Kachlax anma Israel yu ismanhkꞌomal
2
»Wal tinanh hex sacerdote,haꞌ teyet chiꞌaqꞌlax huneꞌ chejbꞌanile tiꞌ:
2 Haꞌ Komam Dios Yahawil yinh Sunil, chalni hakaꞌ tiꞌ:
“Tato mach cheyije tzet chiwalan,
yebꞌ tato mach cheyako yinh hekꞌul hexiw wetan,
chiwatijan isyaꞌtajil teyibꞌanh.
Haꞌ isyaxilal waliltojan teyibꞌanh chinmeltzokojan yinh isyaꞌtajil.
Xaxin waliltojan isyaꞌtajil tuꞌ teyibꞌanh,
yuto mach cheyako yinh hekꞌul heyijen chejbꞌanile walan teyet.
3 Chexwilojan yinh hemunil. Chinqꞌojnikojan istzaꞌ no noqꞌ cheyaqꞌ yinh xahanbꞌalil yinh hesat;
hunxa xin chu heqꞌojlaxto yebꞌ istzaꞌ noꞌ tuꞌ.
4 Hak tuꞌ chu heyohtanheniloj tato haninan waqꞌan huneꞌ chejbꞌanile tuꞌ teyet,
yunhe mach chitanhilo intratohan waqꞌan tet yaꞌ Leví, heyichmam,”
xhi Komam Yahawil kaw Aykano Yip.
5 Yalnipaxo Komam: “Haꞌ intratohan waqꞌan tet heyichmam Leví,
haꞌ ton waqꞌnihan iskawil yaꞌ yebꞌ xin waqꞌnihan aqꞌankꞌulal tet.
Waqꞌan intratohan tet yaꞌ yunhe isxiw wetan.
Yaꞌ Leví tuꞌ kaw ay welapnojan yul sat,
yinipaxayo isbꞌa wetan.
6 Haꞌ isyelal tzet chal chejbꞌanile, haꞌ elti yul istiꞌ yaꞌ Leví,
machi leqꞌtiꞌal ilcha yinh tzet yal yaꞌ.
Yinh aqꞌankꞌulal yebꞌ yinh istoholal ekꞌ yaꞌ yebꞌ hinan;
txꞌiꞌal mak ispohilo isbꞌa yinh istxꞌojal yu yaꞌ.
7 Haꞌ ismunil ebꞌyaꞌ sacerdote haꞌ iskuyni anma,
kat yul anma yabꞌeno kuybꞌanile chal ebꞌyaꞌ.
Yuto ebꞌyaꞌ sacerdote, inchejabꞌan ye ebꞌyaꞌ,
hanin Yahawil yinh Sunil.
8 Wal hex tiꞌ xin xahebꞌejkano inbꞌehan;
txꞌiꞌal mak xaheyaqꞌ aykꞌayo yu kuybꞌanile cheyaqꞌa;
hex kaw hex heyetato intratohan waqꞌan tet yaꞌ Leví,”
xhi Komam Yahawil kaw Aykano Yip.
9 Yalnipaxo Komam: Yuxin kexwutekojan hakaꞌto mach heyelapno yul sat konhobꞌ,
yebꞌ xin kexwinipaxayojan yul sat,
hakaꞌtikꞌa heyute hex tiꞌ yu mach heyije chejbꞌanile walan teyet
yuto mach lahano yu hexahannhen anma,» xhi Komam.
3. KACHBꞌANILE YINH EBꞌNAJ JUDÁ YU ISBꞌEJKANO EBꞌNAJ YIXAL
(2:10-16)
10 ¿Tom mach huneꞌnhe Komam xin?
Yebꞌ xin ¿tom mach huneꞌnheho Komam Dios watxꞌenhehonh?
Yuxin ¿tzet yinh xin chijaqꞌ subꞌchaho kobꞌa hununonh,
kat jetanto istrato Komam Dios yaqꞌ tet ebꞌyaꞌ jichmam?
11 Haꞌ anma Judá, ismanhkꞌo isyijen tzet yal Komam Dios,
iswatxꞌen mule kaw yahbꞌeta bꞌey txꞌotxꞌ Israel yebꞌ bꞌey Jerusalén.
Anma ah Judá yilo ispixan Yatut Komam Dios Jahawil,
huneꞌ yatut kaw xahan ay yu Komam.
Haxa ebꞌnaj winaj, yiqꞌkanh ebꞌnaj ebꞌix ix chiyiyo isbꞌa tet hunteqꞌan komon dios.a
12 Haꞌojabꞌ Komam Jahawil chitanhtzenilo mak chiwatxꞌen hunteqꞌan istxꞌojal tuꞌ
yul kokonhobꞌ hanhonh Israelonh tiꞌ; makxanhetikꞌa,
waxanhka mak chiꞌiniti isyebꞌalqꞌabꞌ tet Komam Dios, Yahawil kaw aykano yip.
13 Chewatxꞌenpaxo huneꞌ tiꞌ,
chichakꞌanbꞌikanilo ismexhahil isxahanbꞌal Komam Jahawil yu yal hesat,
chexok oqꞌoj yinh nime bꞌiskꞌulal,
yuto matxa chitꞌanhxiko Komam yinh heyebꞌalqꞌabꞌ,
matxa chischah Komam teyet yinh tzalahilal.
14 Cheqꞌambꞌeni: «¿tzet yinh xin mach chischah Komam?» kexchi.
Wal xin haꞌ Komam Dios Jahawil xaꞌilni tato mach cheyije tzet taqꞌwebꞌil heyu yet kexmoyi yebꞌ heyixal yet tzeh hexto.
Haꞌ ebꞌix tuꞌ heyixal,
heyalni tet ebꞌix ta matxa chesay hunuxa ix yet hemohyi.
15 ¿Tom mach huneꞌnhe nimanile heye yebꞌ ebꞌix,
yebꞌ huneꞌnhe ye heyanma? ¿Tzet yinh xin huneꞌnhe ye yu Komam Dios?
Yuto heyuninal chiꞌok iskonhobꞌo Komam.
Yuxin nannhehojabꞌ heyu yinh henabꞌal,
haxinwal mach heyaqꞌ subꞌchaho heyixal bꞌay kexmoyi yet tzeh hexto.
16 Haꞌ Komam Jahawil,
koDiosal hanhonh Israelonh tiꞌ chalni hakaꞌ tiꞌ:
«Nannhehojabꞌ heyu yinh henabꞌal, mach cheyute hebꞌa txꞌojal.
Yuto hanintiꞌan chinyahan ebꞌnaj chispoh isbꞌa yebꞌ yixal,
hak tuꞌ xin chistzꞌilnheto xil isqꞌap yu istxꞌojal tuꞌ,» xhi Komam Dios Yahawil kaw aykano yip.
4. ISTZꞌAYIKAL ISYAꞌTAJIL HITZANXATIJ
(2:17–3:5)
17 Xaheyaqꞌ sikolo Komam Jahawil yu tzotiꞌ cheyala, katto xin heyalnipaxoj:
«¿Bꞌaytet yinh chijaqꞌ sikolojanh Komam?» kexchi.
Wal xin yu cheyal hakaꞌ tiꞌ:
«Maknhetikꞌa chiwatxꞌen istxꞌojal chitzala Komam Jahawil yinh,
kaw chitzala Komam yinh hunteqꞌan anma tuꞌ,» kexchi.
Hex tiꞌ mach chetzꞌun yul heyanma tato Komam Dios,
tohol tzet chiswatxꞌe Komam.