Islahtiꞌnhe isbꞌa ebꞌnaj Israel yinh tzet chu yaqꞌnikamo ebꞌnaj Komam Jesús
26
Lahwi yalnikano Komam Jesús hunteqꞌan tuꞌ xin,
yalni Komam tet ebꞌyaꞌ iskuywom:
2 «Hex tiꞌ heyohtaj tato kabꞌexanhe qꞌinh Pascua,
yinh qꞌinh tuꞌ xin chinalaxikojan yul isqꞌabꞌ anma kat walaxkanhan yinh kulus,
Hanin Aqꞌbꞌilintijan texol yu Komam Dios,»
xhi Komam.
3 Yinhtikꞌa huneꞌ tzꞌayik tuꞌ xin,
ebꞌnaj iswiꞌehal sacerdote,
yebꞌ ebꞌnaj kuywawom yinh isley yaꞌ Moisés yebꞌ ebꞌnaj ichamta winaj yul konhobꞌ tuꞌ,
iskutxbꞌako isbꞌa ebꞌnaj bꞌey yatut naj Caifás,
yahawil sacerdote.
4 Islahtiꞌnhen isbꞌa ebꞌnaj yinh tzet leqꞌtiꞌal chal yinh Komam Jesús,
yunhe istzabꞌnayo ebꞌnaj,
kat yaqꞌnikamo ebꞌnaj Komam yalni.
5 Yalni ebꞌnaj tet hunun:
«Yajaꞌ mach yinho qꞌinh,
haxinwal mach chiꞌah bꞌulna anma,»
xhi ebꞌnaj.
Yet isjobꞌnayo huneꞌ ix ix anh kaw xuqꞌ sam yibꞌanh iswiꞌ Komam Jesús
6 Yet ayxa Komam Jesús yul konhobꞌ Betania xin,
isto Komam yatut naj Simón,
naj aytikꞌako yabꞌil lepra yinh.
7 Yet ayko Komam waꞌo sat mexha,
yapni huneꞌ ix ix iskꞌatanh Komam.
Iqꞌbꞌil huneꞌ chꞌen limeta yu ix,
alabastro isbꞌi,
nohna chꞌen yu huneꞌ anh kaw xuqꞌ sam,
yebꞌ kaw ay istohol.
Isjobꞌnayo ix yibꞌanh iswiꞌ Komam.
8 Hayet yilni ebꞌyaꞌ iskuywom Komam huneꞌ tuꞌ istit ishowal ebꞌyaꞌ yinh ix,
yalni ebꞌyaꞌ:
—¿Tzet yinh xin tonhe chiꞌetalaxto huneꞌ anh tiꞌ?
9 Huneꞌ anh tiꞌ kaw ay istohol,
majaltam matxonhlaxtoj,
kat ispohlaxkanh istohol yinh anma mebꞌaꞌ,
xhi ebꞌyaꞌ.
10 Hayet yabꞌen Komam Jesús huneꞌ tuꞌ,
yalni Komam:
—¿Tzet yinh xin cheyiti hehowal yinh ix?
Huneꞌ maswatxꞌe ix winhtiꞌan,
kaw kꞌul.
11 Anma mebꞌaꞌ aynhetikꞌako texol,
wal hinan xin mach sunilbꞌalo tiempo ayinikꞌojan texol.
12 Huneꞌ ix tiꞌ masjobꞌayo ix huneꞌ anh kaw xuqꞌ sam wibꞌanhan yunhe kꞌulxa ye innimanilan yet chinmujlaxan.
13 Yinh kaw yeli chiwalan teyet,
bꞌajxanhetuꞌwal chihal-lax Tzotiꞌ Kꞌul yet Kolbꞌanile chihal-laxpaxo huneꞌ maswatxꞌe ix tiꞌ,
hak tuꞌ xin chiꞌaqꞌlax bꞌinaho ix,
xhi Komam Jesús tet ebꞌyaꞌ iskuywom.
