—Machahlo huneꞌ naj tiꞌ juanh,

sunil anma chisomchato isnabꞌal yu naj,

kat iskachni naj anma ta mach chaqꞌ istohlabꞌal tet naj César,

naj jahaw ay bꞌey Roma,

kat yalnipaxo isbꞌa naj Cristohal,

haꞌ chalilo Jahawil,

xhi ebꞌnaj.

3 Isqꞌambꞌen naj Pilato tet Komam:

—¿Tom Yahawil anma Israel hawehi?

xhi naj.

Istaqꞌwi Komam:

—Hoꞌ,

yeli hakaꞌ hawalni tiꞌ,

xhi Komam.

4 Yuxinto yal naj Pilato tet ebꞌnaj yahawil yeko yinh ebꞌnaj sacerdote,

yebꞌ tet sunil anma kutxaniko tuꞌ:

—Haꞌ huneꞌ winaj tiꞌ,

machi hunu mule chiꞌilchalo yinh wuhan,

xhi naj.

5 Ischilbꞌan ebꞌnaj,

yalni yinh kaw ip:

—Lanhan issomchato isnabꞌal sunil anma yu kuybꞌanile chaqꞌ naj.

Ichiti naj iskuyni anma bꞌey Galilea,

tinanh xin hak tuꞌ chutepaxo naj bꞌey Judea tiꞌ,

xhi ebꞌnaj.

6 Hayet yabꞌen naj Pilato huneꞌ tuꞌ,

isqꞌambꞌen naj ta ah Galilea Komam.

7 Hayet yabꞌen naj ta ah Galilea Komam,

yanito naj Komam yul isqꞌabꞌ naj Herodes,

yuto naj Herodes tuꞌ ayko yahawilo bꞌey Galilea.

Kꞌuxan xin aykꞌo naj Herodes bꞌey Jerusalén yet yuni huneꞌ tuꞌ.

8 Hayet yilni naj Herodes Komam,

kaw tzalakanh naj yuto payxa ichi yochen naj yilaꞌ Komam.

Kaw xin txꞌiꞌalxa bꞌay chabꞌe naj yinh Komam.

Kaw xin choche naj yilaꞌ iswatxꞌen Komam hunu kꞌaybꞌalkꞌule.

9 Kaw txꞌiꞌal tzet isqꞌambꞌe naj tet Komam,

yajaꞌ maxhtikꞌa taqꞌwi Komam tet naj.

10 Wal ebꞌnaj iswiꞌehal yinh ebꞌnaj sacerdote yebꞌ ebꞌnaj chikuyni anma yinh isley yaꞌ Moisés,

kaw ischilbꞌa ebꞌnaj yok aqꞌokꞌule yinh Komam.

11 Naj Herodes yebꞌ ebꞌnaj issoldado tuꞌ ok ebꞌnaj isbꞌuchuꞌ Komam.

Yaniko ebꞌnaj huneꞌ xilqꞌape yinh Komam hakaꞌ chako ebꞌnaj rey yunhe yok ebꞌnaj tzebꞌo yinh Komam.

Lahwi tuꞌ xin,

yanipaxto naj Herodes tuꞌ Komam yul isqꞌabꞌ naj Pilato hunelxa.

12 Yinhtikꞌa huneꞌ tzꞌayikal tuꞌ,

naj Pilato yebꞌ naj Herodes ok ebꞌnaj amigohal,

yaj wal yet yalanhto kaw ayleko ishowal ebꞌnaj yinh hunun.

13 Iskutxbꞌaniko naj Pilato ebꞌnaj iswiꞌehal yinh ebꞌnaj sacerdote,

yebꞌ ebꞌnaj yahaw konhobꞌ,

yebꞌpaxo sunil anma yul konhobꞌ tuꞌ.

14 Yalni naj tet ebꞌnaj:

—Haꞌ huneꞌ naj maxeyiti wettiꞌan cheyala ta lanhan issomchankanh naj isnabꞌal sunil anma.

