Yet yilaxto Komam Jesús sata naj Pilato
27
Haxa yet issajbꞌilo xin,
islahtiꞌnhen isbꞌa ebꞌnaj iswiꞌehal sacerdote,
yebꞌ ebꞌnaj ichamta winaj iswiꞌehal konhobꞌ tuꞌ yinh tzet chu yaqꞌlax kamo Komam Jesús.
2 Lahwi tuꞌ iskꞌalnayo ebꞌnaj Komam,
yinito ebꞌnaj Komam sata naj gobernador romano,
Poncio Pilato.
Iskamikal naj Judas
3 Wal naj Judas,
naj aniko Komam yul isqꞌabꞌ ebꞌnaj tuꞌ,
hayet yilni naj ta kawxiko kamikal yibꞌanh Komam,
istak iskꞌul naj yu istxꞌojal iswatxꞌe tuꞌ,
isto naj yaqꞌnopaxo chꞌen 30 (lahonhebꞌ iskawinaj) plata tet ebꞌnaj iswiꞌehal sacerdote yebꞌ tet ebꞌnaj iswiꞌehal konhobꞌ,
4 yalni naj tet ebꞌnaj:
—Kaw mawako inmulan,
yuto mawakojan huneꞌ naj machi ismul yul isqꞌabꞌ kamikal,
xhi naj.
Istaqꞌwi ebꞌnaj tet naj:
—¡Tzet jokanh tawinh,
ilah tzet chawute habꞌa!
xhi ebꞌnaj.
5 Hayet yabꞌen naj huneꞌ tuꞌ xin istixhnikanikto naj chꞌen melyu tuꞌ yul Yatut Komam Dios.
Lahwi tuꞌ isto naj istꞌunhbꞌano isbꞌa.
6 Ebꞌnaj iswiꞌehal sacerdote issikꞌkanh ebꞌnaj chꞌen melyu tuꞌ,
yalni ebꞌnaj:
—Hunteqꞌan chꞌen melyu tiꞌ mach chu janayto chꞌen xol chꞌen ofrenda,
yuto istohol kamikal ye chꞌen,
xhi ebꞌnaj.
7 Islahtiꞌnhen isbꞌa ebꞌnaj,
isloqꞌni ebꞌnaj huneꞌ txꞌo txꞌotxꞌ chihal-lax:
Istxꞌotxꞌ naj watxꞌem xi,
yu yok camposantohal bꞌay chimujlax anma nan konhobꞌal chikam bꞌey yul konhobꞌ Jerusalén tuꞌ.
8 Yuxin Istxꞌotxꞌal Chikꞌ okkano isbꞌiho huneꞌ txꞌo txꞌotxꞌ tuꞌ,
haꞌ xin chihal-lax yinh txꞌotxꞌ tinanh.
9 Hak tuꞌ yu yijni isbꞌa tzet halbꞌilkano yu yaꞌ Jeremías,
yet yalni yaꞌ:
«Yikanh ebꞌnaj chꞌen 30 (lahonhebꞌ iskawinaj) plata,
chꞌen yaqꞌ ebꞌnaj Israel istoholo huneꞌ naj.
10 Yinh chꞌen xin isloqꞌ ebꞌnaj istxꞌotxꞌ naj watxꞌem xi,
hak tuꞌ yu yalni Komam Dios Jahawil wetan,»a
xhikano yaꞌ Jeremías yul Yum Komam Dios.
Yet ayko Komam Jesús sata naj Pilato
11 Yet ayko Komam Jesús sata naj Pilato isqꞌambꞌen naj tet Komam:
—¿Tom yahawil anma Israel hawehi?
xhi naj.
Istaqꞌwi Komam:
—Hoꞌ,
yeli hakaꞌ hawalni tiꞌ,
xhi Komam.
12 Wal ebꞌnaj iswiꞌehal sacerdote yebꞌ ebꞌnaj iswiꞌehal konhobꞌ,
kaw ok ebꞌnaj aqꞌokꞌule yinh Komam.
Yajaꞌ wal Komam xin maxhtikꞌa taqꞌwininoj.
13 Yuxin yal naj Pilato tet Komam:
—¿Tom mach chawabꞌe tzet chal ebꞌnaj tiꞌ tawinh?
xhi naj.
