Yet yilaxto Komam Jesús sata naj Pilato
15
Haxa yet issajbꞌilo xin iskutxbꞌan isbꞌa ebꞌnaj iswiꞌehal sacerdote yebꞌ ebꞌnaj ichamta winaj iswiꞌehal konhobꞌ yebꞌ ebꞌnaj kuywawom yinh isley yaꞌ Moisés,
yebꞌ ebꞌnaj iswiꞌehal yinh lahtiꞌ,
iskꞌalnayo ebꞌnaj Komam,
yinito ebꞌnaj Komam sata naj Pilato.
Marcos 15:1-32
—¿Tom yeli Yahawil anma Israel hawehi?
xhi naj.
Istaqꞌwi Komam:
—Hoꞌ,
yel hakaꞌ hawalni tiꞌ,
xhi Komam.
3 Yajaꞌ wal ebꞌnaj iswiꞌehal yinh ebꞌnaj sacerdote kaw ayko ebꞌnaj yalni txꞌiꞌal tzet ye tuꞌ ismulo Komam.
4 Yuxin isqꞌambꞌe naj Pilato tet Komam:
—¿Tzet yinh xin mach chaxhtaqꞌwi?
¿Tom mach chawabꞌe hanta tzet chisbꞌalkanh ebꞌnaj hamuluj?
xhi naj.
5 Wal Komam xin mach taqꞌwi Komam,
yuxin kaw kꞌayilo iskꞌul naj Pilato tuꞌ.
Yet iskawxelaxiko kamikal yibꞌanh Komam Jesús
6 Yinh hunun qꞌinh Pascua chitikꞌa isbꞌejtzo naj Pilato hunun ebꞌnaj presowom,
yajaꞌ maktikꞌa chal iskꞌul anma haꞌ chibꞌejtzolaxi.
7 Ay xin hunteqꞌan ebꞌnaj aniko howal yinh naj yahaw konhobꞌ,
aypaxo xin anma ispotxꞌ ebꞌnaj yuxin ayko ebꞌnaj preso.
Xol ebꞌnaj presowom tuꞌ ayko huneꞌ naj,
Barrabás isbꞌi.
8 Iskutxbꞌaniko isbꞌa anma,
yok anma isqꞌanno tet naj Pilato ta chisbꞌejtzo naj hunu naj presowom hakaꞌtikꞌa chute naj yinh hunun qꞌinh Pascua.
9 Istaqꞌwi naj tet anma tuꞌ:
—¿Chimisje hekꞌul chinbꞌejtzohan naj Yahawil Israel?
xhi naj.
10 Hak tuꞌ yute yalni naj,
yuto yohta naj ta tonhe chichiwako iskꞌul ebꞌnaj yahawil sacerdote tuꞌ yinh Komam,
yuxin yako ebꞌnaj Komam yul isqꞌabꞌ naj.
11 Wal ebꞌnaj yahaw sacerdote ok ebꞌnaj aqꞌokꞌule tet anma ta haꞌ naj Barrabás chisbꞌejtzo naj Pilato.
12 Isqꞌambꞌen naj Pilato tet anma:
—¿Tzet wal wutenan naj isreyal Israel tiꞌ,
chal tuꞌ?
xhi naj.
13 Istaqꞌwi anma tuꞌ:
—¡Kamojabꞌ naj yinh kulus!
xhixanhe anma.
14 Isqꞌambꞌen naj Pilato:
—¿Tzet xin istxꞌojal iswatxꞌe naj?
xhi naj.
Yajaꞌ ah wejna anma tuꞌ,
yalni hunelxa:
—¡Kamojabꞌ naj yinh kulus!
xhixanhe anma.
15 Wal naj Pilato,
yunhe istzala anma yinh naj yuxin isbꞌejtzo naj naj Barrabás.
Ischejni naj hatelaxo Komam,
yaniko naj Komam yul isqꞌabꞌ ebꞌnaj soldado yu yalaxkanh Komam yinh kulus.
16 Lahwi tuꞌ yinilto ebꞌnaj soldado Komam yamaqꞌil palacio,
iskutxbꞌanpaxiko ebꞌnaj hunteqꞌanxa ebꞌnaj soldado.
17 Ishukbꞌaniko ebꞌnaj huneꞌ qꞌap qꞌap kajmutzꞌmunhe yinh Komam.
Isbꞌaqꞌonayo ebꞌnaj huneꞌ teꞌ txꞌix,
yanahto ebꞌnaj coronahil yinh iswiꞌ Komam.
