Yet ispitzkꞌa Komam Jesús
2
Haꞌ yinh huneꞌ tiempohal tuꞌ,
yalni naj Augusto César,
yahawil yeko yinh txꞌotxꞌ Roma,
ta chiꞌilaxkanh isbꞌisil sunil anma ayko yalanh yip txꞌotxꞌ Roma.
2 Hayet yah huneꞌ bꞌabꞌel isbꞌisil anma tiꞌ haꞌ naj Cirenio ayko gobernadoral yul ismajul Siria.
3 Sunil anma to istzꞌunuꞌ isbꞌi bꞌaytajtuꞌwal konhobꞌ titna yikꞌal.
4 Yuxinto el yaꞌ José bꞌey yul konhobꞌ Nazaret yul ismajul Galilea,
isto yaꞌ bꞌey Belén yul ismajul Judea,
yuto haꞌ tuꞌ pitzkꞌana yaꞌ rey David,
yichmam yaꞌ José tuꞌ.
5 Yuxin to yaꞌ José yebꞌ yaꞌ María,
yaꞌ taqꞌwebꞌilxa ismohyi yebꞌ yaꞌ,
istzꞌunuꞌ isbꞌi bꞌey konhobꞌ Belén.
Wal yaꞌ María tuꞌ,
ayxa tzet ye yaꞌ.
6 Hayet ay yaꞌ José yebꞌ yaꞌ María bꞌey Belén,
yayilo istzꞌayikal iswatxꞌi iskꞌul yaꞌ María.
7 Yuxin hata bꞌey tuꞌ pitzkꞌa nichꞌan isbꞌabꞌel unin yaꞌ.
Ispichniko yaꞌ istxow nichꞌan yunin tuꞌ,
ishilbꞌanayto yaꞌ yul ishukubꞌ no noqꞌ,
yuto matxa hamanil yul waybꞌal.
Yet isyeni isbꞌa ebꞌnaj yángel Komam Dios tet ebꞌnaj tanhem meꞌ
8 Bꞌey iskawilal konhobꞌ Belén,
ay hunteqꞌan ebꞌnaj tanhem meꞌ;
chiwaynhen ismeꞌ sat cheqꞌanh.
9 Isyenikanh isbꞌa huneꞌ ángel tet ebꞌnaj.
Yaypaxo jopla isqꞌaqꞌal yip Komam Dios yibꞌanh ebꞌnaj,
isxiwkanokanh ebꞌnaj xin.
10 Yalni naj ángel tet ebꞌnaj:
—Mach chexxiwi yuto ay huneꞌ tzotiꞌ kaw kꞌul chinhulan walaꞌan teyet.
Haꞌ huneꞌ chiwaltiꞌan istzalabꞌal hekꞌul yebꞌ istzalabꞌal sunil anma.
11 Bꞌey yul konhobꞌ Belén,
iskonhobꞌ yaꞌ rey David,
haꞌ tuꞌ mapitzkꞌa huneꞌ Hekolomal,
haꞌ ton Komam Cristo,
Komam Jahawil.
12 Haꞌ tiꞌ chꞌaqꞌno hetxumuloj,
pichbꞌiliko istxow yinh,
hilanayto yul teꞌ hukubꞌ bꞌay chꞌalaxayto istelaj no noqꞌ,
xhi naj tet ebꞌnaj.
13 Lanhantotikꞌa xin,
isyenikanh isbꞌa hun bꞌulanxa ebꞌnaj ángel iskꞌatanh naj bꞌabꞌel tuꞌ.
Istzabꞌniko ebꞌnaj isbꞌitnhen isbꞌi Komam,
chilayalni ebꞌnaj:
14 «Jalaꞌwe kꞌul-la tzotiꞌ yinh Komam Dios ay yul satkanh,
ayojabꞌ aqꞌankꞌulal sat txꞌo txꞌotxꞌ xol anma ochebꞌil yu Komam Dios,»
xhi ebꞌnaj.
15 Hayet ispaxto ebꞌnaj ángel tuꞌ satkanh,
yichiko ebꞌnaj tanhem meꞌ yalni tet hunun:
—Tonhwe bꞌey Belén jilaꞌ huneꞌ mayu tuꞌ,
huneꞌ mayaqꞌ Komam Dios Jahawil johtanhelo tiꞌ,
xhile ebꞌnaj tet hunun.
