TZOTIꞌ KꞌUL YET KOLBꞌANILE TZꞌIBꞌNHEBꞌILKANO YU YAꞌ SAN LUCAS
Tzet yuxin chitzꞌibꞌnhelax carta tiꞌ
1
1-2 Tinanh xin,
chintzꞌibꞌnhetojan huneꞌ carta tiꞌ tawet mam Teófilo,
yinh hunteqꞌan tzet ye tuꞌ xayu koxol tiꞌ.
Haꞌ ebꞌyaꞌ chihalnikꞌo Istzotiꞌ Komam Jesucristo tinanh,
yil ebꞌyaꞌ yinh tzet yu yichikoj,
lahwi tuꞌ xin konhiskuynikanojanh ebꞌyaꞌ yinh sunil tzet xayu tuꞌ.
Kaw xin txꞌiꞌal mak xayako yinh iskꞌul istzꞌibꞌnhenkano tzet xayu tuꞌ.
3 Hakinpax tuꞌan mam Teófilo,
lahwi inqꞌambꞌenan yinh nanhkꞌulal yinh sunil kaw yichebꞌanil,
yok yinh innabꞌalan intzꞌibꞌnhentojan sunil tiꞌ yinh istxolal tawet.
4 Hak tuꞌ xin kaw kꞌul chu hawohtanheniloj ta yel chal hunteqꞌan tzet xahakuy tuꞌ.
El Comienzo
Yet yalni huneꞌ yángel Komam Dios ta chipitzkꞌa yaꞌ Juan
5 Hayet ayko naj Herodes yahawilo txꞌotxꞌ Judea,
ay hunmajan ebꞌyaꞌ sacerdote,
chiyij isbꞌi Abías.
Xol ebꞌyaꞌ tuꞌ ayko yaꞌ Zacarías,
Elisabet isbꞌi yixal,
yichmam ixnam ye yaꞌ Aarón.
6 Kaw kꞌul isbꞌeybꞌal yaꞌ Zacarías tuꞌ yebꞌ yixal yul sat Komam Dios,
yebꞌ xin kaw yijem iskawanhil yinh sunil ischejbꞌanil Komam.
Yuxin machi mak chu yalni tato mach yijemo yaꞌ yebꞌ yixal.
7 Wal ixnam Elisabet tuꞌ xin,
maxhtikꞌa yunin,
yuxin machi hunu yuninal yaꞌ Zacarías tuꞌ yebꞌ yixal yet yichambꞌikaniloj.
8 Haꞌ hunel xin,
ayilo istiempohal bꞌay ok yaꞌ Zacarías yinh ismunil yinh sacerdotehal yebꞌ ebꞌyaꞌ yetbꞌi yul Yatut Komam.
9 Yilwen ebꞌyaꞌ mak yinh chꞌok isbꞌi yokto isnhusno pom yibꞌanh ismexhahil bꞌay chinhuslax pom yul Yatut Komam hakaꞌtikꞌa chute ebꞌyaꞌ.
Kꞌuxan xin yibꞌanh yaꞌ Zacarías apni.
10 Yet lanhan isnhusni yaꞌ Zacarías pom tet Komam Dios yul Yatut Komam tuꞌ,
aykanilto sunil anma txahloj.
11 Hayet ayikto yaꞌ Zacarías isnhusno pom tuꞌ,
isyenikanh isbꞌa huneꞌ yángel Komam Dios tet yaꞌ,
yok linhno yinh iswatxꞌqꞌabꞌ ismexhahil bꞌay chinhuslax pom tuꞌ.
12 Yet yilni yaꞌ naj ángel tuꞌ,
isxiwkanh yaꞌ,
iskꞌaykanilo iskꞌul yaꞌ.
13 Yalni naj ángel:
—Mam Zacarías,
mach chaxhxiwkanh,
kaw mayabꞌe Komam Dios tzet maxawal yinh hatxah.
Yu huneꞌ tuꞌ xin,
chiyilaꞌ hawixal Elisabet yinh huneꞌ nichꞌan hakꞌahol,
Juan chawako isbꞌihoj.
14 Kaw chitzala hakꞌul yinh,
kaw niman anma chitzalapaxokanh yet chiyabꞌen ispitzkꞌa nichꞌan heyuninal tuꞌ.
