Islahobꞌal tzꞌayik
12
»Haꞌ yinh huneꞌ tiempohal tuꞌ, chikolwa naj ángel Miguel, naj yahaw yebꞌ chitanhen hawet konhobꞌ Israel.Haꞌ yinh huneꞌ tiempohal tuꞌ, kaw ay nimeta isyaꞌtajil chihuli,
haꞌ hunteqꞌan isyaꞌtajil tuꞌ, maxhto bꞌay chiyu yichitax ispitzkꞌa yul sat yibꞌanhqꞌinal tiꞌ,
yajaꞌ haꞌ yinh huneꞌ tiempohal tuꞌ,
chikolcha hakonhobꞌ, haꞌ ton sunil mak tzꞌunbꞌilayo isbꞌi yul teꞌ hum.
2 Txꞌiꞌal mak kamnaxa chꞌel iswayanh, chiꞌitzitzbꞌikanh xol ispojojal txꞌo txꞌotxꞌ.
Ay hunteqꞌan mak chischah isqꞌinal mach istanhbꞌal,
aypaxo hunteqꞌan mak xin chꞌokkano yinh txꞌixwilal yebꞌ xol isyaꞌtajil yinh sunilbꞌal tiempo.
3 Haꞌ mak ay isnabꞌal, chijepla hakaꞌ isjepla txꞌumel ay satkanh,
haxa mak chikuyni txꞌiꞌal anma yinh istoholal;
chijepla hakaꞌ txꞌumel yinh sunilbꞌal tiempo.
4 »“Yajaꞌ wal hach tiꞌ Daniel, majchekano huneꞌ hum tiꞌ, chakꞌubꞌankano hunteqꞌan tiꞌ, masanta yinh islahobꞌal tzꞌayik. Kaw txꞌiꞌal anma chito lemna bꞌey tuꞌ, kat istit lemna bꞌey tiꞌ, kaw chꞌahkanokanh yitzꞌatil iswiꞌ,” xhi huneꞌ naj ángel tuꞌ wetan.
5 »Hanin Daniel intiꞌan, wilan kawanhxa ebꞌnaj winaj linhankanh; huneꞌ naj linhankanh isqꞌaxepal istiꞌ haꞌ, hunxa naj xin linhankanh yinh hunxa isqꞌaxepxa istiꞌ haꞌ. 6 Isqꞌambꞌen huneꞌ naj tet naj winaj ayko qꞌap lino xilo isqꞌap, linhankanh istiꞌ ha haꞌ tuꞌ hakaꞌ tiꞌ: “Bꞌaqꞌinh chiyij isbꞌa hunteqꞌan tzet kaw kꞌaybꞌalkꞌule jabꞌen tiꞌ,” xhi naj. 7 Haꞌ naj winaj ayko qꞌap lino xilo isqꞌap linhankanh istiꞌ haꞌ tuꞌ, yakanh naj iskabꞌebꞌal isqꞌabꞌ satkanh, yaqꞌni bꞌinaho naj isbꞌi Komam Dios, Komam aynhetikꞌa yinh sunilbꞌal ej tiempo, yalni naj: “Hayet chilahwi hunmajan tiempo, yebꞌ yikta isyox majan tiempo, yet chilahwi istanhtzelaxkanilo yip konhobꞌ yet Komam Dios yehi, kat yijni isbꞌa sunil hunteqꞌan tiꞌ,” xhi naj.
8 »Hanintiꞌan wabꞌehan tzet yal naj, yajaꞌ mach txumcha wuhan. Yuxin inqꞌambꞌehan: “Mamin, ¿bꞌaqꞌinh chiyij isbꞌa hunteqꞌan tiꞌ?” kinchihan. 9 Istaqꞌwi naj wetan: “Daniel, asiꞌ, yuto hunteqꞌan tiꞌ ewan chukanoj masanto yinh islahobꞌal ej tiempo. 10 Yu hunteqꞌan isyaꞌtajil tuꞌ, txꞌiꞌal mak chisajbꞌikaniloj, kat iswatxꞌikaniloj kat istoholbꞌikaniloj, haxa anma txꞌoj isbꞌeybꞌal xin chislah iswatxꞌe istxꞌojal. Haꞌ anma txꞌoj mach chitxumcha yu, yajaꞌ wal anma ay isnabꞌal chitxumchalo yu. 11 Haꞌ yinh istiempohal yet chiꞌilaxilo xahanbꞌal chihaltelax hunun tzꞌayik, masanto yet chiꞌalaxikto tioxh yahbꞌetaj yul Yatut Komam Dios yunhe yetalaxtoj, ay 1,290 tzꞌayik.a 12 Kaw saqꞌal yet mak chiꞌechmali, kat yapni yinh 1,335 tzꞌayik. 13 Wal hach tiꞌ xin, lah habꞌeybꞌal masanta yinh islahobꞌal, kat haxewi, kat hawawanoj, kat hachahni hamajul yinh islahobꞌal tzꞌayik,” xhi wetan,» xhi yaꞌ Daniel.