16 Yinh anhe xin,
to ebꞌnaj yilaꞌ.
Hayet yapni ebꞌnaj xin,
yilchayo yaꞌ María yebꞌ yaꞌ José,
yebꞌ nichꞌan neneꞌ ayayto yul ishukubꞌ no noqꞌ.
17 Yet yilniko ebꞌnaj yinh nichꞌan neneꞌ tuꞌ xin,
istzabꞌloko yalni ebꞌnaj tet sunil anma tzet hal-lax tet ebꞌnaj yu naj ángel yinh huneꞌ nichꞌan neneꞌ tuꞌ.
18 Sunil anma abꞌen hunteqꞌan yal ebꞌnaj tanhem meꞌ tuꞌ,
kaw kꞌaykanokanh iskꞌul yabꞌeni.
19 Wal yaꞌ María xin,
tonhe iskꞌubꞌakano yaꞌ yul yanma yinh hunteqꞌan tzet yal ebꞌnaj,
chilaekꞌ yinh isnabꞌal yaꞌ yinh tzet kaw yehi.
20 Wal ebꞌnaj tanhem meꞌ,
hayet ispaxto ebꞌnaj yichiko ebꞌnaj yaniko ismay Komam Dios,
yaqꞌnipaxo ebꞌnaj yuchꞌandiosal tet Komam yinh tzet yabꞌeꞌ ebꞌnaj,
yebꞌ xin yu tzet bꞌey ebꞌnaj yilaꞌ,
yuto hakaꞌtikꞌa yu yal-lax tet ebꞌnaj hak tuꞌ elikoj.
Nacimiento de Jesús
Yet yilaxto nichꞌan Jesús yelaxo yul Yatut Komam Dios
21 Hujebꞌxa tzꞌayik ispitzkꞌa nichꞌan Jesús tuꞌ,
yaqꞌlax circuncidar.
Jesús yijkano isbꞌi hakaꞌ yu yalnikano naj ángel tet yaꞌ yet maxhto chipitzkꞌati nichꞌan unin yinh yaꞌ.
22 Yet yayilo istzꞌayikal bꞌay chisajnhe isbꞌa ebꞌix hakaꞌ yalni isley yaꞌ Moisés,
yinito yaꞌ José yebꞌ yaꞌ María nichꞌan neneꞌ tuꞌ yelaxo tet Komam Dios bꞌey Jerusalén.
23 Isyije ebꞌyaꞌ hakaꞌ tuꞌ yuto tzꞌibꞌnhebꞌilkano yul Yum Komam Dios hakaꞌ tiꞌ:
«Haꞌ nixhte winaj unin chibꞌabꞌel pitzkꞌahi,
chiꞌaqꞌlax tet Komam Dios Jahawil,»a
xhi yul Yum Komam.
24 Yinito ebꞌyaꞌ isxahanbꞌal hakaꞌ yalni isley yaꞌ Moisés bꞌay chala:
«Kaw yilal yaqꞌni kakꞌonh noꞌ palamuch maka kakꞌonho noꞌ yunin kuwis,»
xhihayoj.
25 Yul konhobꞌ Jerusalén,
yinh huneꞌ tiempohal tuꞌ,
ay huneꞌ icham Simeón isbꞌi,
kaw kꞌulkano isbꞌeybꞌal,
hanhechꞌan tet Komam Dios bꞌay chiyiyo isbꞌa.
Echmabꞌilnhetikꞌa yul Iskolomal konhobꞌ Israel yu icham.
Ayko Komam Espíritu Santo yinh icham.
26 Haꞌ chꞌaqꞌni nachaholo yu tato maxhto chikami masanto chiyiliko yinh Komam Cristo,
Komam chejbꞌilti yu Komam Dios.
27 Ayxakto icham Simeón tuꞌ yul Yatut Komam Dios yu Komam Espíritu Santo yet yapni yaꞌ José yebꞌ yaꞌ María yebꞌ nichꞌan Jesús.
Apni iskawanhil yul Yatut Komam tuꞌ yu isyijen tzet tzꞌibꞌnhebꞌilkano yinh ischejbꞌanil ebꞌnaj Israel yu Komam Dios.
28 Ischelnilo icham Simeón nichꞌan neneꞌ tuꞌ,
yalni icham kꞌul-la tzotiꞌ tet Komam Dios hakaꞌ tiꞌ:
29 «Mamin,
hachejabꞌ wehan.
