Huneꞌ naj iqꞌbꞌil txꞌanh txꞌanh yu
—¿Bꞌaytuꞌwal chaxhtohi? kinchihan.
Istaqꞌwi naj wetan hakaꞌ tiꞌ:
—Chintohan inmaleꞌan konhobꞌ Jerusalén yu wilnihan hanta yeko istxikin, yebꞌ ispakꞌul, xhi naj.
3 Hayet lanhan ispaxto naj ángel tzotel wettuꞌan, yul hunxa naj ángel chahwal yinh naj. 4 Yalni naj: «Asiꞌ yinh anhe, kat hawalni tet naj tzeh tuꞌ hakaꞌ tiꞌ:
“Haꞌ yul konhobꞌ Jerusalén chiꞌehayo anma hunelxa,
wal xin hantanhekano isbꞌisil anma,
yebꞌ xin hantanhepaxkano isbꞌisil isnoqꞌ anma,
yuxin haꞌ konhobꞌ Jerusalén tuꞌ mach chꞌalaxkanh iskꞌubꞌal.
5 Haꞌ kaw Komam Dios Jahawil chalni hakaꞌ tiꞌ:
Haninan chinhoybꞌako hinbꞌahan yinh konhobꞌ Jerusalén hakaꞌ hunu kꞌubꞌ ayko qꞌaꞌ yinh.
Haꞌ xolbꞌal konhobꞌ tuꞌ xin, chinyelojan isqꞌaqꞌal wipan.
6 Haninan kexaqꞌni sajlemotoj bꞌay chitit kanhebꞌ majan jaqꞌeqꞌ yinh ej istxikin yul sat yibꞌanhqꞌinal tiꞌ.
Haꞌ tinanh xin chiwalan teyet:
¡Elanhwekanh yinh anhe sat txꞌotxꞌ ayko yinh yetkꞌulal norte! xhi Komam Dios Jahawil.
7 Yalnipaxo Komam: Konhobꞌ Sión,
hach ay hach iskꞌatanh iskutzꞌin konhobꞌ Babilonia,
chiwalan tawet, elanhkanh bꞌey tuꞌ,» xhikano Komam.
8 Komam Dios Yahawil yinh Sunil, chalni hakaꞌ tiꞌ:
«Tzujan inyenilojan isqꞌaqꞌal wipan,
chachinchejnitojan tet hunteqꞌan konhobꞌ kexaqꞌni sajlemotoj,
yu hawalni ta haꞌ mak chako isqꞌabꞌ yinh inkonhobꞌan,
haꞌ yinh isneneꞌal yanmahil isbꞌaqꞌ insatan chako isqꞌabꞌ, xhi Komam.
9 Chalnipaxo Komam: Hankawhinan chiwaqꞌlehan howal yebꞌ hunteqꞌan konhobꞌ tuꞌ,
haꞌ xin ebꞌnaj ischejabꞌ ebꞌnaj tuꞌ chimeltzoko yinh,
kat yinilo tzet aya,» xhi Komam.
Hak tuꞌ chu istxumchalo heyu tato haꞌ Komam Dios,
Yahawil yinh Sunil, kinchejnitijan.
10 Komam Jahawil chalnipaxo hakaꞌ tiꞌ: «Bꞌitnanhwej yebꞌ aqꞌwe tzalaho hekꞌul, hex ay hex yul konhobꞌ Sión, yuto chinhulan kat wehikꞌojan texol, xhi Komam.
11 Haꞌ yinh huneꞌ tzꞌayik tuꞌ, kaw txꞌiꞌal ej konhobꞌ chihul iskꞌatanh Komam Dios Jahawil,
kat yok iskonhobꞌo Komam, kat yehikꞌo Komam xol,» xhi Komam.
Hak tuꞌ xin chu isnachalo heyu tato haꞌ Komam Dios, Jahawil,
Yahawil yinh Sunil, haꞌ kinanitijan texol bꞌey tiꞌ.
12 Judá chiꞌok yeto Komam Jahawil hunelxa bꞌey sat txꞌo txꞌotxꞌ yet Komam yehi,
kat issikꞌnipaxilo Komam konhobꞌ Jerusalén yetoj.
13 ¡Sunil anma ay yul sat yibꞌanhqꞌinal tiꞌ yilal yok tukno sata Komam Dios,
Jahawil, yuto el Komam yul yehobꞌal yul satkanh,
yul Komam yul sat yibꞌanhqꞌinal tiꞌ!