2
»Oqꞌtzelaxojabꞌ chꞌen trompeta bꞌey konhobꞌ Sión, hal-laxojabꞌ tzet lanhan yuli bꞌey wonhan yet Komam.Bꞌilojabꞌkanh sunil anma yu xiwkilal sat txꞌo txꞌotxꞌ,
yuto chul istzꞌayikal bꞌay chayo Komam Jahawil ishowal,
haꞌ huneꞌ tzꞌayik tuꞌ kaw kawilxa yetij.a
2 Yinh huneꞌ tzꞌayik tuꞌ, chul qꞌejholo,
kaw qꞌej chukaniloj; huneꞌ tzꞌayik tuꞌ,
tzꞌayik kaw moyantanhe, chiqꞌejholilo yu yenhel moyan,» xhi Komam.
2. AKꞌ CHEJBꞌANILE YINH HUNEꞌ TZꞌAYIK YET KOMAM JAHAWIL
(2:2b-11)
Yalnipaxo Komam: «Hakaꞌ chu isto lehno sajilqꞌinal yibꞌanh witz yet chisajbꞌiloj, hak tuꞌ chu yul noꞌ qꞌul,
hakaꞌ huneꞌ niman bꞌulan ebꞌnaj soldado, yebꞌ kaw aykano yip.
Machi bꞌaqꞌinhal ayto hunuxa huneꞌ niman bꞌulan soldado hakaꞌ huneꞌ tuꞌ,
nitam yet tzujanilxa, yebꞌ yinh hunteqꞌanxa tiempo chitohuli.
3 Haꞌ tzet ayko sataj chisnhuskantoj,
haxa tzet ay yintaj chito lebꞌo xaj qꞌaꞌ yinh.
Hayet maxhto chiꞌapni yinh txꞌo txꞌotxꞌ,
kaw saqꞌal jilni txꞌotxꞌ hakaꞌ peyabꞌ Edén, haxa hayet lahwi yekꞌkano sat txꞌotxꞌ,
chimeltzoko txꞌotxꞌ hakaꞌ txꞌotxꞌ matzet chichꞌibꞌ sat; machi hunu tzet chikolchalo tet.
4 Haꞌ noꞌ tuꞌ lahan jilni hakaꞌ ej noꞌ cheh;
hakaꞌ anma ayahto yibꞌanh cheh, hak tuꞌ yaqꞌnipaxo anhe.b
5 Hakaꞌ isbꞌili yekꞌ chꞌen carruaje yet howal, hak tuꞌ isbꞌili yekꞌto yibꞌanh ej witz.
Hakaꞌ isxubꞌli xaj qꞌaꞌ yet chisnhusnito xaj te teꞌ, hak tuꞌ isbꞌili.
Hakaꞌpaxo hunu konhobꞌ kaw aykano yip,
watxꞌebꞌilxa isbꞌa isto yinh howal, hak tuꞌ noꞌ.
6 Sata noꞌ tuꞌ chibꞌilikanh anma,
kaw chisajpaqꞌilo sat sunil anma yet chiyilni.
7 Kaw helan noꞌ yaqꞌni anhe,
hakaꞌ yahto ebꞌnaj yet howal yibꞌanh kꞌubꞌ;
kaw tohol isto noꞌ yinh isbꞌel,
mach chishekꞌilo isbꞌa noꞌ yinh isbꞌel.
8 Machi hunu noꞌ chistenle isbꞌa yinh hunun yetbꞌi.
Haꞌ hunun noꞌ tuꞌ xin tohol isto yinh isbꞌel yinh anhe;
waxanhka xin chiꞌaykꞌay noꞌ yibꞌanh espada, machi noꞌ chilahwi.
9 Chiꞌokto noꞌ yul konhobꞌ, kaw yinh anhe chꞌekꞌto noꞌ yibꞌanh kꞌubꞌ,
kat yahto noꞌ yibꞌanh ej nha, kat yahto noꞌ yul ventanah hakaꞌ elqꞌom.
10 Sata noꞌ tuꞌ xin chibꞌilikanh txꞌo txꞌotxꞌ.
Chinhirnhonpaxokanh satkanh; haxa tzꞌayik yebꞌ ixahaw chiqꞌejholiloj,
wal txꞌumel chipax yip isqꞌaqꞌal.
11 Haꞌ Komam Jahawil chiꞌijbꞌan huneꞌ majan issoldado,
chaqꞌni Komam chejbꞌanile tet.
