Chitanhtzelaxkanilo konhobꞌ Israel
6
¡Kꞌanchꞌan hex, saqꞌal chꞌekꞌ heyu bꞌey konhobꞌ Sión,yebꞌ hex chikawxi hekꞌul yinh wonhan Samaria,
hex ay hemay yebꞌ niman heyelapnoj xol ej konhobꞌ;
tesata xin chihul sunil ej konhobꞌ ay yul txꞌotxꞌ Israel!
2 Ekꞌanhweto bꞌey konhobꞌ Calne, kat heyilni tzet elkanikoj;
lahwi tuꞌ kat heto bꞌey huneꞌ niman konhobꞌ Hamat,
kat heyaypax apno bꞌey konhobꞌ Gat bꞌay ay ebꞌnaj filisteo.
¿Tom ekꞌbꞌalto kꞌul hex yibꞌanh hunteqꞌan txꞌotxꞌ konhobꞌ tuꞌ?
yebꞌ ¿tom ekꞌbꞌalto niman yeko hetxꞌotxꞌ sata hunteqꞌan txꞌotxꞌ konhobꞌ tuꞌ?
3 ¡Hex tiꞌ, hetxumu ta chehitzto yoj istzꞌayikal isyaꞌtajil,
wal xin haꞌ yip sunil istxꞌojal lanhan hehitzniti teyinh!
4 Chexay hilno yibꞌanh txꞌat nabꞌa marfil,
kat heyok xewo yibꞌanh hetxꞌat tuꞌ.
Chekꞌuxni noꞌ tzehla meꞌ elna xol ej noꞌ meꞌ,
kat hekꞌuxnipaxo noꞌ tzehla wakax heyilo xol hewakax.
5 Yet cheyaniko suꞌ, machi txumcha yu anma tzet sonal cheyakoj.
Chenanipaxokanh hewatxꞌen hunuxa nan suꞌal hakaꞌ yaꞌ David.
6 Cheyukꞌni teꞌ vino yul nimeta kꞌot,
kat heyaniko hunteqꞌan anh kaw xuqꞌ sam teyinh, kaw ay istohol,
machi xin heyok yinh, waxanhka lanhan istanhilo iskonhobꞌ ebꞌnaj iskꞌahol yaꞌ José.
7 Yuxin hayet chiꞌilaxto anma preso yul hunxa nan konhobꞌal,
hex chexilaxto bꞌabꞌel;
chihitzti bꞌiskꞌulal yinh mak xayaqꞌ tzet choche yanma.
8 Komam Dios, Jahawil yaqꞌ bꞌinaho isbꞌi,
Komam Yahawil yinh Sunil, haꞌ halni hakaꞌ tiꞌ:
«Chinyahan isloloꞌal ebꞌnaj iskꞌahol yaꞌ Jacob,
chinyahnipaxojan ispalacio ebꞌnaj,
kat wanikojan iskonhobꞌ ebꞌnaj yebꞌ sunil tzet ay yul iskonhobꞌ tuꞌ yul isqꞌabꞌ ebꞌnaj ayko ishowal yinh,» xhi Komam.
9 Yet chuni huneꞌ tuꞌ, tato 10 (lahonhwanhto) ebꞌnaj winaj chitokan yul hunu nha, chiꞌaqꞌlaxkamoj.
10 Haꞌ xin hunu mak ayto yu isbꞌa yebꞌ ebꞌnaj,
haꞌ chinhusnito isnimanil ebꞌnaj yunhe yinilti isbꞌajil
yul nha tuꞌ,
kat isqꞌambꞌen tet hunxa mak ayikto istxukilta nha tuꞌ:
«¿Aymi hunu mak aytokꞌo takꞌatanh tuꞌ?» xhi,
kat yalni naj: «Machi maka,» xhi naj.
Chalnipaxo naj bꞌabꞌel tuꞌ: «Kach hatiꞌ xin,
mach chachtzoteli yuto kꞌuxantaxka hawaqꞌni bꞌinaho isbꞌi Komam Jahawil,» xhi naj.
11 Yuto haꞌ Komam Jahawil chꞌahniti isyaꞌtajil,
kat ishatkanh teꞌ nime nha, kat ishopchakanto ej teꞌ nixhte nha.
12 ¿Chimyu yaqꞌni noꞌ cheh anhe satla ej chꞌen nime chꞌen?
¿Chimyu yekꞌ noꞌ wakax tꞌoko txꞌotxꞌ yibꞌanh chꞌen?
¿Tzet yinh xin hayet cheyilni istoholal tzet chꞌeliko hunu maka,
haꞌ istoholal tuꞌ chemeltzoko yinh venenohal.
Haxa issaqꞌalil chaqꞌ istoholal,
chemeltzoko hakaꞌ hunu lobꞌehal kaw kꞌah, matxa chilochahi.
13 Hex tiꞌ toxanhe chextzala yinh hunu machi yelapnoj?
Cheyalni hakaꞌ tiꞌ:
«¿Tom machi makonhqꞌoji, yu kaw aykano yip xin?» kexchi.
14 Yinh kaw yeli hex Israel, Komam Yahawil yinh sunil,
chalni hakaꞌ tiꞌ:
«Chiwatijan huneꞌ konhobꞌ teyinh, kat yaqꞌni ekꞌoyaꞌ heyanma,
chitaichiti bꞌay chonhokapno bꞌey Hamat masanta bꞌey ha haꞌ chꞌekꞌ yojomal bꞌey Arabá,» xhi Komam.a