15 Huneꞌ heyuninal chipitzkꞌa tuꞌ,
kaw aykano yelapno chꞌeliko yul sat Komam Dios.
Maxhtikꞌa chukꞌuꞌ vino nitam hunuxa nan ukꞌehal.
Ayxako Espíritu Santo yinh yet chipitzkꞌahi.
16 Kaw hanta ebꞌnaj israelita chiswatxꞌeꞌko isbꞌa yul isqꞌabꞌ Komam Dios yu huneꞌ hakꞌahol tuꞌ.
17 Haꞌ chibꞌabꞌito sata Komam Jahawil.a
Hakaꞌ ishelanil yebꞌ yip yanma yaꞌ Elías ischejabꞌ Komam Dios yet payat,
hak tuꞌ chꞌelikoj.
Yu kuybꞌanile chala chimeltzoko yanma ebꞌnaj mame yebꞌ ebꞌix miꞌe yinh aqꞌankꞌulal yebꞌ yuninal.
Yebꞌpaxo anma manhkꞌom chimeltzoko isnabꞌal kat isyijenpaxo tzet chal Komam Dios.
Hak tuꞌ chu iswatxꞌen isbꞌa anma,
kat ischahni Komam,
xhi naj ángel tuꞌ.
18 Istaqꞌwikanh yaꞌ Zacarías tuꞌ:
—¿Tzet xin chu wanaytojan yul wanmahan huneꞌ chawal tiꞌ?
Yuto hanintiꞌan kaw icham inxahan,
kaw xin ixnamxapaxo wixalan,
xhi yaꞌ.
19 Yalni naj ángel tuꞌ:
—Hanintiꞌan Gabriel hinan.
Haꞌ Komam Dios makinchejnitijan walnojan huneꞌ chejbꞌanile kaw kꞌul tiꞌ tawet.
20 Wal tinanh xin,
chimajikano hatiꞌ.
Matxa chiyu hatzoteli masanto yet chijni isbꞌa yapni istiempohal ispitzkꞌa nichꞌan hakꞌahol,
yuto machi maxawayto yul hawanma yinh tzet mawaltiꞌan,
xhi naj ángel tuꞌ tet yaꞌ Zacarías.
21 Wal anma chiꞌechman yelilo yaꞌ Zacarías tuꞌ xin,
kaw chikꞌay iskꞌul yuto kaw ekꞌ istiempo yaꞌ yul Yatut Komam Dios.
22 Haxa yet yelilo yaꞌ xol anma,
kaw matxa chu istzotel yaꞌ.
Isnahnilo anma tato ay hunu tzet isye Komam Dios tet yaꞌ.
Kaw toxanhe chisye yaꞌ yechel yu isqꞌabꞌ yinh tzet yelax tet,
wal istzotel yaꞌ,
matxa chuhi.
23 Hayet islahwi istiempohal ismunil yaꞌ yul Yatut Komam Dios,
ispaxto yaꞌ yatut.
24 Hayet isbꞌelwi istzꞌayikal tuꞌ xin ispitzkꞌati huneꞌ nichꞌan unin yinh ixnam Elisabet.
Howebꞌ ixahaw maxhtikꞌa bꞌay elto ixnam yul yatut.
Chistxumni ixnam hakaꞌ tiꞌ:
25 «Yu ishelanil Komam Dios yuxin hak tiꞌ wehan,
yunhe mach chiꞌel inpixanan yuto maxhtikꞌa hunu wuninan,»
xhi ixnam ischukil.
Yet yalni naj ángel ta chipitzkꞌa Komam Jesús
26 Wajebꞌxa ixahaw xin ischejniti Komam Dios naj ángel Gabriel bꞌey konhobꞌ Nazaret ayko yul ismajul Galilea.
Un ángel anuncia el nacimiento de Jesús (Lucas 1.26-38)
27 Yapni naj iskꞌatanh huneꞌ ix qꞌopo,
María isbꞌi.
Wal xin taqꞌwebꞌilxa mohyilal yu ix tet huneꞌ yaꞌ,
José isbꞌi,
yichmam yaꞌ ye yaꞌ rey David.
28 Hayet yokapno naj ángel yul nha bꞌay ay ix,
yalni naj tet ix:
—Tzalahanh yuto ayko Komam Dios hawetbꞌihoj.
