2
Hak tiꞌ chiyute yalni Komam Jahawil:«Anma ah Moab, kaw xapalkꞌonkanokanh ismul,
yuxin mach chiꞌekꞌto yet wanayojan isyaꞌtajil yibꞌanh.
Yuto isnhusto ebꞌnaj isbꞌajil naj isreyal Edom masan elkaniko tanhil.
2 Chintzujbꞌakojan qꞌa qꞌaꞌ yinh txꞌotxꞌ konhobꞌ Moab,
kat istzꞌakanto palacio ay bꞌey Queriot.
Anma Moab chꞌaqꞌlaxkamoj yet kaw chꞌel aw xol howal,
yebꞌ yet chꞌoqꞌtzelax chꞌen trompeta.
3 Chiwilojan naj juez ayko yul konhobꞌ Moab,
kat waqꞌni kamojan naj yebꞌ sunil ebꞌnaj ayko yahawilal,»
Komam Jahawil chalni huneꞌ tiꞌ.
4 Hak tiꞌ yalnipaxo Komam Jahawil:
«Anma Judá, kaw xapalkꞌonkanokanh ismul,
yuxin mach chiꞌekꞌto yet wanayojan isyaꞌtajil yibꞌanh.
Yuto yintanhekanilto ebꞌnaj chejbꞌanile walan hanin Yahawilintiꞌan,
machi isyije ebꞌnaj tzet walan; wal xin yiyo isbꞌa ebꞌnaj tet tioxh,
hakaꞌtikꞌa yute isbꞌa yichmam ebꞌnaj.
5 Chintzujbꞌakojan qꞌa qꞌaꞌ yinh konhobꞌ Judá,
kat istzꞌato palacio ay bꞌey Jerusalén,» xhi Komam.
2. CHIꞌALAXAYO ISYAꞌTAJIL YIBꞌANH ANMA ISRAEL
(2:6-16)
6 Hak tiꞌ chiyute yalni Komam Jahawil:
«Ebꞌnaj Israel, kaw xapalkꞌonkanokanh ismul ebꞌnaj,
yuxin mach chiꞌekꞌto yet wanayojan isyaꞌtajil yibꞌanh ebꞌnaj.
Yuto istxonhto ebꞌnaj anma tohol isbꞌeybꞌal yu chꞌen melyu,
haxa anma mebꞌaꞌ istxonhto ebꞌnaj yu kabꞌebꞌ noꞌ xanhabꞌ.a
7 Isxanhobꞌtanhe ebꞌnaj iswiꞌ anma machi yelapnoj, xol pojoj.
Mach chitzotel ebꞌnaj yinh istꞌinhanil tet anma chewchotanhe,
anma mach chu iskolni isbꞌa.
Naj mame yebꞌ naj kꞌahole, huneꞌnhe ix ix chiway yebꞌi,
chinilo ebꞌnaj ispixan inbꞌihan kaw sajkanoj.
8 Chiway ebꞌnaj yibꞌanh xil isqꞌap anma chákano selelo yinh tzet chaqꞌ ebꞌnaj kꞌamil,
yul yatut istioxh iskawil ismexhahil yet xahanbꞌal.
Chiyukꞌni ebꞌnaj vino yinh chꞌen multa,
chiyukꞌni ebꞌnaj sata istioxh.
9 Haninan wilojan ebꞌnaj amorreo sataj ebꞌnaj Israel.
Haꞌ ebꞌnaj amorreo tuꞌ, kaw nimej istel hakaꞌ teꞌ cedro,
kaw xin aypaxo yip ebꞌnaj hakaꞌ teꞌ hih;
intanhtzekanilojan sat xol isqꞌabꞌ,
intanhtzenpaxkanilojan isxeꞌ ebꞌnaj amorreo tuꞌ.
10 Haninan kexwiltijan bꞌey txꞌotxꞌ Egipto,
kexwijbꞌanikꞌojan sat txꞌotxꞌ desierto yulbꞌal 40 (kawinaj) habꞌil,
yu heyehikꞌo yinh hunelnhe sat istxꞌotxꞌ ebꞌnaj amorreo.
11 Chiwikanhan inchejabꞌan xol ebꞌnaj hekꞌahol, yu yalnikꞌo intzotiꞌan;
chinsaynipaxojan ebꞌnaj chꞌok nazareo xol ebꞌnaj hekꞌahol tzehtaj.
Hex iskꞌahol ebꞌnaj Israel, ¿yelmi huneꞌ chiwaltiꞌan?
Hak tuꞌ yalni Komam Jahawil.
12 Chalnipaxo Komam: Yajaꞌ hex tiꞌ,
heyaqꞌ vino yukꞌuꞌ ebꞌnaj nazareo tuꞌ;
haxa tet inchejabꞌan heyal hakaꞌ tiꞌ:
“Mach cheyalikꞌo tzet chal Komam Dios teyet,” kexchi.
13 Hakaꞌ chu istenlaxayto ixim trigo yul teꞌ carruaje yet kaw chinohkanoj,
hak tuꞌ chu kexintennayojan sat txꞌotxꞌ bꞌay ay hex.
14 Haꞌ naj kaw helan yaqꞌni anhe, matxa chu yelkanh naj,
haxa naj kaw ay yip xin, mach chu iskolcha naj yu yip tuꞌ,
yebꞌ xin naj kaw helan, mach chu iskolnilo isbꞌa naj.
15 Haxa naj qꞌojomto litꞌ, chiꞌelkanh naj matxa chislinhbꞌa isbꞌa.
Haxapaxo naj yinh kaw anhe chiꞌekꞌi, matxa chikolchapaxo naj.
Haxa xin naj ayahto yibꞌanh noꞌ cheh matxa chu iskolnipaxo isbꞌa naj.
16 Haxa xin naj kaw ay yip yanma xol ebꞌnaj kaw helan,
tꞌilanxa naj kat yelkanh naj yinh huneꞌ tzꞌayik tuꞌ,» xhi Komam Jahawil.