Yechel yinh lahonhwanh ebꞌix qꞌopo
25
Yalnipaxo Komam Jesús:
—Yet chul Komam Dios Yahawil,
lahan chaqꞌle anma hakaꞌ yu 10 (lahonhwanh) ebꞌix qꞌopoto yinh huneꞌ mohyilal yinh aqꞌbꞌalil.
Yito ebꞌix iscantil,
isto ebꞌix chahwal yinh naj mohyom tuꞌ.
2 Yajaꞌ xin ay howanh ebꞌix mach helanoj,
wal howanhxa ebꞌix xin kaw helan ebꞌix.
3 Ebꞌix mach helano tuꞌ,
hanhe teꞌ aceite ayayto yul iscantil ebꞌix,
hanhe teꞌ yito ebꞌix.
4 Wal ebꞌix helan xin isnohtze ebꞌix iscantil,
yinipaxto ebꞌix yaqꞌbꞌilxa yaceite yul islimeta.
5 Yajaꞌ xin ekꞌto yorahil yulbꞌal naj chimohyi tuꞌ,
kaw xin qꞌahan yechman ebꞌix,
matxa chitecha wayanh yu ebꞌix yuxin waykanh ebꞌix sunil.
6 Haxa yinh chuman aqꞌbꞌal,
yabꞌen ebꞌix yal-lax hakaꞌ tiꞌ:
“¡Ahanhwewanoj!
¡Lanhan yul naj chimohyi lah!
Elanhweti hechabꞌa naj,”
xhi.
7 Yet yabꞌen ebꞌix huneꞌ tuꞌ yahwano ebꞌix,
yaniko ebꞌix qꞌaꞌ yinh iscantil.
8 Yalni ebꞌix howanh mach helano tuꞌ tet ebꞌix helan hakaꞌ tiꞌ:
“Aqꞌwe nino heyaceite jetanh yuto lanhan istanhilo qꞌaꞌ yinh kokantilanh lah,”
xhi ebꞌix.
9 Istaqꞌwi ebꞌix helan tet ebꞌix mach helano tuꞌ:
“Mach chu jaqꞌnihanh heyet,
yuto ta chijaqꞌanh hanikꞌo heyet machim chabꞌe hanikꞌ tiꞌ teyinh,
machim chabꞌepaxokanh jetanh.
Wal xin,
kꞌul ta chexto heloqꞌo heyet,”
xhi ebꞌix.
10 Yet ayto ebꞌix howanh loqꞌo aceite tuꞌ,
yapni naj chimohyi.
Wal ebꞌix kaw helan okto ebꞌix yinta naj yinh mohyilal tuꞌ,
lahwi tuꞌ xin ispebꞌalaxkanilti teꞌ pulta.a
11 Hunepxatikꞌa xin yapni ebꞌix howanh to loqꞌo aceite,
yok ebꞌix awokto sat pulta,
yalni ebꞌix:
“Mamin,
Mamin,
haj pulta jetanh,”
xhi ebꞌix.
12 Istaqꞌwilti naj mohyom tuꞌ tet ebꞌix:
“¡Machoj!
Yinh kaw yel chiwalan,
mach kexwohtajojan,”
xhi naj.
13 »Yuxin chiwalkanojan teyet,
kaw helan cheyute hebꞌa yuto mach heyohtajoj tzet tzꞌayikal yebꞌ tzet orahil chinhulan,
xhi Komam.
Yechel yinh ebꞌnaj oxwanh chejabꞌ chahni chꞌen melyu
14 Yalnipaxo Komam Jesús:
—Yet chul Komam Dios Yahawoj,
lahan chaqꞌle anma hakaꞌ yu ebꞌnaj ischejabꞌ huneꞌ naj yahaw munil.
Ok yinh isnabꞌal naj isto bꞌey huneꞌxa nan konhobꞌal kaw nahat,
yajaꞌ yet yalanhto maxhto chito naj,
yawten naj ebꞌnaj ischejabꞌ yu yanikano naj ismelyu yul isqꞌabꞌ ebꞌnaj.
