3 Yuxin hak tuꞌ yu isbꞌey naj Judas tuꞌ issaynoyo Komam.

Tzujan xin hunbꞌulan ebꞌnaj soldado yinta naj,

yebꞌ hunteqꞌan ebꞌnaj chitanhen Yatut Komam Dios chejlaxti yu ebꞌnaj fariseo yebꞌ ebꞌnaj iswiꞌehal yinh ebꞌnaj sacerdote.

Yetbꞌi ebꞌnaj tuꞌ istah,

yebꞌ iscantil,

yebꞌ chꞌen chꞌen chiꞌokniko yinh howal.

4 Wal xin,

kaw yohtaxa Komam Jesús tzet lanhan yul yibꞌanh,

yuxinto elto Komam chahwal yinh ebꞌnaj,

isqꞌambꞌeni:

—¿Mak chesaya?

xhi Komam.

5 Istaqꞌwi ebꞌnaj xin:

—Naj Jesús nazareno chikosayikꞌojanh,

xhi ebꞌnaj.

—Hanintonan,

xhi Komam tet ebꞌnaj.

Aypaxiko naj Judas xol ebꞌnaj,

naj chiꞌaniko Komam yul isqꞌabꞌ kamikal.

6 Yet yalni Komam hakaꞌ tiꞌ:

«Hanintonan,»

isto tekton ebꞌnaj yintaj,

yaykꞌay ebꞌnaj xin.

7 Lahwi tuꞌ,

isqꞌambꞌenpaxo Komam:

—¿Mak chesaya?

xhi Komam.

—Haꞌ naj Jesús nazareno chikosayanh,

xhipaxo ebꞌnaj.

8 Yalni Komam xin:

—Yaj kaw chiwalan teyet tato haninan chinhesayikꞌojan,

bꞌejwekano ebꞌnaj tiꞌ,

xhi Komam tet ebꞌnaj.

9 Hak tuꞌ xin yu yijni isbꞌa tzet yal Komam tet Komam Dios yet yalni:

«Sunil ebꞌnaj hawaqꞌ yul inqꞌabꞌan,

machi hunu ebꞌnaj kꞌayto wuhan,»

xhi.

10 Wal yaꞌ Simón Pedro,

yihti yaꞌ yespada yul yatut,

ispitnilto yaꞌ istxikin ischejabꞌ naj yahawil sacerdote,

Malco isbꞌi.

Haꞌ huneꞌ istxikin naj yinh iswatxꞌqꞌabꞌ haꞌ ispitilto yaꞌ.

11 Yalni Komam tet yaꞌ:

—Ayto hawespada yul yatut.

¿Tom mach yilalo waqꞌni hinbꞌahan yul isqꞌabꞌ isyaꞌtajil nabꞌiliko winhan yu Inmaman?

xhi Komam.

12 Lahwi tuꞌ xin,

istzabꞌlaxayo Komam Jesús yu ebꞌnaj soldado,

yebꞌ yu naj yahawil yeko yinh ebꞌnaj,

yebꞌ yu ebꞌnaj chitanhen Yatut Komam Dios chejbꞌilti yu ebꞌnaj yahawil yinh ebꞌnaj Israel;

iskꞌalnayo ebꞌnaj Komam.

13 Bꞌabꞌel yito ebꞌnaj Komam bꞌey yatut naj Anás,^a

ismam yixal naj Caifás.

Haꞌ naj Caifás,

kaw yahawil yeko yinh ebꞌnaj sacerdote yinh huneꞌ habꞌil tuꞌ.

14 Haꞌ naj Caifás tuꞌ halni tet ebꞌnaj yahawil yinh ebꞌnaj sacerdote tato ekꞌna kꞌul iskam hunu anma selelo sunil anma ay yul konhobꞌ Israel tuꞌ.

15 Yet yilaxto Komam Jesús,

kaw nahat tzujan isto yaꞌ Pedro yinta Komam,

yebꞌ huneꞌxa yaꞌ iskuywom Komam.

Huneꞌ yaꞌ tiꞌ xin,

kaw yohta isbꞌa yaꞌ yebꞌ naj yahawil sacerdote,

yuxinto okto yaꞌ istiꞌ yatut naj yinta Komam.

16 Wal yaꞌ Pedro tuꞌ xin,

kankano yaꞌ sat huneꞌ pulta ayko istiꞌ bꞌeh,

yaj xin elti yaꞌ iskuywom Komam yohta isbꞌa yebꞌ naj yahawil sacerdote,

yalni yaꞌ tet ix chitanhen pulta tuꞌ ta chiꞌokto yaꞌ Pedro.

