4
Abꞌewe hunteqꞌan tzotiꞌ tiꞌ, hex wakax ay bꞌey Basán,ahex kaw how cheyute hebꞌa yinh anma mebꞌaꞌ,
kat heyetan anma matzet aya, cheyalni tet heyichamil:
«Iweti yaqꞌbꞌil vino jukꞌuꞌanh,» kexchi.
2 Komam Jahawil yaqꞌ bꞌinaho isbꞌi kaw txahulkanoj,
yalni hakaꞌ tiꞌ:
«Chul istzꞌayikal bꞌay chexilaxtoj hex ix hex tiꞌ,
kat yalaxikto chꞌen gancho yul hetiꞌ,
kat yalaxikto chꞌen anzuelo chiꞌinahti noꞌ kay xol ha haꞌ,
yul istiꞌ heyuninal kat yilaxtoj.
3 Kat heyilaxilto bꞌay polan iskꞌul chꞌen kꞌubꞌ,
hununtajil chu heyeltoj,
hak tuꞌ chu heyilaxkanilto yul palacio,»
hak tuꞌ yalni Komam Jahawil.
Waxanhka chiꞌalaxayo isyaꞌtajil yibꞌanh Israel yajaꞌ matxatikꞌa chabꞌe
4 Yalnipaxo Komam: «¡Asiꞌwe bꞌey Bet-el, kat heyaniko hemul!
¡Haxa bꞌey Gilgal chelah hewatxꞌen hemul!
Cheyiniti hexahanbꞌal hunun sakꞌayal,
haxa hediezmo yoxox tzꞌayik cheyaqꞌni.b
5 Cheyalten ixim pan ayko yanhal xahanbꞌalil yu heyaqꞌni yuchꞌandiosal,
kat heyalnikꞌoj ta cheyaqꞌ heyebꞌalqꞌabꞌ huneꞌ chitit yinh heyanma,
yaj yu heyinikanh hebꞌa;
yuto hak tuꞌ cheyoche hex iskꞌahol yaꞌ Israel,»
hak tuꞌ chiyute yalni Komam Jahawil.
6 Yalnipaxo Komam: «Watijan wahil texol yulaj nime konhobꞌ bꞌay ay hex,
matxa xin tzet chilolax yul hekonhobꞌ;
yajaꞌ xin machi kexmeltzoko yul inqꞌabꞌan,»
hak tuꞌ yalni Komam Jahawil.
7 Yalnipaxo Komam: «Yebꞌpaxo xin oxebꞌ ixahaw yalanhto maxhto chiqꞌanbꞌilo sat hetzꞌunubꞌ,
inlinhbꞌanan haꞌ nhabꞌ.
Watojan haꞌ nhabꞌ yibꞌanh huneꞌ konhobꞌ,
haxa yibꞌanh hunxa konhobꞌ xin machi wayojan haꞌ.
Yaqꞌ haꞌ nhabꞌ yibꞌanh huneꞌ majan txꞌotxꞌ,
haxa bꞌay mach yaqꞌ haꞌ nhabꞌ xin tajkanokanh.
8 Yuxin apni kabꞌebꞌ konhobꞌ maka oxebꞌ konhobꞌ anma iqꞌo haꞌ yul hunxa konhobꞌ,
yajaꞌ xin mach chislinhbꞌa isbꞌa istaj istiꞌ anma tuꞌ.
Waxanhka heyaqꞌle hakaꞌ tuꞌ,
yajaꞌ maxhtikꞌa kexmeltzo heyaniko hebꞌa yul inqꞌabꞌan,» xhi Komam Jahawil.
9 Yalpaxo Komam: «Watijan jaqꞌeqꞌ tit yinh yetkꞌulal bꞌay chiꞌahilo tzꞌayik yibꞌanh hetzꞌunubꞌ.
Yebꞌpaxo noꞌ qꞌul islohnito hetzꞌunubꞌ ayko yul hepeyabꞌ,
yebꞌpaxo teꞌ uva, istanhpaxkanilo isteꞌal teꞌ higuera yebꞌ teꞌ olivo.
Waxanhka yu hakaꞌ tuꞌ, yajaꞌ matxatikꞌa kexmeltzoko yul inqꞌabꞌan,»
hak tuꞌ yalni Komam Jahawil.
10 Yalpaxo Komam: «Watojan kamikal teyibꞌanh,
hakaꞌ yu bꞌey Egipto; waqꞌ kamojan ebꞌnaj hetzehtaj xol howal,
yilaxto hecheh yu ebꞌnaj yet howal.
Haxa ebꞌnaj kam yul hecampamento kaw ahkano sam, yapni yinh hetxam.
Waxanhka kaw hak tuꞌ yuhi,
yajaꞌ mach kexmeltzoko yul inqꞌabꞌan,» hak tuꞌ yalni Komam Jahawil.
11 Yalni Komam Dios: «Txꞌiꞌal hex kexintanhtzelojan,
hakaꞌ yu intanhtzenilojan konhobꞌ Sodoma yebꞌ konhobꞌ Gomorra.
Lahan kexutelax hakaꞌ chu istziklaxilti tilen xol qꞌa qꞌaꞌ;
yajaꞌ xin maxhtikꞌa kexmeltzoko yul inqꞌabꞌan,»
hak tuꞌ yalni Komam Jahawil.
12 Yalnipaxo Komam: «Yu tuꞌ, yuxin hak tuꞌ kexwutehan, hex Israel.
Yuxin ta chinwatxꞌehan hakaꞌ tuꞌ teyinh,
yilal hewatxꞌen hebꞌa, yu hechahlen hebꞌa yebꞌ heDiosal.
13 Yuto yinh kaw yeli haninan watxꞌenhe ej witz yebꞌ ej wonhan, yebꞌ jaqꞌeqꞌ,
yebꞌ haninan chalnilo tzet chꞌekꞌ yinh isnabꞌal anma.
Chiwanikojan qꞌejholo yinh tzꞌayikal,
yebꞌ chinekꞌan bꞌay kaw nahat yekanh yibꞌanh txꞌo txꞌotxꞌ,»
Komam Yahawil kaw aykano yip, hak tuꞌ inbꞌihan, xhi Komam.