Huneꞌ isbꞌatxobꞌal cantil oro yebꞌ kabꞌebꞌ yoj teꞌ olivo yil yaꞌ Zacarías
4
Ismeltzoti naj ángel tzotel wettuꞌan, yinilo naj inwayanhan, hakaꞌ yilaxilo iswayanh hunu mak chiwayi. 2 Isqꞌambꞌen naj wetan:—¿Tzet chawila? xhi naj.
Intaqꞌwihan:
—Chiwilan huneꞌ isbꞌatxobꞌal cantil oro, yebꞌ huneꞌ isnetal aceite ayahto yibꞌanh. Haꞌ yinh huneꞌ isbꞌatxobꞌal cantil tuꞌ ayko hujebꞌ lámpara, hunun lámpara tuꞌ ay istubohal bꞌay chꞌayto teꞌ aceite. 3 Iskꞌatanh huneꞌ bꞌatxobꞌal cantil tuꞌ ay kabꞌebꞌ teꞌ olivo; huneꞌ teꞌ aykanh yinh iswatxꞌqꞌabꞌ hunxa teꞌ yinh ismekqꞌabꞌ.a
4 Inqꞌambꞌenan tet naj ángel chitzotel wettuꞌan:
—¿Tzet kaw chal yelapno huneꞌ tiꞌ, Mamin? kinchihan.
5 Ispajtzen naj ángel chitzotel wettuꞌan, yalni naj:
—¿Tom mach hawohtajoj tzet chal yelapnoj? xhi naj.
Walnihan tet naj:
—Mach wohtajojan Mamin, kinchihan.
6 Yalni naj ángel wetan hunelxa:
«Haꞌ hunteqꞌan tzotiꞌ tiꞌ chal Komam Jahawil tet yaꞌ Zorobabel:
“Mach yuho ebꞌnaj soldado, nitam yu yip anma,
wal xin yu Wespírituhan,” xhi Komam Dios, Yahawil kaw Aykano Yip.b
7 Haꞌ isyaꞌtajil iswatxꞌelaxkanh Yatut Komam Dios,
lahan hakaꞌ hunu niman witz,
yajaꞌ haꞌ sata yaꞌ Zorobabel chikꞌaykanokanh.
Haꞌ yaꞌ Zorobabel chiꞌaniko chꞌen chꞌen kaw niman yelapno yehi,
kat yah yaw sunil konhobꞌ hakaꞌ tiꞌ:
“¡Kaw nanxa yok iskꞌulchꞌanil jilni!
¡Kaw nanxa yok iskꞌulchꞌanil jilni!” xhixanhe anma.c
8 »Lahwi tuꞌ yaqꞌnipaxo Komam Jahawil istzotiꞌ wetan yalni hakaꞌ tiꞌ:
9 Haꞌ yaꞌ Zorobabel anayto xeꞌ watutan,
haꞌ yaꞌ xin chilahnipaxkanoj.
Hak tuꞌ chu isnachalo yu inkonhobꞌan tato hanin Yahawil yinh Sunil, haninan chejnhe hach.
10 Haꞌ mak ilni yichelaxiko iswatxꞌelaxkanh Yatut Komam,
machi yelapno huneꞌ tzꞌayik tuꞌ yul sat;
haxa yet chiyilni ebꞌnaj tato lanhan yaniko yaꞌ Zorobabel plomo yinh chꞌen islahobꞌal chꞌen,
chitzalakanh ebꞌnaj, xhi Komam.
Lahwi tuꞌ yalni naj ángel hakaꞌ tiꞌ:
Haꞌ hujebꞌ lámpara, yechel isbꞌaqꞌ sat Komam Jahawil chiꞌilni sunil yul sat yibꞌanhqꞌinal tiꞌ,» xhi naj.
11 Inqꞌambꞌenan tet naj ángel tuꞌ:
—¿Tzet chal yelapno kabꞌebꞌ teꞌ olivo tiꞌ, huneꞌ teꞌ ayko yinh iswatxꞌqꞌabꞌ isbꞌatxobꞌal cantil yebꞌ hunxa teꞌ ayko yinh ismekqꞌabꞌ? kinchihan.
12 Inqꞌambꞌenpaxojan hunelxa hakaꞌ tiꞌ:
—¿Tzet chal yelapno kabꞌebꞌ isqꞌabꞌ teꞌ olivo huneꞌnhe ye yebꞌ kabꞌebꞌ tubo oro bꞌay chiꞌayto teꞌ aceite? kinchihan.
13 Istaqꞌwi naj ángel wetan hakaꞌ tiꞌ:
—¿Tom mach hawohtajoj tzet chal yelapnoj? xhi naj.
Intaqꞌwihan:
—Machoj Mamin, mach wohtajojan, kinchihan.
14 Yalni naj ángel wetan hakaꞌ tiꞌ:
—Haꞌ kabꞌebꞌ tiꞌ yechel yinh ebꞌnaj kawanh sikꞌbꞌililoj, yu isyijen ebꞌnaj tzet chal Komam Dios, Yahawil yinh txꞌo txꞌotxꞌ, xhi naj.