Kachbꞌanile tet anma yu isnahni isbꞌa
5
Abꞌewe hunteqꞌan tzotiꞌ yet bꞌiskꞌulal chinbꞌitnhehan teyinh, hex Israel.2 Haꞌ anma Israel, lahan hakaꞌ hunu ix qꞌopo xaꞌaykꞌayi,
matxa xin chiyu yinikanh isbꞌa.
Kꞌonhan yukanayo sat istxꞌotxꞌ, matxa xin mak chiꞌinikanh.
3 Komam Jahawil chalni hakaꞌ tiꞌ: «Yet chanito hunu konhobꞌ ay yul txꞌotxꞌ Israel,
mil issoldado yinh howal, 100 (hokꞌalxanhe) ebꞌnaj chimeltzohi,
haxa yet chanito hunxa konhobꞌ 100 (hokꞌal) issoldado
yinh howal, 10 (lahonhwanhxanhe) ebꞌnaj chimeltzohi,» xhi Komam.
4 Komam Jahawil halni hakaꞌ tiꞌ tet konhobꞌ Israel:
«Sayinwehan, hak tuꞌ xin mach chexaqꞌlaxkamoj.
5 Mach chexto bꞌey Bet-el, mach chexokpaxto yul konhobꞌ Gilgal,
mach chexekꞌpaxo bꞌey Beerseba;
yuto anma ay bꞌey Gilgal chꞌilaxto preso,
haxa anma ah Bet-el chitanhtzelaxkaniloj,» xhi Komam.
6 Saywe Komam Jahawil, hak tuꞌ xin mach chexkami,
ta mach xin chati Komam qꞌaꞌ yinh iskonhobꞌ yaꞌ José,
kat istzꞌakanto yu qꞌaꞌ, machi hunu mak bꞌey Bet-el chu isbꞌutni tanho qꞌaꞌ.
7 ¡Kꞌanchꞌan hex, yuto yet cheyilni tzet chꞌeliko hunu maka,
kaw kꞌah tzet chewatxꞌe yinh, haxa istoholal cheqꞌojayo sat txꞌotxꞌ!
8 Saywe Komam watxꞌenhe hunteqꞌan txꞌumel, chiyij Pléyades,
yebꞌpaxo hunteqꞌan txꞌumel chiyij Orión;a
yebꞌ xin chako qꞌejholo yinh tzꞌayikal,
chanipaxiko tzꞌayik yinh qꞌejholo hakaꞌ yet aqꞌbꞌalil.
Chiyawten ha haꞌ yul haꞌ mar, kat istixhnayo haꞌ yibꞌanh sat txꞌo txꞌotxꞌ, Yahawil, isbꞌi Komam.
9 Chati Komam kꞌayilal yibꞌanh ebꞌnaj kaw ay yip, chistanhtzenpaxilo iscuartel ebꞌnaj.
10 Heyah mak chꞌay yul ispultahil konhobꞌ yu iswatxꞌen istoholal,
haxa mak halni isyelal, kexkajwa yinh.
11 Yuxin yu cheyeta anma mebꞌaꞌ, chechahni iskꞌalanil ixim trigo tet,
yuxin mach chexeh yul nha watxꞌebꞌil heyu yinh chꞌen chꞌen hosbꞌil.
Mach cheyukꞌpaxo vino yinh teꞌ uva kaw saqꞌal tzꞌunbꞌil heyu.
12 Wohtajan sunil hemanhkꞌomal, yebꞌ hanta hemul;
cheyaqꞌni isyaꞌtajil tet ebꞌnaj tohol isbꞌeybꞌal,
chechahni chꞌen melyu yinh isnabꞌnhehal;
haxa yul kapil chikꞌaywa anma mebꞌaꞌ heyu yinh tzet choche iswatxꞌeꞌ.
13 Kaw hantakano istxꞌojal yinh hunteqꞌan tiempo tiꞌ,
yuxin mak ay isnabꞌal, tonhe chꞌok tuknoj.
14 Saywelo iskꞌulal, maxhtaj istxꞌojal chesaya,
hak tuꞌ xin ay hekawil yuto Komam Jahawil kaw aykano yip,
chiꞌehayo texol hakaꞌ cheyute heyalni.
