11
Ishajabꞌ ispultahil txꞌotxꞌ Líbano, kat istzꞌalo sunil teꞌ cedro yu qꞌa qꞌaꞌ.2 Oqꞌ teꞌ tzꞌisis, yuto xaꞌaykꞌay teꞌ cedro;
teꞌ qꞌebꞌtaj nanxa islow iskꞌulal, tanhkanilo teꞌ.
Oqꞌojabꞌ teꞌ hih ay bꞌey txꞌotxꞌ Basán, yuto tzetkꞌa teꞌ qꞌebꞌtaj tanhiloj.
3 Haxa ebꞌnaj tanhem meꞌ yako ebꞌnaj yul isnuqꞌ,
yuto teꞌ telaj kaw saqꞌalkanoj tanhkaniloj.
Haxa noꞌ yunin bꞌalam, kaw chiqꞌanhikano yul isnuqꞌ noꞌ,
yuto haꞌ iskꞌulchꞌanil jilni txꞌotxꞌ ayayo istiꞌ haꞌ Jordán tanhkaniloj.
8. KAWANH MAK TANHEM MEꞌ
(11:4-17)
Ebꞌnaj tanhem meꞌ suk iskꞌul
4 Yalni Komam Dios Jahawil, Komam inDiosalan hakaꞌ tiꞌ: «Tanhe hunteqꞌan noꞌ meꞌ yetxa ay iskami. 5 Ebꞌnaj chiloqꞌni noꞌ chispotxꞌkamo ebꞌnaj noꞌ, machi xin ismul ebꞌnaj, yalni. Haxa ebꞌnaj chitxonhni noꞌ, chalpaxo ebꞌnaj hakaꞌ tiꞌ: “Yuchꞌandios tet Komam Dios makonhqꞌalombꞌikanh,” xhi. Nitam ebꞌnaj chitanhen noꞌ meꞌ tuꞌ chitzꞌay iskꞌul yinh noꞌ. 6 Yuxin hakinpax tuꞌan mach chitzꞌay inkꞌulan yinh anma ay sat txꞌo txꞌotxꞌ tiꞌ, hanin Yahawilintiꞌan chiwalan hakaꞌ tuꞌ. Haninan chiwakojan hunun ebꞌnaj yul isqꞌabꞌ makta ayayo iskawilal, yebꞌpaxo yul isqꞌabꞌ ebꞌnaj isreyal ebꞌnaj. Haꞌ ebꞌnaj tuꞌ chitanhtzenilo sunil tzet ay sat txꞌotxꞌ, machi xin chinkolilojan anma tuꞌ yul isqꞌabꞌ ebꞌnaj,» xhi Komam.
7 Hak tuꞌ yu wokan intanhenojan noꞌ meꞌ yetxatikꞌa ay iskami, haꞌ ton noꞌ machi yip xol noꞌ tuꞌ. Haꞌ ebꞌnaj chiloqꞌni noꞌ xin, haꞌ chiꞌaqꞌni intoholan. Insaynihan kabꞌebꞌ inqꞌojochan, huneꞌ teꞌ wakojan isbꞌi hakaꞌ tiꞌ, Kꞌulchꞌan iskꞌul, haxa hunxa teꞌ xin wakojan isbꞌi hakaꞌ tiꞌ, Hunbꞌabꞌilayoj. 8 Haꞌ yinh huneꞌ ixahaw wilojan oxwanh ebꞌnaj chitanhen noꞌ meꞌ, yuto matxa nimano inkꞌulan yinh ebꞌnaj, yebꞌpaxo yu matxa chiyoche ebꞌnaj kinyilaꞌan.
9 Walnihan tet noꞌ meꞌ tuꞌ hakaꞌ tiꞌ: «Matxa chinokan kexwilaꞌan tinanh, tato ay hunujex chexkami, kamanhwej, yebꞌ tato ay hunujex chexkꞌaytoj, kꞌayanhwetoj. Haxa hex chito kexkani, kꞌuxleweyto hebꞌa hunun hex,» kinchihan.
10 Wal hinan xin, wikanhan inqꞌojochan, huneꞌ chiyij Kꞌulchꞌan iskꞌul, inqꞌahnitojan teꞌ, haꞌ yeniloj tato chitanhkano tzet tꞌinhbꞌabꞌilkano yu Komam Jahawil iswatxꞌe yebꞌ ej iskonhobꞌ. 11 Haꞌ yinh huneꞌ tzꞌayik tuꞌ, tanhkano huneꞌ tzet tꞌinhbꞌabꞌilkano yu Komam. Hak tuꞌ xin yu yohtanhenilo ebꞌnaj txonhnilo noꞌ meꞌ tato haꞌ Komam Jahawil lanhan isyeni huneꞌ kuybꞌanile tuꞌ yinh tzet chiwuhan.
12 Walnihan tet ebꞌnaj hakaꞌ tiꞌ: «Ta kꞌul cheyabꞌe aqꞌwe intoholan, taka mach xin kanojabꞌ hakaꞌ tuꞌ,» kinchihan tet ebꞌnaj. Haꞌ intoholan yaqꞌ ebꞌnaj, haꞌ ton 30 (lahonhebꞌ iskawinaj) chꞌen plata.
13 Yalni Komam Jahawil wetan: «Ayto chꞌen yul yet kꞌuwanbꞌal. ¡Huneꞌ istohol kaw niman chute isnahni ebꞌnaj!» xhi Komam. Winikanhan chꞌen 30 (lahonhebꞌ iskawinaj) plata tuꞌ, wanaytojan chꞌen yul kꞌuwanbꞌal yul Yatut Komam Jahawil.a 14 Inqꞌahnitojan hunxa teꞌ qꞌojoch chiyij Hunbꞌabꞌilayoj. Hak tuꞌ yu iskankano konhobꞌ Judá yebꞌ konhobꞌ Israel hakaꞌ matxa yuxhtajo isbꞌa.
15 Yalnipaxo Komam Jahawil wetan hakaꞌ tiꞌ: «Ute habꞌa hakaꞌ hunu naj tanhem meꞌ, yajaꞌ machi nino chꞌahilo iskꞌul istanhen ismeꞌ. 16 Yuto chiwakojan yul huneꞌ konhobꞌ tiꞌ huneꞌ yilomal mach kꞌulo chute isbꞌa, hakaꞌ hunu naj tanhem meꞌ machi ekꞌ sayson yinh noꞌ chikꞌaytoj, mach chissaypaxo noꞌ nixhtej; mach chanhtepaxo naj noꞌ chiqꞌahtoj. Machikolwapaxo naj yinh noꞌ chisikikanh yinh tzalan. Wal xin chiskꞌuxto naj noꞌ bꞌaqꞌich, kat ismaqꞌnipoho naj yisqꞌaj noꞌ, nitam yoj noꞌ chákano naj.
17 ¡Kꞌanchꞌan naj yilomal inkonhobꞌan,
mach isnabꞌal, isbꞌejkano naj yilni noꞌ!
¡Lowojabꞌ chꞌen espada yinh isqꞌabꞌ naj yebꞌ yinh isbꞌaqꞌ sat naj yinh iswatxꞌqꞌabꞌ!
¡Kamojabꞌkanilo isqꞌabꞌ naj tuꞌ, haxa isbꞌaqꞌ sat naj xin,
tanhojabꞌkanilo ismujli!» xhi Komam tet yaꞌ Zacarías.