Haꞌ issoldado tuꞌ xin kaw nimankano isbꞌisil;
kaw matxa chibꞌischa isbꞌisil ebꞌnaj chiyijen ischejbꞌanil tuꞌ.
Yuto kaw aykano ismay tzꞌayik bꞌay chiyayo Komam Jahawil ishowal,
kaw hanta isyaꞌtajil chuli.
¿Mak chiꞌaqꞌni techaho huneꞌ tuꞌ?» xhi Komam.
3. ISKꞌULCHꞌANIL ISKꞌUL KOMAM JAHAWIL
(2:12-27)
12 Yalnipaxo Komam Jahawil hakaꞌ tiꞌ: «Yuxin tinanh, nahwe hebꞌa,
meltzanhweti yul inqꞌabꞌan yinh sunil heyanma,
kat heyok yinh txah yet mach chexwaꞌi,
kat heyoqꞌi, kat heyiqꞌni bꞌiskꞌulal.
13 Iqꞌwe bꞌiskꞌulal teyinh, tzilweto heyanma, maxhtaj xil heqꞌap chetziltoj.
Meltzanhweko yul isqꞌabꞌ Komam Jahawil, heDiosal,
yuto chitzꞌay iskꞌul Komam jinh yebꞌ xin kaw mach chitit ishowal yinh anhe.
Wal xin kaw hantakano chitzꞌay iskꞌul jinh.
Mach chitzala Komam yet chanayo isyaꞌtajil yibꞌanh hunu maka.
14 Mak ohtanhe ta chitomeltzo Komam, kat ishelni isnabꞌal;
ta hak tuꞌ matxa chayo isyaꞌtajil teyibꞌanh.
Chaqꞌni isyaxil teyet, kat yaqꞌni hetrigo yebꞌ vino,
kat xin yokniko heyu cheyaqꞌni heyebꞌalqꞌabꞌ tet Komam Jahawil, heDiosal.
15 ¡Oqꞌtzewe chꞌen trompeta bꞌey konhobꞌ Sión,
kutxbꞌaweko konhobꞌ kat heyok txahloj yinh yet mach chexwaꞌi.
16 Kutxbꞌaweko anma ay yul konhobꞌ,
kat hesajnhen hebꞌa, kutxbꞌaweko ebꞌnaj ichamta winaj,
chekutxbꞌanpaxiko nixhte unin yebꞌ nixhte unin chitotxutxwi.
Haxa ebꞌnaj tzehtaj yebꞌ ebꞌix qꞌopo tolto mohyi elojabꞌti yul yatut!
17 Xolbꞌal ismexhahil yet xahanbꞌal yebꞌ bꞌay chonhokapno bꞌay ay Yatut Komam Dios,
oqꞌojabꞌ ebꞌyaꞌ sacerdote chimunla yinh ismunil Komam, chiyalni hakaꞌ tiꞌ:
“Mam Jahawil, aqꞌ nimankꞌulal yinh hakonhobꞌ;
machojabꞌ chachah chikan hakonhobꞌ tiꞌ yinh txꞌixwilal sata hunteqꞌanxa konhobꞌ,
kat jokanh yalanh yip hunteqꞌan konhobꞌ tuꞌ.
Machojabꞌ chalobꞌtanhe anma nan konhobꞌal hakaꞌ tiꞌ:
‘¿Bꞌaytuꞌwal ay isDiosal ebꞌnaj?’ mach xhihojabꞌi,” xhi ebꞌyaꞌ sacerdote.
18 Xahan chil Komam Jahawil istxꞌotxꞌ, chaqꞌni nimankꞌulal yinh iskonhobꞌ.
19 Chispajtzen Komam, chalni tet iskonhobꞌ hakaꞌ tiꞌ:
Chiwaqꞌan hetrigo, hevino yebꞌ heyaceite,
masanto kaw chinohkano hekꞌul.
Matxa xin bꞌaqꞌinhal chexwakojan yinh txꞌixwilal xolaj hunteqꞌanxa nimeta nan konhobꞌal.
20 Nahat chiwakantojan ebꞌnaj ayko ishowal teyinh tit yinh yetkꞌulal norte,
chiwanikantojan ebꞌnaj sat txꞌotxꞌ desierto.
Ebꞌnaj elilo tesataj, chiwakantojan ebꞌnaj xol haꞌ Mar Kamom,
haxa ebꞌnaj elilo teyintaj, chiwakantojan ebꞌnaj xol haꞌ mar Mediterráneo,
kat xin isqꞌakanto isnimanil ebꞌnaj kat yekꞌ sam, chꞌuchbꞌi kokꞌul jabꞌeni.
