Yelax yilaꞌ yaꞌ Zacarías huneꞌ hum chulbꞌilayoj chiꞌekꞌ satkanh
5
Hayet intꞌanhxipaxtojan isyelax huneꞌ tiꞌ wilaꞌan, wilan huneꞌ hum chilehxiti satkanh, ayko tzꞌibꞌ yinh.a 2 Isqꞌambꞌen naj ángel wetan hakaꞌ tiꞌ:—¿Tzet ye tuꞌ chawila? xhi naj.
Walnihan tet naj:
—Ay huneꞌ hum tzꞌibꞌnhebꞌil, chiwilan yekꞌ satkanh; bꞌalonhebꞌ metro ishojanil, yok yikta ishoꞌ metro yeko sat.
3 Yalni naj ángel wetan hakaꞌ tiꞌ:
—Haꞌ yinh huneꞌ hum tuꞌ, tzꞌibꞌnhebꞌiliko isyaꞌtajil chihul yibꞌanh anma ay yul sat yibꞌanhqꞌinal tiꞌ. Haꞌ sunil mak elqꞌom chitanhtzelaxiloj hakaꞌ yalni yinh huneꞌ qꞌaxep xaj teꞌ hum tuꞌ; haxa mak chiꞌaniko leqꞌtiꞌal chalni ta kaw yeli, chitanhtzelaxpaxiloj hakaꞌ yalni yinh hunxa qꞌaxepxa xaj teꞌ hum tuꞌ.
4 Komam Dios, Yahawil yinh Sunil, chalni hakaꞌ tiꞌ:
«Hankawhinan chiwatojan isyaꞌtajil tiꞌ,
kat xin yokto yul yatut ebꞌnaj elqꞌom,
yebꞌ yul yatut ebꞌnaj chiꞌaqꞌni bꞌinaho inbꞌihan yinh leqꞌtiꞌal chakoj,
kat iskankano isyaꞌtajil yul nha tuꞌ masanto chistanhtzekaniloj,
yebꞌ sunil ispatzabꞌil yebꞌ chꞌen chꞌen,» xhi Komam.
Huneꞌ ix ix ayayto yul huneꞌ malbꞌal yelax yilaꞌ yaꞌ Zacarías
5 Yelti naj ángel chitzotel wettuꞌan yalni naj:
—Tꞌanhxanhtoj, kat hawilni tzet chisyeti isbꞌa, xhi naj.
6 Inqꞌambꞌenan tet naj hakaꞌ tiꞌ:
—¿Tzet huneꞌ tuꞌ? kinchihan.
Yalni naj wetan:
—Haꞌ huneꞌ tuꞌ malbꞌal, xhi naj.
Yalnipaxo naj:
—Haꞌ ton ismalil ismul anma ay yul sat yibꞌanhqꞌinal tiꞌ, xhi naj.
7 Haꞌ ismajil huneꞌ malbꞌal tuꞌ plomo chꞌen; hayet yilaxkanh ismajil, ay huneꞌ ix ix tzꞌonhanayto yul malbꞌal tuꞌ. 8 Yalni naj ángel wetan hakaꞌ tiꞌ:
—Haꞌ huneꞌ ix tiꞌ haꞌ ton yechel ismul anma, xhi naj.
Lahwi tuꞌ istennayto naj ix yul huneꞌ malbꞌal tuꞌ, yaniko naj ismajil istiꞌ, huneꞌ ismajil plomo.
9 Isyelaxpaxo kawanh ebꞌix ix wilaꞌan, ay xin isxikꞌ ebꞌix hakaꞌ isxikꞌ noꞌ garza, haꞌ jaqꞌeqꞌ xin chitennikꞌo isxikꞌ. Yinikanh ebꞌix huneꞌ malbꞌal tuꞌ, isto purna ebꞌix.
10 Lahwi tuꞌ inqꞌambꞌenan tet naj ángel chitzotel wettuꞌan:
—¿Bꞌaytuꞌwal chiꞌilaxto huneꞌ malbꞌal tuꞌ? kinchihan.
11 Istaqꞌwi naj wetan:
—Chiwatxꞌelaxkanh huneꞌ nha bꞌey Babilonia bꞌay chiꞌehi. Haxa yet chilahwi iswatxꞌelaxkanh huneꞌ nha tuꞌ, kat yalaxikto huneꞌ malbꞌal tuꞌ yul, kat yalaxayo yibꞌanh huneꞌ bꞌatxbꞌal,b xhi naj.