HABACUC
1. OK YAꞌ HABACUC YALAꞌ TET KOMAM DIOS YINH ISTXꞌOJAL CHU ANMA
(1:1-4)
1
Isye Komam Jahawil yilaꞌ ischejabꞌ Habacuc yinh hunteqꞌan tzet chiyuhi.2 Yalni yaꞌ Habacuc hakaꞌ tiꞌ: «Mam Wahawil, chꞌeliko wawan tawinh,
mach xin chawabꞌe tzet chiwalan.
Chintxahlihan, chinqꞌannihan tawet yuto kaw ay kamik chꞌoki.
¿Bꞌaqꞌinh chinbꞌejan yeliko wahwan tawinh yuto mach chachkolwa winhan?
3 ¿Tzet yinh xin kaw chawaqꞌ istxꞌojal wilaꞌan yebꞌ ej ismachiswalilal?
Hanhe kꞌayilal ayko insatajan yebꞌ maqꞌlebꞌahil,
chiꞌah howal yebꞌ chiskajle isbꞌa anma.
4 Yuxin chipax yip ley, haꞌ xin yet chiwatxꞌelax istoholal mach chiwatxꞌelax hakaꞌ kaw istꞌinhanil yehi.
Ebꞌnaj txꞌoj, chistzumbꞌekꞌo ebꞌnaj ebꞌnaj chiwatxꞌen istohol,
hak tuꞌ xin chu iskotxbꞌalax istoholal,» xhi yaꞌ Habacuc.a
2. EBꞌNAJ CALDEO CHAYO EBꞌNAJ ISYAꞌTAJIL YIBꞌANH EBꞌNAJ JUDÁ
(1:5-11)
5 Yalni Komam Jahawil hakaꞌ tiꞌ: «Ilwekꞌanabꞌ tzet chu xol ej konhobꞌ,
ilwekꞌanabꞌi kat iskꞌayilo hekꞌul, yuto ay huneꞌ tzet chinwatxꞌehan yul hunteqꞌan tzꞌayik tiꞌ,
yajaꞌ xin yet chal-lax huneꞌ tuꞌ teyet, mach cheyayto yul heyanma.
6 Chiwikanhan ebꞌnaj caldeo, kat yul ebꞌnaj teyinh,
ebꞌnaj tuꞌ kaw txꞌojkano ebꞌnaj yebꞌ kaw anhe chiꞌekꞌi;
sunil sat txꞌo txꞌotxꞌ chiꞌekꞌkano ebꞌnaj,
kat ismajnikanilo ebꞌnaj istxꞌotxꞌ anma,
txꞌotxꞌ mach yeto ebꞌnaj yehi.
7 Kaw ay yip ebꞌnaj yebꞌ xin xiwkꞌulal ye ebꞌnaj yinh anma.
Haꞌ isley ebꞌnaj, haꞌnhe chaqꞌbꞌalnhe ebꞌnaj, chisnimannhe isbꞌa ebꞌnaj.
8 Haꞌ ischeh ebꞌnaj ekꞌbꞌal yaqꞌni noꞌ anhe yibꞌanh noꞌ leopardo,
ekꞌbꞌal xin ishowal noꞌ yibꞌanh noꞌ oj chꞌekꞌ bꞌey txꞌotxꞌ desierto.
Haꞌ xin ebꞌnaj ayahto yibꞌanh noꞌ cheh, tzetkꞌa yiqꞌni isbꞌa ebꞌnaj.
Nahat xin ay ebꞌnaj, kat istit ebꞌnaj yinh anhe,
chꞌekꞌ ebꞌnaj hakaꞌ noꞌ tꞌiw yet chꞌay lemna yibꞌanh no noqꞌ,
chistzabꞌayoj kat iskꞌuxnaytoj.
9 Chul ebꞌnaj istanhtzelo sunil, yalanhto yet maxhto chiꞌapni ebꞌnaj ayxako xiwkilal yinh anma tet ebꞌnaj.
Kaw hantakano xin isbꞌisil anma chito ebꞌnaj preso,
lahan hakaꞌ arena ay istiꞌ haꞌ mar.
10 Chitzebꞌi ebꞌnaj yinh ebꞌnaj rey, kat isbꞌuchwa ebꞌnaj yinh ebꞌnaj ayko yahawiloj.
Chitzebꞌipaxo ebꞌnaj yinh iskꞌubꞌal konhobꞌ hoyanikoj,
chistenbꞌakanh ebꞌnaj txꞌo txꞌotxꞌ yinh iskꞌul iskꞌubꞌal konhobꞌ,
kat istzabꞌnayo ebꞌnaj anma ay yul konhobꞌ tuꞌ.
11 Lahan ebꞌnaj hakaꞌ nime jaqꞌeqꞌ chiꞌekꞌi, chetakanto sunil kat istohi.
Chaniko ebꞌnaj ismul yuto haꞌ yip ebꞌnaj, haꞌ ayko isdiosaloj,» xhi Komam.b
3. OK YAꞌ HABACUC ELOCO YAW YINH KOMAM
(1:12-17)
12 «Mam Wahawil, ¿tom maxhtaj hach ayachxatikꞌa yet yalanhtokanoj?
Hach inDiosalan, machi nino istxꞌojal tawinh.
Mach chonhkamanh yinh hunelnhe. Mam Jahawil, hach Kokolomalanh,
hach hawaqꞌ yip ebꞌnaj caldeo, yunhe yul ebꞌnaj yanoyo isyaꞌtajil jibꞌanhanh hawu.
13 Hach tiꞌ, mach chischah hawiꞌ hawilni istxꞌojal,
mach chischahpaxo hawiꞌ hawilni yetalax anma.
¿Tzet yinh xin tonhe chawiliko ebꞌnaj potxꞌomkamo anma,
machi xin tzet chawala yet chistanhtzenilo ebꞌnaj anma kꞌul?
14 Lahan chawute anma hakaꞌ noꞌ kay ay xol haꞌ mar,
yebꞌpaxo hakaꞌ no noqꞌ chishatxikꞌo iskꞌul sat txꞌotxꞌ, noꞌ machi yahaw.
15 Chiꞌok ebꞌnaj caldeo yahawo yinh ej konhobꞌ;
hakaꞌ chute ebꞌnaj chitzabꞌni noꞌ kay,
chiyihti ebꞌnaj noꞌ yu chꞌen anzuelo yebꞌ yul txꞌanh hakꞌ,
kat yahkano tenno noꞌ, kaw xin chitzalakano iskꞌul ebꞌnaj.
16 Yuxin chiyalte ebꞌnaj xahanbꞌal tet isanzuelo,
kat isnhusni ebꞌnaj teꞌ pom tet ishakꞌ iqꞌomati kay;
yuto yu hunteqꞌan ismunlabꞌal ebꞌnaj tuꞌ,
yuxin kaw ay tzet chislo ebꞌnaj yebꞌ xin kaw kꞌul tzet chislo ebꞌnaj.
17 ¿Tom mach isbꞌej ebꞌnaj caldeo konhistzabꞌnayojanh yu ishakꞌ?
Chislahniko ebꞌnaj istanhtzenilo ej konhobꞌ,
machi nino xin chitzꞌay iskꞌul ebꞌnaj yinh.»