3. HAꞌ TZET YILAL YALNIKꞌO ISCHEJABꞌ KOMAM DIOS TET EBꞌNAJ ISRAEL
(3:1–6:14)
Chꞌel yaw noꞌ bꞌalam
3
Abꞌewe tzotiꞌ chiyal Komam Jahawil teyinh, hex iskꞌahol Israel:«Sunil hex heyuxhtanhe hebꞌa, kexwahtojan bꞌey txꞌotxꞌ Egipto.
2 Hanhechꞌan hex kexinsayilojan xol sunil ej konhobꞌ;
yuxin chiwayojan isyaꞌtajil teyibꞌanh yu sunil istxꞌojal xahewatxꞌe,» xhi Komam.
3 ¿Huneꞌnhem chꞌekꞌ kawanh anma tato mach chischale isbꞌa isnabꞌal?
4 ¿Chimel yaw noꞌ bꞌalam xol qꞌebꞌtaj tato machi no noqꞌ chitzabꞌcha yu noꞌ?
¿Chimelpaxo yaw noꞌ yunin bꞌalam yul isnhachꞌen tato maxhto no noqꞌ tzabꞌilayo yu ismiꞌ noꞌ?
5 ¿Chimay hunu noꞌ chꞌik sat txꞌotxꞌ,
kat yok noꞌ yul latzꞌabꞌ, tato machi noꞌ xhepu?
¿Chimah litꞌna teꞌ latzꞌabꞌ sat txꞌotxꞌ tato machi noꞌ noqꞌ chiꞌok yul teꞌ?
6 ¿Chimoqꞌtzelax chꞌen trompeta yul konhobꞌ, machi xin chiwejchakanh anma?
¿Aymi hunu isyaꞌtajil chihul yul konhobꞌ tato maxhtaj Komam Jahawil chiꞌanitij?
7 Machi hunu tzet ye tuꞌ chiswatxꞌe Komam Jahawil tato maxhto chalilo Komam tet ischejabꞌ,
yaꞌ chalnikꞌo istzotiꞌ Komam.
8 Hayet chiꞌel yaw noꞌ bꞌalam, ¿mak hunu tiꞌ mach chixiwi?
Hayet chitzotel Komam Jahawil,
¿mak hunu ebꞌyaꞌ ischejabꞌ mach chalikꞌo istzotiꞌ Komam?
Tanhtzelaxkanilo konhobꞌ Samaria
9 Hal-laxojabꞌ yul palacio bꞌey Asdod,
yebꞌpaxo yul palacio bꞌey txꞌotxꞌ Egipto, chalni hakaꞌ tiꞌ:
«Kutxbꞌaweko hebꞌa yibꞌanh ej witz ay bꞌey Samaria,
kat heyilni yetalax anma yul konhobꞌ Samaria,
yebꞌ hanta istxꞌojal chiwatxꞌelax yinh anma yul konhobꞌ tuꞌ,» xhiojabꞌi.
10 Mach yohtajo ebꞌnaj iswatxꞌen istoholal.
Haꞌ tzet chelqꞌa ebꞌnaj yebꞌ tzet chistzikilo ebꞌnaj tet anma,
chiskꞌubꞌato ebꞌnaj yul ispalacio.
11 Yuxin Komam Jahawil xayal hakaꞌ tiꞌ:
«Sunil sat txꞌo txꞌotxꞌ tiꞌ chul huneꞌ niman konhobꞌ ayko ishowal yinh konhobꞌ Samaria,
kat ishoylaxayoj konhobꞌ yu; kat yuchkꞌanayo iscuartel,
kat yinito sunil tzet kꞌuwan yul ispalacio,» xhi Komam.a
12 Hak tiꞌ chute yalni Komam Jahawil:
«Hakaꞌ yet haxanhe kabꞌebꞌ isbꞌul noꞌ meꞌ
maka nichꞌanxa iswiꞌ istxikin noꞌ chiskolilo naj tanhem meꞌ yul istiꞌ noꞌ bꞌalam;
hak tuꞌ chiyu yelkanh ebꞌnaj iskꞌahol Israel ay bꞌey Samaria,
ebꞌnaj chꞌay tzꞌonhno yibꞌanh istxikin istxꞌat,
istxꞌat kaw kꞌulkano bꞌay chixewi,» xhi Komam.
13 Yalnipaxo Komam: «Abꞌewej, kat heyalni tet yuninal yaꞌ Jacob tzet chul yinh,»
xhi Komam Jahawil, Yahawil kaw aykano yip.
14 Yalnipaxo Komam: «Yuto hayet istzꞌayikal yet chiwanayojan isyaꞌtajil yibꞌanh Israel yu ismanhkꞌomal wetan,
chiwuchkꞌayojan ismexhahil yet xahanbꞌal ay bꞌey konhobꞌ Bet-el,
chitzokꞌlaxilo yukꞌaꞌ ayko yinhla istxikin ismexhahil yet xahanbꞌal tuꞌ,
kat yaykꞌay sat txꞌotxꞌ.b
15 Kat wuchkꞌanayojan teꞌ nha chꞌokniko yet nhabꞌil,
yebꞌ teꞌ nha chꞌokniko yet weresmail,
chiwuchkꞌapaxayojan ej teꞌ nha nabꞌa marfil;
kaw xin txꞌiꞌal ej teꞌ nha chiwuchkꞌakanayojan,»
hak tuꞌ yalni Komam Jahawil.