14 Yajaꞌ maxhtikꞌa taqꞌwi Komam tet naj Pilato tuꞌ,
yuxin kaw kꞌayilo iskꞌul naj yinh Komam.
Yet iskawxelaxiko kamikal yibꞌanh Komam Jesús
15 Yinh hunun qꞌinh Pascua chisbꞌejtzo naj gobernador tuꞌ hunun ebꞌnaj presowom,
yajaꞌ haꞌtikꞌa mak chal iskꞌul anma haꞌ chibꞌejtzolaxi.
16 Kꞌuxan xin ayko huneꞌ naj Barrabás isbꞌi yul preso,
kaw ohtabꞌil naj yu anma.
17 Yet kutxaniko anma tuꞌ isqꞌambꞌen naj Pilato tet anma:
—¿Mak cheyoche chinbꞌejtzohan,
tom naj Barrabás mato naj Jesús,
naj chal-lax Cristohal?
xhi naj.
18 Yal naj huneꞌ tuꞌ yuto yohta naj ta yu ayko ishowal ebꞌnaj iswiꞌehal sacerdote yinh Komam yuxin ilaxto Komam sata naj.
19 Yet ayikto naj Pilato yul iskapil tuꞌ,
yapni tzotiꞌ tet naj yu yixal hakaꞌ tiꞌ:
—Mach chawako habꞌa xol ebꞌnaj yinh huneꞌ naj machi ismul tuꞌ,
yuto hayet may aqꞌbꞌal ay huneꞌ inwayikan kaw xiwkilta yinh naj,
xhito ix tet naj.
20 Wal ebꞌnaj iswiꞌehal sacerdote yebꞌ ebꞌnaj ichamta winaj yul konhobꞌ tuꞌ,
ok ebꞌnaj aqꞌokꞌule tet anma ta chala ta chibꞌejtzolax naj Barrabás kat yaqꞌlax kamo Komam Jesús.
21 Isqꞌambꞌenpaxo naj gobernador tuꞌ tet anma:
—Yinh ebꞌnaj kawanh tiꞌ,
¿mak cheyoche chinbꞌejtzohan?
xhi naj.
Istaqꞌwi anma tuꞌ sunil:
—¡Naj Barrabás chabꞌejtzo!
xhi anma.
22 Isqꞌambꞌen naj:
—¿Tzet xin chiwutehan naj Jesús tiꞌ heyalni,
naj chihal-lax Cristohal tiꞌ?
xhi naj.
Istaqꞌwi anma sunil:
—Ahojabꞌ naj yinh kulus,
xhixanhe anma.
23 Isqꞌambꞌen naj Pilato tuꞌ:
—¿Tzet xin istxꞌojal iswatxꞌe naj?
xhi naj.
Yajaꞌ wal anma tuꞌ kaw ekꞌbꞌalto ah yaw,
yalni hakaꞌ tiꞌ:
—¡Kamojabꞌ naj yinh kulus!
xhixanhe anma.
24 Hayet yilni naj Pilato ta kaw ekꞌbꞌalto ah wejna anma,
matxa hunuxa tzet tzꞌaj yuteꞌ naj.
Isqꞌanniti naj ha haꞌ,
yok naj istxꞌahno isqꞌabꞌ yinh sat sunil anma yu isyenilo naj tato machi yok naj yinh iskamikal Komam Jesús.
Lahwi tuꞌ yalni naj:
—Mach wibꞌanhojan chitit iskamikal huneꞌ naj tiꞌ,
wal xin teyibꞌanh chitokanoj,
xhi naj.
25 Istaqꞌwi anma sunil:
—Waxanhka chiꞌok iskamikal naj tuꞌ komulojanh yebꞌ yibꞌanh juninalanh,
xhixanhe anma.
26 Hak tuꞌ yu isbꞌejtzon naj Pilato naj Barrabás,
ischejni naj hatelaxo Komam Jesús.
Lahwi tuꞌ yaniko naj Komam yul isqꞌabꞌ ebꞌnaj yu yalaxkanh yinh kulus.