Kaw niman iskꞌulchꞌanil Komam tawinh yuto sikꞌbꞌil hachilo xol hawet ixal,
xhi naj.
29 Hayet yabꞌen ix tzet yal naj tuꞌ xin,
iskꞌayilo iskꞌul ix,
yichiko ix istxumnilo hakaꞌ tiꞌ:
—María,
mach chaxhxiwkanh,
yuto xaꞌilcha iskꞌulal hawu yul sat Komam Dios.
31 Wal tinanh xin,
chipitzkꞌahoti huneꞌ nichꞌan winaj unin tawinh,
haxa yet chipitzkꞌahi Jesús chawako isbꞌihoj.
32 Kaw ay yelapno chꞌelikoj,
kat xin yalni anma ta Iskꞌahol Komam Dios yehi.
Haꞌ Iskꞌahol Komam Dios Jahawil tuꞌ chiꞌoko reyalil,
hakaꞌ yichmam David.
33 Haꞌ chiꞌok yahawilo anma Israel yinh sunilbꞌal tiempo.
Machi bꞌaqꞌinhal chilahwi huneꞌ ismunil tuꞌ,
xhi naj.
34 Isqꞌambꞌen yaꞌ María tet naj:
—¿Tzet chu yijno isbꞌa huneꞌ chawal tiꞌ?
Hanintiꞌan maxhto wichamilan,
xhi yaꞌ tet naj.
35 Yalni naj ángel tuꞌ:
—Haꞌ Komam Espíritu Santo chiꞌayolo tawibꞌanh,
yebꞌpaxo yip Komam Dios kaw ay ismay chiꞌayilo tawibꞌanh hakaꞌ hunu moyan.
Yuxin haꞌ huneꞌ unin chipitzkꞌa tawinh tuꞌ,
yet Dios yehi kat yal-laxpaxoj ta Iskꞌahol Komam.
36 Hakaꞌ ixnam Elisabet hanoh,
kaw ixnamxa,
yajaꞌ chiyilaꞌ ixnam yinh huneꞌ nichꞌan yunin.
Wal xin ohtabꞌil tato maxhtikꞌa hunu unin xapitzkꞌati yinh ixnam,
yaj wal tinanh wajebꞌxa ixahaw iskꞌul ixnam.
37 Wal xin machi hunu tzet ye tuꞌ mach chu iswatxꞌen Komam Dios,
xhi naj ángel tet yaꞌ.
38 Istaqꞌwikanh yaꞌ María xin:
—Hanintiꞌan ischejabꞌ Komam Dios Jahawil wehan,
yubꞌojabꞌ hakaꞌ maxawal tiꞌ,
xhi yaꞌ.
Lahwi tuꞌ xin,
ismeltzoto naj ángel.
Yet istuklelax ixnam Elisabet yu yaꞌ María
39 Yinh huneꞌ tiempohal tuꞌ xin,
yinh haꞌmataj to yaꞌ María bꞌey huneꞌ konhobꞌ chewal txꞌotxꞌ yul ismajul Judea.
40 Yapni yaꞌ bꞌey yatut icham Zacarías,
isqꞌambꞌen yaꞌ hanikꞌ ye ixnam Elisabet.
41 Hayet yabꞌen ixnam Elisabet istzotel yaꞌ María tuꞌ,
isbꞌili nichꞌan unin ijbꞌiliko yu ixnam.
Hak tuꞌ yu yokkano ixnam yalanh yip Komam Espíritu Santo.
42 Yuxinto yal ixnam hakaꞌ tiꞌ yinh kaw ip:
—Hach tiꞌ María,
kaw niman iskꞌulal Komam Dios chaqꞌ tawet sata sunil ebꞌix jet ixal.
Nimanpaxo iskꞌulal Komam chaqꞌ tet huneꞌ hawunin chipitzkꞌaho tiꞌ.
43 ¿Tzet kaw yelapno wehan yuxin mahul ismiꞌ Komam Wahawilan kinistukleꞌan?
44 Yet mawabꞌenan hatzotelkanh mabꞌili nichꞌan unin tiꞌ winhan yu tzalahilal.
45 Saqꞌal hawet yuto hawayto yul hawanma ta chij isbꞌa tzet yal Komam Dios,
xhi ixnam Elisabet.
