ZACARÍAS
1. CHAL KOMAM DIOS TET ISKONHOBꞌ TA CHIMELTZOKO YUL ISQꞌABꞌ
(1:1-6)
Awtebꞌal yu Komam Jahawil yinh iskonhobꞌ
1
Haꞌ yinh iswaxajebꞌ ixahaw yulbꞌal iskabꞌ habꞌilxa yok naj Darío reyal; yaqꞌni Komam Dios Jahawil istzotiꞌ tet ischejabꞌ, haꞌ ton yaꞌ Zacarías, iskꞌahol yaꞌ Berequías, yaꞌ Berequías iskꞌahol yaꞌ Iddo, yalni yaꞌ hakaꞌ tiꞌ:a2 «Kaw tit ishowal Komam Dios Jahawil yinh ebꞌnaj jichmam.
3 Haꞌ Komam Dios, Yahawil yinh Sunil, chalni hakaꞌ tiꞌ:
“Meltzanhweko yul inqꞌabꞌan, kat inhitzikojan tekꞌatanh,”
xhi Komam Dios, Yahawil yinh Sunil.»
4 Yalnipaxo Komam: «Mach lahano cheyute hebꞌa hakaꞌ yute isbꞌa ebꞌnaj heyichmam, ebꞌnaj machi abꞌen tzet yal ebꞌyaꞌ inchejabꞌan, yet yalni hakaꞌ tiꞌ: “Hak tiꞌ chiyute yalni Komam Yahawil yinh Sunil: ‘Bꞌejwekano hebꞌeybꞌal machiswalil yebꞌ istxꞌojal chewatxꞌe,’ xhi Komam,” xhi ebꞌyaꞌ. Yajaꞌ maxhtikꞌa ischah yabꞌe ebꞌnaj yinh tzet walan,» xhi Komam Dios Jahawil.
5 Yalnipaxo Komam: «Haꞌ tinanh xin, ¿bꞌaytuꞌwal ay ebꞌnaj heyichmam tuꞌ?
Yebꞌ xin ebꞌyaꞌ inchejabꞌan, ¿tom itzitzto?
6 Wal intzotiꞌan yebꞌ chejbꞌanile walan tet ebꞌyaꞌ inchejabꞌ tuꞌan yij isbꞌa yinh ebꞌnaj heyichmam,
yuxin isnah isbꞌa ebꞌnaj, yalni ebꞌnaj hakaꞌ tiꞌ:
“Komam Dios Yahawil kaw aykano Yip, iswatxꞌe jinh hakaꞌ yute yalni,
hakaꞌtikꞌa istxꞌojal kobꞌeybꞌalnhe,
yebꞌ hakaꞌtikꞌa istxꞌojal kowatxꞌe,” xhi ebꞌnaj,» xhi Komam.
2. NOꞌ CHEH YELAX YILAꞌ YAꞌ ZACARÍAS
(1:7–6:8)
Yil yaꞌ Zacarías hunteqꞌan mak ayahto yibꞌanh noꞌ cheh yinh iswayik
7 Haꞌ yinh tzꞌayik 24 (kanhebꞌ iskawinaj) yinh 11 (ishunlahonhebꞌ) ixahaw, haꞌ ton ixahaw Sebat, yet kabꞌxa habꞌil yok naj Darío reyal, yaqꞌni Komam Jahawil istzotiꞌ tet ischejabꞌ Zacarías, iskꞌahol yaꞌ Berequías, yaꞌ Berequías, iskꞌahol yaꞌ Iddo.
8 Yalni yaꞌ Zacarías: Hayet aqꞌbꞌalil yelax wilaꞌan yinh sajsatil, wilnihan huneꞌ naj ángel ayahto yibꞌanh huneꞌ noꞌ cheh kajinh, linhankanh noꞌ xol teꞌ mirto yul huneꞌ hokan; haxa yinta naj xin ay hunteqꞌanxa noꞌ cheh, ay noꞌ kajinh, ay noꞌ qꞌaninh yebꞌ qꞌejinh, aypaxo noꞌ sajinh. 9 Inqꞌambꞌenan hakaꞌ tiꞌ:
—¿Mamin, mak hunteqꞌan ebꞌnaj ayahto yibꞌanh cheh tiꞌ? kinchihan.
Istaqꞌwi naj ángel chiwettzotel tuꞌan hakaꞌ tiꞌ:
—Chinyehan tawet mak hunteqꞌan ebꞌnaj tiꞌ, xhi naj.
10 Haꞌ xin naj ayko xol teꞌ mirto taqꞌwi wetan hakaꞌ tiꞌ:
—Haꞌ ton ebꞌnaj tiꞌ ischejto Komam Dios Jahawil isbꞌeytzekꞌo yul sat yibꞌanhqꞌinal tiꞌ, xhi naj.