Kaw kam ebꞌnaj yuto kaw txꞌiꞌal istxꞌojal iswatxꞌe ebꞌnaj,» xhi Komam.
21 Hex txꞌotxꞌ hex tiꞌ, mach chexxiwi, tzalahanhwej,
yuto Komam Jahawil, ay txꞌiꞌal nime tzet ye tuꞌ chiswatxꞌe Komam texol.
22 Hex noqꞌ xoltelajil, machojabꞌ chꞌok yinh hekꞌul,
yuto chiyaxbꞌikanh telaj sat txꞌotxꞌ desierto,
kat yaqꞌni sat ej te teꞌ, chaqꞌni sat teꞌ higuera yebꞌ teꞌ uva.
23 Hakexpax tuꞌ yuninal Sión, aqꞌwe tzalaho hekꞌul,
tzalahanhwe yinh Komam Jahawil,
koDiosal, yuto xayayo Komam haꞌ bꞌabꞌel nhabꞌ yinh istiempohal;
chayo Komam haꞌ bꞌabꞌel nhabꞌ,
yebꞌ haꞌ nhabꞌ chul yinh tzujanilxa, hakaꞌtikꞌa yet yalanhtokanoj.c
24 Hak tuꞌ xin kaw chiꞌahkano tenno ixim trigo bꞌay chiwatxꞌelaxilo ixim,
kaw xin chinohilo bꞌay chixanhlaxilti yal teꞌ uva, yebꞌpaxo xin teꞌ aceite.
25 Chalni Komam: «Chiwaqꞌ meltzohojan sat tzꞌunubꞌ yetato noꞌ qꞌul,
yinh hunteqꞌan habꞌil xaꞌekꞌtoj, hakaꞌto huneꞌ niman wejercitohan watojan texol.
26 Kat xin hewaꞌi masanto kaw chinohkano hekꞌul, kat xin hebꞌitnhen hinbꞌihan,
hanin Yahawilintiꞌan, heDiosal inwatxꞌenan kꞌaybꞌalkꞌule texol;
matxa bꞌaqꞌinhal xin chikan inkonhobꞌan yinh txꞌixwilal.
27 Cheyohtanheniloj tato ayinikojan xol konhobꞌ Israel;
hanintiꞌan Yahawil hinan, haninan heDiosal, machi hunuxa Dios.
Matxa bꞌaqꞌinhal xin chꞌel ispixan inkonhobꞌan,» xhi Komam.
4. CHAYO YESPÍRITU KOMAM DIOS YIBꞌANH ANMA
(2:28-32)
28 Yalni Komam: «Lahwi yuni hunteqꞌan tuꞌ xin,
chiwanayojan Wespírituhan yibꞌanh sunil anma.
Chalnikꞌo ej hekꞌahol yebꞌ ej hekutzꞌin tzotiꞌ chischah wetan,
haxa ebꞌnaj ichamta winaj ay texol chiwayikli.
Haxa ebꞌnaj hekꞌahol tzehtaj ay texol chil ebꞌnaj tzet ye tuꞌ yinh sajsatil.d
29 Chiwapaxtijan Wespírituhan yibꞌanh ebꞌnaj chejabꞌ,
yebꞌ ebꞌix chejabꞌ yinh hunteqꞌan tzꞌayik tuꞌ.
30 Chinyenihan yechel wipan yul satkanh yebꞌ sat txꞌo txꞌotxꞌ,
haꞌ ton chikꞌ yebꞌ qꞌa qꞌaꞌ yebꞌ huneꞌ niman topan nhubꞌ.
31 Haꞌ yoj tzꞌayik, chiqꞌejholiloj, haxa ixahaw chikajponhiloj hakaꞌ chikꞌ.
Hunteqꞌan tiꞌ, chiyu yet yalanhto maxhto chihul tzꞌayik bꞌay chayo Komam Jahawil ishowal,
huneꞌ tzꞌayik kaw niman yelapnoj yebꞌ kaw xiwkiltaj.
32 Wal sunil mak chiꞌawten isbꞌi Komam Jahawil yinh,
chikolchahi, yuto haꞌ bꞌey wonhan Sión yebꞌ Jerusalén,
haꞌ tuꞌ ay kolbꞌanile, hakaꞌ yu yalni Komam.
Haꞌ mak awtebꞌil yu Komam, haꞌ chikolchahi, haꞌ ton mak tuꞌ chitokani,» xhi.