5. CHAYO KOMAM DIOS ISYAꞌTAJIL YIBꞌANH EJ NIME KONHOBꞌ
(3:1-15)
3
Yalni Komam Dios hakaꞌ tiꞌ:«Haꞌ yulbꞌal hunteqꞌan tzꞌayik tuꞌ yebꞌ yinh hunteqꞌan tiempo
yet chiwinilojan anma Judá yebꞌ anma Jerusalén bꞌay ayko chejabꞌoj.
2 Chinkutxbꞌakojan sunil nimeta konhobꞌ,
kat wanitojan sat akꞌal bꞌey Josafat;
haꞌ tuꞌ xin chiwayojan isyaꞌtajil yibꞌanh yu tzet iswatxꞌe yinh Israel,
inkonhobꞌan; yuto hunteqꞌan konhobꞌ tuꞌ,
aqꞌni sajlemoto inkonhobꞌan yul hunteqꞌanxa nan konhobꞌal,
ispohnikanh ebꞌnaj intxꞌotxꞌan yinh.
3 Ispohkanh ebꞌnaj inkonhobꞌan yinh suertehal.
Istxonhnito ebꞌnaj nixhte winaj unin yebꞌ nixhte ix unin,
iskꞌaytzenilo ebꞌnaj istohol yinh ukꞌu teꞌ yebꞌ yinh ebꞌix ix txꞌoj ye iswiꞌ.
4 ¿Tzet cheyoche wetan hex konhobꞌ Tiro yebꞌ konhobꞌ Sidón yebꞌ txꞌotxꞌ Filistea?
¿Tom cheyoche chepajtze wetan?
Ta cheyoche chepajtze, yinh anhe chinpajtzehan, chiwaqꞌnihan selel teyet.
5 Yuto hex tiꞌ, heyelqꞌato inplatahan yebꞌ inorohan,
yebꞌ inkꞌuwanbꞌalan kaw kꞌulchꞌankanoj, heyanikto yul yatut hetioxh.
6 Hetxonhnito ebꞌnaj Judá yebꞌ ebꞌnaj Jerusalén tet ebꞌnaj griego;
kaw nahat heyikanilo ebꞌnaj yinh iskonhobꞌ.
7 Wal xin chitowiqꞌatijan ebꞌnaj yul hunteqꞌan konhobꞌ bꞌay hetxonhto tuꞌ,
kat heyabꞌen isyaꞌtajil wuhan hakaꞌ yu yabꞌen ebꞌnaj isyaꞌtajil heyu.
8 Chintxonhnitojan hekꞌahol yebꞌ hekutzꞌin tet ebꞌnaj iskꞌahol ebꞌnaj Judá,
haxa ebꞌnaj xin chitxonhnipaxto tet ebꞌnaj Sabeo,
huneꞌ txꞌotxꞌ konhobꞌ kaw nahatkano aya.
Wal xin hanin Yahawilintiꞌan chiwalan.a
9 ¡Halwekꞌo hunteqꞌan tiꞌ xol nimeta konhobꞌ: Ichojabꞌiko howal,
iwelo iswayanh ebꞌnaj winaj kaw helan!
¡Kutxbꞌaweko hebꞌa, hulujabꞌ sunil ebꞌnaj yet howal!
10 Watxꞌeweko heyespada yinh heyasaron,
kat hewatxꞌeniko helanza yinh chꞌen kꞌupom trigo.
Haꞌ naj machi yip, yalabꞌ naj hakaꞌ tiꞌ: “¡Wal tinanh kaw ayxa wipan!” xhi naj.
11 Kutxbꞌaweko hebꞌa kat hetita sunil hex konhobꞌ hoyanikoj, titanhwe hesunil bꞌey tiꞌ.
¡Mam Jahawil ati ebꞌnaj hasoldado kaw ay yip!