17 Yalni ix chitanhen yokto anma yul huneꞌ pulta tuꞌ tet yaꞌ Pedro:

—¿Tom maxhtaj hunach chaxhkuywi yinta huneꞌ naj tiꞌ?

xhi ix tet yaꞌ.

Istaqꞌwi yaꞌ Pedro tuꞌ tet ix:

—Machoj,

maxhtaj hinan,

xhi yaꞌ.

18 Yet huneꞌ tiempohal tuꞌ kaw chew,

yuxin yako ebꞌnaj chejabꞌ yebꞌ ebꞌnaj chitanhen Yatut Komam Dios qꞌaꞌ,

yok ebꞌnaj qꞌaxhnoj.

Sunil ebꞌnaj tuꞌ ok linhno yinh qꞌaꞌ,

haꞌ hun yaꞌ Pedro tuꞌ ok linhno qꞌaxhno yinh qꞌaꞌ xol ebꞌnaj.

19 Lahwi tuꞌ xin,

isqꞌambꞌen naj yahawil sacerdote hunteqꞌan qꞌambꞌebꞌal tet Komam Jesús:

—¿Mak ebꞌnajil chikuywi tawintaj?

¿Tzettaj ye tuꞌ chawaqꞌ iskuyuꞌ ebꞌnaj?

xhi naj tet Komam.

20 Istaqꞌwi Komam tet naj:

—Yet inkuywahan yinh anma,

kaw sajsatil kinkuywahan.

Kaw inkuyan anma yulaj capilla yebꞌ xin yul Yatut Komam Dios bꞌay chilaiskutxbꞌa isbꞌa anma Israel.

Yuxinto kaw machi hunu tzet ye tuꞌ tiꞌ walan yinh kaw ewantajil.

21 ¿Tzet yinh yuxinto wetan chaqꞌambꞌe?

Qꞌambꞌe tet anma bꞌay kinkuywahan,

haꞌ anma chihalni tawet tzet waqꞌan iskuyuꞌ.

Wal xin kaw yohta anma tuꞌ tzet halbꞌilkano tet wuhan,

xhi Komam.

22 Yet yalni Komam tet naj hakaꞌ tuꞌ,

ispaqꞌlaxilto sat Komam yu huneꞌ naj chitanhen Yatut Komam Dios,

yalni naj:

—¿Tzet yinh yuxinto hak tuꞌ hataqꞌwi tet yaꞌ yahawil sacerdote tiꞌ?

xhi naj tet Komam.

23 Istaqꞌwikanh Komam:

—Tato ay hunu txꞌoj mawalan chawabꞌe,

halilo tinanh bꞌaytet.

Ta kꞌul xin,

¿tzet yinh yuxinto chinhamaqꞌan?

xhi Komam tet naj.

24 Iskꞌal-laxto Komam tet naj Caifás yu naj Anás,

naj yahawil yinh ebꞌnaj sacerdote.

25 Wal yaꞌ Pedro xin,

qꞌaxhno chu yaꞌ xol ebꞌnaj chejabꞌ yebꞌ ebꞌnaj chitanhen Yatut Komam Dios,

yok ebꞌnaj isqꞌambꞌeno tet yaꞌ:

—¿Wal hach hach tiꞌ,

iskuywom naj Jesús tiꞌ hawehi?

xhi ebꞌnaj tet yaꞌ.

Yaj kaw maxhtikꞌa yalilo yaꞌ,

yalni yaꞌ hakaꞌ tiꞌ:

—Machoj,

kaw mach wetbꞌiho hinbꞌahan yebꞌ naj,

xhi yaꞌ Pedro tuꞌ.

26 Hunepixto xin,

isqꞌambꞌen huneꞌ ischejabꞌ naj yahawil sacerdote ayto yu isbꞌa yebꞌ naj elto istxikin yu yaꞌ Pedro tuꞌ:

—Yaj kaw kaxhwilan xol teꞌ tzꞌunubꞌ yebꞌ naj Jesús tiꞌ,

xhi naj.

27 Yanipaxiko yaꞌ Pedro tuꞌ leqꞌtiꞌal tato mach yohtajo yaꞌ Komam,

hunepixto xin,

yoqꞌkanh noꞌ icham chiyo.

28 Yet issajbꞌilo xin,

yilaxilti Komam Jesús yul yatut naj Caifás,

yilaxto Komam sata naj gobernador Poncio Pilato.

Yaj mach okto ebꞌnaj Israel yul kapil bꞌay ayikto naj gobernador tuꞌ,

yuto txahul yokto ebꞌnaj hakaꞌ yalni isley ebꞌnaj.