46 «Lahwi tuꞌ xin,
yalni yaꞌ María:
Kaw chitzala wanmahan chiwalnihan kꞌul-la tzotiꞌ yinh Komam Dios Jahawil,
Komam kaw aykano yip.
47 Kaw chitzalakano wanmahan yinh Komam Dios Inkolomalan.
48 Waxanhka mach nimano welapnojan,
yajaꞌ Komam Dios chꞌanayo iskꞌulal wibꞌanhan.
Yuxin chiyalaꞌ anma yinh sunilbꞌal tiempo ta kaw saqꞌal wetan yu ayayo iskꞌulal Komam wibꞌanhan.
49 Yuto haꞌ Komam Dios,
kaw aykano yip,
chiyenilo kꞌaybꞌalkꞌule winhan.
Kaw niman yelapno isbꞌi Komam,
kaw machi nichꞌano istxꞌojal ayko yinh.
50 Sunilbꞌal tiempo chitzꞌay iskꞌul Komam yinh sunil mak chixiw tet.
51 Isyelo Komam yip,
yuchkꞌanto Komam sunil tzet iswatxꞌe ebꞌnaj chal isbꞌa kanhyehal.
52 Xaꞌel ebꞌnaj yahaw konhobꞌ yul iskapil yu Komam,
haxa ebꞌnaj chewchotanhe chute isbꞌa,
yikanh Komam.
53 Xayaqꞌ noho Komam iskꞌul ebꞌnaj chinhohchahi,
haxa ebꞌnaj qꞌalom xin,
okkano ebꞌnaj yinh manhtzetal.
54 Xaꞌok Komam jetbꞌiho hanhonh Israel honh tiꞌ,
hanhonh ischejabꞌ Komam jehi,
maxhtikꞌa to nahul yu Komam,
istzꞌay iskꞌul jinh.
55 Hak tuꞌ yu yalnikano Komam tet ebꞌyaꞌ jichmam;
tet yaꞌ Abraham,
yebꞌ xin tet hunteqꞌanxa ebꞌyaꞌ ichmame titna yinh yaꞌ,»b
xhi yaꞌ María.
56 Etza oxebꞌ ixahaw bꞌeykꞌo yaꞌ María iskꞌatanh ixnam Elisabet,
ismeltzoto yaꞌ bꞌey yatut hunelxa.
Yet ispitzkꞌa yaꞌ Juan chꞌanikanh haꞌ iswiꞌ anma
57 Hayet yapni istiempohal,
ispitzkꞌa nichꞌan iswinaj unin ixnam Elisabet,
58 yapni ebꞌix ay iskawilal yatut ixnam yebꞌ yikꞌal ixnam tzalaho yinh iskꞌulchꞌanil iskꞌul Komam Dios yaqꞌ tet ixnam.
59 Yinh iswaxajebꞌ tzꞌayik xin,
yaqꞌlax circuncidarc nichꞌan tzꞌul tuꞌ,
yalni anma ta Zacarías chij isbꞌi hakaꞌ isbꞌi ismam.
60 Yalni ixnam miꞌe tuꞌ tet anma:
—Machoj,
Juan chiyij isbꞌi,
xhi ixnam.
61 Yalni anma tet ixnam:
—¿Tzet yuxin hak tuꞌ cheyaqꞌ yijaꞌ isbꞌi?
Wal xol heyikꞌal machi hunu mak hak tuꞌ isbꞌi,
xhi anma.
62 Yuxin ekꞌikꞌo isqꞌabꞌ anma isqꞌambꞌen tet icham Zacarías yinh tzet bꞌiꞌehal chiyaqꞌ yijaꞌ iskꞌahol.
63 Isqꞌanni icham huneꞌ nichꞌan aqꞌinteꞌ,
istzꞌibꞌnhenayo icham hakaꞌ tiꞌ:
«Juan chiyij isbꞌi huneꞌ nichꞌan unin tiꞌ,»
xhihayoj.
Toxanhe kꞌaykanokanh iskꞌul sunil anma yet yabꞌeni.
64 Lanhantotikꞌa xin istzotelkanh icham Zacarías,
yichi yalni icham kꞌul-la tzotiꞌ yinh Komam Dios.
