Chꞌen kanhebꞌ carruaje yelax yilaꞌ yaꞌ Zacarías
6
Lahwi tuꞌ intꞌanhxipaxtojan, isyelaxpaxo huneꞌ tiꞌ wilaꞌan, wilan kanhebꞌ chꞌen carruaje yet howal, chiꞌelti xolbꞌal kabꞌebꞌ witz, haꞌ kabꞌebꞌ witz tuꞌ, broncenhe. 2 Haꞌ chꞌen bꞌabꞌel carruaje, haꞌ noꞌ cheh kajinh nhikꞌnhe chꞌen, haxa chꞌen iskabꞌ carruaje, haꞌ noꞌ cheh qꞌejinh nhikꞌnhe chꞌen. 3 Haxa chꞌen isyox carruaje, haꞌ noꞌ cheh sajinh nhikꞌnhe chꞌen, haxa chꞌen iskanh carruaje, haꞌ noꞌ cheh tzꞌibꞌinhtanhe nhikꞌnhe chꞌen.4 Inqꞌambꞌenan tet naj ángel chiwettzotel tuꞌan:
—Mamin, ¿tzet chal yelapno huneꞌ tiꞌ? kinchihan.
5 Yalni naj wetan:
—Haꞌ hunteqꞌan tiꞌ, haꞌ ton kanhebꞌ jaqꞌeqꞌ yul satkanh, chibꞌabꞌi sata Komam yinh sunil yul sat yibꞌanhqꞌinal tiꞌ. 6 Haꞌ chꞌen carruaje nhikꞌbꞌil yu noꞌ qꞌejinh cheh, chito bꞌey txꞌotxꞌ konhobꞌ ayko yinh yetkꞌulal norte; haxa chꞌen carruaje nhikꞌbꞌil yu noꞌ cheh sajinh, tzujan istopaxo noꞌ bꞌay chito tzꞌayik. Haxa chꞌen carruaje nhikꞌbꞌil yu noꞌ cheh tzꞌibꞌinhtanhe chito noꞌ bꞌey txꞌotxꞌ konhobꞌ ayko yinh yetkꞌulal sur, xhi naj.
7 Haxa noꞌ kajinh cheh xin, kaw chiyoche chito isbꞌeytzekꞌo yul sat yibꞌanhqꞌinal tiꞌ. Yalni naj ángel tet noꞌ:
—Asiꞌwej hebꞌeytzekꞌo yul sat yibꞌanhqꞌinal tiꞌ, xhi naj.
Isto noꞌ isbꞌeytzekꞌo yul sat yibꞌanhqꞌinal.
8 Lahwi tuꞌ yahwi naj ángel wetan, yalni naj hakaꞌ tiꞌ:
—Ilkꞌanabꞌi haꞌ noꞌ to bꞌey txꞌotxꞌ konhobꞌ ayko yinh yetkꞌulal norte, haꞌ anayo ishowal Komam Jahawil yibꞌanh txꞌotxꞌ konhobꞌ tuꞌ. Yaqꞌ ehoyo Yespíritu Komam Jahawil sat txꞌotxꞌ tuꞌ, xhi naj ángel.a
3. ALAXAHTO CORONA YINH ISWIꞌ YAꞌ JOSUÉ
(6:9-15)
9 Yaqꞌni Komam Jahawil istzotiꞌ wetan, yalni hakaꞌ tiꞌ: 10 «Chah isyebꞌalqꞌabꞌ ebꞌnaj xameltzo yinh presohal bꞌey Babilonia, haꞌ ton naj Heldai, naj Tobías yebꞌ naj Jedaías. Yinhtikꞌa huneꞌ tzꞌayik tuꞌ chaxhtopaxo bꞌey yatut yaꞌ Josías, iskꞌahol yaꞌ Sofonías. 11 Haꞌ chꞌen plata yebꞌ chꞌen oro chachah tuꞌ, chawatxꞌe corona, kat xin hawahnato corona tuꞌ yinh iswiꞌ yaꞌ Josué yahawil sacerdote, yaꞌ Josué iskꞌahol yaꞌ Josadac. 12 Chawalni tet yaꞌ hakaꞌ tiꞌ: “Hak tiꞌ yalni Komam Dios Yahawil kaw Aykano Yip:
»”Haꞌ huneꞌ mak chiyij isbꞌi Woleh chihul iswol yinh isxeꞌ, haꞌ xin chiꞌanikanh Yatut Komam Dios Jahawil.b
13 Haꞌ chiwatxꞌenkanh Yatut Komam Dios Jahawil,
kaw ay yelapno chukano yaꞌ, chiꞌay tzꞌonhno yul istrono kat yaqꞌni yahawilal,
kat xin yok tzꞌonhno yaꞌ sacerdote iskꞌatanh.
Lahanxanhe xin chꞌeliko isnabꞌal.
14 »”Haꞌ chꞌen corona chawatxꞌe tuꞌ, hakaꞌ nabꞌanilehal chukano yul Yatut Komam Dios, yu isnahniti naj Helem, naj Tobías, naj Jedaías yebꞌ naj Hen, naj iskꞌahol naj Sofonías,” kachi,» xhi Komam.
15 Haꞌ anma nahat aya, chihuli, kat iskolwa teyinh iswatxꞌenkanh Yatut Komam Jahawil, hak tuꞌ chu heyohtanheniloj tato haꞌ Komam Dios, Yahawil kaw Aykano Yip, haꞌ chejnheintijan texol. Haꞌ hunteqꞌan tiꞌ chiyij isbꞌa tato cheyabꞌe, kat heyijen tzet chal Komam Jahawil, koDiosal.