7. KOMAM JAHAWIL CHISKOLILO ISKONHOBꞌ
(10:1–11:3)
10
Qꞌanwe haꞌ nhabꞌ tet Komam Jahawil,haꞌ chaqꞌ yinh tzujanxa,
Komam chꞌanotij kꞌuh, kat yaqꞌno haꞌ nimeta yaxnhabꞌ,
kat ischꞌibꞌ tzꞌunubꞌ sat hetxꞌotxꞌ hunun hex.
2 Yajaꞌ wal tzet chispajtze ej tioxh matzet chal yelapnoj.
Leqꞌtiꞌalpaxo tzet chiyal ebꞌnaj txumlum;
haꞌ tzet chiyal ebꞌnaj, hunteqꞌan tzet chiyil yinh iswayik machi yelapnoj.
Haꞌ tzet chaqꞌ ebꞌnaj yipo iskꞌul anma, machi nino iskꞌulal.
Yuxin chikꞌayikꞌo huneꞌ konhobꞌ tuꞌ, hakaꞌ noꞌ meꞌ,
chixin ekꞌyaꞌ yuto machi mak chitanheni.
3 Yu tuꞌ yuxin chiyal Komam Dios Jahawil hakaꞌ tiꞌ:
«Chiwiti inhowalan yinh ebꞌnaj chitanhen inkonhobꞌan.
Chiwayojan isyaꞌtajil yibꞌanh ebꞌnaj chiꞌijbꞌali.
Hanin Yahawil yinh Sunil, chihulan wilaꞌ inmeꞌan,
haꞌ ton ebꞌnaj titna yinh naj Judá,
kat wanikojan ebꞌnaj inchejabꞌojan,
kat wanikojan ebꞌnaj hakaꞌ noꞌ cheh kaw ay yip yet howal.
4 Haꞌ xol ebꞌnaj tuꞌ, chꞌelti chꞌen chꞌen chꞌok xeꞌo nha,a
yebꞌ teꞌ estaca, bꞌay chiximlax istxam qꞌap mantiado,
chiꞌok nhahil, yebꞌpaxo teꞌ litꞌ yet howal.
Xol ebꞌnaj tuꞌ chiꞌelpaxti ebꞌnaj ijbꞌalom.
5 Lahan xin chꞌelokoj ebꞌnaj hakaꞌ ebꞌnaj soldado, chixanhikꞌoj mak ayko ishowal yinh xol tzꞌotzꞌew yul bꞌeh.
Chiqꞌoji ebꞌnaj yinh howal, yuto Komam Jahawil ayko yetbꞌiho ebꞌnaj.
Chꞌelkano istxꞌixobꞌal ebꞌnaj ayahto yibꞌanh cheh yu ebꞌnaj.
6 Haninan chiwaqꞌan yip yanma yuninal yaꞌ Judá,
kat inkolnihan yuninal yaꞌ José.
Chiwaqꞌ meltzohojan ebꞌnaj bꞌaytikꞌa aya,
yuto chitzꞌayo inkꞌulan yinh ebꞌnaj.
Kat iskanpaxo ebꞌnaj hunelxa hakaꞌtikꞌa,
machi wilojan ebꞌnaj yinh inkꞌulan.
Yuto hanin Yahawilintiꞌan isDiosal ebꞌnaj,
haninan xin chiwabꞌehan istxah ebꞌnaj.
7 Kaw ay yip yanma ebꞌnaj Israel, hakaꞌ ebꞌnaj soldado;
kat xin yaqꞌni tzalaho iskꞌul ebꞌnaj hakaꞌ mak chiꞌukꞌni vino.
Hayet chiyilni yuninal ebꞌnaj huneꞌ tuꞌ, kat istzalapaxo iskꞌul.
Kat yaqꞌni tzalaho yanma ebꞌnaj winhan, Yahawilintiꞌan.
8 Chinxuqꞌabꞌlihan tet ebꞌnaj, yunhe inkutxbꞌanikojan ebꞌnaj, yuto kolbꞌilxalo
ebꞌnaj wuhan; kat ispohchakanh isbꞌisil ebꞌnaj hakaꞌ yet payat.
9 Haninan waqꞌan sajlemoto ebꞌnaj yulaj konhobꞌ.
Waxanhka kaw nahat konhobꞌal bꞌay aykanto ebꞌnaj,
chimeltzo ebꞌnaj yebꞌ yuninal hunelxa.
10 Haninan chiwaqꞌmeltzohotijan ebꞌnaj bꞌey Egipto.
Chiwipaxtijan ebꞌnaj bꞌey Asiria,
chiwanayojan ebꞌnaj sat txꞌotxꞌ Galaad yebꞌ txꞌotxꞌ Líbano; matxa chabꞌe bꞌay chiꞌay ebꞌnaj.
11 Hayet chiꞌekꞌto ebꞌnaj xol isyaꞌtajil hakaꞌ xol haꞌ mar,
haninan chiwilojan yipal haꞌ mar tuꞌ.
Chiwaqꞌni tajolojan haꞌ Nilo, matxa nino haꞌ chikan yich,
kat intanhtzenilojan isloloꞌal txꞌotxꞌ Asiria.
Chiwaqꞌni lahwojan yip ebꞌnaj yahawil Egipto.
12 Haninan xin chiwaqꞌan yip inkonhobꞌan.
Wuhan yuxin chislahiko ebꞌnaj yinh isbꞌel,» xhi Komam Jahawil.