Wal tinanh xin,
xayu inkaman yuto mayij isbꞌa tzet halbꞌilkano hawu wetan.
30 Yuto mawilikojan yu insatan yinh koKolomalanh tiꞌ.
31 Haꞌ huneꞌ mak tiꞌ chawakaniko yinh sat sunil anma ay yul sat yibꞌanhqꞌinal tiꞌ.
32 Haꞌ xin chꞌaqꞌno sajbꞌolo yanma hanta anma mach Israeloj,
kat xin isbꞌinahokano konhobꞌ Israel yu Kokolomalanh tiꞌ,»
xhi icham Simeón tet Komam Dios.
33 Kaw xin,
kꞌaykanh iskꞌul yaꞌ José yebꞌ yaꞌ María yabꞌen sunil tzet yal icham Simeón yinh nichꞌan neneꞌ tuꞌ.
34 Lahwi tuꞌ xin,
isqꞌannikano icham iskꞌulal Komam Dios yibꞌanh.
Yalni icham tet yaꞌ María:
—Naj nichꞌan tiꞌ kaw ixtanhxa yehi ta kaw hantanhe anma Israel chikꞌayoꞌto yanma yu naj,
yaj kaw ixtanhxa yepaxo tato kaw hantanhe anma Israel chiswatxꞌeꞌpaxo isbꞌeybꞌal yu naj.
Haꞌ naj chiyenolo tzet chiyubꞌ iskolchaho anma xol istxꞌojal,
yaj xin kaw ay anma chiyahno naj.
35 Hak tuꞌ xin chu yixtanhwikanilo tzet chꞌekꞌ yul isnabꞌal anma yebꞌ tzet chꞌekꞌ yul yanma anma.
Wal hach hach tiꞌ,
chꞌayolo huneꞌ tzꞌayik yet kaw chiꞌoko bꞌiskꞌulal yinh hawanma yu naj neneꞌ tiꞌ.
Hakaꞌ isyaꞌil chispolto hunu chꞌen espada,
hak tuꞌ isyaꞌil chꞌeliko hawanma,
xhikano icham Simeón tet yaꞌ María.
36 Bꞌey yul Yatut Komam Dios tuꞌ xin,
haꞌ tuꞌ ayikto huneꞌ ixnam chitzotel yu yip Komam Dios.
Huneꞌ ixnam tuꞌ,
Ana isbꞌi,
iskutzꞌin yaꞌ Fanuel,
titna yinh yuninal yaꞌ Aser.
Yet qꞌopo ixnam yiqꞌni ixnam yichamil,
yaj hujebꞌchꞌan habꞌil yiqꞌle isbꞌa naj yebꞌ ix,
iskam naj.
37 Kaw xin 84 (kanhebꞌ ishokꞌal) habꞌilxa iskankano ixnam hunixal.
Tzꞌayik aqꞌbꞌal aynhetikꞌakto ixnam yul Yatut Komam Dios yu istxahli yebꞌ yu yinayo isbꞌa tet Komam.
Kaw xin chisyijepaxo ixnam huneꞌ yet mach chonhwaꞌi yu kotxahli tet Komam.
38 Yapni ixnam iskꞌatanh yaꞌ José yebꞌ yaꞌ María,
yaqꞌni ixnam yuchꞌandiosal tet Komam Dios.
Lahwi tuꞌ xin,
istzabꞌloko yalnikꞌo ixnam kuybꞌanil yinh nichꞌan neneꞌ tuꞌ tet sunil anma chꞌechman yul iskolbꞌanil konhobꞌ Jerusalén.
Meltzoto yaꞌ María yebꞌ yaꞌ José bꞌey konhobꞌ Nazaret
39 Hayet lahwi isyijenkano yaꞌ José yebꞌ yaꞌ María yinh tzet chal ischejbꞌanil ebꞌnaj Israel yu Komam Dios,
ispaxto ebꞌyaꞌ bꞌey iskonhobꞌ Nazaret yul ismajul Galilea.
40 Wal nichꞌan unin tuꞌ xin,
kaw saqꞌal ischꞌibꞌi,
kaw chꞌokpaxo yip isnimanil yebꞌ yitzꞌatil iswiꞌ.