11 Yalni ebꞌnaj ayahto yibꞌanh cheh tuꞌ tet yángel Komam Jahawil ayko xol teꞌ mirto, hakaꞌ tiꞌ:
—Makobꞌeytzekꞌojanh yul sat yibꞌanhqꞌinal tiꞌ, majilnihanh ta kaw aqꞌankꞌulal yehi, machi bꞌiskꞌulal, xhi ebꞌnaj.
12 Yalni yángel Komam Dios Jahawil hakaꞌ tiꞌ:
—Mam Wahawil, Yahawil yinh Sunil, 70 (lahonhebꞌ iskanhwinaj) habꞌilxa ayti hahowal yinh ebꞌnaj ah Jerusalén yebꞌ yinh ebꞌnaj ay yul sunil ismajul Judá. ¿Hayebꞌto xin habꞌil mach chitzꞌay hakꞌul yinh ebꞌnaj?b xhi yángel Komam.
13 Istaqꞌwi Komam Jahawil, yalni Komam tzotiꞌ kꞌul yebꞌ tzotiꞌ chiꞌaqꞌni yaqꞌlobꞌal yanma naj ángel chitzotel wetan.
14 Yuxin naj ángel chitzotel wetan halni hakaꞌ tiꞌ:
«Halikꞌo xin; hak tiꞌ chiyute yalni Komam Dios Yahawil kaw Aykano yip:
“Kaw xahan ay konhobꞌ Jerusalén wuhan yebꞌ wonhan Sión.
15 Yajaꞌ kaw chitit inhowalan yibꞌanh hunteqꞌanxa nan konhobꞌal,
yuto hayet hanikꞌnhe inhowalan wayojan yibꞌanh konhobꞌ Jerusalén,
yelaꞌxa kaw yayo hunteqꞌan konhobꞌ tuꞌ isyaꞌtajil yibꞌanh inkonhobꞌan.
16 Hanin Yahawilintiꞌan chiwalan hakaꞌ tiꞌ:
Tinanh chinmeltzohan yinh konhobꞌ Jerusalén,
chiwaqꞌnihan iskꞌulchꞌanil inkꞌulan tet, chiwatxꞌelaxkanh watutan bꞌey tuꞌ,
kat iswatxꞌelaxpaxokanh konhobꞌ tuꞌ,” xhi Komam Dios Yahawil yinh Sunil.
17 »Yalnipaxo naj ángel wetan: Hal hakaꞌ tiꞌ:
Komam Dios Yahawil kaw Aykano yip, chalni hakaꞌ tiꞌ:
“Chiwapaxayojan iskꞌulal inkꞌulan yibꞌanh ej inkonhobꞌan hunelxa,
chiwaqꞌnihan yaqꞌlobꞌal yanma Sión,
kat walnihan hunelxa tato haꞌ konhobꞌ Jerusalén inkonhobꞌan,
sikꞌbꞌililo wuhan,” xhi Komam,» xhi naj ángel.
Yelax kanhebꞌ yukꞌaꞌ meꞌ yilaꞌ yaꞌ Zacarías yebꞌ kanhwanh ebꞌnaj hosom teꞌ
18 Yalnipaxo yaꞌ Zacarías: Lahwi tuꞌ wah tꞌanhnojan, wilnihan kanhebꞌ yukꞌaꞌ noꞌ meꞌ.
19 Inqꞌambꞌenan tet naj ángel chitzotel wettuꞌan hakaꞌ tiꞌ:
—¿Tzet chal yelapno hunteqꞌan yukꞌaꞌ noꞌ meꞌ tiꞌ? kinchihan. Istaqꞌwi naj wetan:
—Hunteqꞌan yukꞌaꞌ meꞌ tiꞌ, yechel yip hunteqꞌan konhobꞌ aqꞌni sajlemoto anma ah Judá yebꞌ anma ah Israel yebꞌ ah Jerusalén, xhi naj.
20 Lahwi tuꞌ isyeni Komam Dios Jahawil kanhwanh ebꞌnaj polom teꞌ wilaꞌan.c 21 Inqꞌambꞌenan tet Komam:
—¿Tzet yinh xin hul hunteqꞌan ebꞌnaj polom teꞌ tiꞌ? kinchihan.
Istaqꞌwi Komam wetan, yalni hakaꞌ tiꞌ:
—Haꞌ hunteqꞌan yukꞌaꞌ noꞌ meꞌ tiꞌ, haꞌ ton konhobꞌ aqꞌni sajlemoto anma ah Judá, machi hunu mak ah Judá tuꞌ yikanh iswiꞌ. Yaj wal ebꞌnaj tiꞌ, hul ebꞌnaj yu yaqꞌni xiwoj yebꞌ yu istanhtzenilo yip hunteqꞌan konhobꞌ yikanh isbꞌa yaniko howal yinh konhobꞌ Judá yebꞌ yu yaqꞌni sajlemoto ebꞌnaj konhobꞌ Judá, xhi Komam.