Ishelanil yip Komam Jesús
20
Ay huneꞌ tzꞌayikal tiꞌ yet lanhan iskuywa Komam Jesús yul Yatut Komam Dios,
yet chalni Komam kuybꞌanile yet kolbꞌanile,
yapni ebꞌnaj yahawil yinh ebꞌnaj sacerdote yebꞌpaxo ebꞌnaj kuywawom yinh isley yaꞌ Moisés,
yebꞌ ebꞌnaj ichamta iswiꞌehal yinh konhobꞌ tuꞌ.
2 Isqꞌambꞌen ebꞌnaj tet Komam:
—¿Mak kaxhchejni hawatxꞌen hunteqꞌan tiꞌ?
yebꞌpaxo ¿mak aqꞌni hawip?
xhi ebꞌnaj.
3 Istaqꞌwi Komam Jesús tet ebꞌnaj:
—Hakinpax tuꞌan,
ay huneꞌ inqꞌambꞌebꞌalan chiwaqꞌan teyet.
Pajtzewe wetan,
4 ¿mak chejniti yaꞌ Juan,
anikanh haꞌ iswiꞌ anma,
Komam Dios mato haꞌ anma?
xhi Komam.
5 Yichiko ebꞌnaj isqꞌambꞌen tet hunun:
—¿Tzet xin chijute jalni tet naj tiꞌ?
Ta chijalaꞌ ta Komam Dios chejnheti yaꞌ Juan tuꞌ,
chalaꞌ naj jet:
“¿Tzet yinh yuxin machi heyayto yul heyanma yinh tzet yal yaꞌ?”
xhim naj jet.
6 Makato ta chijalaꞌpaxoj ta maxhtaj Komam Dios anheti yaꞌ,
chitij ishowal anma jinh,
kat konhisqꞌojno kamoj,
yuto haꞌ yaꞌ Juan tuꞌ kaw ischejabꞌ Komam Dios ye yaꞌ yul sat anma,
xhi ebꞌnaj.
7 Yuxin yal ebꞌnaj tet Komam:
—Hakintuꞌan,
mach chiwalpaxilojan teyet mak aqꞌnhe huneꞌ wiptiꞌan inwatxꞌenan hunteqꞌan tiꞌ,
xhi Komam.
Anás cuestiona la autoridad de Jesús
Yechel yinh ebꞌnaj munlawom mach kꞌuloj
9 Lahwi tuꞌ xin,
yichiko Komam Jesús yalni huneꞌxa yechel tiꞌ tet anma:
«Ay huneꞌ naj winaj tzꞌunni teꞌ uva sat istxꞌotxꞌ.
Lahwi tuꞌ xin yanito naj istzꞌunubꞌ komonal tet hunteqꞌan ebꞌnaj munlawom.
Isto naj niman tiempo bꞌey huneꞌ txꞌotxꞌ kaw nahat.
10 Yet yapni istiempohal yuxlax teꞌ uva,
ischejnito naj yahaw txꞌotxꞌ huneꞌ ischejabꞌ ischabꞌaꞌ ismajul tet ebꞌnaj munlawom tuꞌ.
Hayet yilni ebꞌnaj yapni naj,
yok ebꞌnaj ismaqꞌno naj.
Maxhtikꞌa xin tzet aqꞌlax tet naj,
ischejlaxtopaxo naj.
11 Lahwi tuꞌ xin,
ischejnipaxto naj yahaw tuꞌ huneꞌxa ischejabꞌ.
Hayet yapni naj,
yok ebꞌnaj munlawom tuꞌ iskajno naj,
ismaqꞌnipaxo ebꞌnaj naj.
Maxhtikꞌa tzet aqꞌlaxpaxo tet naj,
istzumbꞌelaxto naj.
12 Lahwi tuꞌ xin,
yanipaxto naj yahaw txꞌotxꞌ tuꞌ huneꞌxa ischejabꞌ yet yoxel.
Hayet yapni naj tuꞌ,
yokpaxo ebꞌnaj munlawom tuꞌ ismaqꞌno taho naj,
istzumbꞌelaxpaxti naj.
