Yet yokto Komam Jesús yul konhobꞌ Jerusalén
11
Hayet lanhan yapni Komam Jesús yebꞌ ebꞌyaꞌ iskuywom bꞌey konhobꞌ Jerusalén,
yet ayko Komam yinh istzalanil wonhan Olivo,
xolbꞌal konhobꞌ Betfagé yebꞌ Betania,
ischejni Komam kawanh ebꞌyaꞌ iskuywom,
Marcos 11:1-14
—Asiꞌwe bꞌey aldea kosatakꞌto tiꞌ.
Hayet chexapno bꞌey tuꞌ,
cheyilaꞌ huneꞌ noꞌ burro xekan,
maxhto hunu mak chiꞌahto yibꞌanh noꞌ.
Chepuhilo noꞌ kat heyiniti noꞌ wetan.
3 Ta ay mak chiqꞌambꞌen teyet:
“¿Tzet yinh xin chepuhilo noꞌ?”
ta xhi,
cheyala:
“To ay chiꞌokniko noꞌ yu Komam,
yajaꞌ pet chonhhulanh jaqꞌaꞌkanojanh noꞌ,”
kexchi,
xhi Komam.
4 Isto ebꞌyaꞌ kawanh tuꞌ,
yilni ebꞌyaꞌ noꞌ nichꞌan burro tuꞌ,
xekan noꞌ iskawilal huneꞌ pulta,
ispuhnilo ebꞌyaꞌ noꞌ.
5 Ay xin hunteqꞌan ebꞌnaj linhanayo iskawilal tuꞌ qꞌambꞌen tet ebꞌyaꞌ:
—¿Tzet yinh xin chepuhilo noꞌ?
xhi ebꞌnaj.
6 Hakaꞌtikꞌa xin yu yalni Komam,
hak tuꞌ yu yalni ebꞌyaꞌ,
matxa tzet yal ebꞌnaj tuꞌ.
7 Lahwi tuꞌ yinito ebꞌyaꞌ noꞌ nichꞌan burro tet Komam.
Yanahto ebꞌyaꞌ xil isqꞌap yibꞌanh noꞌ,
lahwi tuꞌ yahto Komam yibꞌanh noꞌ.
8 Kaw hantanhe anma islitxꞌbꞌayo xil isqꞌap yul bꞌeh sata Komam.
Aypaxo mak inilo isqꞌabꞌ te teꞌ yanayo yul bꞌeh bꞌay chiꞌekꞌto Komam.
9 Yah yaw anma bꞌabꞌeliko sata Komam yebꞌ anma tzujaniko yintaj Komam,
yalni anma hakaꞌ tiꞌ:
—¡Jaqꞌaꞌwe yuchꞌandiosal tet Komam Dios,
jalaꞌwe tzotiꞌ kꞌul yinh mak chul koxol tiꞌ,
yuto chejbꞌilti yaꞌ yu Komam Dios!
10 ¡Jaqꞌaꞌwe tzalaho kokꞌul yinh Jahawil chiꞌok reyal koxol selelo jichmam David!
¡Yuchꞌandios tet Komam Dios!
xhixanhe anma tuꞌ.
11 Yapni Komam Jesús bꞌey Jerusalén,
yokto yul Yatut Komam Dios,
yilni Komam tzet ye yul Yatut Komam Dios tuꞌ.
Lahwi tuꞌ xin ismeltzo Komam yebꞌ ebꞌyaꞌ iskuywom bꞌey Betania hunelxa yuto qꞌejbꞌixa.
Yet istzꞌaktiꞌnhen Komam Jesús huneꞌ teꞌ higuera mach issat
12 Haxa yet huneꞌxa tzꞌayik xin yel Komam Jesús yebꞌ ebꞌyaꞌ iskuywom yul konhobꞌ Betania,
ismeltzo Komam yul konhobꞌ Jerusalén.
Yet ayko Komam yinh isbꞌel tuꞌ isnhohchakanh.
13 Nahatto ay Komam xin yilnito huneꞌ teꞌ higuera xanhe qꞌubꞌaniko xaj,
isto Komam yilnoj tato ay sat teꞌ aykoj,
yajaꞌ machi hunu sat teꞌ ilcha yu Komam,
wal xin xajnhe teꞌ aykoj yuto maxhto istiempohalo issatni teꞌ.
14 Yuxin yal Komam yinh teꞌ:
—Matxa bꞌaqꞌinhal chilolax hunu hasat,
xhi Komam.
Wal ebꞌyaꞌ iskuywom Komam xin yabꞌe ebꞌyaꞌ yalni Komam huneꞌ tuꞌ.
Yet istzumbꞌenilti Komam Jesús anma chitxonhwi yul Yatut Komam Dios
15 Lahwi tuꞌ,
yapni Komam Jesús yebꞌ ebꞌyaꞌ iskuywom yul konhobꞌ Jerusalén;
yokto Komam yul Yatut Komam Dios,
istzumbꞌenilti Komam sunil mak chitxonhwi yebꞌ mak chiloqꞌwi bꞌey tuꞌ.
Ispakꞌchankanokanh Komam ismexha ebꞌnaj helom melyu yebꞌ isxhila ebꞌnaj txonhom palamuch.
