4. YECHEL YINH HUNTEQꞌAN ISYAꞌTAJIL
(7:1–9:10)
Oxebꞌ yechel yinh isyaꞌtajil chihuli
7
Haꞌ hunteqꞌan tiꞌ, isye Komam Jahawil wetan: Wilan ispohchan Komam noꞌ qꞌul yet lanhan yichiko ischꞌibꞌkanh tzꞌunubꞌ chaqꞌ yinh tzujanilxa; tzꞌunubꞌ chichꞌibꞌkanh yinh tzujanilxa yet chilahwi iskutxbꞌaniko yaꞌ rey sat istzꞌunubꞌ.a 2 Haxa yet lanhan islahwito tzꞌunubꞌ ay sat txꞌo txꞌotxꞌ tiꞌ islohnito noꞌ. Walnihan tet Komam: «Mam Wahawil, aqꞌ nimankꞌulal jinhanh. ¿Tzet chu isqꞌoji istecha yu hakonhobꞌ Jacob, yuto kaw haywanhchꞌan ebꞌnaj?» kinchihan. 3 Ekꞌayo xin huneꞌ tuꞌ yu Komam, yalni hakaꞌ tiꞌ: «Matxa chiyij isbꞌa,» xhi Komam.
4 Komam Jahawil yeni huneꞌxa yechel wetan; wilan yawtenti Komam Jahawil qꞌa qꞌaꞌ yu yanayo isyaꞌtajil yibꞌanh anma Israel. Istzꞌato huneꞌ niman xabꞌ yu qꞌaꞌ, yikta txꞌo txꞌotxꞌ tzꞌapaxkantoj.b 5 Yuxin walan tet Komam: «Mam Wahawil, ¿tzet chu istecha yu hakonhobꞌ Jacob, yuto kaw haywanhchꞌan?» kinchihan. 6 Yekꞌayo xin huneꞌ tuꞌ yu Komam, yalni hakaꞌ tiꞌ: «Mach chiyijpaxo isbꞌa huneꞌxa tiꞌ,» xhi Komam Jahawil.
7 Isyenipaxo Komam huneꞌxa tiꞌ wetan: Wilan, linhankanh Komam yibꞌanh huneꞌ kꞌubꞌ kaw tohol yekanh iswatxꞌebꞌanil. Lokbꞌilkanh huneꞌ plomo yet albañil yu. 8 Isqꞌambꞌen xin Komam Jahawil wetan:
—¿Tzet iqꞌbꞌil wuhan chawil Amós? xhi Komam.
Intaqꞌwihan:
—Huneꞌ plomo yet albañil, kinchihan.
Yalni Komam wetan:
—Chiwakojan chꞌen plomo xolbꞌal inkonhobꞌ Israelan, kat wilnihan ta tohol isbꞌeybꞌal maka ta machoj; ta txꞌoj isbꞌeybꞌal xin, matxa chiwaqꞌan nimankꞌulalan hunelxa yinh. 9 Haꞌ bꞌay nahat yekanh istxꞌotxꞌ yaꞌ Isaac bꞌay chiyiyo isbꞌa, chitanhtzelaxiloj; haxa istemplo Israel chiꞌuchkꞌalaxtoj. Kat winikanhan chꞌen espada yinh naj rey Jeroboam yebꞌ mak ay yul yatut, xhi Komam.
Yaꞌ Amós yebꞌ yaꞌ Amasías
10 Wal yaꞌ Amasías, sacerdote bꞌey Bet-el, ischejto yaꞌ yalaꞌ tet yaꞌ Jeroboam, isreyal Israel hakaꞌ tiꞌ: «Yaꞌ Amós chꞌekꞌyaꞌ xol anma Israel, chalni yaꞌ ta chaxhaqꞌlaxkamoj. Hanhonh Israelonh tiꞌ, matxa chiyaqꞌ techaho jabꞌen tzet chal yaꞌ. 11 Hak tiꞌ chiyute yalni yaꞌ Amós, hakaꞌ tiꞌ: “Yaꞌ Jeroboam, chꞌaqꞌlaxkamo yaꞌ yu chꞌen espada, wal anma Israel chiꞌilaxilo sat istxꞌotxꞌ kat yilaxto preso,” xhi yaꞌ,» xhi yaꞌ Amasías. 12 Lahwi tuꞌ yalni yaꞌ Amasías tet yaꞌ Amós:
—Hach chawalikꞌo istzotiꞌ Komam Dios, elanh bꞌey tiꞌ, kat hato bꞌey txꞌotxꞌ Judá, haꞌ bꞌey tuꞌ chiyu hawaꞌi yinh hawalnikꞌo istzotiꞌ Komam Dios. 13 Matxa chawalikꞌo bꞌey konhobꞌ Bet-el tiꞌ yinh tzet chiyuhi, yuto haꞌ bꞌey tiꞌ chihulikꞌo yaꞌ rey yiqꞌayo isbꞌa, yebꞌ haꞌ bꞌey tiꞌ ay Yatut Komam Dios yinh sunil txꞌotxꞌ Israel, xhi yaꞌ Amasías.
14 Istaqꞌwi yaꞌ Amós, yalni yaꞌ tet yaꞌ Amasías:
—Hanintiꞌan mach ischejabꞌo Komam Dios, mach iskꞌaholopaxo hunu ischejabꞌ Komam wehan, wal xin tanhem meꞌ hinan, yebꞌ xin chinekꞌan inkutxbꞌakojan sat teꞌ higo xoltelajil. 15 Hayet lanhan intanhenan noꞌ meꞌ tuꞌ xin, kinyawtenan Komam, yalni wetan hakaꞌ tiꞌ: “Chachtohi, kat hawalnikꞌo intzotiꞌan tet ebꞌnaj inkonhobꞌan, haꞌ ton ebꞌnaj Israel,” xhi Komam.
16 Wal tinanh xin, abꞌe istzotiꞌ Komam Jahawil. Hach tiꞌ chawala: “Mach chawal tzotiꞌ chachah tet Komam Dios yinh konhobꞌ Israel, matzet chawalpaxo yinh anma titna yinh yikꞌal yaꞌ Isaac,” kachi. 17 Wal tinanh xin hak tiꞌ chiyute yalni Komam Dios: “Haꞌ ix hawixal, chiꞌokkano ix hakaꞌ hunu ix ix txꞌoj ye iswiꞌ yul konhobꞌ, wal hakꞌahol yebꞌ hakutzꞌin chiꞌaqꞌlaxkamo yu chꞌen espada; wal hatxꞌotxꞌ xin chipohlaxkanh txꞌotxꞌ yinh suertehal. Wal hach tiꞌ xin chaxhkam sat txꞌo txꞌotxꞌ bꞌay ay anma mach ohtanhe Komam Dios; wal konhobꞌ Israel chiꞌilaxto chejabꞌoj, nahat chukanilo yinh istxꞌotxꞌ,” xhi Komam, xhi yaꞌ Amós.