13 »Yuxinto yal naj yahaw txꞌotxꞌ hakaꞌ tiꞌ:
“¿Tzet wal wutenan tinanh?
Wal xin chinchejtojan huneꞌ inkꞌaholtiꞌan kaw ochebꞌil wuhan,
etzanhem chixiw ebꞌnaj tet naj,”
xhi naj.
14 Hayet yilni ebꞌnaj yapni naj kꞌahole tuꞌ,
yalni ebꞌnaj tet hunun:
“¡Ilwekꞌanabꞌtoj!
Lanhan yul naj kꞌahole lah.
Haꞌ tet naj chikankano istxꞌotxꞌ ismam tiꞌ.
Wal tinanh xin komaqꞌaꞌwe kamo naj haxinwal jetxa chubꞌoko huneꞌ txꞌotxꞌ tiꞌ,”
xhi ebꞌnaj munlawom tuꞌ.
15 Lahwi tuꞌ xin yilaxilto naj yintalto peyabꞌ tuꞌ,
haꞌ bꞌey tuꞌ aqꞌlaxkamo naj,»
xhi Komam.
Isqꞌambꞌen Komam tet anma:
«¿Tzet xin chiꞌutelax ebꞌnaj munlawom yu naj yahaw tzꞌunubꞌ tuꞌ,
heyalni?
16 Wal xin haꞌ naj kaw yahaw tuꞌ,
chitij kat istanhtzenkanilo naj ebꞌnaj munlawom tuꞌ,
kat yanito naj istzꞌunubꞌ komonal tet hunuxa majan ebꞌnaj munlawom,»
xhi Komam.
Hayet yabꞌen anma huneꞌ tuꞌ yalni anma:
—Machojabꞌ bꞌaqꞌinhal chu hakaꞌ chawal tiꞌ,
xhi anma.
17 Yuxinto ok tꞌanhno Komam Jesús yinh anma,
yalni Komam:
—¿Yaj tzettaxka chalilo huneꞌ tzꞌibꞌnhebꞌilkano yul Yum Komam Dios heyalni bꞌay chal hakaꞌ tiꞌ?:
“Haꞌ huneꞌ chꞌen chꞌen istirilo ebꞌnaj watxꞌem nha,
haꞌ chꞌen kaw ekꞌbꞌal kꞌul yok xeꞌo nha,”
xhikanoj.
18 Yaj maknhetikꞌa chiꞌaykꞌay yibꞌanh huneꞌ chꞌen tuꞌ chiqꞌahtoj,
yaj ta haꞌ chꞌen chꞌaykꞌay yibꞌanh huneꞌ mak tuꞌ,
chikechꞌmoto yalanh chꞌen,
xhi Komam.
19 Yuxin ebꞌnaj yahawil yinh ebꞌnaj sacerdote yebꞌ ebꞌnaj kuywawom yinh isley yaꞌ Moisés,
yet hunep tuꞌ yoche ebꞌnaj istzabꞌayo Komam Jesús,
yuto nachalo yu ebꞌnaj ta haꞌ ebꞌnaj chal huneꞌ kuybꞌanile yal Komam,
yaj chixiw ebꞌnaj istzabꞌnayo Komam yu anma ayikto bꞌey tuꞌ.
Parábola de los Viñedos y los Arrendatarios
Chꞌen tohlabꞌal chiqꞌanlax yu naj yahaw Roma
20 Yuxin haꞌ ebꞌnaj yahaw yinh ebꞌnaj sacerdote yebꞌ ebꞌnaj chikuyni anma yinh isley yaꞌ Moisés istohla ebꞌnaj hunteqꞌan ebꞌnaj to ilno ta chꞌaykꞌay Komam yinh hunu leqꞌtiꞌal.
Kꞌul yubꞌ ebꞌnaj kꞌulchꞌan istzotel ebꞌnaj tet Komam yunhe yaykꞌay Komam yinh hunu tzotiꞌ,
kat yaniko ebꞌnaj Komam yul isqꞌabꞌ naj gobernador.
21 Yalni ebꞌnaj tet Komam:
—Mam Kuywawom,
kaw johtajanh ta tzet chawala yebꞌ tzet chakuyu kaw toholkanoj,
yebꞌpaxo lahan yelapno ye anma yul hasat.