Yako naj Judas Komam Jesús yul isqꞌabꞌ kamikal
14 Naj Judas Iscariote,
naj ayko istzꞌajo ebꞌyaꞌ 12 (kabꞌlahonhwanh) iskuywom Komam Jesús,
to naj iskꞌatanh ebꞌnaj iswiꞌehal sacerdote,
15 yalni naj tet ebꞌnaj:
«¿Hanta cheyaqꞌ wetan,
chiwakojan yaꞌ Jesús yul heqꞌabꞌ?»
xhi naj.
Yalten ebꞌnaj 30 (lahonhebꞌ iskawinaj) melyu nabꞌa plata tet naj.
16 Hak tuꞌ xin yu yichiko naj issayni yinh tzet chu yaniko naj Komam yul isqꞌabꞌ ebꞌnaj.
Yet iswaꞌkano Komam Jesús yebꞌ ebꞌyaꞌ iskuywom yinh qꞌinh Pascua
17 Haxa yet yayilo bꞌabꞌel tzꞌayik qꞌinh Pascua,
yet chiwahlax ixim pan machi yanhal,
ishitziko ebꞌyaꞌ iskuywom Komam iskꞌatanh,
isqꞌambꞌen ebꞌyaꞌ:
—Mamin,
¿bꞌaytuꞌwal chawoche chikowatxꞌehanh tzet chikolo yinh qꞌinh Pascua tiꞌ?
xhi ebꞌyaꞌ.
18 Istaqꞌwi Komam:
—Asiꞌwe yul konhobꞌ,
yet chexapnoj kat heto bꞌey yatut huneꞌ naj,
kat heyalno tet naj:
“Makonhischejtijanh Komam kuywawom jalanh tawet tato hanikꞌxanhe tiempohal aykꞌo koxolanh,
yuxin haꞌ bꞌey hawatut tiꞌ chonhhulanh jekꞌtzehanh qꞌinh Pascua tiꞌ yebꞌ Komam,”
kexchi,
xhi Komam.
19 Lahwi tuꞌ,
isto ebꞌyaꞌ iskuywom Komam Jesús,
isyijen ebꞌyaꞌ hakaꞌtikꞌa yu yalni Komam.
Yok ebꞌyaꞌ iswatxꞌen tzet chilolax yinh qꞌinh Pascua.
20 Haxa yet yah aqꞌbꞌal xin,
yok Komam waꞌo sat mexha yebꞌ ebꞌyaꞌ 12 (kabꞌlahonhwanh) iskuywom tuꞌ.
21 Yet lanhan iswaꞌ Komam yebꞌ ebꞌyaꞌ tuꞌ,
yalni Komam:
—Yinh kaw yeli chiwalan teyet,
ay huneꞌ mak texol tiꞌ chinanokojan yul isqꞌabꞌ kamikal,
xhi Komam.
22 Yet yabꞌen ebꞌyaꞌ huneꞌ tuꞌ,
kaw ok bꞌiskꞌulal yinh iskꞌul ebꞌyaꞌ.
Yok ebꞌyaꞌ isqꞌambꞌeno tet Komam yinh hununtajil:
—Mamin,
¿maxhmitajinan?
xhi ebꞌyaꞌ yinh hununtajil.
23 Istaqꞌwi Komam:
—Haꞌ huneꞌ mak huneꞌnhe chu wanaytojan inqꞌabꞌan yul plato yebꞌi haꞌ chinanokojan yul isqꞌabꞌ kamikal.
24 Hanin Aqꞌbꞌilintijan texol yu Komam Dios,
yilal wekꞌan yinh kamikal,
hakaꞌ yalni yul Yum Komam Dios.
Yajaꞌ,
¡kꞌanchꞌan naj chinanikojan yul isqꞌabꞌ kamikal!
Ayxikꞌa mach pitzkꞌa naj yul sat yibꞌanhqꞌinal tiꞌ,a
xhi Komam.
25 Naj Judas naj chiꞌaniko Komam yul isqꞌabꞌ kamikal tuꞌ,
isqꞌambꞌe naj:
—Mam kuywawom,
¿tom haninan?
xhi naj.
