Komam Jesús yebꞌ naj Zaqueo
19
Hayet yapni Komam Jesús bꞌey Jericó,
yekꞌ Komam yul konhobꞌ tuꞌ.
2 Haꞌ bꞌey tuꞌ,
ay huneꞌ naj winaj kaw qꞌalom,
Zaqueo isbꞌi.
Yahaw yeko naj yinh ebꞌnaj iqꞌomilo tohlabꞌal chito bꞌey konhobꞌ Roma.
3 Naj Zaqueo tuꞌ,
yoche naj yilaꞌ Komam Jesús,
yaj mach chiyu yilni naj yuto hantanhe anma tzujaniko yinta Komam,
yebꞌpaxo yu kaw nichꞌanchꞌan istel naj.
4 Yuxin bꞌabꞌikꞌo naj sata anma,
yahto naj yinh isqꞌabꞌ huneꞌ teꞌ sicómoro aykanh istiꞌ bꞌeh,
yu yilni naj Komam yet chꞌekꞌto bꞌey tuꞌ.
5 Hayet yekꞌto Komam yich teꞌ,
istꞌanhxahto Komam yinh naj,
yalni Komam tet naj:
—Zaqueo,
ayanhti yinh anhe,
yuto haꞌ bꞌey hawatut chinkanojan huneꞌ aqꞌbꞌal tiꞌ,
xhi Komam tet naj.
6 Hayet yabꞌen naj Zaqueo huneꞌ tuꞌ,
yinh anhe ayti naj,
isto naj.
Kaw xin chitzala iskꞌul naj yet ischahni naj Komam yul yatut.
7 Hayet yilni anma huneꞌ tuꞌ,
yichiko anma bꞌuchwal yinh Komam yuto kankano Komam bꞌey yatut huneꞌ naj mulum.
8 Haꞌ naj Zaqueo tuꞌ,
ah linhno naj,
yalni naj tet Komam:
—Mamin,
wal tinanh chiwaqꞌan yikta tzet ayinan tet anma mebꞌaꞌ,
yebꞌ xin ta ay mak ekꞌbꞌal wutelojan ismelyu,
kanhelto ekꞌbꞌal selel chiwaqꞌan tet,
xhi naj.
9 Yalni Komam:
—Mahul kolbꞌanile bꞌey huneꞌ nha tiꞌ tinanh;
naj Zaqueo tiꞌ kaw yuninalpaxo icham Abraham ye naj.
10 Wal xin Hanin Aqꞌbꞌilintijan texol yu Komam Dios,
hulnajinan insayaꞌan yebꞌ inkolnihan anma kꞌaynato yu ismul,
xhi Komam.
Jesús y Zaqueo
Yechel yinh oxwanh ebꞌnaj chahni chꞌen melyu
11 Yet lanhan yabꞌen anma yinh tzet chal Komam Jesús tuꞌ,
lanhanxa xin yapni Komam bꞌey Jerusalén,
yok yinh isnabꞌal anma ta lanhanxa yapni istiempohal bꞌay chꞌok Komam Dios Yahawilo anma,
yuxin yicheko Komam yalni huneꞌ yechel tiꞌ.
12 Yalni Komam:
«Yet hunel ay huneꞌ naj niman yelapnoj.
Awtelax naj yul huneꞌ niman konhobꞌ yu ischahni naj yok yahawilo yul iskonhobꞌ yet chimeltzohi.
13 Yet maxhto chito naj,
yawte naj 10 (lahonhwanh) ebꞌnaj chimunla yintaj,
yaqꞌnikano naj niman melyu tet hunun ebꞌnaj yu ismunla ebꞌnaj yebꞌ chꞌen.
Lahan yutekano naj isbꞌisil chꞌen yinh ebꞌnaj.
Yalnikano naj tet ebꞌnaj:
“Munlahanhwe yebꞌ chꞌen inmelyutiꞌan masanto yet chinhulan,
kat heyaqꞌni chꞌen yebꞌ yal wetan,”
xhi naj,
isto naj xin.
14 »Yajaꞌ wal ebꞌnaj yet konhobꞌ naj xin,
kaw chichiwa iskꞌul ebꞌnaj yinh naj,
yuxin yet isto naj,
tzujantikꞌa yu isto hunteqꞌan ebꞌnaj aqꞌokꞌule yinh naj tet naj awten naj tuꞌ,
yalni ebꞌnaj tet naj kaw yahaw tuꞌ hakaꞌ tiꞌ:
“Haꞌ huneꞌ naj tiꞌ kaw mach chijochehanh chꞌok naj yahawilo yul kokonhobꞌanh,”
xhi ebꞌnaj.
15 Yaj kaw aqꞌlaxtikꞌa huneꞌ ismunil naj yok yahawo iskonhobꞌ tuꞌ.
»Haxa yet ayxa naj yul iskonhobꞌ hunelxa,
yawten naj ebꞌnaj 10 (lahonhwanh) bꞌay yaqꞌ naj ismelyu tuꞌ,
yu isqꞌambꞌen naj hantaxa yal chꞌen chiqꞌ hunun ebꞌnaj.
