5. ISYAꞌTAJIL AY YIBꞌANH EJ KONHOBꞌ AYAYO ISKAWILAL JERUSALÉN
(9:1-8)
9
Haꞌ hunteqꞌan tzotiꞌ tiꞌ halbꞌilkano yu Komam Dios Jahawil ta chul isyaꞌtajil yibꞌanh txꞌotxꞌ Adrac yebꞌ yibꞌanh konhobꞌ Damasco: «Yuto ohtabꞌil hunteqꞌan konhobꞌ tuꞌ yu Komam Jahawil, hakaꞌ yohtanhen Komam hunun majan ebꞌnaj Israel. 2 Haxa konhobꞌ Hamat ayayo yul ismohonal txꞌotxꞌ Adrac ohtabꞌilpaxo yu Komam Dios, yebꞌpaxo xin konhobꞌ Tiro yebꞌ konhobꞌ Sidón, waxanhka xin kaw ay ishelanil hunteqꞌan konhobꞌ tuꞌ. 3 Haꞌ konhobꞌ Tiro, iswatxꞌeko iskꞌubꞌal, istenbꞌankanh isplata hakaꞌ pojoj; istenbꞌanpaxokanh chꞌen oro hakaꞌ tzꞌotzꞌew. 4 Yajaꞌ chilo Komam Dios sunil isqꞌalomal, kat yanayto Komam isqꞌalomal tuꞌ xol haꞌ mar, kat istzꞌalo konhobꞌ tuꞌ yu qꞌa qꞌaꞌ.5 »Hayet chiyilni konhobꞌ Ascalón konhobꞌ Tiro tuꞌ kat isxiwkanokanh; haxa konhobꞌ Gaza niman isyaꞌilal chabꞌe. Haxa konhobꞌ Ecrón chabꞌepaxo isyaꞌil, yuto haꞌ tzet ayko yipo iskꞌul chikꞌaytzelaxiloj. Haxa konhobꞌ Gaza, chikankano yinh manh reyal; haxa konhobꞌ Ascalón matxa hunu mak chiꞌeyayo yul. 6 Haxa konhobꞌ Asdod, anma chiꞌeyayo bꞌey tuꞌ, chissomto isbꞌa yebꞌ anma nananta konhobꞌal. Hak tuꞌ chu istanhkanilo isloloꞌal ebꞌnaj filisteo wuhan.a 7 Noꞌ chibꞌe aytoko ischikꞌil yinh, chiskꞌux ebꞌnaj, chiwilojan noꞌ yinh istiꞌ ebꞌnaj. Matxa chiꞌokpaxto yul istiꞌ hunteqꞌan itah txahul hakaꞌ yalni chejbꞌanile. Haxa xol hunteqꞌan anma tuꞌ ayto mak chitokani, chiꞌokkano xin wetojan, niman yelapno chiꞌeliko bꞌey Judá. Haxa anma ah Ecrón, lahan chukano hakaꞌ ebꞌnaj Jebuseo.b 8 Ayinikojan yetbꞌiho inkonhobꞌan, yunhe intanhenan, hak tuꞌ xin machi hunu mak chiꞌeltoj yebꞌ machi hunu mak chiꞌekꞌto bꞌey tuꞌ. Matxa hunu mak chihuli, kat yok kexyetanoj, yuto haninan kaw chiwilan inkonhobꞌtuꞌan yu isbꞌaqꞌ insatan,» xhi Komam.
6. HUNEꞌ ISREYAL KONHOBꞌ ISRAEL CHITOHULI
(9:9-17)
9 Yalni Komam: «¡Tzalahanhwej hex ah konhobꞌ Sión.
Elojabꞌ heyaw yu tzalahilal hex ah konhobꞌ Jerusalén!
Ilwekꞌanabꞌi, chihul hereyal texol,
kaw toholkanoj, haꞌ chiꞌaqꞌni kolbꞌanile,
kaw xin chewchotanhe, ayahto yibꞌanh huneꞌ noꞌ tzeh burro,
yunin huneꞌ noꞌ miꞌe burro.c
10 Haꞌ iscarruaje konhobꞌ Efraín chintanhtzelojan,
yebꞌpaxo xin ischeh konhobꞌ Jerusalén.