15 »Tet huneꞌ naj,
howebꞌ mil quetzal yakano naj yul isqꞌabꞌ naj,
wal tet hunxa naj xin,
kabꞌ mil quetzal yakano naj,
haxa tet hunxa naj xin mil quetzalnhe yakano naj.
Hatatikꞌa ishelanil hunun ebꞌnaj,
hak tuꞌ yu yanikano naj chꞌen tet ebꞌnaj.
Lahwi tuꞌ isto naj.
16 Naj chejabꞌ chahnikano chꞌen howebꞌ mil quetzal,
ok naj munil yebꞌ chꞌen,
kaw xin howebꞌto mil chꞌen yiqꞌ naj yibꞌanhilo chꞌen howebꞌ mil tuꞌ.
17 Hakpax tuꞌ naj chahnikano chꞌen kabꞌ mil,
kabꞌ milto chꞌen yiqꞌpaxo naj yibꞌanhilo chꞌen kabꞌ mil tuꞌ.
18 Wal naj chahnikano chꞌen huneꞌ mil,
ishol naj txꞌo txꞌotxꞌ ismujni naj chꞌen alaxkano tet yu naj yahaw tuꞌ.
19 »Yet kaw nimanxa tiempo chiꞌelto xin,
yul naj yahaw melyu tuꞌ,
yawten naj ebꞌnaj ischejabꞌ yu yilni naj hantaxa ismelyu.
20 Naj chahnikano chꞌen howebꞌ mil,
haꞌ naj ok bꞌabꞌel yinh sat naj yahaw melyu tuꞌ.
Yanikano naj chꞌen howebꞌ mil aqꞌlax tet yebꞌ chꞌen howebꞌ mil yiqꞌ naj,
yalni naj:
“Mamin,
howebꞌ mil chꞌen hawakano wetan,
yajaꞌ xin howebꞌxa mil chꞌen chiwiqꞌan yibꞌanhilo chꞌen,”
xhi naj.
21 Yalni naj yahaw melyu tuꞌ tet naj:
“Kaw kꞌul mayu hamunlahi,
yebꞌ kaw yijem maxawute habꞌa.
Yu kaw kꞌul maxawute habꞌa yinh hanikꞌ wakanojan tawet,
yuxinto kaw hantanheto tzet chiwakanikojan yul haqꞌabꞌ.
Tinanh xin okanh,
aqꞌ tzalaho hakꞌul inkꞌatanhan,”
xhi naj tet naj.
22 Lahwi tuꞌ xin yapni naj chahnikano chꞌen kabꞌ mil,
yalni naj tet naj yahaw melyu tuꞌ:
“Mamin,
kabꞌ mil chꞌen hawakano wetan,
yajaꞌ xin kabꞌtopaxo mil chꞌen wiqꞌan yibꞌanhilo chꞌen,”
xhi naj.
23 Yalni naj yahaw melyu tuꞌ tet naj:
“Kaw kꞌul mayu hamunlahi,
yebꞌ kaw yijem maxawute habꞌa.
Yu kaw kꞌul hawute habꞌa yinh hanikꞌ wakanojan tawet,
yuxin kaw nimanto tzet chiwakanojan yul haqꞌabꞌ.
Wal tinanh okanh,
aqꞌ tzalaho hakꞌul inkꞌatanhan,”
xhi naj.
24 »Haxa yet yapni naj chahni chꞌen huneꞌ mil xin,
yalni naj tet naj yahaw melyu tuꞌ:
“Mamin,
wohtajan tato hach tiꞌ kaw how hach,
yuto chahatxꞌ tzet ye tuꞌ maxhtaj hach tzꞌunnhe;
chawinipaxokanh tzet ye tuꞌ maxhtaj hach watxꞌenheloj.
