Chischah konhobꞌ Jerusalén iskꞌulal iskꞌul Komam Dios hunelxa
8
Yaqꞌ Komam Dios, Yahawil kaw Aykano Yip, istzotiꞌ wetan, yalni hakaꞌ tiꞌ:2 «Hanin Yahawil yinh Sunil, hankawhinan chiwalan hakaꞌ tiꞌ:
“Kaw xahan ay anma ah Jerusalén wuhan, kaw tzꞌeꞌ hinan yinh,
yuxin kaw ayko inhowalan yinh mak ayko ishowal yinh Jerusalén.”
3 »Yalnipaxo Komam:
Xaꞌinwatxꞌekanhan konhobꞌ Jerusalén,
chixinquinehikꞌojan yul konhobꞌ tuꞌ;
hak tuꞌ xin chihal-lax yinh Jerusalén, “konhobꞌ Yijem.”
Haxapaxo huneꞌ wonhan wetan, hanin Yahawil yinh Sunil,
wonhan Yetnhe Komam yehi, chihal-lax yinh,» xhi Komam.
4 Chalnipaxo Komam Dios, Yahawil yinh Sunil:
«Haꞌ ebꞌnaj icham winaj yebꞌ ebꞌix ixnam ix chiꞌekꞌo yul isbꞌehal Jerusalén hunelxa,
ayko isqꞌojoch yul isqꞌabꞌ, yu kaw ayxa ishabꞌilal.
5 Yul isbꞌehal konhobꞌ tuꞌ nohnalo yu nixhte winaj unin yebꞌ nixhte ix unin,
kat xin istzajchi yul isbꞌehal konhobꞌ tuꞌ,» xhi Komam.
6 Yalnipaxo Komam Dios, Yahawil yinh sunil:
«Hayet chiyuni tuꞌ, haꞌ anma aytokano yul konhobꞌ tiꞌ kaw chikꞌayo iskꞌul yilni,
wal hinan xin mach kꞌaybꞌalkꞌuleho yul insatan,» xhi Komam.
7 Chalnipaxo Komam Dios Yahawil kaw aykano yip:
«Haninan chinkolan inkonhobꞌan yul isqꞌabꞌ txꞌotxꞌ konhobꞌ ayko yinh yetkꞌulal bꞌay chiꞌahilo tzꞌayik,
yebꞌ bꞌey txꞌotxꞌ ayko yinh yetkꞌulal bꞌay chito tzꞌayik.
8 Chiwitijan kat ye yul konhobꞌ Jerusalén,
kat yok ebꞌnaj inkonhobꞌojan,
kat xin wokan isDioso ebꞌnaj, hanin kaw yel tzet chiwalan,
yebꞌ tohol tzet chinwatxꞌehan,» xhi Komam.a
9 Hak tiꞌ chute yalnipaxo Komam Dios Yahawil Kaw Aykano Yip:
«Aweko yip heyanma hex lanhan heyabꞌen tzotiꞌ chiyal ebꞌnaj inchejabꞌan
lahan hakaꞌtikꞌa hal-lax yet yichelaxiko yalaxayto xeꞌ watutan, hanin Yahawil yinh sunil.
10 Yet yalanhto hunteqꞌan tzꞌayik tuꞌ machi bꞌay chitit istohol ebꞌnaj munlawom yebꞌ istohol noꞌ cheh chimunlahi.
Yu ebꞌnaj ayko ishowal yinh yuxin chixiw anma yelti yul konhobꞌ yebꞌ yokto yul konhobꞌ,
wal xin, haninan wakojan anma tuꞌ howal yinh hunun.
11 Yaj wal tinanh matxa hako tuꞌ chiwutehan yinh ebꞌnaj xato kankano yul konhobꞌ tiꞌ,
hakaꞌ yinh hunteqꞌan tzꞌayik tuꞌ,» xhi Komam Yahawil yinh Sunil.
12 Yalnipaxo Komam: «Wal xin yinhxa aqꞌankꞌulal chiꞌeh ebꞌnaj;
haꞌ teꞌ uva kaw chiyaqꞌ sat teꞌ, kat yaqꞌnipaxo txꞌo txꞌotxꞌ sat tzꞌunubꞌ,
haxa satkanh chitxinayti nhabꞌ.
