7. ISTZꞌAYIKAL BꞌAY CHUL KOMAM DIOS JAHAWIL
(4:1-6)
4
Komam, Yahawil yinh Sunil, chalni hakaꞌ tiꞌ:«Lanhan yul huneꞌ tzꞌayik bꞌay ay qꞌa qꞌaꞌ hakaꞌ horno,
haꞌ xin anma manhkꞌom yebꞌ anma chiwatxꞌen istxꞌojal chinhuslaxtoj hakaꞌ isnhuslaxto teꞌ chꞌim.
Yinh huneꞌ tzꞌayik chul tuꞌ chitzꞌakantoj,
matxa nino tzet chikani.a
2 Haxa teyet hex chexxiw wettiꞌan xin chisyekanh isbꞌa istoholal,
hakaꞌ istzejla yoj tzꞌayik yet chiꞌahiloj,
iqꞌbꞌil kolbꞌanile yu.
Toxanhe xin chexah tꞌujla yu tzalahilal hakaꞌ noꞌ tzehla wakax lanhanto yelti bꞌay majan.b
3 Haꞌ yinh huneꞌ tzꞌayik yet chiwilnihan tzet chiꞌeliko anma,
hex tiꞌ chexanhobꞌtanhe anma chiwatxꞌen istxꞌojal,
hakaꞌ chu isxahanlaxikꞌo tanh.
4 Naweti kuybꞌanile waqꞌan tet yaꞌ Moisés,
yaꞌ inchejabꞌan, yet ay yaꞌ yinh iswiꞌ witz Horeb,
haꞌ ton chejbꞌanile yebꞌ kuybꞌanile,
yu heyijen hesunil, hex Israel hex tiꞌ.
5 Ilwekꞌanabꞌi, chinchejtojan yaꞌ Elías inchejabꞌan,
yalanhto maxhto chul istzꞌayikal bꞌay chinhulan,
hanin Yahawilintiꞌan;
huneꞌ tzꞌayik tuꞌ niman yelapnoj, yebꞌ kaw nanxa islowi.c
6 Haꞌ yaꞌ chimeltzoniko yanma naj mame yinh iskꞌahol,
yebꞌpaxo chimeltzoniko yanma naj kꞌahole yinh ismam.
Ta mach xin chinhulan, kat wanayojan isyaꞌtajil yibꞌanh hekonhobꞌ,
kat intanhtzenkanilojan,» xhi Komam.