Istaqꞌwi Komam:
—Hoꞌ,
hachtoni,
xhi Komam.
26 Yet lanhan iswaꞌ Komam,
yinikanh ixim pan,
yaqꞌni Komam yuchꞌandiosal tet Komam Dios,
isqꞌaxponayo Komam ixim.
Lahwi tuꞌ yaqꞌni Komam ixim tet ebꞌyaꞌ iskuywom;
yalni Komam:
—Wahwej,
huneꞌ tiꞌ yechelb innimanilan yehi,
xhi Komam.
27 Yinipaxokanh Komam chꞌen copa,
yaqꞌni Komam yuchꞌandiosal tet Komam Dios.
Lahwi tuꞌ yaqꞌni Komam chꞌen copa tuꞌ tet ebꞌyaꞌ,
yalni Komam:
—Ukꞌwe huneꞌ tiꞌ hesunil,
28 yuto haꞌ huneꞌ tiꞌ yechel inchikꞌilan chimalto yu istanh ismul txꞌiꞌal anma,
yunhe yijnikano isbꞌa huneꞌ akꞌ trato chaqꞌ Komam Dios.
29 Chiwalpaxojan teyet tato matxa chiwukꞌan yal teꞌ uva masanto yet chiꞌok Inmaman Yahawilal katto wukꞌnihan yinh yakꞌtohal hunelxa,
xhi Komam tet ebꞌyaꞌ.
Yal Komam Jesús ta chal yaꞌ Pedro ta mach yohtajo yaꞌ Komam
30 Hayet lahwi isbꞌitnhenkano ebꞌyaꞌ bꞌit tet Komam Dios,
isto Komam Jesús yebꞌ ebꞌyaꞌ bꞌey wonhan Olivo.
31 Yalni Komam tet ebꞌyaꞌ iskuywom tuꞌ:
—Yinh huneꞌ aqꞌbꞌal tiꞌ chikabꞌkonokanh heyanma winhan hesunil,
yuto tzꞌibꞌnhebꞌilkano hakaꞌ tiꞌ:
“Chinpotxꞌan naj tanhem meꞌ,
kat ispujnakanto noꞌ meꞌ tuꞌ,”
xhihayoj.
32 Yajaꞌ yet chinitzitzbꞌikanhan xin,
chinbꞌabꞌitojan tesata bꞌey Galilea,
xhi Komam.
33 Yalni yaꞌ Pedro tet Komam:
—Mamin,
waxanhka sunil mak chikabꞌkonkanh iskꞌul tawinh,
yajaꞌ wal hinan,
machoj,
xhi yaꞌ.
34 Yalni Komam Jesús tet yaꞌ:
—Yinh kaw isyelal chiwalan tawet,
yinh huneꞌ aqꞌbꞌal tiꞌ oxelxa chawala ta mach kinhawohtajojan yet chiꞌoqꞌokanh noꞌ icham chiyo,
xhi Komam tet yaꞌ.
35 Istaqꞌwi yaꞌ Pedro:
—Waxanhka chinaqꞌlax kamojan tawinta Mamin,
yajaꞌ mach chu walnihan ta mach kaxhwohtajojan,
xhi yaꞌ.
Hakaꞌtikꞌa yu yalni yaꞌ Pedro tuꞌ,
hak tuꞌ yu yalnipaxo ebꞌyaꞌ sunil.
Txahli Komam Jesús bꞌey Getsemaní
36 Lahwi tuꞌ xin,
isto Komam Jesús yebꞌ ebꞌyaꞌ iskuywom bꞌey huneꞌ peyabꞌ chiyij Getsemaní,
yalni Komam tet ebꞌyaꞌ:
—Kananhwekano tzꞌonhno bꞌey tiꞌ,
chintohan txahlo kosatato tiꞌ,
xhi Komam.
37 Yinito Komam yaꞌ Pedro yebꞌ ebꞌyaꞌ kawanh iskꞌahol icham Zebedeo yintaj.
Yok huneꞌ niman bꞌiskꞌulal yinh Komam,
kaw xin yaꞌ yukaniko yinh yanma.
