9. KOLBꞌANILE CHIꞌAQꞌLAX TET JERUSALÉN
(12:1–13:9)
12
Haꞌ hunteqꞌan tzotiꞌ tiꞌ yal Komam Dios Jahawil yinh Konhobꞌ Israel. Komam lehnito satkanh, iswatxꞌenpaxayto xeꞌ txꞌo txꞌotxꞌ, yaqꞌnipaxo Komam iskawil anma. Hak tiꞌ chiyute yalni Komam hakaꞌ tiꞌ: 2 «Haninan chiwutekojan konhobꞌ Jerusalén hakaꞌ hunu net bꞌay chꞌayto vino, chibꞌili kat yekꞌtekton sunil konhobꞌ ayko yinh ishoyanil, yet chipitwako yaniko howal yinh Jerusalén yebꞌ yinh ej konhobꞌ ay yul Judá. 3 Haꞌ yinh hunteqꞌan tzꞌayikal tuꞌ chiwutekojan konhobꞌ Jerusalén hakaꞌ hunu chꞌen chꞌen kaw al yinh ej konhobꞌ. Haꞌ mak chiꞌochen yiqꞌaꞌkanh chꞌen, chiqꞌahto yu chꞌen. Sunil ej konhobꞌ ay sat txꞌo txꞌotxꞌ tiꞌ chiskutxbꞌako isbꞌa howal yinh Jerusalén. 4 Haꞌ yinh huneꞌ tzꞌayik tuꞌ, chiwakojan xiwkilal yinh noꞌ cheh kutxaniko bꞌey tuꞌ; haxa ebꞌnaj ayahto yibꞌanh noꞌ, chisomchakanh yul iswiꞌ ebꞌnaj. Yaj wal konhobꞌ Judá chintanhehan, haxa ischeh hunteqꞌanxa konhobꞌ tuꞌ chiwakojan noꞌ yinh tzꞌopsatil. 5 Haxa yet chiyilni ebꞌnaj yahawil yinh Judá huneꞌ tuꞌ, chalni ebꞌnaj yinh yanma hakaꞌ tiꞌ: “Haꞌ Komam Dios, Yahawil yinh Sunil, isDiosal anma ay bꞌey Jerusalén, haꞌ Komam chꞌaqꞌni yip anma tuꞌ,” xhi ebꞌnaj. 6 Haꞌ yinh huneꞌ tzꞌayik tuꞌ chiwutekojan ebꞌnaj yahawil Judá hakaꞌ tzaqꞌaꞌ kaj txaltxonhe chiꞌalaxikto xol teꞌ siꞌ, yebꞌ hakaꞌ hunu topan xaj qꞌa qꞌaꞌ chiꞌalaxiko yinh hunu yachan ixim trigo, kat yok qꞌaꞌ yinh sunil ej konhobꞌ hoyaniko yinh Jerusalén, konhobꞌ ayko yinh iswatxꞌqꞌabꞌ yebꞌ yinh ismekqꞌabꞌ. Wal anma ah Jerusalén chiꞌehpaxayo yul iskonhobꞌ Jerusalén hunelxa.7 »Haꞌ Komam Dios Jahawil, haꞌ yinh bꞌabꞌel chiskolilo Komam ebꞌnaj Judá, yunhe machi palkꞌon ismay ebꞌnaj yuninal yaꞌ David yebꞌ anma ah Jerusalén, yibꞌanh ebꞌnaj Judá tuꞌ. 8 Haꞌ yinh huneꞌ tzꞌayik tuꞌ, haꞌ Komam Dios Jahawil chiꞌilni anma ay yul konhobꞌ Jerusalén. Haꞌ mak machi yip xol anma tuꞌ, haꞌ yinh huneꞌ tiempo tuꞌ, kaw ay yip chiꞌelkaniko hakaꞌ yaꞌ rey David. Haxapaxo ebꞌnaj yuninal yaꞌ rey David, lahan chiꞌeliko ishelanil hakaꞌ Komam Dios, maka hakaꞌ yángel Komam Jahawil bꞌabꞌi sata ebꞌnaj.»
9 Chalni Komam: «Haꞌ yinh hunteqꞌan tzꞌayik tuꞌ, chiwako yinh inkꞌulan intanhtzenilojan sunil hunteqꞌan konhobꞌ chihul howal yinh konhobꞌ Jerusalén. 10 Chiwakojan yinh isnabꞌal ebꞌnaj yuninal yaꞌ rey David yebꞌ anma ay yul konhobꞌ Jerusalén huneꞌ iskꞌulchꞌannhen iskꞌul yebꞌ nabꞌale yok yinoyo isbꞌa wetan. Haꞌ xin yet chitꞌanhxiko ebꞌnaj winhan, hanin isqꞌaxpokꞌto ebꞌnaj islanza winhan, kat yok ebꞌnaj oqꞌoj hakaꞌ yoqꞌ hunu anma yinh hunu kꞌitan iskꞌahol chikami, kat xin yiqꞌnipaxo ebꞌnaj bꞌiskꞌulal hakaꞌ chu yiqꞌni hunu mak bꞌiskꞌulal yinh isbꞌabꞌel kꞌahol chikami. 11 Haꞌ yinh huneꞌ tzꞌayik tuꞌ kaw ay oqꞌil yul konhobꞌ Jerusalén, hakaꞌ oqꞌil yu anma yinh tioxh Hadad-rimón bꞌey yul yakꞌalil txꞌotxꞌ Meguido. 12 Sunil anma ay yul txꞌotxꞌ konhobꞌ tuꞌ, chiꞌok yinh oqꞌil, hunun ismajanil anma nananta chiꞌok oqꞌoj. Ebꞌnaj titna yinh yuninal yaꞌ rey David nananta chiꞌok oqꞌoj, nanpaxo xin chꞌok yixal ebꞌnaj oqꞌoj. Hakpax tuꞌ ebꞌnaj titna yinh yuninal naj Natán nananta chꞌok oqꞌoj, nanpaxo xin chꞌok yixal ebꞌnaj oqꞌoj. 13 Hakpax tuꞌ ebꞌnaj titna yinh yuninal yaꞌ Leví, nan chiꞌoqꞌi, nan chiꞌokpaxo yixal ebꞌnaj oqꞌoj. Hakpax tuꞌ ebꞌnaj titna yinh yuninal naj Simei, nan chiꞌok ebꞌnaj oqꞌoj, nan chiꞌokpaxo yixal ebꞌnaj oqꞌoj. 14 Yebꞌ hunteqꞌan ebꞌnaj titna yinh hunmajanxa anma, nan chiꞌokpaxo ebꞌnaj oqꞌoj, nan chiꞌokpaxo yixal ebꞌnaj oqꞌoj,» xhi Komam.