AMÓS
1. ISYAꞌTAJIL CHIꞌALAXAYO YIBꞌANH EJ KONHOBꞌ AYKO YINHLA ISHOYANIL TXꞌOTXꞌ JUDÁ
(1:1–2:5)
1
Tzotiꞌ yal yaꞌ Amós, yaꞌ tanhem meꞌ ay bꞌey konhobꞌ Tecoa; yal yaꞌ tzotiꞌ ischah tet Komam Dios yinh txꞌotxꞌ Israel, yulbꞌal hunteqꞌan habꞌil yet ayko yaꞌ Uzías isreyalo Judá, haxa yaꞌ Jeroboam, iskꞌahol yaꞌ Joás ayko isreyalo Israel, kabꞌ habꞌil yet yalanhto maxhto chꞌekꞌ txixkabꞌ.a 2 Yalni yaꞌ Amós:«Chꞌel yaw Komam Jahawil bꞌey wonhan Sión,
chitaabꞌelax yul isnuqꞌ Komam bꞌey Jerusalén.
Haꞌ txꞌo txꞌotxꞌ bꞌay ay telaj chislo no noqꞌ, chitajkanh, kat istajpaxilo witz Carmelo,» xhi yaꞌ.
3 Hak tiꞌ chiyute yalni Komam Jahawil:
«Anma ay yul konhobꞌ Damasco, kaw xapalkꞌonkanokanh ismul,
yuxin mach chiꞌekꞌto yet wanayojan isyaꞌtajil yibꞌanh;
kechꞌchato isnimanil anma ah Galaad yu ebꞌnaj,
hakaꞌ yilaxilti sat ixim trigo yu chꞌen maquina.b
4 Chintzujbꞌakojan qꞌa qꞌaꞌ yinh yatut naj Hazael,
kat istzꞌakanto ispalacio naj Ben-adad yu qꞌaꞌ.
5 Chinqꞌahtojan istel ispultahil konhobꞌ Damasco,
kat intanhtzenilojan anma ay sat akꞌal bꞌey Avén,
kat intanhtzenpaxilojan ebꞌnaj yahaw yinh ej konhobꞌ ay bꞌey Bet-edén.
Haxa anma ay yul konhobꞌ Siria, chiꞌilaxto bꞌey konhobꞌ Kir,» hak tuꞌ yalni Komam Jahawil.
6 Hak tiꞌ chiyute yalnipaxo Komam Jahawil:
«Anma ay yul konhobꞌ Gaza, kaw xapalkꞌonkanokanh ismul,
yuxin mach chiꞌekꞌto yet wanayojan isyaꞌtajil yibꞌanh.
Yuto sunil anma ay yul konhobꞌ Israel yito ebꞌnaj,
istxonhnito ebꞌnaj chejabꞌo tet txꞌotxꞌ Edom.
7 Chintzujbꞌakojan qꞌaꞌ yinh iskꞌubꞌal konhobꞌ Gaza,
kat yokkano qꞌaꞌ yinh ispalacio konhobꞌ tuꞌ.
8 Chintanhtzelojan anma ay yul konhobꞌ Asdod yebꞌ ebꞌnaj yahawil konhobꞌ ay bꞌey Ascalón;
yinh sunil wipan chintohan yinh Ecrón masanto chitanhkanilo sunil ebꞌnaj filisteo,»
hak tuꞌ yalni Komam Jahawil.c
9 Hak tiꞌ chute yalnipaxo Komam Jahawil:
«Anma ay yul konhobꞌ Tiro, kaw xapalkꞌonkanokanh ismul,
yuxin mach chiꞌekꞌto yet wanayojan isyaꞌtajil yibꞌanh.
Yuto huneꞌ konhobꞌal anma yito ebꞌnaj, yaniko ebꞌnaj chejabꞌo tet txꞌotxꞌ Edom;
machi xin isnahti ebꞌnaj tzet ye tuꞌ tꞌinhbꞌabꞌilkano yu tet konhobꞌ Israel, hakaꞌto yuxhta isbꞌa.
10 Chintzujbꞌakojan qꞌa qꞌaꞌ yinh iskꞌubꞌal konhobꞌ Tiro,
kat istzꞌakanto ispalaciohal konhobꞌ tuꞌ,» xhi Komam.
11 Hak tiꞌ yalnipaxo Komam Jahawil:
«Anma ah Edom, kaw xapalkꞌonkanokanh ismul,
yuxin mach chiꞌekꞌto yet wanayojan isyaꞌtajil yibꞌanh.
Istzumbꞌekꞌo ebꞌnaj yuxhta yu chꞌen espada,
mach xahano yil ebꞌnaj yuxhta hakaꞌ yelapnoj,
ok eleqꞌ yinh yu kaw chichiwa iskꞌul. Machi xin ekꞌayo ischiwa iskꞌul.
12 Chintzujbꞌakojan qꞌa qꞌaꞌ yinh konhobꞌ Temán,
kat istzꞌakanto palacio yu qꞌaꞌ ay bꞌey Bosra,» xhi Komam.
13 Hak tiꞌ chiyute yalni Komam Jahawil:
«Yu kaw xapalkꞌonkanokanh ismul ebꞌnaj iskꞌahol ebꞌnaj Amón,
yuxin mach chiꞌekꞌto yet wanayojan isyaꞌtajil yibꞌanh.
Yunhe ischꞌibꞌto istel istxꞌotxꞌ ebꞌnaj bꞌey Galaad,
yuxin ispol ebꞌnaj ebꞌix ix ayxa chꞌini.
14 Chintzujbꞌakojan qꞌa qꞌaꞌ yinh iskꞌubꞌal konhobꞌ Rabá,
kat istzꞌakanto ispalacio konhobꞌ yinh istzꞌayikal yet chꞌok howal hakaꞌ ismaqꞌwa kꞌuh yebꞌ yet ay jaqꞌeqꞌ nhabꞌ.
15 Haxa naj isreyal konhobꞌ tuꞌ yebꞌ sunil ebꞌnaj yahawil,
chiꞌilaxto ebꞌnaj preso,» hak tuꞌ yalni Komam Jahawil.