4. KUYBꞌANILE YIBꞌANH AYUNO. CHAL-LAX KOLBꞌANILE YET MESÍAS
(7:1–8:23)
Mach chitzala Komam Dios yinh ayuno chiyekꞌtze ebꞌnaj Israel
7
Haꞌ yinh iskanh tzꞌayik yinh isbꞌalonhebꞌ ixahaw, haꞌ ton ixahaw chiyij Quisleu, yet kanhebꞌxa habꞌil yok naj Darío reyal, yaqꞌni Komam Jahawil istzotiꞌ tet yaꞌ Zacarías. 2 Haꞌ yinh huneꞌ tiempohal tuꞌ, haꞌ anma ah Bet-el, ischejto naj Sarezer yebꞌ naj Regem-melec yebꞌ ebꞌnaj ayko yinta ebꞌnaj tuꞌ yu isqꞌanni ta chikolwa Komam Jahawil yinh anma tuꞌ. 3 Yebꞌ yu isqꞌambꞌen ebꞌnaj tet ebꞌyaꞌ sacerdote ay yul Yatut Komam Dios, Yahawil kaw Aykano Yip, yebꞌ ebꞌyaꞌ ischejabꞌ Komam. Isqꞌambꞌen ebꞌnaj: «¿Chitom konhokanh yinh bꞌiskꞌulal, yinh ishoꞌ ixahaw, yebꞌ koyijenanh yet mach konhwaꞌanh yu kotxahlihanh, hakaꞌtikꞌa chijutehanh masanta tinanh?» xhi ebꞌnaj.4 Yalni Komam Dios, Jahawil kaw aykano Yip:
5 «Hal tet sunil anma ay yul konhobꞌ tuꞌ yebꞌ tet ebꞌyaꞌ sacerdote hakaꞌ tiꞌ:
“Hex tiꞌ chexok yinh huneꞌ mach chexwaꞌi yu hetxahli,
yebꞌ chexokpaxo yinh bꞌiskꞌulal yinh ishoꞌ ixahaw
yebꞌ yinh ishuj ixahaw yinh hunun habꞌil yulbꞌal 70 (lahonhebꞌ iskanhwinaj) habꞌil tinanh.
Yaj maxhtaj yu heyaniko inmayan, yuxin cheyekꞌtze tuꞌ.
6 Hakpax tuꞌ yet chexwaꞌi yebꞌ yet cheyukꞌni tzet ye tuꞌ,
haꞌ heyaqꞌni tzalaho hekꞌul, haꞌnhe chesaya, kachi,» xhi Komam.
7 Yalnipaxo yaꞌ Zacarías: «¿Tom mach lahano hunteqꞌan tzotiꞌ tiꞌ, hakaꞌ tzotiꞌ ischej Komam Jahawil yalaꞌ ebꞌyaꞌ ischejabꞌ yet payat? Yet kaw aqꞌankꞌulal ye anma yul konhobꞌ Jerusalén yebꞌ yulaj konhobꞌ ayiko yinhla ishoyanil, yebꞌpaxo bꞌey txꞌotxꞌ Neguev, yebꞌpaxo sat ej akꞌal,» xhi yaꞌ.
Yu ismanhkꞌomal ebꞌnaj Israel yuxin ilaxto ebꞌnaj chejabꞌo bꞌey hunteqꞌanxa nan konhobꞌal
8 Yaqꞌni Komam Jahawil istzotiꞌ tet yaꞌ Zacarías, yalni yaꞌ hakaꞌ tiꞌ:
9 «Hak tiꞌ chiyute yalni Komam Yahawil:
“Hayet cheyilni yinh tzet chiꞌeliko hunu maka,
haꞌ istoholal chewatxꞌe yinh, kꞌulchꞌanojabꞌ cheyute hekꞌul,
yebꞌ tzꞌayojabꞌ hekꞌul teyinh hunun hex.
10 Mach cheyeta ebꞌix hunix yebꞌ nixhte mebꞌaꞌ unin,
yebꞌpaxo anma nan konhobꞌal ay texol, yebꞌpaxo anma mebꞌaꞌ.
Mach chiꞌekꞌpaxo yinh heyanma hewatxꞌen istxꞌojal teyinh hunun hex,” xhi Komam.»
11 Yajaꞌ mach yabꞌeto anma tzet yal Komam, haꞌ yichinh anma yati yinh sat Komam, ismajchen istxikin yunhe mach chabꞌe. 12 Yaqꞌni kawbꞌo anma yanma hakaꞌ chꞌen diamante, yunhe mach chiyabꞌeto anma chejbꞌanile chal Komam Dios, Yahawil yinh Sunil, yebꞌ mach yabꞌe anma istzotiꞌ Komam yaqꞌ yu Yespíritu yu ebꞌyaꞌ ischejabꞌ yet payat.
Yuxin kaw yíkanti Komam Dios, Jahawil ishowal yinh ebꞌnaj. 13 Yalni Komam: «Hayet wawihan yinh ebꞌnaj, mach yabꞌe ebꞌnaj tzet walan, haxa yet yahwi ebꞌnaj winhan xin, mach wabꞌepaxojan tzet yal ebꞌnaj. 14 Yuxin sajlemito ebꞌnaj wuhan yulaj ej konhobꞌ mach ohtabꞌilo yu ebꞌnaj, hakaꞌ chu isxunito hunu nimeta kajtuxkum hunu tzet ye tuꞌ. Iskankano tzꞌinhno istxꞌotxꞌ ebꞌnaj yintaj; matxa hunu mak xin chiꞌeltoj maka chiꞌoktoj. Haꞌ istxꞌotxꞌ ebꞌnaj kaw ochebꞌil, haꞌ kaw ebꞌnaj anikaniko txꞌotxꞌ hakaꞌ txꞌotxꞌ desierto,»a xhi Komam.