3
»¡Kꞌanchꞌan hach konhobꞌ aqꞌomkamo anma,nohnajachpaxo yu anma leqꞌtiꞌwom yebꞌ elqꞌom!
¡Machi xin chabꞌej hawelqꞌawi!a
2 Chiꞌabꞌelax yalaxayto noꞌ tzꞌum, yebꞌ isbꞌili yekꞌ isyantahil carruaje,
yebꞌ yekꞌ chinhchon noꞌ cheh, yebꞌ yah tꞌujla chꞌen carruaje.
3 Noꞌ cheh bꞌay ayahto ebꞌnaj soldado kaw tꞌinhan isto noꞌ.
Xanhe chitzejla yekꞌ chꞌen espada,
xanhe chitzejtzonpaxo chꞌen lanza.
¡Matxa isbꞌi hanta isbꞌisil anma alaxiko islahwilal,
matxa isbꞌi hantapaxo isbꞌisil kamom!
¡Machi linhi istenbꞌalaxkanh kamom!
Chixin txaqꞌmo anma yinh kamom tuꞌ.
4 Hak tuꞌ yuhi, yu iswinajlomal ix txꞌoj ye iswiꞌ, ix kꞌulchꞌan yil-laxi.
Kuywawompaxo yinh nawalil, chistanhtzenilo nime konhobꞌ yu istxꞌojal iswiꞌ,
haxa nixhte konhobꞌ chisubꞌcha yu isnawalil.
5 Yalnipaxo Komam Yahawil aykano yip:
¡Ayinan lah, intoxahan tawinh, hach Nínive!
Chiwikanhan hanuybꞌil yinh hasat, kat hakan tꞌilnoj yinh sat ej konhobꞌ,
kat yel hapixan sata ej txꞌotxꞌ konhobꞌ.
6 Chiwayojan isyahbꞌetajil tawibꞌanh, chiwinilojan hapixan,
lahan chaxhelkaniko hakaꞌ istzaꞌ noꞌ wakax.
7 Sunil mak chaxhilni chishekꞌilo isbꞌa tawinh, chalni hakaꞌ tiꞌ:
“Konhobꞌ Nínive, etabꞌilxakantoj,” xhi.
¿Mak hunu chitzꞌay iskꞌul tawinh?
¿Bꞌaytuꞌwal chisaycha mak chꞌaqꞌni yaqꞌlobꞌal hawanma?
8 ¿Tom ekꞌbꞌalto kꞌulach yibꞌanh konhobꞌ Tebas,
konhobꞌ ayayo istiꞌla haꞌ Nilo, konhobꞌ hoybꞌilayo yu ha haꞌ,
haꞌ xin yinh haꞌ mar chiskol isbꞌa, haꞌ xin haꞌ mar ayko kꞌubꞌal yinh?
9 Chiskolpaxo isbꞌa yinh konhobꞌ Etiopía yebꞌ konhobꞌ Egipto,
machi xin najach ayayo xolbꞌal;
yebꞌpaxo xin konhobꞌ Fut bꞌey Libia chikolwapaxo yinh.
10 Yajaꞌ xin anma ay yul konhobꞌ Tebas tuꞌ,
tzabꞌlaxayoj yilaxto preso, haxa nixhte unin chꞌitchato poho bꞌay chiskulusnhe isbꞌa bꞌeh chiꞌekꞌ yul konhobꞌ tuꞌ.
Haꞌ xin anma niman yelapnoj alaxayo suerte yinh mak chꞌinitoj,
haxa ebꞌnaj ayko yahawilal alaxiko chꞌen cadena yinh isqꞌabꞌ ebꞌnaj.
11 Hex ah Nínive, hex tiꞌ, chexukꞌtzelaxkanh,
kat xin heyebꞌan hebꞌa yu hesayni tzet chu hekolni hebꞌa tet ebꞌnaj ayko ishowal teyinh.
12 Haꞌ bꞌay chekol hebꞌa chiꞌaykꞌayi, lahan hakaꞌ teꞌ higuera kaw nohnako sat, haxa xin yet chiyukxelaxi,
kat yaykꞌayti sat, kat yokto yul istiꞌ mak chilohnitoj.
13 Ebꞌnaj soldado ay yul hekonhobꞌ tuꞌ, lahan ebꞌnaj hakaꞌ ebꞌix ix;
haxa ispultahil hetxꞌotxꞌ chishaj isbꞌa tet ebꞌnaj ayko ishowal teyinh,
kat xin istzꞌato isqꞌanh pulta tuꞌ yu qꞌaꞌ.
14 Kutxbꞌawe heyaꞌ yuto chexhoylaxayoj.
Kam watxꞌewekanh chꞌen kꞌubꞌ bꞌay chekol hebꞌa.
Cheyaweyto heyoj xol tzꞌotzꞌew, kat hesomni txꞌo txꞌotxꞌ chꞌok ladrillohal,
kat heyaniko yip qꞌa qꞌaꞌ yul horno.
15 Haꞌ bꞌey tuꞌ chexisnhusto qꞌaꞌ, kat xin heyaykꞌay yu chꞌen espada,
kat xin hetanhtzelaxilo hakaꞌ chu islohnito noꞌ qꞌul teꞌ tzꞌunubꞌ.
¡Pohchahanhwej hakaꞌ chu ispohcha noꞌ qꞌul!
¡Pohchahanhwepaxo hakaꞌ noꞌ litꞌ!
16 Ebꞌnaj hatxonhwom kaw hantanhekano ebꞌnaj,
ekꞌbꞌal isbꞌisil sata txꞌumel ay satkanh.
Ebꞌnaj tuꞌ lahan hakaꞌ noꞌ qꞌul chetato sunil tzet ye tuꞌ, lahwi tuꞌ kat istohi.
17 Ebꞌnaj ayko heyahawilal, lahan ebꞌnaj hakaꞌ noꞌ qꞌul,
haxa ebꞌnaj ay yelapnoj lahan ebꞌnaj hakaꞌ huneꞌ majan noꞌ qꞌul;
hayet kaw chew chiꞌapni bꞌulna noꞌ yibꞌanh bꞌitzꞌabꞌ,
haxa yet chiꞌahilo tzꞌayik, kat isto noꞌ,
machi mak xin ohtanhe bꞌay kaw chitohkaniko noꞌ.
18 Hach isreyal Asiria, xaꞌaqꞌlaxkamo ebꞌnaj ayko yahawilo hakonhobꞌ.
Haxa ebꞌnaj yahaw soldado xewoxa chu ebꞌnaj, haxa ebꞌnaj hasoldado,
xasajlemito ebꞌnaj xolaj wonhan, matxa mak xin chikutxbꞌaniko ebꞌnaj.
19 ¡Machi anh chiwatxꞌenilo haqꞌahil, halahwilal machi yanhal!
Haꞌ sunil anma chꞌabꞌeni ta chachtanhtzelaxiloj,
chispoqꞌ isqꞌabꞌ yu tzalahilal, yuto ¿mak hunu tiꞌ machi hawatxꞌe istxꞌojal yinh?
Sunil anma hawayo isyaꞌtajil yibꞌanh.
Yuto machi hunu mak ekꞌto yet ischahni isyaꞌtajil hawu,» xhi Komam.