38 Yalni Komam tet ebꞌyaꞌ:
—Kaw chiwabꞌehan isyaꞌil isbꞌiskꞌulal kamikal yinh wanmahan.
Kananhwekano bꞌey tiꞌ;
¡iwelo hewayanh wintajan!
xhi Komam.
39 Lahwi tuꞌ xin,
ishitzilo Komam hanikꞌ yinh ebꞌyaꞌ,
yay jahno Komam,
yay xulno sat txꞌotxꞌ.
Yichiko istxahli:
«Mam,
ta chisje hakꞌul kolinan tet huneꞌ isyaꞌtajil chul wibꞌanhtiꞌan;
yaj mach hakaꞌ chiwochehan,
to hakaꞌojabꞌ tzet chal hakꞌul,»
xhi Komam.
40 Lahwi tuꞌ yul Komam bꞌay kankano ebꞌyaꞌ oxwanh,
kaw xin chiway ebꞌyaꞌ yet yapni Komam,
yalni Komam tet yaꞌ Pedro:
—¿Tom mach chitecha heyu heyinilo hewayanh hunu orahil wintajan?
41 Iwelo hewayanh,
txahlanhwe tet Komam Dios haxinwal mach chexaykꞌay yul isqꞌabꞌ istxꞌojal.
Wal heyanma hinan isyijen tzet chal Komam Dios,
yajaꞌ wal henimanil xin mach chitecha yu,
xhi Komam.
42 Istopaxo Komam txahlo hunelxa,
yalnipaxo Komam yinh istxah:
«Mam,
ta mach chiꞌekꞌayo huneꞌ tiꞌ wibꞌanhan,
yuhojabꞌ hakaꞌ chal hakꞌul,»
xhi Komam.
43 Ismeltzopaxo Komam iskꞌatanh ebꞌyaꞌ,
kaw xin yexnhe isway ebꞌyaꞌ yuto kaw mach chitecha naj wayanh yu ebꞌyaꞌ.
44 Lahwi tuꞌ istopaxo Komam txahlo yinh yoxel,
hakaꞌtikꞌa yu yalni Komam yinh bꞌabꞌelal yebꞌ yinh iskayel,
haktikꞌapax tuꞌ yu yalni Komam.
45 Lahwi tuꞌ xin ismeltzo Komam bꞌay ay ebꞌyaꞌ iskuywom tuꞌ,
yalni Komam tet ebꞌyaꞌ:
—¿Tom yexnheto hewayi,
yebꞌ hexewi?
Wal tinanh maꞌapni yorahil walaxikojan,
Hanin Aqꞌbꞌilintijan texol yu Komam Dios,
yul isqꞌabꞌ anma mulum.
46 Ahanhwewanoj,
tonhwej yuto lanhan yul naj chinanikojan yul isqꞌabꞌ kamikal,
xhi Komam tet ebꞌyaꞌ.
Yet istzabꞌlaxayo Komam Jesús
47 Yet lanhan istzotel Komam Jesús tuꞌ,
yapni naj Judas,
naj ayko istzꞌajo ebꞌyaꞌ 12 (kabꞌlahonhwanh) iskuywom Komam.
Kaw xin hantanhe ebꞌnaj tzujan yinta naj,
iqꞌbꞌil yespada yebꞌ isteꞌ ebꞌnaj yu;
chejbꞌil ebꞌnaj yu ebꞌnaj iswiꞌehal sacerdote,
yebꞌ ebꞌnaj ichamta winaj iswiꞌehal konhobꞌ Israel.
48 Wal xin halbꞌilxa tet ebꞌnaj yu naj Judas tuꞌ yinh tzet chu yaniko naj Komam yul isqꞌabꞌ ebꞌnaj,
yet yalni naj:
«Haꞌ naj chintzꞌohan isqꞌotx,
haꞌ naj chetzabꞌayoj,»
xhi naj.
49 Yuxin hayet ishitziko naj iskꞌatanh Komam,
yalni naj:
—¿Hanikꞌ haweh Mam kuywawom?
xhi naj.