Marcos 11:15-33
16 Machi xin isje Komam ta chiꞌekꞌto anma yebꞌ yijatz yul yamaqꞌil Yatut Komam Dios.
17 Yok Komam yalno tet anma tuꞌ:
—Tzꞌibꞌnhebꞌilkano yul Yum Komam Diosa hakaꞌ tiꞌ:
“Haꞌ watutan yet txah yehi,
bꞌay chul anma ay yul hunun txꞌotxꞌ nimeta konhobꞌ txahloj,”
xhihayoj.
Wal hex tiꞌ xin hakaꞌ isnhachꞌen elqꞌom ye Yatut Inmaman heyu,
xhi Komam.
18 Hayet yabꞌen ebꞌnaj iswiꞌehal yinh ebꞌnaj sacerdote yebꞌ ebꞌnaj kuywawom yinh isley yaꞌ Moisés tzet iswatxꞌe Komam tuꞌ,
yok ebꞌnaj issayni yinh tzet chu ispotxꞌni Komam,
yajaꞌ xiw ebꞌnaj yuto kaw chitzala anma yabꞌen kuybꞌanile chal Komam.
19 Haxa yet lanhanxa yay numna xin yel Komam yul konhobꞌ yebꞌ ebꞌyaꞌ iskuywom.
Tajilo teꞌ higuera istzꞌaktiꞌnhe Komam Jesús
20 Haxa yinh hunxa tzꞌayik yinh sahabꞌ sakꞌayal ismeltzopaxo Komam Jesús yebꞌ ebꞌyaꞌ iskuywom yul konhobꞌ Jerusalén,
yilni ebꞌyaꞌ iskuywom Komam ta xatajilo teꞌ higuera.
21 Isnahniti yaꞌ Pedro ta haꞌ teꞌ istzꞌaktiꞌnhe Komam,
yalni yaꞌ tet Komam:
—Mam Kuywawom,
ilkꞌanabꞌi,
matajnalo teꞌ higuera hatzꞌaktiꞌnhe,
xhi yaꞌ.
22 Istaqꞌwi Komam:
—Aweko heyanma yinh Komam Dios.
23 Yinh kaw isyelal chiwalan teyet;
maknhetikꞌa chihalni tet huneꞌ witz tiꞌ:
“Elanh bꞌey tiꞌ,
bꞌejayto habꞌa xol haꞌ mar,”
ta xhi.
Ta xin chayto yul yanma yinh tzet chal tuꞌ,
machi xin chikabꞌkon yanma,
chij isbꞌa tzet chisqꞌana.
24 Yuxin chiwalan teyet,
sunil tzet cheqꞌan yinh hetxah tet Komam Dios yilal heyanayto yul heyanma ta chaqꞌ Komam teyet;
ta hak tuꞌ chechah tzet cheqꞌana.
25 Yebꞌ yet lanhan hetxahli,
yilal heyaqꞌni nimankꞌulal yinh mak ayko ishowal teyinh,
haxinwal chaqꞌpaxo nimankꞌulal Komam Dios yinh hemul.
26 Yuto ta mach cheyaqꞌ nimankꞌulal,
mach chaqꞌpaxo Hemam ay yul satkanh nimankꞌulal teyinh,
xhi Komam.
Qꞌambꞌelax bꞌay chitit yip Komam Jesús
27 Lahwi tuꞌ,
yapni Komam yul konhobꞌ Jerusalén hunelxa.
Haxa yet lanhan yekꞌ Komam yul Yatut Komam Dios xin yapni ebꞌnaj iswiꞌehal yinh ebꞌnaj sacerdote yebꞌ ebꞌnaj kuywawom yinh isley yaꞌ Moisés yebꞌ ebꞌnaj ichamta winaj iswiꞌehal konhobꞌ,
iskꞌatanh Komam.
28 Isqꞌambꞌen ebꞌnaj tet Komam:
—¿Mak chaxhchejni hawatxꞌen hunteqꞌan hawatxꞌe yet ewi?
¿Mak aqꞌnhe hawip hawatxꞌen hunteqꞌan tuꞌ?
xhi ebꞌnaj.
29-30 Istaqꞌwi Komam:
—Hakintuꞌan ay huneꞌ inqꞌambꞌebꞌalan teyet:
¿Mak anheti yaꞌ Juan anikanh haꞌ iswiꞌ anma,
Komam Dios mato haꞌ anma?
Ta chepajtze wetan chiwalpaxojan mak chejnheintijan inwatxꞌenan hunteqꞌan tuꞌ,
xhi Komam tet ebꞌnaj.
31 Yet yabꞌen ebꞌnaj yalni Komam hakaꞌ tuꞌ,
yichiko ebꞌnaj yal-len tet hunun:
—Ta chijala ta Komam Dios anheti yaꞌ Juan tuꞌ,
chimisqꞌambꞌe naj jet:
“¿Tzet yinh xin mach heyayto yul heyanma yinh yaꞌ?”
xhim naj jet.
32 »¿Tom xin chijalaꞌpaxoj tato haꞌ anma chejnhe yaꞌ Juan tuꞌ?
xhi ebꞌnaj.
Yal ebꞌnaj hakaꞌ tuꞌ yu chixiw ebꞌnaj tet anma yuto chal anma tato yaꞌ Juan tuꞌ ischejabꞌ Komam Dios ye yaꞌ.
33 Yuxin taqꞌwi ebꞌnaj tet Komam:
—Mach johtajojanh,
xhi ebꞌnaj.
Yalni Komam:
—Hakinpax tuꞌan mach chiwalan teyet mak aqꞌnhe wipan inwatxꞌenan hunteqꞌan tuꞌ,
xhi Komam tet ebꞌnaj.