Tato chiꞌokto ebꞌnaj tuꞌ,

matxa chiyu islohni ebꞌnaj itah chilolax yinh qꞌinh Pascua.

29 Yuxinto elti naj gobernador tzotelo istiꞌ kapil,

isqꞌambꞌen naj tet ebꞌnaj:

—¿Tzet ismul huneꞌ naj tiꞌ heyalni?

xhi naj.

30 Istaqꞌwi ebꞌnaj tet naj:

—Tato mach xiwkilta ismul naj tiꞌ,

machim majitijanh naj tawet,

xhi ebꞌnaj.

31 Yalni naj Pilato tuꞌ tet ebꞌnaj:

—Iweto naj,

kat xin heyilni tzet chiꞌeliko naj hakaꞌ chiyute yalni heley,

xhi naj tet ebꞌnaj.

Istaqꞌwi ebꞌnaj Israel tuꞌ:

—Yaj wal hanhonh Israel honhtiꞌanh,

kaw mach chiyu jaqꞌni kamojanh hunu anma,^b

xhi ebꞌnaj.

32 Hak tuꞌ xin yu yijni isbꞌa tzet halbꞌilkano yu Komam Jesús yinh tzet chiyu iskami.

33 Yokpaxto naj Pilato tuꞌ yul kapil hunelxa.

Yawtenikto naj Komam Jesús iskꞌatanh,

isqꞌambꞌen naj tet Komam:

—¿Tom yahawil anma Israel hawehi?

xhi naj tet Komam.

34 Istaqꞌwi Komam xin:

—¿Yulmi hawiꞌ chawiti chawalni huneꞌ tiꞌ,

mato ay mak halnhe tawet?

xhi Komam.

35 Istaqꞌwi naj Pilato tuꞌ xin:

—¿Tom Israel hinan hawalni?

Haꞌ ebꞌnaj hawet konhobꞌ,

yebꞌ xin ebꞌnaj yahawil yehiko yinh ebꞌnaj sacerdote,

haꞌ ebꞌnaj makaxhiniti wetan,

¿tzet hamul?

xhi naj tet Komam.

36 Yalni Komam:

—Wal hanintiꞌan,

maxhtaj yul huneꞌ sat yibꞌanhqꞌinal tiꞌ chinokan Yahawil.

Tato yul sat yibꞌanhqꞌinal tiꞌ yahaw hinan,

sunilmi anma ayxako yul inqꞌabꞌan chiskutxbꞌa isbꞌa kat xin istzabꞌniko howal yunhe kiniskolnihan yul isqꞌabꞌ ebꞌnaj yahawil konhobꞌ Israel.

Wal xin maxhtaj yul sat yibꞌanhqꞌinal tiꞌ chinokan Yahawil,

xhi Komam tet naj.

37 Yalni naj Pilato tuꞌ:

—¿Tom yeltikꞌa yahawil hach,

chal tuꞌ?

xhi naj.

—Hoꞌ Yahawil wehan hakaꞌ hawalni tiꞌ.

Kinpitzkꞌahan yul sat yibꞌanhqꞌinal tiꞌ yunhe walnihan isyelal.

Yuxin maknhetikꞌa yetxatikꞌa isyelal yehi chiyabꞌe tzet chiwalan,

xhi Komam.

38 Isqꞌambꞌen naj Pilato tuꞌ:

—¿Tzet yelapno huneꞌ isyelal tuꞌ?

xhi naj tet Komam.

Yet lahwi isqꞌambꞌen naj Pilato tet Komam hakaꞌ tuꞌ xin,

yelpaxti naj istiꞌ kapil,

yalni naj tet ebꞌnaj Israel kutxaniko tuꞌ:

—Wal hinan,

kaw machi mule chiꞌilchalo yinh naj tiꞌ wuhan.

39 Yaj hex tiꞌ,

kaw hunun habꞌil heqꞌannilto hunun ebꞌnaj presowom yet chiꞌekꞌ qꞌinh Pascua tiꞌ.

¿Chimheyoche tato chinbꞌejtzohan huneꞌ naj heYahawil tiꞌ?

xhi naj tet ebꞌnaj.

40 Yet yabꞌen ebꞌnaj yalni naj Pilato hakaꞌ tuꞌ,

yah wejla ebꞌnaj,

yalni yinh kaw ip:

—¡Machoj!

Maxhtaj naj chabꞌejtzo,

wal xin haꞌ naj Barrabás,

xhi ebꞌnaj.

Wal naj Barrabás tuꞌ xin,

elqꞌom naj.