Chakuypaxo yinh kaw isyelal tzet chu kowatxꞌen yinh tzet choche Komam Dios.
22 Yuxin chikoqꞌambꞌehanh tawet:
¿Kꞌulmi jaqꞌni kotohlabꞌal tet naj jahaw ay bꞌey Roma,
naj César,
mato machoj?
xhi ebꞌnaj.
23 Yajaꞌ yohtaxa Komam ta txꞌoj nabꞌil yu ebꞌnaj,
yuxin yal Komam tet ebꞌnaj:
24 —Yewe hunu chꞌen melyu wilaꞌan nanh.
¿Mak najil ayko yechel sat yebꞌ isbꞌi yinh chꞌen?
xhi Komam.
Istaqꞌwi ebꞌnaj:
—Yechel sat naj jahaw ay bꞌey Roma yebꞌ isbꞌi naj ayko yinh chꞌen,
xhi ebꞌnaj.
25 Yalni Komam tet ebꞌnaj xin:
—Aqꞌwe tet naj César tuꞌ bꞌaytet yet naj yehi,
kat heyaqꞌni tet Komam Dios bꞌaytet yet Komam yehi,
xhi Komam.
26 Yajaꞌ maxhtikꞌa hunu tzotiꞌ txꞌoj ilchalo yinh Komam yu ebꞌnaj yinh tzet yal Komam sata anma.
Tonhe kꞌaykanokanh iskꞌul ebꞌnaj yu ispaj istzotiꞌ ebꞌnaj yaqꞌ Komam.
Yuxin matxa tzet yal ebꞌnaj.
Pagándole Impuestos a Cesar
Isqꞌambꞌe ebꞌnaj saduceo yinh yet chiꞌitzitzbꞌikanh kamom
27 Lahwi tuꞌ xin yapni hunteqꞌan ebꞌnaj saduceo ilwal yinh Komam Jesús.
Ebꞌnaj saduceo tuꞌ,
chal ebꞌnaj tato matxa chiꞌitzitzbꞌi anma chikami.
Isqꞌambꞌen ebꞌnaj tet Komam:
28 —Mam Kuywawom,
tzꞌibꞌnhebꞌilkano yu yaꞌ Moisés tato chikam yichamil hunu ix ix,
mach xin yuninal naj yebꞌ ix,
yilal yiqꞌni ix yuxhta naj kamna tuꞌ,
haxinwal ay yuninal naj yebꞌ ix,
kat yok yuninalo naj kamna tuꞌ.
29 Yaj ay hunel ay hujwanh ebꞌnaj yuxhtanhe isbꞌa.
Naj bꞌabꞌel mohyi naj yebꞌ huneꞌ ix,
yaj kam naj,
machi xin hunu yuninal naj yebꞌ ix.
30 Hakpax tuꞌ naj iskabꞌ,
mohyi naj yebꞌ ix,
iskampaxo naj,
machipaxo yuninal naj yebꞌ ix.
31 Ismohyipaxo naj yox yebꞌ ix.
Hak tuꞌ xin yu ismohyilo ebꞌnaj hujwanh tuꞌ yebꞌ ix,
yaj kamto ebꞌnaj sunil.
Maxhtikꞌa xin hunu yuninal ebꞌnaj yebꞌ ix.
32 Islahobꞌal xin,
iskampaxo ix.
33 Yuxin hayet chiꞌapni istzꞌayikal yet chiꞌitzitzbꞌikanh anma kamnaxa,
¿mak xin ebꞌnaj hujwanh tuꞌ chꞌok yichamilo ix yuto mohyina ebꞌnaj hujwanh tuꞌ yebꞌ ix?
xhi ebꞌnaj.
34 Istaqꞌwikanh Komam Jesús:
—Bꞌey yul sat yibꞌanhqꞌinal tiꞌ ebꞌnaj winaj chiyiqꞌ ebꞌnaj yixal,
yebꞌ ebꞌix ix chiqꞌ ebꞌix yichamil.