Yebꞌpaxo teꞌ litꞌ chaqꞌbꞌalnhe ebꞌnaj yinh howal, chinqꞌahkantojan.
Haꞌ herey chihalnikꞌo aqꞌankꞌulal tet ej txꞌotxꞌ konhobꞌ;
kat xin yok yahawiloj, chiꞌichiti bꞌey istiꞌ haꞌ mar masanta bꞌey istiꞌ hunxa mar;
bꞌey haꞌ Éufrates, masanta bꞌay chikachnakan apno txꞌo txꞌotxꞌ.
11 Hex ah Jerusalén, yu intratohan waqꞌan teyet,
huneꞌ yij isbꞌa yu ischikꞌil noꞌ xahanbꞌal, yuxin chexinkolilojan.
Haninan kexwihtijan yul kꞌuh nahat yich,
bꞌay machi ha haꞌ yul, bꞌay preso heyekoj.
12 Hex ayexiko preso, ayinikojan yipo hekꞌul,
meltzanhwe bꞌay kaw kꞌul heyehi.
Chiwalan teyet tato chiwaqꞌ meltzohojan isyaxil teyibꞌanh,
ekꞌbꞌalto ispaj chiwaqꞌan teyet.
13 Xaꞌinwatxꞌehan inlitꞌan, haꞌ ton Judá;
inwatxꞌenpaxojan isbꞌaqꞌ inlitꞌ tuꞌan, haꞌ ton Efraín.
Hex ah Sión, chexwutekojan hakaꞌ chꞌen espada;
chiwanikojan heyuninal howal yinh yuninal ebꞌnaj ah Grecia,» xhi Komam.
14 «Haꞌ kaw Komam Jahawil chisye isbꞌa yibꞌanh iskonhobꞌ,
hakaꞌ isjepla kꞌuh, hak tuꞌ isto isbꞌaqꞌ islitꞌ.
Haꞌ Komam Dios Jahawil chꞌoqꞌtzen chꞌen trompeta,
kat yekꞌto lemna xol ishowal jaqꞌeqꞌ chitit bꞌey sur.
15 Haꞌ Komam Dios, Yahawil kaw Aykano Yip, haꞌ chikolwa yinh iskonhobꞌ,
haꞌ ton ebꞌnaj Israel, kat yaqꞌni Komam yip ebꞌnaj isxanhobꞌtanhen isbꞌaqꞌ islitꞌ ebꞌnaj chihulwa yinh,
kat istanhtzenilo ebꞌnaj ebꞌnaj ayko ishowal yinh.
Toxanhe chiꞌel yaw ebꞌnaj iskonhobꞌ Komam tuꞌ,
yaqꞌni howal hakaꞌ ukꞌum.
Chimalkanto ischikꞌil ebꞌnaj ayko ishowal yinh ebꞌnaj,
hakaꞌ chiyu ismalto ischikꞌil noꞌ xahanbꞌal ayayto yul pechꞌan yibꞌanh istxikin ismexhahil yet xahanbꞌal.
16 Haꞌ Komam Jahawil, isDiosal ebꞌnaj,
haꞌ chikolwa yinh ebꞌnaj yinh huneꞌ tzꞌayik tuꞌ,
yuto hakaꞌ ismeꞌ Komam yeko iskonhobꞌ.
Hakaꞌ istzejtzon chꞌen diamante yinh diadema,
hak tuꞌ chiꞌeliko ebꞌnaj yul iskonhobꞌ, chiꞌilaxkanh ebꞌnaj.
17 Hak tuꞌ xin kaw kꞌul iskonhobꞌ Komam,
yebꞌ kaw kꞌulchꞌan jilni.
Yu kaw nimankano ixim trigo yebꞌ teꞌ vino,
yuxin kaw saqꞌal chu ischꞌibꞌ ebꞌnaj tzehtaj yebꞌ ebꞌix qꞌopotaj.»