Yil yaꞌ Zacarías yaꞌ Josué yinh iswayik
3
Isyeni Komam yaꞌ Josué wilaꞌan, yahawil sacerdote, linhankanh yaꞌ sata yángel Komam Jahawil. Wal naj Matzwalil, linhanayo naj yinh iswatxꞌqꞌabꞌ yaꞌ Josué yu yok naj aqꞌokꞌule yinh yaꞌ. 2 Yalni yángel Komam Jahawil tet naj Matzwalil: «¡Komam Jahawil chikachwa tawinh hach Matzwalil, Komam sikꞌnhelo Jerusalén chikachwa tawinh; yuto huneꞌ naj tiꞌ, lahan naj hakaꞌ hunu tilen ilaxilti xol qꞌa qꞌaꞌ!» xhi ángel Komam. 3 Wal yaꞌ Josué kaw tzꞌiltanhe xil isqꞌap yaꞌ aykoj, linhankanh yaꞌ sata yángel Komam Jahawil. 4 Yalni yángel Komam tet hunteqꞌan ischejabꞌ ayko sata tuꞌ hakaꞌ tiꞌ: «Iwelo xil isqꞌap yaꞌ tzꞌiltanhe ayko yinh,» xhi. Yalnipaxo yángel Komam tet yaꞌ Josué: «Kaw kam chawila, haꞌ chal yelapno huneꞌ tiꞌ, mawikanilojan hamul ayko tawinh, mawanikanikojan xilqꞌape yet qꞌinh tawinh,» xhi.a 5 Lahwi tuꞌ yalnipaxo yángel Komam: «Ahweto isqꞌuxil iswiꞌ yaꞌ kaw saj,» xhi. Yalaxahto isqꞌuxil iswiꞌ yaꞌ Josué kaw saj. Yalaxiko xilqꞌape yet qꞌinh yinh yaꞌ; wal yángel Komam Jahawil xin linhankanokanh.6 Lahwi tuꞌ yaqꞌni yángel Komam Jahawil iskuybꞌanil yaꞌ Josué, yalni hakaꞌ tiꞌ:
7 «Komam Dios, Yahawil kaw Aykano Yip, halni hakaꞌ tiꞌ:
Tato chabꞌeybꞌalnhe inbꞌeybꞌalan,
kat hayijen kuybꞌanile, chachwatojan yilomalo watutan, kat hatanhenpaxo yamaqꞌil.
Chiwaqꞌnihan hamanil hawok insatajan xol ebꞌnaj ángel ayko insatatiꞌan.
8 Kaw kam chawabꞌekano, hach Josué, yahawil sacerdote,
yebꞌ kam chabꞌepaxo ebꞌnaj ayko yinh ismunil takꞌatanh,
yuto hex tiꞌ yechel heye yinh tzet lanhanxa yuli.
Chiwitijan inchejabꞌan, haꞌ ton huneꞌ mak chiyij Wole.
9 Haninan chiwayojan sata yaꞌ Josué huneꞌ chꞌen chꞌen hujebꞌ sat,
matxa hunuxa chꞌen hakaꞌ chꞌen tiꞌ.
Hankawinan chintzꞌibꞌnhekojan hunteqꞌan tzꞌibꞌ yinh chꞌen.
Hak tuꞌ xin yinh huneꞌnhe tzꞌayik chiwilojan ismul anma ay yul huneꞌ txꞌotxꞌ konhobꞌ tiꞌ,» xhi Komam.
10 Komam Dios, Yahawil kaw Aykano Yip, chalni hakaꞌ tiꞌ:
«Hayet chul huneꞌ tzꞌayik tuꞌ, hunun hex tiꞌ cheyawtele hebꞌa,
yinh xin tzalahilal chexok xewo yalanh yenhel xaj teꞌ uva,
yebꞌ yalanh teꞌ higo,» xhi Komam.