Wal xin tesata manqꞌambꞌehan tet naj,

yajaꞌ kaw machi hunu ismul naj chiꞌilchalo wuhan hakaꞌ cheyute heyalni tiꞌ.

15 Mawatojan naj yul isqꞌabꞌ naj Herodes,

yajaꞌ mach ismul naj maꞌilcha yu naj,

yuxin mayapaxti naj Herodes tuꞌ naj hunelxa wetan.

Wal xin,

mach ismul naj chꞌaqꞌni kamoj.

16 Tonhe xin chiwaqꞌ hatelaxojan naj,

kat inbꞌejtzonan naj,

xhi naj Pilato tuꞌ,

17 yuto yinh hunun qꞌinh Pascua chibꞌejtzolax hunun ebꞌnaj presowom.

18 Yaj sunil anma kutxaniko bꞌey tuꞌ,

ah yaw yinh kaw ip:

—¡Ilo huneꞌ naj tiꞌ yinh kosatanh,

kat hebꞌejtzon naj Barrabás!

xhixanhe anma.

19 Yaj naj Barrabás tuꞌ,

ayko naj preso yu huneꞌ howal yicheko naj yul konhobꞌ tuꞌ,

yebꞌpaxo potxꞌom anma naj.

20 Wal naj Pilato,

kaw yoche naj isbꞌejtzoꞌ Komam Jesús,

yuxinto tzotelilti naj xol anma hunelxa.

21 Yajaꞌ anma tuꞌ,

kaw ekꞌbꞌalto ah yaw,

yalni hakaꞌ tiꞌ:

—¡Kamojabꞌ naj yinh kulus!

¡Kamojabꞌ naj yinh kulus!

xhixanhe anma tuꞌ.

22 Yalni naj Pilato yinh yoxel tet ebꞌnaj:

—¿Tzet yu?

¿Tzet istxꞌojal iswatxꞌe naj heyalni?

Mach hunu ismul naj chiꞌilchalo yinh wuhan chꞌaqꞌni kamoj.

Wal xin tonhe chinchejan hatelaxo naj,

kat inbꞌejtzonan naj,

xhi naj.

23 Ischilbꞌan ebꞌnaj yel yaw yinh kaw ip,

isqꞌanni kamo ebꞌnaj Komam yinh teꞌ kulus.

Yu kaw chꞌel yaw ebꞌnaj yuxinto aqꞌlax tzet choche ebꞌnaj.

24 Yuxinto isyije naj Pilato tzet isqꞌan ebꞌnaj.

25 Wal xin,

haꞌ naj ayko preso yu howal yebꞌ yu potxꞌwal,

haꞌ naj isbꞌejtzoto naj Pilato hakaꞌ yu isqꞌanni ebꞌnaj.

Yaniko naj Pilato Komam yul isqꞌabꞌ ebꞌnaj.

26 Yet lanhan yilaxto Komam Jesús bꞌay chꞌalaxkanh yinh kulus,

istzabꞌnayo ebꞌnaj huneꞌ naj,

Simón isbꞌi.

Lanhan yokto naj yul konhobꞌ tuꞌ,

haꞌ bꞌey txꞌotxꞌ Cirene ay naj.

Yalaxiko iskulus Komam yibꞌanh naj,

yok tzujno naj yinta Komam.

27 Kaw hantanhe anma ok tzujno yinta Komam;

xol anma tuꞌ ay hunteqꞌan ebꞌix kaw chꞌoqꞌ yu bꞌiskꞌulal yinh Komam.

28 Istꞌanhxiti Komam yinh ebꞌix,

yalni Komam tet ebꞌix:

—Hex ix ah Jerusalén tiꞌ,

mach chexoqꞌ winhan.

Oqꞌanhwe teyinh yebꞌ yinh nixhtej heyunin.

