4. ISPAJTZE KOMAM DIOS ISQꞌAMBꞌEBꞌAL YAꞌ HABACUC
(2:1-5)
2
«Hakaꞌ yeko hunu naj chitanhen konhobꞌ,hak tuꞌ wekojan inmajnihan yinh tzet chiyute yalni Komam,
yebꞌ wechmanan yaqꞌni ispaj inqꞌambꞌebꞌalan waqꞌan tet.
2 Ispajtzen Komam wetan yalni hakaꞌ tiꞌ: “Tzꞌibꞌnhe tzet chinyehan tawet tiꞌ,
ayo tzꞌibꞌ tuꞌ yibꞌanh hunu txꞌotxꞌ paqꞌan yehi,
yunhe haꞌ mak chiꞌilni tzꞌibꞌ tuꞌ habꞌan isyenikanh isbꞌa tzet chal tzꞌibꞌ tuꞌ.
3 Waxanhka chꞌekꞌto hanikꞌo yijni isbꞌa tzet lanhan hawilni tiꞌ,
yajaꞌ xin chiyij isbꞌa, mach chꞌekꞌayoj.
Waxanhka mach peto chuhi, yajaꞌ echma,
kaw tꞌinhan yijni isbꞌa, mach txꞌiꞌalo tzꞌayik bꞌay chij isbꞌa.
4 Tzꞌibꞌnhe ta haꞌ ebꞌnaj mach toholo yanma,
kaw loloꞌkano ebꞌnaj,
wal ebꞌnaj tohol isbꞌeybꞌal ay iskawil ebꞌnaj,
yu chikawxi iskꞌul ebꞌnaj winhan.”
5 Yebꞌ xin ebꞌnaj ukꞌum vino, chiyaqꞌ subꞌchaho ebꞌnaj anma;
kaw loloꞌ chute isbꞌa ebꞌnaj, machi xin chꞌehikꞌo ebꞌnaj yinh hunelnhe.
Chisayni ebꞌnaj tzet chiyoche, hakaꞌ iskꞌabꞌito istiꞌ bꞌay ay anma kamnaxa hak tuꞌ ebꞌnaj,
machi xin chinoh iskꞌul hakaꞌ naj kamikal.
Ismajilo sunil nimeta konhobꞌ yu yok yetoj.
5. ISYAꞌTAJIL CHIHUL YIBꞌANH EBꞌNAJ MACH TOHOLO TZET CHISWATXꞌE
(2:6-20)
6 »Haꞌ hunteqꞌan konhobꞌ chiꞌaykꞌay tuꞌ,
chiꞌok bꞌuchwal yinh mak chꞌaqꞌni aykꞌayoj.
Chalni anma tuꞌ bꞌuchwal tzotiꞌ hakaꞌ tiꞌ:
“Kꞌanchꞌan hach kaxhok qꞌalomal yinh tzetaj ye tuꞌ mach hawetoj.
¿Bꞌaqꞌinh chabꞌej hakutxbꞌan sunil hunteqꞌan tzet chachah yu hamajnilo qꞌalomal?” xhi anma.
7 ¿Tom mach chikanh isbꞌa ebꞌnaj bꞌay ay hakꞌas tawinh?
Kat yelpaxo iswayanh ebꞌnaj chaxhaqꞌni xiwokanh kat yinikanilo ebꞌnaj sunil tzet ayach.
8 Yu hawilo tzet ay txꞌiꞌal ej txꞌotxꞌ konhobꞌ,
yuxin haxa hunteqꞌan konhobꞌ chiꞌinilo tzet ayach.
Hak tuꞌ chachutelaxi yuto kaw txꞌiꞌal anma hamaqꞌkamoj,
yebꞌ yu sunil ismachiswalilal
hawatxꞌe yinh ej konhobꞌ ay yul sat yibꞌanhqꞌinal tiꞌ,
yebꞌ yinh anma ay yulaj konhobꞌ.
9 ¡Kꞌanchꞌan hach yu chanohtze hawatut yu tzet hawiqꞌ yinh tzet ye tuꞌ mach toholoj.
