2. ISKꞌULCHꞌANIL JILNI HUNEꞌ YATUT KOMAM DIOS AKꞌTO
(2:1-9)
2
Haxa yinh ishuj ixahaw yinh 21 (huneꞌ iskawinaj) tzꞌayik, yaqꞌni Komam Jahawil istzotiꞌ tet yaꞌ Hageo, ischejabꞌ, yalni Komam: 2 «Hal intzotiꞌan tet yaꞌ Zorobabel, yahawil yinh Judá, yaꞌ iskꞌahol yaꞌ Salatiel, yebꞌ tet yaꞌ Josué, yahawil sacerdote, iskꞌahol yaꞌ Josadac, yebꞌ tet anma ay yul konhobꞌ, chawalni hakaꞌ tiꞌ: 3 “¿Aytom hunu mak tiꞌ itzitzto koxol tiꞌ ilni Yatut Komam Dios yet yalanhtokanoj yinh iskꞌulchꞌanil? ¿Tzet cheyute heyalni yebꞌ yinh huneꞌ jet tinanh? ¿Chimisje kolahbꞌan iskꞌulchꞌanil mato machoj? 4 Yuxin haꞌ kaw Komam Jahawil chalni hakaꞌ tiꞌ: Tinanh hach Zorobabel iptzewe hebꞌa, hakpax tuꞌ hach Josué yahawil sacerdote, Josué iskꞌahol yaꞌ Josadac, yebꞌpaxo xin sunil anma ay yul konhobꞌ iptzewe hebꞌa. Munlahanhwej yuto haninan ayinikojan heyetbꞌihoj,”» xhi Komam Yahawil kaw Aykano Yip. 5 Chalnipaxo Komam: Hakaꞌtikꞌa yu walnihan teyet yet heyel bꞌey Egipto, tato ayko Wespírituhan texol, yuxin mach chexxiwi.a 6 Hanin Yahawil yinh Sunil, hankawhinan chiwalan hakaꞌ tiꞌ: «Yulbꞌal hayebꞌxanhe tzꞌayik, kat waqꞌni bꞌilenojan satkanh yebꞌ yul sat yibꞌanhqꞌinal tiꞌ, yebꞌ xin haꞌ mar yebꞌ txꞌo txꞌotxꞌ. 7 Chinbꞌilehan sunil ej txꞌotxꞌ konhobꞌ, hak tuꞌ xin chiyu yiniti isqꞌalomal, kat xin isnohilo yul Watutan yu iskꞌulchꞌanil. Hanin Yahawil yinh Sunil, chihalni hakaꞌ tiꞌ. 8 Haꞌ chꞌen plata wetan ye chꞌen, wetpaxojan chꞌen oro,» xhi Komam Jahawil Aykano Yip. 9 Yalnipaxo Komam: «Haꞌ huneꞌ iskabꞌ watuttiꞌan ekꞌbꞌal iskꞌulchꞌanil yibꞌanh huneꞌ bꞌabꞌel. Kat xin waqꞌnihan aqꞌankꞌulal bꞌey tuꞌ,» xhi Komam Yahaw yinh Sunil.3. CHISKACH KOMAM DIOS ISKONHOBꞌ MANHKꞌOM
(2:10-19)
10 Haꞌ yinh 24 (kanhebꞌ iskawinaj) tzꞌayik yinh isbꞌalonhebꞌ ixahaw yet kabꞌxa habꞌil yok naj Darío reyal, yaqꞌni Komam Jahawil istzotiꞌ tet ischejabꞌ, yaꞌ Hageo, yalni yaꞌ hakaꞌ tiꞌ: 11 «Hak tiꞌ chute yalni Komam Yahawil yinh Sunil: “Qꞌambꞌe tet ebꞌyaꞌ sacerdote yinh tzet chute yalni ley. 12 Qꞌinalo tato ay hunu naj pichbꞌiliko hanikꞌo noꞌ chibꞌe yul xil isqꞌap, wetan noꞌ chibꞌe tuꞌ yuto haltebꞌilxa yinh xahanbꞌal, yajaꞌ ta haꞌ xin istiꞌ xil isqꞌap tuꞌ chꞌekꞌ masnah yinh ixim pan, maka yibꞌanh itah tanaxa, maka yinh vino, maka yinh teꞌ aceite, maka yinh hunuxa itah chilolaxi ay bꞌey tuꞌ; ¿tom yu tuꞌ yuxin wetxahan chiyukaniko hunteqꞌan tuꞌ?” xhi Komam, kachi.» Istaqꞌwi ebꞌyaꞌ sacerdote, hakaꞌ tiꞌ: «Machoj,» xhi ebꞌyaꞌ. 