2. ISYAꞌTAJIL CHIꞌALAXAYO YIBꞌANH EJ KONHOBꞌ AYKO ISKAWILAL ISRAEL
(2:1-15)
2
«Kutxbꞌaweko hebꞌa, kat xin henani hebꞌa,hex konhobꞌ mach chextxꞌixwininoj.
2 Yalanhto maxhto chiyij isbꞌa tzet halbꞌilkanoj,
huneꞌ tzꞌayik bꞌay chexsajlemitoj hakaꞌ yijlaxto matzꞌik yu jaqꞌeqꞌ.
Yalanhto maxhto chihul yip ishowal Komam Dios teyinh.
Yalanhto maxhto chihul istzꞌayikal bꞌay chiꞌay ishowal Komam Dios teyibꞌanh.
3 Saywe Komam Jahawil sunil hex machi heyelapnoj,
yebꞌ hex chewchotanhe ay yul sat yibꞌanhqꞌinal tiꞌ;
cheyijen ischejbꞌanil Komam kat
hesayni istoholal yebꞌ heyinayo hebꞌa;
hak tuꞌ xin kꞌuxantaxka
chayo Komam Jahawil ishowal.a
4 Haꞌ konhobꞌ Gaza, chitzꞌinhlokanoj, haxa konhobꞌ Ascalón,
chitanhtzelaxkaniloj; haxa konhobꞌ Asdod yet tzꞌayikal chiꞌilaxilo sunil tzet aya;
haxa konhobꞌ Ecrón xin chihokꞌlaxkanh bꞌay ayayoj.
5 ¡Kꞌanchꞌan hex ay hex istiꞌ haꞌ mar, hex titna yinh ebꞌnaj cereteo!
Komam Jahawil chalni tzet chihul teyibꞌanh,
chalni hakaꞌ tiꞌ: “¡Haꞌ Canaán istxꞌotxꞌ ebꞌnaj filisteo chintanhtzekanilojan,
matxa hunu mak chiꞌeyayo bꞌey tuꞌ!”
6 Sunil txꞌotxꞌ ayayo istiꞌ haꞌ mar, chiꞌokkano txꞌotxꞌ bꞌay chilow noꞌ meꞌ,
yebꞌ bꞌay chiswatxꞌe ebꞌnaj tanhem meꞌ ispeyabꞌ ismeꞌ.
7 Haꞌ mak kantokano bꞌey yul konhobꞌ Judá,
haꞌ chiꞌeyayo sat istxꞌotxꞌ ebꞌnaj tuꞌ.
Haꞌ bꞌey tuꞌ xin chiyaqꞌ lowo ebꞌnaj ismeꞌ;
haꞌ xin yul teꞌ nha ay bꞌey Ascalón,
haꞌ tuꞌ chiway ebꞌnaj yet aqꞌbꞌalil.
Yuto hanin Yahawilintiꞌan chinkolan ebꞌnaj,
chiwinitijan ebꞌnaj bꞌay ayko preso.b
8 Xawabꞌehan isbꞌuchwa konhobꞌ Moab yinh inkonhobꞌan,
haxa konhobꞌ Amón yaqꞌ tako iskꞌul inkonhobꞌan yu yilo ebꞌnaj ispixan;
isqꞌalombꞌikanh yu istxꞌotxꞌ inkonhobꞌan.
9 Yuxin hanin Yahawil yinh sunil, isDiosal Israel,
chiwalan hakaꞌ tiꞌ:
“Hanintiꞌan itzitz hinan, haꞌ konhobꞌ Moab lahan chiꞌelkaniko hakaꞌ konhobꞌ Sodoma;
haxa anma ay yul konhobꞌ Amón,
lahan chukano hakaꞌ konhobꞌ Gomorra,
chiꞌokkano bꞌay chichꞌibꞌ teꞌ txꞌix, yebꞌ bꞌay huntenan atzꞌam.
Tzꞌinan chiyukano yinh hunelnhe.
Haꞌ ebꞌnaj chitokankano yinh inkonhobꞌan, haꞌ chꞌinito tzet ay konhobꞌ tuꞌ,
yebꞌ haꞌ ebꞌnaj xin chiꞌinikanikꞌo istxꞌotxꞌ hunteqꞌan konhobꞌ tuꞌ,” xhi Komam.
10 Chihul hunteqꞌan tuꞌ yibꞌanh yuto isloloꞌnhe isbꞌa,
yok kajwal yinh iskonhobꞌ Komam Jahawil,
yahawil yinh ebꞌnaj ángel yet howal;
kaw xin nime anma yute isbꞌa yinh iskonhobꞌ Komam tuꞌ.
11 Kaw how chiyute isbꞌa Komam Jahawil yinh ebꞌnaj.
Chistanhtzelo Komam sunil komon dios ay yul sat yibꞌanhqꞌinal tiꞌ,
haꞌ xin konhobꞌ ayayo istiꞌla haꞌ mar, haꞌ bꞌay ay tuꞌ,
haꞌ tuꞌ chiyiyo isbꞌa sata Komam.
12 Hakpax tuꞌ hex ay hex bꞌey txꞌotxꞌ Etiopía,
chexaqꞌlax kamo yu wespadahan.
13 Chanipaxto Komam isqꞌabꞌ yinh yetkꞌulal norte,
chistanhtzenilo konhobꞌ Nínive, tzꞌinan chiyukanoj,
chiꞌokkano tajinal, hakaꞌ txꞌotxꞌ desierto.
14 Haꞌ hunta bꞌulan noꞌ meꞌ chꞌapni noꞌ xewo bꞌey tuꞌ;
hakpax tuꞌ xin sunil noꞌ xoltelajil noqꞌ.
Haꞌ noꞌ pelícano yebꞌ noꞌ erizo chiway noꞌ yibꞌanh ispultahil teꞌ nha kat xin yel yaw noꞌ yul isventanahil nha.
Kaw xin tzꞌinan yul ispultahil nha tuꞌ,
yuto haꞌ isteꞌal iswiꞌ nha cedro teꞌ, ixtanh chukanoj.
15 Haꞌ ton huneꞌ konhobꞌ tiꞌ kaw tzalakano iskꞌul yet yalanhtokanoj,
kaw kawxi iskꞌul yinh, yalni hakaꞌ tiꞌ:
“Haninnhehan, machi hunuxa konhobꞌ hakaꞌ intiꞌan,” xhi.
¡Yajaꞌ kaw tzꞌinan yukanoj, okkano yatuto noꞌ xoltelajil noqꞌ!
Haꞌ mak chiꞌekꞌto iskawilal konhobꞌ tuꞌ,
chiꞌok tzebꞌo yinh, kat xin istziknipaxo isqꞌabꞌ.»