13
Yalnipaxo Komam: «Haꞌ yinh huneꞌ tzꞌayik tuꞌ, ay huneꞌ isnuqꞌ ha haꞌ chihajcha tet ebꞌnaj yikꞌal yaꞌ rey David, yebꞌ anma ay yul konhobꞌ Jerusalén, yunhe istxꞌahlaxilo ismul yebꞌ xin istzꞌilal.»a 2 Hanin Yahawil yinh Sunil, hankawhinan chiwalan hakaꞌ tiꞌ: «Haꞌ yinh huneꞌ tiempo tuꞌ, haꞌ yul txꞌotxꞌ konhobꞌ Israel chiwikanilojan sunil tzet chal-lax tioxhal, matxa bꞌaqꞌinhal chinahlaxti isbꞌi. Chiwipaxilojan sat txꞌotxꞌ konhobꞌ tiꞌ ebꞌnaj chal isbꞌa inchejabꞌojan; yebꞌpaxo sunil nabꞌale yet istxꞌojal.3 »Hayet tuꞌ, ta ay hunu mak chalnikꞌo intzotiꞌan chute yalni; haxa ismam yebꞌ ismiꞌ chalni tet hakaꞌ tiꞌ: “Hach tiꞌ chaxhkamoj, yuto chalinhbꞌa habꞌa hawalni leqꞌtiꞌal tzotiꞌ, hakaꞌto yet Komam Jahawil yehi,” xhi. Haxa xin ismam yebꞌ ismiꞌ huneꞌ mak tuꞌ chitejni kamoj, yet chisbꞌalniko isbꞌa inchejabꞌojan. 4 Haꞌ yinh huneꞌ tiempo tuꞌ sunil ebꞌnaj chisbꞌaliko isbꞌa inchejabꞌojan chitxꞌixwikanh ebꞌnaj yinh tzet chalikꞌoj. Matxa xin chako ebꞌnaj xilqꞌape chako ebꞌnaj inchejabꞌan yu yaqꞌni subꞌchano ebꞌnaj anma. 5 Wal xin chiyal hunun ebꞌnaj hakaꞌ tiꞌ: “Hanintiꞌan mach ischejabꞌo Dios wehan, wal xin munlawom hinan yettax unin hinan, tꞌokom txꞌotxꞌ hinan,” xhi. 6 Yajaꞌ ta ay mak chiqꞌambꞌen tet hunu ebꞌnaj: “¿Tzet ye lahwilal ayko yul haqꞌabꞌ?” Kat istaqꞌwikanh naj xin, “Okna huneꞌ lahwilal tiꞌ bꞌey yatut ebꞌnaj wamigohan,” xhi naj,» xhi Komam.
Chiꞌaqꞌlaxkamo naj chitanhen iskonhobꞌ Komam Jahawil
7 Komam Dios Yahawil yinh Sunil, chalni hakaꞌ tiꞌ:
«¡Ilaxojabꞌkanh chꞌen espada yinh naj chitanhen inmeꞌan,
haꞌ ton naj huneꞌnhe ay inkꞌatanhan!
Potxꞌlaxojabꞌ kamo naj chiꞌilni inmeꞌ tuꞌan, kat issajlemito noꞌ;
kat wokan howal yinh noꞌ yunin meꞌ tuꞌ.b
8 Haꞌ anma ay sat txꞌotxꞌ tiꞌ chiꞌaqꞌlaxkamo kabꞌ majan yet isyox majan;
hunxanhe xin huneꞌ majan chikankanoj.
9 Haꞌ hunxanhe majan anma chikankano tuꞌ,
chiwaqꞌ ekꞌo yaꞌan, yunhe isbꞌejnikano istxꞌojal.
Chiwutehan hakaꞌ iswatxꞌelaxilo chꞌen plata xol qꞌa qꞌaꞌ, yu yel istzꞌilal chꞌen;
kat inwatxꞌenilojan hakaꞌ chu iswatxꞌelaxilo chꞌen oro.
Lahwi tuꞌ chinyawtenan ebꞌnaj yinh,
kat intaqꞌwihan tet ebꞌnaj, chiwalnihan:
“Hex tiꞌ, inkonhobꞌan heyehi,” kinchihan.
Chalnipaxo ebꞌnaj:
“Haꞌ Komam Jahawil, haꞌ koDiosal,” xhi ebꞌnaj,» xhi Komam.