25 Wal xin kinxiwan,
yuxin inmujan hamelyu yalanh txꞌotxꞌ,
yajaꞌ tinanh xin chiwaqꞌkanojan chꞌen tawet,”
xhi naj.
26 Yalni naj yahaw melyu tuꞌ tet naj hakaꞌ tiꞌ:
“Hach tiꞌ kaw mach kꞌulo hamunlahi,
kaw isah hach.
Ta hawohtaj tato chinhatxꞌkanhan tzet ye tuꞌ maxhtaj hinan tzꞌunnhe,
yebꞌ ta chiwikanhan tzet ye tuꞌ maxhtajinan watxꞌenheloj,
27 estam hawakto inmelyutiꞌan yul banco.
Hayet makinhultiꞌan xin,
manchahnihan chꞌen yebꞌ yal,”
xhi naj tet ischejabꞌ tuꞌ.
28 »Lahwi tuꞌ xin yalni naj tet ebꞌnaj ischejabꞌ:
“Iwelo chꞌen mil quetzal tet naj kat heyaqꞌni chꞌen tet naj iqꞌnhe chꞌen 10 (lahonhebꞌ) mil.
29 Yuto haꞌ mak ay tzet aya chiꞌaqꞌlax yaqꞌbꞌil tet,
hak tuꞌ xin kaw ekꞌbꞌalto tzet ay huneꞌ mak tuꞌ.
Wal mak matzet ay xin,
haꞌ nichꞌan ay yul isqꞌabꞌ tuꞌ,
chiꞌilaxilo tet.
30 Huneꞌ naj chejabꞌ matzet chiꞌel yinh tiꞌ hawelto naj xol qꞌejholo,
haꞌ bꞌey tuꞌ xin chiꞌoqꞌ naj yinh,
kat isnhetxꞌla yeh naj yu isyaꞌtajil,”
xhi naj yahaw tuꞌ,
xhi Komam.
Yet chilni Komam Jesucristo yinh tzet chiꞌeliko anma
31 Yalnipaxo Komam Jesús:
—Hanin Aqꞌbꞌilintijan texol yu Komam Dios,
chinhulan Yahawiloj yebꞌ isqꞌaqꞌal wipan,
kat yulpaxo ebꞌnaj ángel wintajan,
kat way tzꞌonhnojan yul inkapilan.
32 Wal anma ay yul hunun konhobꞌ yul sat yibꞌanhqꞌinal tiꞌ,
chikutxiko insatajan,
kat inpohnihan xol,
hakaꞌ chu ispohni naj tanhem meꞌ,
noꞌ meꞌ xol noꞌ chiw.
33 Noꞌ meꞌ tuꞌ yinh iswatxꞌqꞌabꞌ naj chako noꞌ,
wal noꞌ chiw xin yinh ismekqꞌabꞌ naj chꞌok noꞌ.
34 Hanin Yahawilintiꞌanb chiwalan tet anma ayko yinh inwatxꞌqꞌabꞌan hakaꞌ tiꞌ:
“Hex xahechah iskꞌulal Inmaman,
okanhwe yul huneꞌ ehobꞌal watxꞌebꞌil teyet yu Inmaman.
Huneꞌ tiꞌ watxꞌebꞌil yettax iswatxꞌi huneꞌ yul sat yibꞌanhqꞌinal tiꞌ.
35 Yuto hayet innhohchahan,
heyaqꞌni tzet chinlohan.
Yet istaj intiꞌan heyaqꞌni haꞌ wukꞌuꞌan,
yet wekꞌan inqꞌanaꞌan bꞌay chinwayan,
heyaqꞌni bꞌay kinwayan.
36 Yet lanhanxa weltꞌilnojan,
heyaqꞌni xil inqꞌapan;
yet yaꞌay hinan,
hebꞌey kinhetuklenojan.