Istzꞌohni naj isqꞌotx Komam.
50 Yalni Komam tet naj:
—Hach amigo,
haꞌ tzet chihul hawubꞌ,
watxꞌe tinanh,
xhi Komam.
Istit bꞌulna ebꞌnaj istzabꞌnoyo Komam.
51 Yajaꞌ ay huneꞌ yaꞌ iskuywom Komam yihti yespada yul yatut,
ispitnilto yaꞌ istxikin huneꞌ ischejabꞌ naj yahawil sacerdote.
52 Yalni Komam Jesús tet yaꞌ:
—Ayto hawespada yul yatut yuto haꞌ mak espada chaqꞌa,
espada chipotxꞌnipaxo kamoj.
53 ¿Tom mach chu hinqꞌannihan 12 (kabꞌlahonhebꞌ) legiónc ebꞌnaj ángel tet Inmaman tinanh ta chiwochehan?
54 Yajaꞌ ta hak tuꞌ,
machim chiyij isbꞌa tzet tzꞌibꞌnhebꞌilkano yul Yum Komam Dios winhan bꞌay chala tato yilal yuni hunteqꞌan tiꞌ,
xhi Komam.
55 Lahwi tuꞌ,
yalni Komam tet ebꞌnaj apni tuꞌ:
—¿Tom elqꞌom hinan teyet yuxin iqꞌbꞌil heyespada yebꞌ heteꞌ winhan chexhul kinhetzabꞌnoyojan?
Hunun tzꞌayik inbꞌeyan kuywal yul Yatut Komam Dios texol,
yajaꞌ mach kinhetzabꞌayojan.
56 Yajaꞌ tinanh,
yilal yuni sunil hunteqꞌan tiꞌ yunhe yijni isbꞌa sunil tzet tzꞌibꞌnhebꞌilkano yu ebꞌyaꞌ ischejabꞌ Komam Dios yet payat,
xhi Komam.
Wal ebꞌyaꞌ iskuywom Komam xin elkanh ebꞌyaꞌ,
yanikano ebꞌyaꞌ Komam ischukil.
Ilaxto Komam Jesús sata ebꞌnaj iswiꞌehal konhobꞌ Israel
57 Lahwi tuꞌ yinito ebꞌnaj Komam Jesús bꞌey yatut naj Caifás,
yahawil sacerdote.
Haꞌ bꞌey tuꞌ xin kutxaniko ebꞌnaj kuywawom yinh isley yaꞌ Moisés,
yebꞌ ebꞌnaj iswiꞌehal konhobꞌ.
58 Wal yaꞌ Pedro xin nahat tzujan isto yaꞌ yinta Komam,
yapni yaꞌ yamaqꞌil yatut naj yahawil sacerdote tuꞌ,
yay tzꞌonhno yaꞌ xol ebꞌnaj chitanhen Yatut Komam Dios yu yilni yinh tzet chiꞌeliko Komam.
59 Wal ebꞌnaj iswiꞌehal sacerdote yebꞌ ebꞌnaj yahawil yinh lahtiꞌ xol ebꞌnaj Israel issay ebꞌnaj mak chiꞌok halno leqꞌtiꞌal yinh Komam yunhe iskawxiko kamikal yibꞌanh.
60 Kaw xin txꞌiꞌal mak oktoj,
ishobꞌnikanh ebꞌnaj leqꞌtiꞌal yinh Komam,
yajaꞌ maxhtikꞌa hunu tzet ok ismulo Komam.
Lahwi tuꞌ yapni kawanhxa ebꞌnaj,
61 yalni ebꞌnaj:
—Huneꞌ naj tiꞌ jabꞌehanh yalni naj hakaꞌ tiꞌ:
“Hanintiꞌan chu wuchkꞌanayojan huneꞌ Yatut Komam Dios tiꞌ,
kat wanikanhan isselel yinh oxebꞌ tzꞌayik,”
xhi naj,
xhi ebꞌnaj yinh Komam.
