo hunteqꞌan tioxh tuꞌ yul hesat,
yuto haninan chiwabꞌehan tzet cheqꞌan wetan, chexintanhenan.
Chinokan heyenheloj, hakaꞌ hunu teꞌ tah kaw yax xaj; wuhan yuxin chexahi,» xhi Komam.
9 ¿Mak ay isnabꞌal yunhe istxumniloj,
yebꞌ ay ishelanil yunhe yohtanhenilo hunteqꞌan tiꞌ?
Haꞌ isbꞌeh Komam Jahawil, kaw toholkanoj, haxa anma tohol isbꞌeybꞌal chiꞌekꞌ yul isbꞌeh tuꞌ;
haxa anma manhkꞌom chitxaqꞌmo yul isbꞌeh Komam.