27 Yinito ebꞌnaj soldado Komam Jesús bꞌey ispalacio naj gobernador tuꞌ.
Yet yapni Komam xin,
iskutxbꞌaniko isbꞌa ebꞌnaj soldado,
yok hoyno ebꞌnaj yinh Komam.
28 Yinilo ebꞌnaj xil isqꞌap Komam,
yaniko ebꞌnaj huneꞌ xilqꞌape kaj yinh Komam.
29 Isbꞌaqꞌonayo ebꞌnaj hunteqꞌan teꞌ txꞌix coronahil,
yahnato ebꞌnaj yinh iswiꞌ Komam.
Yanipaxiko ebꞌnaj huneꞌ te teꞌ yul isqꞌabꞌ Komam,
yichiko ebꞌnaj istzebꞌi yinh Komam,
chilaxin ay jahno ebꞌnaj sata Komam,
chalni ebꞌnaj:
—¡Tzalajonhwe yinh naj yahawil anma Israel tiꞌ!
xhi ebꞌnaj.
30 Istzubꞌlipaxiko ebꞌnaj yinh Komam,
yinilo ebꞌnaj te teꞌ ayko yul isqꞌabꞌ ismaqꞌniko ebꞌnaj teꞌ yinh iswiꞌ Komam.
31 Lahwi yetankano ebꞌnaj Komam,
yinilo ebꞌnaj huneꞌ xilqꞌape kaj yako ebꞌnaj yinh Komam tuꞌ,
yanipaxiko ebꞌnaj xil isqꞌap Komam.
Lahwi tuꞌ yinito ebꞌnaj Komam yu yalaxkanh yinh kulus.
Yet yalaxkanh Komam Jesús yinh kulus
32 Hayet lanhan yilaxto Komam bꞌay chiꞌalaxkanh yinh kulus,
istzabꞌnayo ebꞌnaj soldado huneꞌ naj ah Cirene,
Simón isbꞌi,
ischejniko ebꞌnaj naj yinoto iskulus Komam.
33 Hayet yapni ebꞌnaj bꞌey huneꞌ txꞌotxꞌ chiyij Gólgota,
chihal-laxpaxo Isbꞌajil Wiꞌe,
34 issomni ebꞌnaj vinagre yebꞌ hunteqꞌan teꞌ kꞌahla telaj,
yaqꞌni ebꞌnaj yukꞌuꞌ Komam.
Yajaꞌ yet yabꞌlen Komam matxa isje Komam yukꞌuꞌ.
35 Hayet ayxakanh Komam yinh kulus yu ebꞌnaj,
yok ebꞌnaj soldado tuꞌ yilweno isbꞌa yinh xil isqꞌap Komam yu ispohnikanh ebꞌnaj yinh.
Hak tuꞌ yu yijni isbꞌa tzet tzꞌibꞌnhebꞌilkano yu ischejabꞌ Komam Dios yet payat bꞌay chala:
«Ispohkanh ebꞌnaj xil inqꞌapan yinh,
yokpaxo ebꞌnaj yilweno isbꞌa mak kꞌul yinhbꞌal yinh xil inqꞌap tuꞌan,»b
xhihayoj.
36 Lahwi tuꞌ,
yok tzꞌonhno ebꞌnaj istanhen Komam.
37 Yaniko ebꞌnaj hayebꞌ tzꞌibꞌ yibꞌanh iswiꞌ Komam yinh teꞌ kulus tuꞌ bꞌay chala tzet yinh xin aqꞌlaxkamo Komam.
Haꞌ hunteqꞌan tzꞌibꞌ tuꞌ xhi hakaꞌ tiꞌ:
«Haꞌ naj tiꞌ Jesús Yahawil anma Israel,»
xhikoj.
38 Aypaxo kawanh ebꞌnaj elqꞌom alaxkanh yinh kulus yinta Komam.
Huneꞌ naj ah yinh iswatxꞌqꞌabꞌ Komam,
huneꞌxa naj xin ah yinh ismekqꞌabꞌ Komam.
39 Haꞌ makta chiꞌekꞌto bꞌey tuꞌ ok bꞌuchwal yinh Komam,
chisbꞌilen iswiꞌ,
40 chalni hakaꞌ tiꞌ:
«¡Hach tiꞌ,
hawala tato chawuchkꞌayo Yatut Komam Dios,
kat hawanikanh isselel yinh oxebꞌ tzꞌayik hawalni!
