3
Komam Dios, Yahawil yinh Sunil, chalni hakaꞌ tiꞌ:«Chinchejtojan inchejabꞌan yu isto iswatxꞌeno bꞌeh insatajan.
Hanin Yahawilintiꞌan, hanin chinhesayikꞌojan,
chinokto lemnahan yul watutan.
¡Lanhan yapni naj chejabꞌ iqꞌnhe istꞌinhanil intratohan,
huneꞌ cheyoche chihuli!» xhi Komam.a
2 ¿Mak hunu chaqꞌni techaho istzꞌayikal bꞌay chul Komam?
Yebꞌpaxo ¿mak hunu chitecha yok linhno sata Komam?
Chul Komam hakaꞌ hunu qꞌaꞌ chinhusnilo istzꞌilal chꞌen chꞌen,
yebꞌ hakaꞌ noꞌ xapun chiꞌokniko yul txꞌahwobꞌal.
3 Chiꞌay tzꞌonhno Komam Dios Jahawil,
chissajnhen Komam ebꞌnaj yuninal yaꞌ Leví hakaꞌ yinilo hunu mak istzꞌilal chꞌen plata yebꞌ chꞌen oro xol qꞌa qꞌaꞌ.
Lahwi tuꞌ, kat yiniti ebꞌnaj isyebꞌalqꞌabꞌ tet Komam Jahawil,
hakaꞌ kaw yehi yinh istoholal.
4 Hak tuꞌ xin chitzala Komam Dios Jahawil yinh isyebꞌalqꞌabꞌ anma ah Judá
yebꞌ isyebꞌalqꞌabꞌ anma ah Jerusalén;
hakaꞌ yu istzala Komam yinh hunteqꞌan tiempo yet yalanhtokanoj.
5 Komam Dios, Yahawil yinh Sunil, chalni hakaꞌ tiꞌ:
«Chinhulan texol, kat wilnihan tzet chexelikoj.
Hankawinan chiwaqꞌ hinbꞌahan testigohal yinh anma kunlum yebꞌ yinh anma ixlom,
yebꞌpaxo yinh anma chiꞌaniko leqꞌtiꞌal lahwi tuꞌ chalni ta yeli;
yinh mak mach tzꞌajano chaqꞌ istohol ismunlawom,
yebꞌ yinh ebꞌnaj chiꞌetan ebꞌix hunix, yebꞌ nixhte mebꞌaꞌ unin;
yebꞌpaxo yinh mak machi watxꞌen istoholal yinh anma nan konhobꞌal,
yebꞌ yinh sunil mak mach chixiw wetan,» xhi Komam Jahawil.
5. CHꞌEN DIEZMO YEBꞌ YEBꞌALQꞌABꞌE
(3:6-12)
6 Yalnipaxo Komam Jahawil: «Hanin Yahawil hinan,
mach bꞌaqꞌinhal chinhel hinbꞌahan;
yu huneꞌ tuꞌ xin, hex yuninal yaꞌ Jacob maxhtikꞌa chitanhtzelaxkaniloj heyikꞌal.
7 Wal hex tiꞌ mach heyije kuybꞌanile aqꞌbꞌilkano teyet;
yettax hunteqꞌan tiempo yet yekꞌ heyichmam hehekꞌilo hebꞌa yinh chejbꞌanile,
mach heyije tzet chala.
Hanin Yahawil kaw Aykano Yip, chiwalan hakaꞌ tiꞌ:
“¡Meltzanhweko yul inqꞌabꞌan, kat inmeltzonpaxiko hinbꞌahan teyinh!” kinchihan.
Wal hex xin cheyal hakaꞌ tiꞌ: “¿Tzet chu komeltzokojanh tawinh?” kexchi.
8 ¿Tom kꞌul yelqꞌawi hunu anma yinh isDiosal?
Yaj wal hex tiꞌ, chexelqꞌawi winhan;
katto xin heqꞌambꞌenpaxo wetan: “¿Bꞌaytet yinh chaxhjelqꞌahanh?” kexchi.
Chexelqꞌawi yuto matxa cheyaqꞌ hediezmo yebꞌ matxa cheyaqꞌ heyebꞌalqꞌabꞌ wetan.