16 »Yapni huneꞌ naj bꞌabꞌel,
yalni naj:
“Mamin,
haꞌ chꞌen hamelyu hawakano yul inqꞌabꞌan,
10 (lahonhebꞌto) chꞌen wiqꞌan yu chꞌen,”
xhi naj.
17 Istaqꞌwi naj yahaw tuꞌ tet naj:
“Hach tiꞌ,
kaw kꞌul yu hamunla yinh hanikꞌchꞌan wakanojan tawet,
yuxinto chaxhwakanikojan yahawo 10 (lahonhebꞌ) konhobꞌ,”
xhi naj.
18 »Lahwi tuꞌ xin,
yapni hunxa naj munlawom,
yalni naj hakaꞌ tiꞌ:
“Mamin,
haꞌ chꞌen hamelyu hawaqꞌkano yul inqꞌabꞌan,
howebꞌto chꞌen wiqꞌan yinh chꞌen,”
xhi naj.
19 Yalni naj yahaw tuꞌ tet naj:
“Hach tiꞌ,
chaxhwakanikojan yahawilo howebꞌ konhobꞌ,”
xhi naj.
20 »Lahwi tuꞌ xin yapni hunxa naj,
yalni naj tet naj yahaw tuꞌ hakaꞌ tiꞌ:
“Mamin,
ay hamelyu lah.
Kꞌubꞌabꞌil chꞌen yul huneꞌ payuꞌe tiꞌ wuhan.
21 Kaw kinxiwan intzabꞌnihan hamelyu tiꞌ,
yuto wohtajan ta kaw how hach,
yebꞌpaxo toxanhe chachah tzet ye tuꞌ maxhtaj hach watxꞌenhe,
yebꞌ tonhe chahatxꞌ tzet ye tuꞌ maxhtaj hach tzꞌunnhe,”
xhi naj tet naj yahaw.
22 Yalni naj yahaw tuꞌ tet naj:
“wal hach hach tiꞌ,
kaw machiswalil yu hamunlahi,
yu tzet maxawal wettiꞌan yuxin chaxhwakanikojan yinh isyaꞌtajil.
Yuto ta hawohtaj ta how hinan,
yebꞌpaxo ta toxanhe chinchahan tzet ye tuꞌ maxhtaj hinan watxꞌenhe,
yebꞌ ta toxanhe chinhatxꞌan tzet ye tuꞌ maxhtaj hinan tzꞌunnhe
23 ¿Tzet yinh yuxin mach hawaqꞌ inmelyutiꞌan kꞌamil tet anma,
haxinwal yet manhultiꞌan ayxa yal chꞌen chiqꞌa?”
xhi naj.
24 »Yalni xin naj yahaw tuꞌ tet ebꞌnaj ayko iskꞌatanh hakaꞌ tiꞌ:
“Iwelo chꞌen melyu tet naj tiꞌ,
kat heyaqꞌni chꞌen tet naj iqꞌni chꞌen 10 (lahonhebꞌto),”
xhi naj.
25 »Yalni ebꞌnaj:
“Mamin,
yaj huneꞌ naj chawal tuꞌ,
kaw 10 (lahonhebꞌxa) chꞌen ekꞌbꞌal iqꞌbꞌil yu naj,”
xhi ebꞌnaj.
26 »Istaqꞌwi naj yahaw tuꞌ xin:
“Haꞌ mak ay yet,
chꞌaqꞌlax yaqꞌbꞌil tet,
haꞌ mak machi yet,
haꞌ nichꞌan ay yul isqꞌabꞌ tuꞌ,
chiꞌilaxolo tet.
27 Yebꞌpaxo xin,
ebꞌnaj ayko ishowal winhan mach choche chinokan yahawilo yul konhobꞌ tiꞌ,
iweti ebꞌnaj bꞌey tiꞌ,
kat hepotxꞌnikamo ebꞌnaj yinh insatan,”
xhi naj yahaw tuꞌ,»
xhi Komam.
Yet yokto Komam Jesús yul konhobꞌ Jerusalén
28 Lahwi yalni Komam Jesús hunteqꞌan tuꞌ xin,
isto Komam bꞌey Jerusalén yebꞌ ebꞌyaꞌ iskuywom.
29 Hayet ayko Komam yinh istzalanil wonhan Olivo,
xolbꞌal konhobꞌ Betfagé yebꞌ konhobꞌ Betania,
ischejnito Komam kawanh ebꞌyaꞌ iskuywom,
yalni Komam tet ebꞌyaꞌ:
30 —Asiꞌwe bꞌey huneꞌ aldea kosatakꞌto tiꞌ.
Yet chexapno bꞌey tuꞌ,
cheyilaꞌ huneꞌ noꞌ burro xekan,
maxhto hunu mak chiꞌahto yibꞌanh noꞌ.
Chepuholo noꞌ,
kat heyinoti noꞌ wetan,
xhi Komam.
31 Yalnipaxo Komam:
—Ta ay mak chiqꞌambꞌen teyet,
“¿Tzet yinh xin chepuhilo noꞌ?”
ta xhi,
cheyalaꞌwe hakaꞌ tiꞌ:
“Ay chꞌokniko noꞌ yu Komam Jesús,”
kexchi,
xhi Komam.