¡Yuxin kolayti habꞌa tato yel chawala Iskꞌahol Komam Dios hawehi!
¡Ayanhti yinh teꞌ kulus tuꞌ!»
xhi ebꞌnaj.
41 Hakpax tuꞌ ebꞌnaj iswiꞌehal yinh ebꞌnaj sacerdote yebꞌ ebꞌnaj kuywawom yinh isley yaꞌ Moisés yebꞌ ebꞌnaj ichamta winaj iswiꞌehal konhobꞌ tuꞌ,
ok ebꞌnaj bꞌuchwal yinh Komam,
chalni ebꞌnaj:
42 «Naj tiꞌ iskol naj anma,
wal naj xin mach chu iskolni isbꞌa.
Tato yeli haꞌ naj tiꞌ Jahawil hanhonh Israel honh tiꞌ,
jilaꞌ yinayti isbꞌa naj yinh kulus,
wal tuꞌ chijako janma yinh naj.
43 Chikawxi iskꞌul naj yinh Komam Dios yalni yuxin jilaꞌ yul Komam Dios kolwal yinh naj tato kaw yeli ochebꞌil naj yu Komam,
yuto chal naj tato Iskꞌahol Komam Dios ye naj,»
xhi ebꞌnaj.
44 Hakpax tuꞌ ebꞌnaj elqꞌom alaxkanh yinh kulus yinta Komam,
okpaxo ebꞌnaj bꞌuchwal yinh Komam.
Yet iskam Komam Jesús
45 Yet chumanil isqꞌejholilo yul sat yibꞌanhqꞌinal tiꞌ masanto yinh chꞌen oxebꞌ yinh qꞌejbꞌiyalil sajbꞌipaxiloj.
46 Yinh huneꞌ orahil tuꞌ ah yaw Komam Jesús yinh kaw ip,
yalni Komam:
«Elí,
Elí,
¿lama sabactani?»c
xhi Komam.
Chal yelapnoj:
«Hach inDiosal,
hach inDiosal,
¿tzet yinh xin chinhabꞌejkanojan?»
xhi.
47 Ay xin hunteqꞌan ebꞌnaj abꞌen huneꞌ tuꞌ,
yalni ebꞌnaj:
—Ham yaꞌ Elías,
ischejabꞌ Komam Dios chawte naj,
xhi ebꞌnaj.
48 Ay xin huneꞌ yetbꞌi ebꞌnaj to yinh anhe yinoti huneꞌ esponja,
islabꞌanayto naj xol pahla vinagre,
iskꞌalniko naj yinh iswiꞌ huneꞌ teꞌ ah,
yanahto naj yinh istiꞌ Komam.
49 Yajaꞌ kachlax naj yu hunteqꞌanxa ebꞌnaj hakaꞌ tiꞌ:
—Maxhtonhe bꞌela,
jilaꞌ tato chul yaꞌ Elías iskoloꞌ naj,
xhi ebꞌnaj.
50 Yahwipaxo Komam yinh kaw ip hunelxa,
lahwi tuꞌ xin iskamiloj.
51 Yinhnhena tuꞌ istzilmoyo qꞌap qꞌap aykanh yul yiktabꞌal Yatut Komam Dios,
kabꞌ ayiko qꞌap.
Ichiti istzilbꞌanil qꞌap yinh iswiꞌ,
yaykanilo yinh yojtabꞌanil.d
Yekꞌpaxo huneꞌ niman txixkabꞌ,
ispohto chꞌen nimeta chꞌen yu.
52 Ay xin ej chꞌen nhachꞌen bꞌay mujan kamom hajlohi;
txꞌiꞌal xin ebꞌnaj ayxako yul isqꞌabꞌ Komam Dios itzitzbꞌikanh.
53 Hato xin yet yitzitzbꞌikanh Komam Jesús yelti ebꞌnaj bꞌay mujan tuꞌ.
Lahwi tuꞌ isto ebꞌnaj yul konhobꞌ Jerusalén,
txꞌiꞌal mak xin ilni ebꞌnaj.