29 Yuto chihul istzꞌayikal bꞌay chihal-lax hakaꞌ tiꞌ:

“Saqꞌal yet ebꞌix ix maxhtikꞌa yunin,

yebꞌ ebꞌix maxhtikꞌa unin chitxutxwi yinh,”

xhi anma tuꞌ.

30 Yet huneꞌ tiempohal tuꞌ,

chal anma hakaꞌ tiꞌ:

“Majaltam chititkꞌay witz tiꞌ jibꞌanh,

kat komujikano yalanh,”

xhi anma tuꞌ.

31 Ta hanintiꞌan,

lahan hinan hakaꞌ hunu teꞌ qꞌebꞌtaj kaw yax,

yaj chꞌekꞌyaꞌ wanmahan yu anma,

hajxamex hex tiꞌ,

lahan hex yebꞌ teꞌ tajin teꞌ kaw niman isyaꞌtajil cheyila,

xhi Komam.

32 Aypaxo kawanhxa ebꞌnaj kaw xiwkilta ismul,

ilaxto kamo yinh kulus yinta Komam.

33 Hayet yapni ebꞌnaj bꞌey huneꞌ txꞌotxꞌ chij Calavera,

chalilo Isbꞌajil Wiꞌe,

yalaxkanh Komam yinh kulus.

Hak tuꞌ utelax kawanh ebꞌnaj xiwkilta ismul tuꞌ,

huneꞌ naj ah yinh iswatxꞌqꞌabꞌ Komam,

hunxa naj yinh ismekqꞌabꞌ Komam.

34 Hayet aykanh Komam yinh kulus tuꞌ,

yalni hakaꞌ tiꞌ:

—Mamin,

aqꞌ nimankꞌulal yinh anma tiꞌ,

yuto mach chinachalo yu ta txꞌoj tzet chiswatxꞌe,

xhi Komam.

Yok ebꞌnaj soldado yilweno isbꞌa yinh mak chiꞌinito xil isqꞌap Komam.

35 Sunil anma tuꞌ tꞌanhaniko yilni tzet chuhi;

yok ebꞌnaj yahaw konhobꞌ bꞌuchwal yinh Komam,

yalni ebꞌnaj:

—Ta haꞌ naj tiꞌ Cristo sikꞌbꞌililo yu Komam Dios,

iskolabꞌayti isbꞌa naj,

hakaꞌ yu iskolwa naj yinh anma,

xhi ebꞌnaj.

36 Hakpax tuꞌ ebꞌnaj soldado,

ok ebꞌnaj bꞌuchwal yinh Komam,

yaqꞌni ebꞌnaj pahla vinagre yukꞌuꞌ Komam.

37 Yalni ebꞌnaj:

—Ta yeli yahaw anma Israel hawehi,

kolayti habꞌa,

xhi ebꞌnaj.

38 Yinh iswiꞌ iskulus Komam tzꞌibꞌnhebꞌiliko hayebꞌ tzꞌibꞌ,

chalni hakaꞌ tiꞌ:

«Haꞌ naj tiꞌ,

yahawil anma Israel,»

xhikoj.

39 Xol ebꞌnaj kawanh alaxkanh yinh kulus yinta Komam,

ay huneꞌ naj txꞌoj istzotel tet Komam,

yalni naj tet Komam:

—Ta hach tiꞌ Cristo hach,

kolayto habꞌa,

kat konhhakolnipaxaytojanh,

xhi naj.

40 Haxa huneꞌxa yetbꞌi naj kachwa yinh hakaꞌ tiꞌ:

—¿Tom mach chaxhxiw tet Komam Dios?

¿Tom mach chawila tato lahan jeko yinh isyaꞌtajil yebꞌ yaꞌ?

41 Wal hanhonh tiꞌ,

lanhan yekꞌyaꞌ janma yu kotohlan istxꞌojal kowatxꞌe,

wal yaꞌ tiꞌ,

machi nino istxꞌojal iswatxꞌe yaꞌ,

xhi naj tet yetbꞌi tuꞌ.