Yet ayiniktojan yul preso,
hebꞌey kinheyilnojan,”
kinchinhetikꞌahan tet anma tuꞌ.
37 Haꞌ anma watxꞌen istoholal tuꞌ xin,
chisqꞌambꞌe wetan hakaꞌ tiꞌ:
“Mamin,
¿bꞌaqꞌinhi kaxhnhohcha tuꞌ jaqꞌnihanh tzet chaloh?
yebꞌ ¿bꞌaqꞌinhi taj hatiꞌ jaqꞌnihanh haꞌ hawukꞌuꞌ?
38 ¿Bꞌaqꞌinhi xin haqꞌan bꞌay kaxhway jetanh,
jaqꞌnihanh bꞌay kachwayi?
yebꞌ ¿bꞌaqꞌinhi matxa xil haqꞌap,
jaqꞌnihanh xil haqꞌap?
39 ¿Bꞌaqꞌinhi kaxhyabꞌilnipaxoj,
kobꞌeyanh kaxhkotuklenojanh,
yebꞌ yet hawokto yul preso,
konhbꞌeyanh kaxhjilnojanh?”
xhi anma tuꞌ.
40 Chiwalnihan tet hakaꞌ tiꞌ:
“Yinh kaw yeli chiwalan teyet,
yet hekolwa yinh hunu ebꞌnaj wuxhtajan,
waxanhka kaw komon yekꞌi,
winhan hewatxꞌe sunil hunteqꞌan tuꞌ,”
kinchinhetikꞌahan tet.
41 »Lahwi tuꞌ xin chiwalnihan tet anma ayko yinh inmekqꞌabꞌan:
“Elanhwe yinh insatan hex tzꞌaktiꞌnhebꞌil hexxa tiꞌ,
asiꞌwekano xol qꞌa qꞌaꞌ mach istanhbꞌal watxꞌebꞌilxa tet naj matzwalil yebꞌ tet ebꞌnaj ischejabꞌ naj.
42 Yuto yet innhohchahan,
maxhtikꞌa heyaqꞌ nino tzet inlohan,
yet istaj intiꞌan,
maxhtikꞌa heyaqꞌ nichꞌano haꞌ wukꞌuꞌan.
43 Yet wekꞌan inqꞌanaꞌan bꞌay chinwayan,
maxhtikꞌa heyaqꞌ bꞌay kinwayan.
Yet matxa xil inqꞌapan maxhtikꞌa heyaqꞌ hunu xil inqꞌapan.
Yet yaꞌay hinan yebꞌ yet ayiniktojan yul preso,
maxhtikꞌa kinhetuklehan,”
kinchinhetikꞌahan tet.
44 Yajaꞌ chisqꞌambꞌe anma tuꞌ wetan:
“Mamin,
¿bꞌaqꞌinhi kaxhnhohchahi,
yebꞌ istaj hatiꞌ,
kaxhekꞌpaxo haqꞌanaꞌ bꞌay kachwayi,
yebꞌ yet matxa xil haqꞌap,
machi xin konhkolwahanh tawinh?
Yebꞌpaxo,
¿bꞌaqꞌinhi kaxhyabꞌilni yebꞌ hawokto yul preso?
¿Machi xin konhkolwapaxojanh tawinh hawalni?”
xhi anma tuꞌ.
45 Yajaꞌ chintaqꞌwihan tet:
“Yinh kaw yeli chiwalan teyet,
yet mach kexkolwa yinh hunu ebꞌnaj wuxhtajan,
yebꞌ ebꞌix wanabꞌan,
waxanhka kaw komonnhe yekꞌi,
winhan mach kexkolwa tuꞌ,”
kinchinhetikꞌahan tet.
46 Haꞌ hunteqꞌan anma tuꞌ xin,
chitokano yinh isyaꞌtajil yinh hunelnhe.
Wal anma watxꞌen iskꞌulal,
chischah isqꞌinal mach istanhbꞌal,
xhi Komam Jesús.