32 Isto ebꞌyaꞌ iskuywom tuꞌ,
yilcha noꞌ yu ebꞌyaꞌ hakaꞌtikꞌa yu yalni Komam.
33 Yet lanhan ispuhnilo ebꞌyaꞌ noꞌ yapni ebꞌnaj ay yet noꞌ tuꞌ,
yalni ebꞌnaj:
—¿Tzet yuxin chepuhilo noꞌ?
xhi ebꞌnaj.
34 Istaqꞌwi ebꞌyaꞌ:
—To ay chꞌokniko noꞌ yu Komam Jesús,
xhi ebꞌyaꞌ.
35 Lahwi tuꞌ xin yinito ebꞌyaꞌ noꞌ tet Komam,
yanahto ebꞌyaꞌ hunteqꞌan xil isqꞌap yibꞌanh noꞌ,
tzujan tuꞌ xin iskolwa ebꞌyaꞌ yanahto Komam Jesús yibꞌanh noꞌ.
36 Hayet lanhan yekꞌto Komam xin,
islitxꞌbꞌanayo anma xil isqꞌap yul bꞌeh sata Komam yu chitzala iskꞌul anma yinh Komam.
37 Hayet lanhanxa yapni Komam yinh isxulanil wonhan Olivo tuꞌ,
yah yaw sunil anma tzujaniko yinta Komam yu tzalahilal.
Yalni anma kꞌul-la tzotiꞌ yinh Komam Dios yu sunil kꞌaybꞌalkꞌule xayil anma.
38 Chalni anma hakaꞌ tiꞌ:
—Jalaꞌwe kꞌul-la tzotiꞌ yinh Jahawil chul koxol yu Komam Dios.
Ayojabꞌ aqꞌankꞌulal yul satkanh,
kaw jaqꞌaꞌweko ismay Komam Dios,
xhi anma.
Entrada Triunfal de Jesús
39 Ay xin hunteqꞌan ebꞌnaj fariseo ayko xol anma tuꞌ,
halni tet Komam:
—Chiwalan teyet,
ta chisbꞌejaꞌ anma yelo yaw,
haxam chꞌen chꞌen chiꞌaho yaw selelo anma tiꞌ,
xhi Komam.
41 Haxa yet lanhanxa yapni Komam iskawilal konhobꞌ Jerusalén,
yoqꞌkanh Komam yilni konhobꞌ tuꞌ.
42 Yalni Komam hakaꞌ tiꞌ:
—Tinanh xin,
hex ah Jerusalén,
majaltam yet huneꞌ tzꞌayik tiꞌ chinachalo heyu yinh huneꞌ mak chu yaqꞌni aqꞌankꞌulal yul heyanma,
yaj wal xin mach chinachalo huneꞌ tiꞌ heyu yuto kaw ewan ye yul hesat.
43 Kꞌanchꞌan hex,
ay huneꞌ tiempo bꞌay chihulo isyaꞌtajil teyibꞌanh yu anma ayko ishowal teyinh.
Chihoylaxayo hekonhobꞌ tiꞌ,
hakaꞌxanhe peyabꞌ chuko ebꞌnaj soldado,
kat yaniko ebꞌnaj howal teyinh.
44 Chitanhtzelaxilo huneꞌ konhobꞌ tiꞌ.
Matxa hunu chꞌen chꞌen chikankano yibꞌanh yet chꞌenal,
kat ispotxꞌlaxkamo sunil anma yuto mach hechah huneꞌ Mak Aqꞌbꞌilti texol Hekolomalo yu Komam Dios,
xhi Komam.
Jesús Llora Sobre Jerusalén
Yet istzumbꞌenilti Komam Jesús anma chitxonhwi yul Yatut Komam Dios
45 Lahwi tuꞌ xin,
yokto Komam Jesús yul Yatut Komam Dios,
istzumbꞌenilti Komam anma chitxonhwi bꞌey tuꞌ.
46 Yalni Komam tet anma:
—Tzꞌibꞌnhebꞌilkano yul Yum Komam Dios hakaꞌ tiꞌ:
“Haꞌ watutan yet txah yehi,”
xhikanoj.
Yaj hex tiꞌ hakaꞌ hunu isnhachꞌen elqꞌom ye heyu,
xhi Komam tet anma.
47 Hunun tzꞌayik isbꞌey Komam Jesús kuywal yul Yatut Komam Dios.
Yajaꞌ ebꞌnaj yahawil yeko yinh ebꞌnaj sacerdote,
yebꞌ ebꞌnaj kuywawom yinh isley yaꞌ Moisés,
yebꞌpaxo ebꞌnaj yahaw yeko yinh konhobꞌ,
kaw issay ebꞌnaj tzet chute yaqꞌnikamo Komam.
48 Yajaꞌ mach chitxumcha yu ebꞌnaj tzet chu ispotxꞌlax Komam,
yuto kaw ayko yanma sunil anma yabꞌen tzet chal Komam.
Jesús Expulsa a Los Cambistas