65 Iskꞌayilo iskꞌul sunil anma ayayo iskawilal yatut icham,
ispujbꞌalaxikꞌo huneꞌ tiꞌ bꞌey sunil chewal txꞌotxꞌ yul ismajul Judea.
66 Sunil anma abꞌen hunteqꞌan tiꞌ chilaisqꞌambꞌen tet hunun:
«¿Tzettaxka kaw chꞌeloko huneꞌ nichꞌan unin tiꞌ?»
xhi anma.
Hak tuꞌ yute yalni anma yuto ayko Komam Dios yetbꞌiho nichꞌan unin tuꞌ.
Hunteqꞌan tzotiꞌ yaqꞌ Komam Dios yalaꞌ icham Zacarías
67 Wal icham Zacarías,
ismam nichꞌan unin tuꞌ,
ok icham yalanh yip Komam Espíritu Santo,
yalni tzotiꞌ hakaꞌ tiꞌ:
68 «Hal-laxojabꞌ tzotiꞌ kꞌul yinh Komam,
Komam koDiosal hanhonh Israel honh tiꞌ,
yuto xahul Komam konhiskoloꞌ hanhonh iskonhobꞌonh tiꞌ.
69 Yati Komam Dios huneꞌ Kokolomal kaw aykano yip,
huneꞌ Kokolomal tiꞌ titna yinh yuninal jichmam rey David,
yaꞌ ischejabꞌ Komam.
70 Huneꞌ tiꞌ halbꞌilkano yu Komam Dios tet ebꞌyaꞌ ischejabꞌ sikꞌbꞌililo yu yet payat:
71 Chonhiskolilo Komam tet makta ayko ishowal jinh yebꞌ xin makta chichiwa iskꞌul jinh.
72 Yalnipaxoj ta chitzꞌay iskꞌul Komam yinh ebꞌyaꞌ jichmam,
yebꞌ maxhtikꞌa chito nahul yu isyijen istrato yaqꞌkano tet ebꞌyaꞌ,
huneꞌ trato yetnhe Komam.
73 Haꞌ huneꞌ tiꞌ halbꞌilkano yu Komam Dios tet jichmam Abraham yettax payat.
74 Yal Komam ta chonhiskolilo yul isqꞌabꞌ ebꞌnaj chichiwako iskꞌul jinh,
haxinwal mach chonhxiw jaqꞌni chejaꞌ kobꞌa tet Komam Dios.
75 Kꞌulojabꞌ chijute kobꞌeybꞌal sata Komam,
hanhehojabꞌ yinh Komam ayko konabꞌal sunilbꞌal tiempo.
76 Wal hach tiꞌ kꞌahol,
chaxhok ischejabꞌo Komam Dios kaw ay yip,
yuto hach bꞌabꞌel chaxhto sata Komam Jahawil.d
Yu hawatxꞌen isbꞌeh Komam,
haꞌ ton hakuyni yaniko anma isnabꞌal yinh Komam Dios.
77 Hach chawaqꞌa yabꞌe anma yinh tzet chu ischahni iskolbꞌanil yet chꞌaqꞌlaxkano tanho ismul yu Komam.
78 Yu kaw chitzꞌay iskꞌul Komam Dios jinh,
yuxin hakaꞌ yahilo tzꞌayik,
kat komujli yu,
hak tuꞌ chu yul huneꞌ Kokolomal chejbꞌilti yu Komam.
79 Yu yiniti issajilqꞌinal jet hanhonh ayiko qꞌejholo yinh janma,
yebꞌ hanhonh ayonhxako yul isqꞌabꞌ naj kamikal.
Haꞌ xin chonhijbꞌan konhyaniko yinh aqꞌankꞌulal yebꞌ Komam Dios,»
xhi icham Zacarías.
80 Wal nichꞌan unin tuꞌ xin,
hakaꞌtikꞌa ischꞌibꞌ isnimanil,
hakpax tuꞌ ischꞌibꞌ yitzꞌatil iswiꞌ yinh Komam Dios.
Haxa yet istzehbꞌikanh,
isto bꞌey huneꞌ txꞌotxꞌ desierto,
haꞌ tuꞌ ehayoj masanto apni istiempohal yaqꞌni yohtanhelo isbꞌa tet konhobꞌ Israel.