Kaw xin ayayo iskꞌulchꞌanil iskꞌul Komam yibꞌanh.
Yet iskankano nichꞌan Jesús yul Yatut Komam Dios
41 Hunun habꞌil isbꞌeykꞌo ismam ismiꞌ nichꞌan Jesús yul Yatut Komam Dios bꞌey konhobꞌ Jerusalén yinh qꞌinh Pascua.
42 Haxa yet istzꞌajna nichꞌan Jesús yinh 12 (iskabꞌlahonhebꞌ) habꞌil,
isto yinta ismam yebꞌ ismiꞌ yinh qꞌinh hakaꞌ chu isbꞌeykꞌo anma yinh hunun habꞌil.
43 Lahwinhe qꞌinh tuꞌ xin,
ismeltzoto yaꞌ José yebꞌ yaꞌ María.
Wal nichꞌan Jesús,
kankano bꞌey yul konhobꞌ Jerusalén,
yajaꞌ mach yohtajo ismam yebꞌ ismiꞌ nichꞌan tuꞌ tato kankanoj.
44 Haꞌ yalni ismam yebꞌ ismiꞌ ta paxto xol anma ilom qꞌinh.
Huneꞌ tzꞌayikxa isbꞌelwito ismam yebꞌ ismiꞌ nichꞌan Jesús tuꞌ,
yok ismam yebꞌ ismiꞌ issaynoyo xol yikꞌal yebꞌ xol mak ohtanhe nichꞌan Jesús tuꞌ.
45 Yajaꞌ maxhtikꞌa ilchahi,
yuxin meltzoto yaꞌ José yebꞌ yaꞌ María saywal yinh nichꞌan Jesús tuꞌ bꞌey yul konhobꞌ Jerusalén.
46 Haxa yet yox tzꞌayik xin,
yilchati nichꞌan Jesús tuꞌ yul Yatut Komam Dios yu ismam yebꞌ ismiꞌ.
Tzꞌonhanikto xol ebꞌnaj ichamta winaj kaw yahawil yinh iskuyni anma yinh isley yaꞌ Moisés.
Kaw ayko nichꞌan Jesús tuꞌ yabꞌen tzet chal ebꞌnaj,
chisqꞌambꞌenpaxo tet ebꞌnaj.
47 Wal xin,
kaw chikꞌay iskꞌul ebꞌnaj chiꞌabꞌen tzet chiyal nichꞌan Jesús tuꞌ yuto kaw helan,
yebꞌ xin kaw kꞌul ispaj istzotiꞌ ebꞌnaj chiyaqꞌa.
48 Haxa yet yilcha nichꞌan Jesús tuꞌ yu ismam yebꞌ ismiꞌ,
kaw kꞌayilo iskꞌul.
Yalni ismiꞌ tet:
—Wunin,
¿tzet yinh yuxinto hak tiꞌ chonhhawutehanh?
Haninan yebꞌ hamam kaw bꞌiskꞌulal jehanh kaxhkosaynikꞌojanh,
xhi yaꞌ.
49 Istaqꞌwikanh nichꞌan Jesús tuꞌ:
—¿Tzet yinh nan bꞌay chinhesayikꞌojan?
¿Tom mach heyohtajo tato yul Yatut Inmaman kaw yilal inkanan?
xhi tet ismiꞌ tuꞌ.
50 Wal xin machi txumchalo yu ismam yebꞌ ismiꞌ yinh tzet chalilo huneꞌ yal nichꞌan Jesús tuꞌ.
51 Lahwi tuꞌ xin,
ismeltzo yinta ismam yebꞌ ismiꞌ bꞌey yul konhobꞌ Nazaret.
Kaw xin yijem tet ismam yebꞌ tet ismiꞌ.
Tonhe xin iskꞌubꞌa ismiꞌ nichꞌan Jesús tuꞌ yinh yanma yinh hunteqꞌan tuꞌ,
chistxumni ix yinh tzet yelapno yehi.
52 Wal nichꞌan Jesús tuꞌ xin,
hakaꞌ ischꞌibꞌ isnimanil,
hak tuꞌ ischꞌibꞌpaxo yitzꞌatil iswiꞌ.
Kaw chitzala yanma Komam Dios yinh,
kaw chitzalapaxo anma yinh nichꞌan Jesús tuꞌ.
La Niñez de Jesús.