Hawanikanh hawatut nahat, yunhe mach chꞌapni istxꞌojal tawinh, chawute hatxumni!
10 Hak tuꞌ yu hawiniti txꞌixwilal yibꞌanh hawatut,
yuto kaw txꞌiꞌal konhobꞌ hatanhtzeloj,
hach hunach hawatxꞌe istxꞌojal yinh hakawil.
11 Yuto haꞌ chꞌen chꞌen ayko yinh iskꞌubꞌal hawatut chiꞌawi tawinh,
yebꞌpaxo xin te teꞌ ayko patzabꞌil, haꞌ teꞌ chitaqꞌwi.
12 ¡Kꞌanchꞌan hach chawatxꞌekanh hakonhobꞌ yu chikꞌ chamaltoj,
yebꞌ hawanayo xeꞌ yu sunil ismachiswalilal chawatxꞌe!
13 Haꞌ Komam Yahawil kaw aykano yip,
haꞌ chinhusnilo sunil tzet iswatxꞌe ej konhobꞌ,
haxa ej nime konhobꞌ nabꞌanhe ekꞌyaꞌ yinh ismunil.
14 Yuto sunil sat txꞌo txꞌotxꞌ tiꞌ chinohilo yu yohtanhelaxilo isqꞌaqꞌal yip Komam Jahawil,
hakaꞌ isnohnajil haꞌ mar yu ha haꞌ.
15 ¡Kꞌanchꞌan hach chawaqꞌ ukꞌe yukꞌuꞌ hawet anmahil!
¡Kꞌanchꞌan hach chawaqꞌ kꞌahla tzet ye tuꞌ yukꞌuꞌ hawet anmahil,
chawukꞌtzenkanh yunhe hawilni istxꞌixobꞌal yuto chatꞌilbꞌa!
16 Hach tiꞌ, matxa chaxhilaxkanh, wal xin chiꞌilaxilo hapixan.
Chaxhukꞌtzelaxkanh kat xin yil-lax hatxꞌixobꞌal.
Haꞌ Komam Jahawil chꞌaqꞌni huneꞌ copa ayko yul
iswatxꞌqꞌabꞌ hawukꞌuꞌ, haxa xin hamay matxa yelapno chiꞌeliko yu Komam.
17 Hach tiꞌ haqꞌajayo teꞌ nimeta teꞌ bꞌey txꞌotxꞌ Líbano,
haxa tinanh xin chachtanhtzelaxiloj.
Hamaqꞌkamo no noqꞌ ay bꞌey tuꞌ, haxa tinanh xin, haxa noꞌ chꞌaqꞌni xiwkilal tawet,
hak tuꞌ chaxhutelaxi yuto kaw txꞌiꞌal anma kam hawu,
yebꞌ yu tzet hawelqꞌa tet anma ay yul sat yibꞌanhqꞌinal tiꞌ, yebꞌ tet ej konhobꞌ.
18 ¿Tzet chiꞌokniko hunu echele chistzꞌuj hunu naj watxꞌem tioxh,
hunteqꞌan tioxh bꞌay chiyaqꞌ subꞌchaho isbꞌa anma?
¿Tzet yinh xin chako yanma naj chiwatxꞌen tioxh yinh tzet chiswatxꞌe tuꞌ,
chiswatxꞌen naj echele mach chu istzoteli?
19 ¡Kꞌanchꞌan hach chawal tet tioxh chawatxꞌe yinh te teꞌ hakaꞌ tiꞌ:
“Ilo hawayanh,” kachi tet! ¡Chawalnipaxo tet chꞌen chꞌen mach chitzoteli hakaꞌ tiꞌ:
“Ahanhlinhnoj,” kachi! ¿Tom chu yaqꞌni kuybꞌanile xin?
Waxanhka ayko chꞌen oro yebꞌ chꞌen plata ispichiloj,
yajaꞌ mach itzitzoj.
20 Yajaꞌ wal Komam Jahawil xin ayikto Komam yul yatut,
huneꞌ nha hanhe Komam ay yet.
¡Machojabꞌ chitzotel sata Komam sunil tzet ay sat txꞌo txꞌotxꞌ tiꞌ!»a