18 Yichiko ebꞌnaj yahwi yalni yinh kaw ip hakaꞌ tiꞌ:
—¡Tzalajonhwe yinh naj yahawil anma Israel tiꞌ!
xhi ebꞌnaj.
19 Chismaqꞌnipaxiko ebꞌnaj huneꞌ teꞌ ah yinh iswiꞌ Komam,
istzubꞌlipaxiko ebꞌnaj yinh,
yebꞌ xin chiꞌay jahno ebꞌnaj sata Komam,
kat yay xulno ebꞌnaj sat txꞌotxꞌ.
20 Lahwi istzebꞌikano ebꞌnaj yinh Komam,
yinilo ebꞌnaj huneꞌ qꞌap qꞌap ishukbꞌako yinh Komam,
yaniko ebꞌnaj xil isqꞌap Komam.
Lahwi tuꞌ yinito ebꞌnaj Komam yinh kulus.
Yet yalaxkanh Komam Jesús yinh kulus
21 Ay xin huneꞌ naj ah Cirene,
Simón isbꞌi,
ismam naj Alejandro yebꞌ naj Rufo,
ispeto xin naj munil.
Hayet yekꞌto naj sata ebꞌnaj iqꞌnhe Komam tuꞌ,
istzabꞌnayo ebꞌnaj naj,
yinito naj iskulus Komam.
22 Yinito ebꞌnaj Komam bꞌey huneꞌ txꞌotxꞌ chiyij Gólgota,
chaliloj Isbꞌajil Wiꞌe.
23 Yaqꞌni ebꞌnaj vino sombꞌil yebꞌ hunteqꞌan teꞌ telaj chiyij mirra yukꞌuꞌ Komam,
yajaꞌ mach isje Komam yukꞌuꞌ.
24 Lahwi tuꞌ yanikanh ebꞌnaj Komam yinh kulus,
yok ebꞌnaj soldado yilweno isbꞌa yinh xil isqꞌap Komam yunhe yilni ebꞌnaj mak chiꞌinitoj.
25 Yinh chꞌen bꞌalonhebꞌ yet yalanh chuman yanikanh ebꞌnaj Komam yinh kulus.
26 Ispahniko ebꞌnaj huneꞌ nichꞌan aqꞌinteꞌ yibꞌanh iswiꞌ Komam yinh kulus bꞌay tzꞌibꞌnhebꞌilikoj tzet yinh xin aqꞌlaxkamoj,
xhi hakaꞌ tiꞌ:
«Haꞌ naj tiꞌ Yahawil anma Israel,»
xhikoj.
27 Ay xin kawanh ebꞌnaj elqꞌom ah yinh kulus yinta Komam,
huneꞌ naj ah yinh iswatxꞌqꞌabꞌ Komam,
huneꞌxa naj yinh ismekqꞌabꞌ.
28 Hak tuꞌ yu yijni isbꞌa tzet tzꞌibꞌnhebꞌilkano bꞌay chala:
«Alaxiko naj xol ebꞌnaj kaw txꞌoj,»
xhihayoj.
29 Haꞌ xin anma chiꞌekꞌto bꞌay alaxkanh Komam yinh kulus,
chisbꞌile iswiꞌ kat isbꞌuchwa yinh Komam,
chalni hakaꞌ tiꞌ:
—Hach tiꞌ chawuchkꞌayo Yatut Komam Dios kat hawanikanh selel yinh oxebꞌ tzꞌayik hawalni,a
30 kolilo habꞌa yinh kulus tiꞌ,
kat hawaytij,
xhi ebꞌnaj.
31 Hakpax tuꞌ ebꞌnaj iswiꞌehal sacerdote yebꞌ ebꞌnaj kuywawom yinh isley yaꞌ Moisés,
ok ebꞌnaj yalaꞌ tet hunun:
—Txꞌiꞌal mak iskol naj,
wal naj xin mach chu iskolnilo isbꞌa naj.
32 Ta chiskolilo isbꞌa naj yinh kulus tiꞌ yinh kosat,
wal tuꞌ chimjayto yul janma ta haꞌ naj Cristo,
Yahawil Israel,
xhi ebꞌnaj.
Hakpax tuꞌ ebꞌnaj aykanh yinh kulus yinta Komam tuꞌ,
okpaxo ebꞌnaj bꞌuchwal yinh Komam.
Yet iskam Komam Jesús
33 Haxa yet yapni yinh chumanil isqꞌejholilo sat yibꞌanhqꞌinal tiꞌ,
yinhxa chꞌen oxebꞌ yinh qꞌejbꞌiyal issajbꞌilo hunelxa.