9 Kꞌanchꞌan hex, yuto chexokkano yalanh isyaꞌtajil hesunil,
yuto sunil huneꞌ konhobꞌ tiꞌ chinelqꞌanan.
10 Wal tinanh xin iweti sunil hediezmo kat heyanayto yul kꞌuwanbꞌal,
haxinwal ay tzet chislo ebꞌnaj chimunlakto yul watutan.
Hanin Yahawil yinh sunil, haninan chiwalan teyet,
okanhwe kinheyilweꞌan, lahwi tuꞌ kat heyilni tato mach chinhajaꞌan ispultahil satkanh,
kat wanayojan isyaxil teyibꞌanh masanto chipalkꞌonkanoj.b
11 Chiwalnipaxojan; mach chinchahan oko no noqꞌ islohnoto sat hetzꞌunubꞌ,
mach chistanhtzelo noꞌ sat tzꞌunubꞌ sat txꞌo txꞌotxꞌ tiꞌ,
yebꞌpaxo hetzꞌunubꞌ uva, mach chisbꞌej teꞌ yaqꞌni sat.
Hanin Yahawil yinh Sunil, haninan chiwalan hakaꞌ tuꞌ.
12 Sunil ej konhobꞌ chalni teyinh tato kaw saqꞌalkano heyet,
yuto hetxꞌotxꞌ bꞌay ay hex tiꞌ, kaw ochebꞌil chiꞌelkanikoj.
Hanin Yahawil yinh Sunil, chiwalan hakaꞌ tuꞌ,» xhi Komam.
6. ANMA CHIWATXꞌEN ISTOHOLAL YEBꞌ ANMA CHIWATXꞌEN ISTXꞌOJAL
(3:13-18)
13 Yalni Komam Jahawil hakaꞌ tiꞌ:
«Hex tiꞌ kaw how hetzotel winhan,
katto xin heqꞌambꞌen wetan hakaꞌ tiꞌ:
“¿Tzet istxꞌojal chijalanh tawinh?” kexchi.
14 Wal xin hak tiꞌ cheyute heyalni hakaꞌ tiꞌ:
“Nabꞌanhe chikoyije tzet chal Komam Dios.
¿Tzet chijiqꞌ yinh ta chikoyije,
kat jok yinh bꞌiskꞌulal yu komul sata Komam Dios, Yahawil yinh Sunil?
15 Hanhonh tiꞌ xajila tato haꞌ anma manhkꞌom kaw saqꞌal yehi,
yebꞌpaxo xin haꞌ anma chiwatxꞌen istxꞌojal kaw ay tzet aya,
yebꞌ xin yako ebꞌnaj Komam yinh ilwebꞌal,
machi xin isyaꞌtajil hul yibꞌanh ebꞌnaj,” kexchi,» xhi Komam.
16 Wal ebꞌnaj ay yelapno Komam Jahawil yul sat,
tzotel ebꞌnaj tet hunun,
yabꞌen Komam Jahawil tzet yal ebꞌnaj.
Istzꞌibꞌnhelax huneꞌ hum sata Komam Jahawil,
haꞌ ton bꞌay chibꞌina isbꞌi ebꞌnaj chixiw tet Komam,
yebꞌ ebꞌnaj ayko isnabꞌal yinh Komam.
17 Hak tiꞌ chute yalni Komam Dios, Yahawil yinh Sunil:
«Haꞌ yinh istzꞌayikal yet chiwilnihan tzet chiꞌeliko anma,
ebꞌnaj ay welapnojan yul sat, chiwakanikojan ebꞌnaj wuninalojan,
chiwaqꞌnihan nimankꞌulalan yinh ebꞌnaj hakaꞌ yaqꞌni nimankꞌulal hunu naj mame yinh iskꞌahol chimunla iskꞌatanh.
18 Hak tuꞌ xin chu isnachalo heyu tato mach lahano ispaj selel tzet chischah anma chiwatxꞌen istoholal yebꞌ anma chiwatxꞌen istxꞌojal,
yebꞌpaxo mak chiyiyo isbꞌa wetan yebꞌ mak mach chiyiyo isbꞌa wetan,» xhi Komam.