13 Isqꞌambꞌenpaxo yaꞌ Hageo: «Qꞌinalo tato ay hunu naj mach sajoj hakaꞌ yalni ley, yu istzabꞌ isnimanil hunu kamom, lahwi tuꞌ chistzabꞌ hunu tzet majal tuꞌ, ¿machmi sajo chiꞌelkaniko tzet chistzabꞌ tuꞌ?» xhi yaꞌ Hageo. Istaqꞌwi ebꞌyaꞌ sacerdote: «Hoꞌ, mach sajo chukanoj,» xhi ebꞌyaꞌ. 14 Yalni yaꞌ Hageo: «Komam Jahawil chalni: “Hak tuꞌ hunteqꞌan anma ayko yinh insattiꞌan, haꞌ tzet chiswatxꞌe, yebꞌ tzet chiyalte wetan, mach sajoj. 15 Haꞌ tinanh xin yinh tzꞌayik chito tiꞌ txumwe hebꞌa sikꞌlebꞌil yalanhto maxhto cheyicheko hewatxꞌenkanh Watuttuꞌan, haninan Yahawilintiꞌan. 16 Yet yalanhto tuꞌ, haꞌ mak hul iqꞌno 20 (hunkꞌal) mal ixim trigo bꞌay chiteni, 10 (lahonhebꞌnhe) mal ixim ilcha yu; haxa mak hul bꞌay chixanhlaxilti yal teꞌ uva yunhe yinito cincuenta tzꞌahabꞌ yal teꞌ, 30 (lahonhebꞌxanhe iskawinaj) tzꞌahabꞌ aya. 17 Hanin Yahawilintiꞌan, hankawhinan hintanhtzelojan sunil sat hetzꞌunubꞌ, wanitijan yabꞌil yebꞌ chꞌen sajbꞌat, yajaꞌ mach kexmeltzoko yul inqꞌabꞌan. 18 Txumwe yinh heyanma, yinh hunteqꞌan chito tesataj tiꞌ, yinh huneꞌ tzꞌayik tiꞌ, tzꞌayik 24 (kanhebꞌ iskawinaj) yinh isbꞌalonhebꞌ ixahaw yinh istzꞌayikal yet yaykanto xeꞌ Yatut Komam Jahawil. 19 Maxhto ixim trigo yul bꞌay chikꞌubꞌalaxi, maxhtopaxo teꞌ uva yebꞌ teꞌ higo yebꞌ teꞌ granado, maxhto chixumaklipaxo teꞌ olivo; yajaꞌ yinh huneꞌ tzꞌayik tiꞌ chiwakanayojan isyaxil teyibꞌanh,”» xhi Komam.
4. HAꞌ TZET YALTE KOMAM DIOS TET YAꞌ ZOROBABEL
(2:20-23)
20 Haꞌtikꞌa yinh tzꞌayik 24 (kanhebꞌ iskawinaj) yinhtikꞌa huneꞌ ixahaw tuꞌ, yaqꞌ Komam Jahawil istzotiꞌ tet yaꞌ Hageo, yalni Komam: 21 «Hal intzotiꞌan tet yaꞌ Zorobabel, yahawil yinh txꞌotxꞌ Judá, chawalni: Hanintiꞌan chinbꞌilehan satkanh yebꞌ txꞌo txꞌotxꞌ. 22 Chiwuchkꞌakantojan bꞌay chiꞌay tzꞌonhno ebꞌnaj yahawil ej konhobꞌ, kat intanhtzenkanilojan yip ebꞌnaj yahawil yinh konhobꞌ ay yul sat yibꞌanhqꞌinal tiꞌ. Chiwuchkꞌakantojan carruaje yet howal, yebꞌ ebꞌnaj ayahto yul. Chiwaqꞌni aykꞌayojan noꞌ cheh yebꞌ ebꞌnaj ayahto yibꞌanh noꞌ; haꞌtikꞌa xin ebꞌnaj chispotxꞌlekamo isbꞌa yu yespada. 23 Hanin Yahawilintiꞌan yinh Sunil, chiwalan tawet Zorobabel, inchejabꞌan, iskꞌahol yaꞌ Salatiel, tato chaxhinsikꞌkanikojan, kat wanikanikojan hawechel yu chꞌen jolqꞌabꞌ chiꞌokniko sellohal,» xhi Komam Jahawil tet yaꞌ Zorobabel.b