Marcos 15:33-47
—Eloi,
Eloi,
¿lama sabactani?b
xhi Komam.
Haꞌ chal yelapnoj:
“Mamin,
Mamin,
¿tzet yinh xin chinhabꞌejkanojan?”
xhi Komam.
35 Ay xin hunteqꞌan ebꞌnaj ayayo bꞌey tuꞌ abꞌen tzet yal Komam,
yalni ebꞌnaj:
—Abꞌewekꞌanabꞌ tzet chal naj,
lanhan yawten naj yaꞌ Elías,
ischejabꞌ Komam Dios,
xhi ebꞌnaj.
36 Isto huneꞌ naj yinh anhe islabꞌanayto huneꞌ esponja xol teꞌ pahla vinagre,
yaniko naj huneꞌ esponja tuꞌ yinh iswiꞌ huneꞌ teꞌ ah,
yanahto naj yinh istiꞌ Komam yunhe yukꞌni Komam.
Yalni naj tet ebꞌnaj ayko iskawilal tuꞌ:
—Jilaꞌwej ta chihul yaꞌ Elías yiqꞌalo naj yinh kulus tiꞌ,
xhi naj.
37 Lahwi tuꞌ yah yaw Komam yinh kaw ip,
iskamiloj.
38 Wal huneꞌ qꞌap niman qꞌap aykanh yiktabꞌanil Yatut Komam Dios,
kabꞌ ayiko qꞌap.
Ichiti istzilbꞌanil qꞌap yinh iswiꞌ masanta ayilo yinh yojtabꞌanil.c
39 Hayet yilni naj yahawil yinh ebꞌnaj soldado tzet yuhi yet iskam Komam tuꞌ,
yalni naj:
—Kaw yeltikꞌabꞌani,
Iskꞌahol Komam Dios ye huneꞌ naj tiꞌ,
xhi naj.
40 Ay xin hunteqꞌan ebꞌix ix nahat yehilo yilni iskam Komam.
Xol ebꞌix tuꞌ ayko ix María ah Magdala yebꞌ ix Salomé,d
yebꞌ xin ix María ismiꞌ naj José yebꞌ naj Jacobo,
naj tzujan unin.
41 Hunteqꞌan ebꞌix tuꞌ ekꞌ tzujtzun yinta Komam,
iskolwapaxo ebꞌix yinh Komam yet yekꞌ yul ismajul Galilea.
Yebꞌ txꞌiꞌal ebꞌix hul yinta Komam bꞌey Jerusalén.
Yet ismujlax Komam Jesús
42 Haꞌ yinh huneꞌ tzꞌayik tuꞌ xin chiswatxꞌekano anma Israel tzettaj chiꞌokniko yu yinh hunxa tzꞌayik,
yuto hunxa tzꞌayik tuꞌ,
tzꞌayik xewilal.
Haxa yet lanhanxa isqꞌejbꞌayoj xin,
43 isto naj José isqꞌanno isnimanil Komam tet naj Pilato;
kaw mach xiw naj isqꞌanni isnimanil Komam.
Naj José tuꞌ ah Arimatea naj,
ayko naj xol ebꞌnaj yahawil yinh lahtiꞌ xol ebꞌnaj Israel,
kaw xin ay yelapno naj yul sat ebꞌnaj.
Echmabꞌilpaxo yu naj yok Komam Dios Yahawiloj.
44 Hayet yabꞌen naj Pilato ta kam Komam,
kaw kꞌayilo iskꞌul naj,
yawten naj naj yahawil yinh ebꞌnaj soldado,
isqꞌambꞌen naj ta yeli kamnaxa Komam.
45 Hayet yalni naj yahawil yinh ebꞌnaj soldado ta xakam Komam,
ischejni naj Pilato ta chiyiyti naj José tuꞌ isnimanil Komam yinh kulus.
46 Isloqꞌni naj José huneꞌ qꞌap sábana kaw ay istohol,
yinayti naj isnimanil Komam yinh teꞌ kulus,
ispichniko naj huneꞌ sábana tuꞌ yinh Komam;
lahwi tuꞌ isto naj yanokto isnimanil Komam yul huneꞌ chꞌen chꞌen holbꞌil.
Yanikaniko naj huneꞌ chꞌen chꞌen ismajilo istiꞌ bꞌay yakanikto naj isnimanil Komam tuꞌ.
47 Wal ix María Magdalena yebꞌ ix María ismiꞌ naj José yil ebꞌix bꞌay alaxkanikto isnimanil Komam.