12 Iwelo hewayanh hex nimeta konhobꞌ.
Ahanhweto bꞌey huneꞌ akꞌal ay bꞌey Josafat,
yuto haꞌ bꞌey tuꞌ chinaytzꞌonhnojan,
kat wokan wilnojan yinh tzet chiꞌeliko sunil ej konhobꞌ ayko yinhla ishoyanil.
13 Hakaꞌ chu iskꞌuplaxkanh ixim trigo xaqꞌanbꞌiloj, hak tuꞌ cheyute ebꞌnaj,
yuto maꞌapni istzꞌayikal yay isyaꞌtajil yibꞌanh.
Titanhwej kat hexanhobꞌtanhe ebꞌnaj hakaꞌ chu isxanhobꞌtanhelax teꞌ uva tenanxa yet chiwatxꞌelax vino,
yuto kaw hantakano istxꞌojal ebꞌnaj.
14 Hantanhekano ej konhobꞌ chikutxiko bꞌey akꞌal bꞌay chil Komam tzet chiꞌeliko anma,
yuto kawilxa yeti istzꞌayikal bꞌay chayo Komam Jahawil isyaꞌtajil yibꞌanh.
15 Haꞌ tzꞌayik yebꞌ ixahaw chiqꞌejholiloj,
haxa ej txꞌumel xin chipax yip ismujli.
6. YET CHIKOL-LAXILO JUDÁ
(3:16-21)
16 »Chiꞌabꞌelax yel yaw Komam Jahawil bꞌey wonhan Sión,
kat yapni yabꞌelax yul isnuqꞌ Komam bꞌey Jerusalén,
kat isbꞌilikanh satkanh yebꞌ txꞌo txꞌotxꞌ.
Yajaꞌ haꞌ Komam Jahawil chiꞌok yipo iskꞌul iskonhobꞌ;
haꞌ Komam ayko yipo ebꞌnaj iskꞌahol yaꞌ Israel.
17 Chalni Komam: Hak tuꞌ xin chu heyohtanheniloj ta hanin Yahawilintiꞌan,
haninan heDiosal; ta haꞌ bꞌey wonhan Sión, haꞌ tuꞌ ay hinan, huneꞌ wonhan wetan yehi.
Haꞌ konhobꞌ Jerusalén chiꞌokkano wetojan,
matxa xin chiꞌapni ebꞌnaj nan konhobꞌal yaqꞌaꞌko howal yinh.
18 Haꞌ yinh huneꞌ tiempohal tuꞌ, chinohkanilo iswiꞌla witz yu teꞌ uva,
kat isnohpaxkanilo tzalan yu noꞌ wakax, yebꞌ xin kaw ay yal yim noꞌ.
Haxa xin yojomal haꞌ nixhte haꞌ chꞌekꞌ bꞌey Judá, kaw chichꞌibꞌkanh haꞌ.
Haxa yul Watutan, hanin Yahawilintiꞌan,
chiꞌelti huneꞌ isnuqꞌ ha haꞌ chihayen akꞌal Sitim.
19 Txꞌotxꞌ Egipto, chitanhtzelaxkanilo txꞌotxꞌ;
haxa txꞌotxꞌ Edom chiꞌalaxkaniko txꞌotxꞌ desiertohal hakaꞌ bꞌay machi anma,
yuto yako howal yinh konhobꞌ Judá.
Haꞌ bꞌey Judá tuꞌ malto ischikꞌil anma machi ismul yu ebꞌnaj.b
20 Yajaꞌ txꞌotxꞌ Judá xin, yinh sunilbꞌal tiempo chꞌehikꞌo anma sat txꞌotxꞌ,
haxapaxo bꞌey Jerusalén yinh sunilbꞌal tiempo chiꞌeh anma.
21 Haninan chinsajnhehan ischikꞌil ebꞌnaj maxhto chissajnhe isbꞌa.
Hanin Yahawilintiꞌan xin, chinehayojan bꞌey konhobꞌ Sión,» xhi Komam.