54 Hayet yabꞌen naj capitán yebꞌ issoldado chitanhen Komam huneꞌ txixkabꞌ tuꞌ kaw xiwkanh ebꞌnaj,
yebꞌ yet yilni ebꞌnaj sunil tzet yuhi,
yalni ebꞌnaj:
«Haꞌ huneꞌ naj makam tuꞌ,
yinh kaw yeli Iskꞌahol Komam Dios ye naj,»
xhi ebꞌnaj.
55 Ay xin hunteqꞌan ebꞌix tꞌanhanto yilni nahat yinh tzet chuhi.
Haꞌ ebꞌix tuꞌ tit yinta Komam bꞌey Galilea,
iskolwapaxo ebꞌix yinh Komam.
56 Xol ebꞌix ayko ix María ah Magdala,
yebꞌ ix María ismiꞌ naj Jacobo yebꞌ naj José,
yebꞌ xin ismiꞌ ebꞌyaꞌ iskꞌahol icham Zebedeo.
Yet ismujlax Komam Jesús
57 Ay huneꞌ naj kaw qꞌalom chiyij José,
ah konhobꞌ Arimatea.
Naj tuꞌ iskuywom Komam Jesús ye naj.
58 Haxa yinh qꞌejbꞌiyal xin,
isto naj iskꞌatanh naj Pilato,
yok naj isqꞌanni isnimanil Komam yu ismujni naj.
Hak tuꞌ yu ischejni naj Pilato ebꞌnaj issoldado yaqꞌno isnimanil Komam tet naj.
59 Lahwi ischahni naj isnimanil Komam tuꞌ,
ispichniko naj huneꞌ sábana kaw saj yinh isnimanil Komam.
60 Ay xin huneꞌ chꞌen niman chꞌen holbꞌil yu naj;
yet naj ye chꞌen,
kaw akꞌto chꞌen,
maxhto hunu kamom chiꞌalaxikto yul chꞌen,
haꞌ tuꞌ xin yakto naj isnimanil Komam.
Yanikaniko naj huneꞌ chꞌen niman chꞌen ismajiloj,
lahwi tuꞌ ispaxto naj.
61 Wal ix María ah Magdala yebꞌ huneꞌxa ix chiyij María,
kankano tzꞌonhno ebꞌix sata bꞌay mujlax Komam tuꞌ.
Alaxiko ebꞌnaj soldado istanheꞌ bꞌay mujlax Komam Jesús
62 Haxa yinh huneꞌxa tzꞌayik,
yet istzꞌayikal xewilal,
isto ebꞌnaj yahawil sacerdote yebꞌ ebꞌnaj fariseo yilaꞌ naj Pilato,
63 yalni ebꞌnaj tet naj:
—Mam jahaw,
chikonatijanh tato yet itzitzto huneꞌ naj leqꞌtiꞌ tuꞌ yal naj tato yinhxa yoxebꞌ tzꞌayik iskam naj kat yitzitzbꞌikanh naj hunelxa,
64 yuxin tinanh chikoqꞌananh tawet,
ato nino istanhemal bꞌay mujan naj,
masanto hekal yinh qꞌejbꞌiyal.
Ta mach xin apnita ebꞌnaj iskuywom naj kat yinito ebꞌnaj isnimanil naj,
kat yalni ebꞌnaj tet anma tato itzitzbꞌikanh naj xol kamom.
Yinh hakaꞌ tuꞌ ekꞌbꞌalto huneꞌ leqꞌtiꞌal tiꞌ sata huneꞌ leqꞌtiꞌal yako naj yet itzitzto naj,
xhi ebꞌnaj.
65 Istaqꞌwi naj Pilato tet ebꞌnaj:
—Kꞌultikꞌa,
iweto ebꞌnaj soldado teyintaj kat heto hekawxenokano bꞌay mujan naj hakaꞌ chal hekꞌul,
xhi naj.
66 Lahwi tuꞌ isto ebꞌnaj yebꞌ ebꞌnaj soldado.
Iskawxenkano ebꞌnaj bꞌay mujan Komam,
yanikaniko ebꞌnaj huneꞌ sello yinh chꞌen chꞌen ayko ismajilo chꞌen bꞌay mujan Komam.
Yanikaniko ebꞌnaj ebꞌnaj soldado istanhenoj.