3. ISMUL KONHOBꞌ JERUSALÉN YEBꞌ ISKOLBꞌANIL
(3:1-20)
3
«¡Kꞌanchꞌan konhobꞌ Jerusalén,konhobꞌ manhkꞌom yebꞌ bꞌakbꞌil yu istxꞌojal, yebꞌ chiyeta yet anmahil!
2 Mach yabꞌeto anma tzet yal Komam.
Mach ischah yabꞌe iskachbꞌanil,
mach yapaxiko Komam Dios yipo iskꞌul,
machi xin ishitziko isbꞌa iskꞌatanh Komam Dios.
3 Haꞌ ebꞌnaj yahaw konhobꞌ tuꞌ,
lahan ebꞌnaj hakaꞌ noꞌ bꞌalam chiꞌel yaw yet chiskꞌuxnayto ischibꞌe;
haxa ebꞌnaj juez, lahan ebꞌnaj hakaꞌ noꞌ oj chiꞌelto yet aqꞌbꞌalil,
machi xin hunu isbꞌajil no noqꞌ chákano yet hunxa tzꞌayik.
4 Wal ebꞌnaj ischejabꞌ Komam Dios yalni,
kaw chiyikanh isbꞌa, yebꞌ xin chiyaqꞌ subꞌchaho ebꞌnaj anma.
Wal ebꞌyaꞌ sacerdote xin, chilo ispixan Yatut Komam Dios,
yuto chishel ebꞌnaj chejbꞌanile yet Komam.
5 Haꞌ Komam Jahawil haꞌ istoholal chiswatxꞌe xol iskonhobꞌ,
mach chiswatxꞌe Komam istxꞌojal.
Hunun tzꞌayik yet chisajbꞌi chisyelo Komam istoholal, yaj wal anma txꞌoj,
mach chohtanhelo tzet ye txꞌixwilal.
6 Chalni Komam Jahawil hakaꞌ tiꞌ: “Waqꞌ tanhtzelojan ej konhobꞌ,
matxa hunu anma kaw chitzꞌinhtzoni, matxa hunu mak kankano yul.
7 Walnihan hakaꞌ tiꞌ ‘Yinh kaw isyelal chixiwo ebꞌnaj wetan,
chischabꞌaꞌ ebꞌnaj iskachbꞌanil.
Hak tuꞌ xin mach chiwayojan isyaꞌtajil yibꞌanh ebꞌnaj,
mach chiꞌetaxto bꞌay ay ebꞌnaj,’ kinchihan.
8 Yuxin echmawe istzꞌayikal bꞌay chinahwanojan,
kat wilnihan tzet chexeliko yu istxꞌojal chewatxꞌe,a
hanin Yahawilintiꞌan chiwalan huneꞌ tiꞌ.
Yuto haꞌ tzet nabꞌil wuhan haꞌ ton inkutxbꞌanikojan ej konhobꞌ yebꞌ txꞌotxꞌ nimeta konhobꞌ,
kat wanayojan inhowalan yibꞌanh.
Chiwayojan yip inhowalan, sunil txꞌo txꞌotxꞌ chitzꞌato yu isqꞌaqꞌal inhowalan.
9 Hayet chꞌapni huneꞌ tzꞌayik tuꞌ xin chinwatxꞌelojan istzotel ej konhobꞌ,
matxa xin istxꞌojal chala,
hak tuꞌ xin sunil ej konhobꞌ chꞌaqꞌni bꞌinaho inbꞌihan huneꞌxanhe xin chu isyijen yinh tzet chiwalan.
10 Haꞌ yul ismajul txꞌotxꞌ ay bꞌey isqꞌaxebꞌikꞌto ej ha haꞌ ay bꞌey Etiopía chitit inkonhobꞌan sajleminato bꞌey tuꞌ,
kat yay issat wetan, kat yiniti isyebꞌalqꞌabꞌ wetan.
11 Hex inkonhobꞌtuꞌan, yinh huneꞌ tzꞌayik tuꞌ,
matxa chexkankano yinh txꞌixwilal yu tzet chewatxꞌe,
hakaꞌ yet heyok manhkꞌomal wetan.
Chiwilojan texol ebꞌnaj yaqꞌ tzalaho iskꞌul yet heyinikanh hebꞌa.
Matxa bꞌaqꞌinhal xin cheyikanh hebꞌa bꞌey wonhan wetan yehi.
12 Haxanhe xin anma kaw chewchotanhe yebꞌ anma chiyiyo isbꞌa chiwakanikojan texol;
haxanhe xin yinh inbꞌihan,
hanin Yahawilintiꞌan chikawxi iskꞌul.
13 Haꞌ hun bꞌotzan anma chitokankano yinh konhobꞌ Israel,
matxa chiswatxꞌe tzet ye tuꞌ mach toholoj,
mach chiyalpaxo leqꞌtiꞌal,
machi xin chiyaqꞌ subꞌchaho yet anmahil.
Wal anma tuꞌ chixewi, hak tuꞌ xin machi mak tet chixiwi,” xhi Komam.
14 ¡Bꞌitnanhwej hex ah konhobꞌ Sión, elojabꞌ heyaw yu tzalahilal hex Israel!
¡Aqꞌwe tzalaho hekꞌul hex ah Jerusalén,
tzalahanhwe yinh sunil heyanma!
15 Mayilo Komam Jahawil isyaꞌtajil yayo teyibꞌanh,
haxa xin ebꞌnaj ayko ishowal teyinh mayipaxkanilo Komam.
Komam Jahawil, Rey Komam yinh konhobꞌ Israel;
aykꞌo Komam texol, matxa xin chexxiw tet hunu isyaꞌtajil.
16 Haꞌ yinh huneꞌ tiempohal tuꞌ, chihal-lax tet anma ah Jerusalén hakaꞌ tiꞌ:
“¡Hex ah konhobꞌ Sión, mach chexxiwi,
machojabꞌ chipáxilo yip heqꞌabꞌ!
17 Komam Jahawil ayiko texol, ¡kaw ay yip Komam,
haꞌ xin Komam chexkolni!
Kaw chiyaqꞌ tzalaho iskꞌul Komam teyinh, yu heyijemal.
Ayko iskꞌulchꞌanil iskꞌul Komam teyinh yuxin chibꞌitni, xhi.
18 Chalnipaxo Komam: Haxa yinh istzꞌayikal chiꞌekꞌtzelax qꞌinh,
chexinhekꞌilojan tet isyaꞌtajil chiyuhi,
kat xin winipaxilojan txꞌixwilal aytikꞌako teyinh.
19 Haꞌ yinh huneꞌ tiempohal tuꞌ chiwaqꞌan ispaj selel tet sunil ebꞌnaj kexaqꞌni ekꞌoyaꞌ,
kat kexinkolnihan yuto lahan hex hakaꞌ noꞌ meꞌ chikotxxi,
kat inkutxbꞌanikojan mak sajleminatoj.
Haꞌ istxꞌixobꞌal chiꞌilaxiloj, chinmeltzokojan yinh yalaxiko iswinajil,
kat isbꞌina yul sat yibꞌanhqꞌinal tiꞌ.
20 Haꞌ yinh huneꞌ tiempohal tuꞌ chexwitijan bꞌey tiꞌ yet chexinkutxbꞌakojan.
Chiwakojan hewinajil,
kaw xin ay yelapno chexelkaniko xol ej konhobꞌ yul sat yibꞌanhqꞌinal tiꞌ,
yet chexwinitijan bꞌay ayexiko preso;
hex kaw hex xin cheyil yu hesat,» xhi Komam Jahawil.