35 Yajaꞌ anma yettikꞌa satkanh yehi,
yet chiꞌitzitzbꞌokanh xol kamom,
matxa yixal naj winaj,
matxapaxo yichamil ix ix.
36 Matxa chikam anma tuꞌ yuto lahanxa chꞌeliko yebꞌ ebꞌnaj yángel Komam Dios.
Chiꞌok yuninalo Komam Dios bꞌey satkanh yet chiꞌitzitzbꞌikanh.
37 Yaꞌ Moisés,
yaqꞌkano yaꞌ johtanheloj tato chiꞌitzitzbꞌikanh anma kamnaxa,
bꞌay tzꞌibꞌnhebꞌilkano yinh yet yilni yaꞌ yok qꞌaꞌ yinh hun hobꞌan teꞌ txꞌix yet istzotelilti Komam Dios xol qꞌa qꞌaꞌ tet yaꞌ.
Yalni yaꞌ yinh Komam hakaꞌ tiꞌ:
—Mamin,
isDiosal yaꞌ Abraham,
isDiosal yaꞌ Isaac yebꞌpaxo isDiosal yaꞌ Jacob,
xhi yaꞌ.
38 Waxanhka kamnaxa ebꞌyaꞌ,
yaj itzitz ebꞌyaꞌ yul sat Komam Dios,
yuto mach isDiosalo kamom ye Komam.
Yuxin yul sat Komam Dios sunil anma itzitz,
xhi Komam.
39 Yalni hunteqꞌan ebꞌnaj chikuyni anma yinh isley yaꞌ Moisés tet Komam:
—Mam Kuywawom,
kaw kꞌul maxawute hapajtzen huneꞌ tiꞌ,
xhi ebꞌnaj.
40 Lahwi tuꞌ xin matxa hunu ebꞌnaj yaqꞌ isqꞌambꞌebꞌal tet Komam.
Komam Cristo Iskꞌahol Komam Dios yehi
41 Yalni Komam Jesús tet anma ayko iskꞌatanh tuꞌ:
—¿Tzet yinh yuxin chihal-laxi tato yinh yaꞌ David titna Komam Cristo?
42 Yajaꞌ yalkano yaꞌ David yinh Salmos hakaꞌ tiꞌ:
Yal Komam Dios tet Wahawilan:
“Ayanh tzꞌonhno yinh inwatxꞌqꞌabꞌtiꞌan,
43 masanto chiwakojan anma ayko ishowal tawinh
yalanh hawoj,”a
xhi yaꞌ David.
44 ¿Tzet yinh yuxin yal yaꞌ David Wahawan yinh Komam Cristo,
tato yinh yaꞌ titna Komam?
xhi Komam Jesús tet anma.
Yal Komam Jesús istxꞌojal ebꞌnaj kuywawom yinh isley yaꞌ Moisés
45 Yet ayko anma yabꞌen tzet chal Komam Jesús tuꞌ,
yalni Komam tet ebꞌyaꞌ iskuywom:
46 —Kaw cheyil hebꞌa haxinwal mach chexkꞌayto yu iskuybꞌanil ebꞌnaj chikuyni anma yinh isley yaꞌ Moisés,
yuto tonhetikꞌa choche ebꞌnaj yekꞌ hukxi yebꞌ hunteqꞌan nime xilqꞌape chako yinh.
Chochepaxo ebꞌnaj ta nanxa islow chu istioxhli anma tet ebꞌnaj yet chiꞌekꞌ ebꞌnaj yulaj txonhbꞌal.
Chissaypaxo ebꞌnaj hunteqꞌan tzꞌonhobꞌal kaw ay yelapno yul iscapilla ebꞌnaj Israel,
yebꞌpaxo yet chꞌawtelax ebꞌnaj waꞌo yinh qꞌinh.
47 Chelqꞌanpaxilo ebꞌnaj sunil tzet ay ebꞌix hunix.
Yunhe yal-lax ebꞌnaj kꞌulal yuxin kaw nime chute ebꞌnaj yoj istxah.
Yaj hanan chiwalan ta kaw niman isyaꞌtajil chul yibꞌanh ebꞌnaj tuꞌ,
xhi Komam Jesús.