62 Yah linhno naj yahawil sacerdote,
yalni naj tet Komam:
—¿Tzet yinh xin mach chaxhtaqꞌwi?
¿Tzet ye hunteqꞌan chal ebꞌnaj tiꞌ tawinh?
xhi naj.
63 Yajaꞌ maxhtikꞌa taqꞌwi Komam tet naj,
lahwi tuꞌ yalnipaxo naj:
—Yinh isbꞌi Komam Dios itzitz,
hal yinh isyelal jetanh.
¿Ham hach tiꞌ Cristo,
Iskꞌahol Komam Dios?
xhi naj.
64 Istaqꞌwi Komam:
—Hoꞌ,
hanintonan hakaꞌ hawalni tiꞌ.
Chiwalan teyet tato Hanin Aqꞌbꞌilintijan texol yu Komam Dios cheyil wok tzꞌonhnojan yinh iswatxꞌqꞌabꞌ Komam Dios kaw aykano yip,
kat heyilni wulan xol moyan,
xhi Komam.
65 Yet yabꞌen naj yahawil sacerdote tzet yal Komam tuꞌ,
istzilnilo naj xil isqꞌap yu ishowal,
yalni naj tet ebꞌnaj yetbꞌi tuꞌ:
—Huneꞌ mayal naj tiꞌ,
kaw txꞌoj yul sat Komam Dios.
Yuxin tinanh matxa yilal chikoqꞌan anma chihalni ismul naj,
wal xin hanhkawonh majabꞌe istxꞌojal istzotel naj.
66 Yuxin,
¿tzet cheyute heyalni hex tiꞌ?
xhi naj.
Istaqꞌwi ebꞌnaj:
—Ay ismul naj,
kamojabꞌ naj,
xhi ebꞌnaj.
67 Istzubꞌliko ebꞌnaj yinh sat Komam,
ismaqꞌnipaxo ebꞌnaj Komam,
ay ebꞌnaj xin paqꞌnilto sat Komam,
68 chalni ebꞌnaj:
—Hach Cristo,
txumiloj mak makaxhmaqꞌni,
xhi ebꞌnaj tet Komam.
Yal yaꞌ Pedro ta mach yohtajo yaꞌ Komam Jesús
69 Yet tzꞌonhanayo yaꞌ Pedro istiꞌ yamaqꞌil teꞌ nha tuꞌ,
ishitziko huneꞌ ix chejabꞌ iskꞌatanh yaꞌ,
yalni ix:
—Hach tiꞌ hawetbꞌi habꞌa yebꞌ naj Jesús ah Galilea,
xhi ix.
70 Wal yaꞌ Pedro tuꞌ yebꞌa yaꞌ yinh sat sunil anma,
yalni yaꞌ:
—Mach wohtajojan tzet chawala,
xhi yaꞌ.
71 Haxa yet yapni yaꞌ bꞌey ispultahil yamaqꞌil teꞌ nha tuꞌ,
yalni hunxa ix tet anma kutxaniko bꞌey tuꞌ:
—Naj tiꞌ yetbꞌi isbꞌa naj yebꞌ naj Jesús ah Nazaret,
xhi ix.
72 Yajaꞌ yebꞌa yaꞌ hunelxa,
yalni yaꞌ:
—Kaw chabꞌe Komam Dios,
¡mach wohtajojan huneꞌ naj tuꞌ!
xhi yaꞌ.
73 Hunepixto xin ishitziko hunteqꞌan ebꞌnaj iskꞌatanh yaꞌ,
yalni ebꞌnaj:
—Yinh kaw yeli,
hach tiꞌ hawetbꞌi habꞌa yebꞌ ebꞌnaj chiꞌekꞌ yinta naj Jesús tiꞌ yuto ixtanh kotxumnilojanh hatzoteli,
xhi ebꞌnaj.
74 Yajaꞌ ok yaꞌ Pedro tuꞌ istzꞌaktiꞌnhe isbꞌa,
yalni yaꞌ:
—Kaw chabꞌe Komam Dios,
¡mach wohtajojan huneꞌ naj tuꞌ!
xhi yaꞌ.