15 Yahwekano istxꞌojal, kat hetzala yinh tzet ye tuꞌ kꞌul.
Hayet cheyilni yinh tzet chiꞌeliko hunu maka,
haꞌojabꞌ istoholal chewatxꞌe yinh, hak tuꞌ xin Komam Jahawil,
kꞌuxantaxka istzꞌaykanh iskꞌul yinh haywanh mak xol ebꞌnaj iskꞌahol yaꞌ José aytokꞌoj.
16 Komam Jahawil, Yahawil yinh Sunil, chalni hakaꞌ tiꞌ:
«Yul sunil yulaj ej txonhbꞌal kaw chꞌoqꞌ anma,
haxa yulaj bꞌeh, chal anma hakaꞌ tiꞌ: “¡Ay! ¡Ay!” xhi;
kat yawtelaxpaxo ebꞌnaj munlawom kat yok oqꞌoj,
haxa mak ay ismunil yoqꞌi yet ay kamom,
chihal-lax tet ta chꞌok oqꞌoj.
17 Sunil xolaj tzꞌunubꞌ uva kaw ay oqꞌil,
hunteqꞌan tiꞌ chiyu yet chinhulan waqꞌayojan isyaꞌtajil texol,» xhi Komam Jahawil.
18 ¡Kꞌanchꞌan mak chꞌocheniko huneꞌ tzꞌayik yet Komam Jahawil!
¿Tzet yinh xin cheyoche huneꞌ tzꞌayik yet Komam Jahawil tuꞌ?
Huneꞌ tzꞌayik tuꞌ chihul qꞌejholo, matxa yoj tzꞌayik.b
19 Lahan hakaꞌ yet chꞌelkanh hunu mak tet noꞌ bꞌalam,
haxa yebꞌ noꞌ oso chischale isbꞌa, yebꞌ hakaꞌ mak chꞌokto yul nha,
kat yanayo isqꞌabꞌ yibꞌanh bꞌitzꞌabꞌ, kat ischilax yu noꞌ labꞌa.
20 ¿Tom sajilqꞌinal huneꞌ tzꞌayik bꞌay chul Komam Jahawil, mach xin qꞌejholohoj?
Wal xin, kaw qꞌejholo, mach sajo qꞌinal.
21 Yalnipaxo Komam: «Inyahan yebꞌ xin mach wochehan qꞌinh kaw ay yelapno cheyekꞌtze wetan,
machi xin chintzalahan yet chekutxbꞌan hebꞌa wetan.
22 Haꞌ xin yet cheyaniko no noqꞌ xahanbꞌalil wetan,
yebꞌ yet cheyaqꞌni heyebꞌalqꞌabꞌ wetan, mach chinchahan.
Mach chintꞌanhxipaxikojan yinh hexahanbꞌal yet aqꞌankꞌulal yet cheyalten no noqꞌ kaw bꞌaqꞌich wetan.
23 Matxa chexhul heyaqꞌaꞌko bꞌit, hitzanhwelo winhan;
mach chiwabꞌehan bꞌit cheyako yinh teꞌ arpa.
24 Yajaꞌ wal xin haꞌ istꞌinhanil tzet chewatxꞌe, lahanojabꞌ hakaꞌ yel yojomal ha haꞌ;
haxa istoholal hakaꞌ isnuqꞌ ha haꞌ kaw nimajalkano yinh.
25 Hex konhobꞌ Israel, ¿heyaltemi xahanbꞌal yebꞌ heyebꞌalqꞌabꞌ wetan yet heyekꞌ yulbꞌal 40 (kawinaj) habꞌil sat txꞌotxꞌ desierto?
26 Wal xin heyikꞌo yatut tioxh Moloc hereyal,
yebꞌ tioxh Quiún, yechel txꞌumel, hetioxh watxꞌebꞌil heyu.
27 Yuxin chexwakantojan yintalto konhobꞌ Damasco,»
hak tuꞌ yalni Komam Jahawil,
isDiosal ebꞌnaj ángel yet howal ay satkanh, hak tuꞌ isbꞌi Komam.