42 Yalni naj tet Komam:

—Mam Jesús,

chinhanabꞌaꞌtijan yet chaxhhuli kat hawok Yahawil,

xhi naj tet Komam.

43 Yalni Komam tet naj:

—Yinh kaw isyelal chiwalan tawet,

haꞌtikꞌa tinanh chaxhapno inkꞌatanhan bꞌey huneꞌ ehobꞌal chij Paraíso,

xhi Komam tet naj.

44 Yet chuman xin isqꞌejholilo yul yibꞌanhqꞌinal tiꞌ masanto yinh chꞌen oxebꞌ yinh qꞌejbꞌiyal issajbꞌipaxiloj.

45 Istzilmopaxayo huneꞌ qꞌap qꞌap aykanh yul Yatut Komam Dios,

kabꞌ ayiko qꞌap.

46 Yah yaw Komam yinh kaw ip,

yalni:

—Mam,

yul haqꞌabꞌ chiwakanikojan wanmatiꞌan,

xhi Komam.

47 Hayet yilni naj yahawil ebꞌnaj soldado ah Roma huneꞌ tuꞌ,

yok naj yalno kꞌul-la tzotiꞌ yinh Komam Dios,

yalni naj:

—Yinh kaw yeli,

huneꞌ winaj tiꞌ mach ismul,

xhi naj.

48 Sunil anma kutxaniko bꞌey tuꞌ,

hayet yilni tzet yuhi,

kaw toxanhe chistinh anma istxam iskꞌul yu bꞌiskꞌulal yet ispaxto yatut.

49 Wal sunil anma yohta isbꞌa yebꞌ Komam Jesús,

yebꞌ hunteqꞌan ebꞌix ok tzujno yinta Komam yet istit bꞌey Galilea,

nahat linhanti yilni tzet chuhi.

50 Ay huneꞌ naj José isbꞌi,

ay bꞌey konhobꞌ Arimatea,

yul ismajul Judea;

naj tuꞌ,

kaw kꞌul iskꞌul naj,

kaw kꞌulpaxo isbꞌeybꞌal naj.

Ayko naj xol ebꞌnaj iswiꞌehal yinh lahtiꞌ yul konhobꞌ Israel.

51 Yajaꞌ mach yako isbꞌa naj yinh istxꞌojal iswatxꞌe ebꞌnaj yetbꞌi tuꞌ yinh Komam Jesús,

yuto chechma naj yok Komam Dios Yahawiloj.

52 Isto naj José tuꞌ isqꞌanno isnimanil Komam tet naj Pilato.

53 Lahwi tuꞌ xin,

isto naj yinoyti isnimanil Komam yinh teꞌ kulus,

ispichniko naj huneꞌ sábana kaw kꞌul yinh.

Isto naj yanokto isnimanil Komam yul huneꞌ chꞌen chꞌen holbꞌil yul,

kaw xin maxhto hunu kamom chiꞌalaxikto yul chꞌen.

54 Haꞌ yinh huneꞌ tzꞌayikal tuꞌ chisqꞌuy isbꞌa anma Israel yinh tzet chislo yinh tzꞌayik xewilal.

Lanhanxa xin isto tzꞌayik kat yichiko tzꞌayik xewilal.

55 Haꞌ ebꞌix ix tit yinta Komam bꞌey Galilea,

topaxo ebꞌix mujwal yinh Komam,

yilni ebꞌix chꞌen chꞌen bꞌay alaxikto Komam,

yilnipaxo ebꞌix tzet yukanikto isnimanil Komam.

56 Lahwi ispaxto ebꞌix,

iswatxꞌen ebꞌix kabꞌ majan anh kaw xuqꞌ sam chꞌok yinh isnimanil Komam.

Lahwi tuꞌ xin yichiko tzꞌayik xewilal,

yuxin xew ebꞌix hakaꞌtikꞌa yalni isley yaꞌ Moisés.