Haninan chiwaqꞌan sunil tuꞌ tet mak chitokankano yul konhobꞌ tiꞌ.
13 Hakaꞌtikꞌa heyu hex Judá yebꞌ hex Israel,
alaxayo tzꞌaktiꞌ teyibꞌanh xol sunil nimeta konhobꞌ,
haxa tinanh xin chexinkolilojan, hak tuꞌ xin chal-laxi tato ayayo isyaxilal teyibꞌanh.
Mach chexxiwi, aweko yip heyanma,» xhi Komam.
14 Komam Dios, Yahawil Kaw Aykano Yip, chalni hakaꞌ tiꞌ: «Hakaꞌtikꞌa yu intxumnihan wanayojan isyaꞌtajil yibꞌanh ebꞌnaj heyichmam, yu yaqꞌtij ebꞌnaj inhowalan, haꞌ tzet intxum tuꞌan, mach ekꞌayo yet yijni isbꞌa wuhan. 15 Yajaꞌ wal tinanh xin mantxuman inwatxꞌenan iskꞌulal yinh konhobꞌ Jerusalén, yebꞌ yinh anma ah Judá tiꞌ; yuxinto matzet chal hekꞌul, mach chexxiwi. 16 Haꞌ huneꞌ wal heyuten hebꞌa, haꞌ ton tiꞌ: Haꞌ isyelal, haꞌ cheyal teyet hunun hex, chewatxꞌen istoholal yet cheyilni yinh tzet chiꞌeliko hunu maka. Yebꞌ haꞌ aqꞌankꞌulal chesayiloj yet chexok sata naj juez. 17 Machojabꞌ istxꞌojal chꞌekꞌ yinh henabꞌal yinh heyet anmahil; machojabꞌ cheyalpaxo leqꞌtiꞌal, lahwi tuꞌ, cheyalni ta kaw yeli. Yuto sunil hunteqꞌan tuꞌ chinyahan,» xhi Komam.
18 Hul istzotiꞌ Komam Dios Jahawil wetan, Yahawil Kaw Aykano Yip, yalni hakaꞌ tiꞌ: 19 «Hak tiꞌ chiwute walnihan, hanin Yahawil yinh sunil: Hayet mach chexwaꞌi yu hetxahli yinh iskanh ixahaw, yebꞌ yinh ishoꞌ ixahaw, yebꞌ yinh ishuj ixahaw, yebꞌpaxo yinh 10 (islahonhebꞌ) ixahaw, chimeltzoko yinh tzalahilal yebꞌ yinh qꞌinh kaw ay yelapnoj yu anma ah Judá. Yuxin xahannhewe isyelal yebꞌ aqꞌankꞌulal,» xhib Komam.
20 Haꞌ Komam Dios, Yahawil Kaw Aykano Yip, hak tiꞌ chiyute yalni hakaꞌ tiꞌ:
«Ayto xin istit anma yul hunteqꞌan nimeta konhobꞌ.
21 Chihul anma yul huneꞌ konhobꞌ,
kat yalni tet hunxa konhobꞌ hakaꞌ tiꞌ:
“¡Tonhwe kosayaꞌ Komam Dios, Yahawil kaw aykano yip,
kat xin koqꞌanni iskꞌulal Komam jibꞌanh!” xhi anma.
Haxa hunteqꞌanxa anma chalni: “¡Hakonh tuꞌanh, chonhtopaxojanh!” xhi.
22 Kat xin yul bꞌey konhobꞌ Jerusalén txꞌiꞌal ej konhobꞌ,
yebꞌ ej nimeta konhobꞌ kaw aykano yip,
saywal winhan, hanin Yahawil yinh sunil.
Chihul anma isqꞌanaꞌ inkꞌulalan yibꞌanh,» xhi Komam.
23 Yalnipaxo Komam Dios, Yahawil kaw Aykano Yip: «Haꞌ yinh hunteqꞌan tiempo tuꞌ, 10 (lahonhwanh) anma nananta konhobꞌal, chiꞌoktzabꞌno yinh xil isqꞌap hunu naj Israel, chiyalni hakaꞌ tiꞌ: “Chonhtohanh tekꞌatanh, yuto xajabꞌehanh tato ayko Komam Dios heyetbꞌihoj,” xhi anma,» xhi Komam.